01/09/2025
په ډېره خواشینۍ چې بیګا شپه په کونړ، ننګرهار او لغمان کې سختې زلزلې وشوې او زموږ ګڼ شمېر هېوادوال یې متاثره کړل. موږ د ټولو قربانیانو له کورنیو سره ژوره غمشریکي ښايو.
له تاسې مې غوښتنه ده:
هڅه وکړئ، په دې سختو حالاتو کې له ماشومانو او سپین ږیرو سره مهربانه او ډاډ ورکوونکی چلند وکړئ، هغوی ته ووایاست چې تاسې ورسره یاست.
هڅه وکړئ، د کورنۍ غړيو ته د يو ځای راټولېدو سپارښتنه وکړئ، تر څو د بېلتون د وېرې احساس يې کم شي.
هڅه وکړئ، زلزله ځپلو کسانو ته يو مناسب چاپيريال اماده کړئ او که شوني وي د پيښې له چاپيرياله يې يو بل خوندي ځای ته ورسوئ.
هڅه وکړئ، په دې وختونو کې منفي اوازې یا وېروونکي مالومات مه خپروئ.
او که هلته زيانمن شوي کسان اوس هم د سختې اندېښنې، وېرې او خپګان نښې لري، د اروايي او طبي مرستو ټيمونه دې د هغوی په حالات ښه کولو کې ونډه واخلي. که شوني وي تاسې هملته لاړ شئ او د ډاډ په ورکولو يې زړونه ارامه کړئ.
