Ağciyər Xəstəlikləri Mərkəzi

13/02/2026

Ağciyər Xəstəlikləri Mərkəzinin tabeliyində fəaliyyət göstərən Yevlax Regional Xəstəxanasının açılışı olub

Ağciyər Xəstəlikləri Mərkəzinin tabeliyində fəaliyyət göstərən Yevlax Regional Xəstəxanasının binası əsaslı yenidənqurma işlərindən sonra vətəndaşların istifadəsinə verilib.

Açılış mərasımında TƏBİB-in İcraçı direktorunun müavini Anar İsrafilov, Yevlax Rayon İcra Hakimiyyəti başçısının birinci müavini Xaliq Əliyev, Yeni Azərbaycan Partiyasının Yevlax Rayon Təşkilatının sədri Rafiq Əliyev, Ağciyər Xəstəlikləri Mərkəzinin direktoru Nəhmət Rəhmanov, Yevlax Regional Xəstəxanasının baş həkimi Mirrəhim Nəbiyev, Səhiyyə Nazirliyi HIV/AIDS, Vərəm və Malyariya ilə mübarizə proqramının Layihə Əlaqələndirmə Bürosunun əməkdaşları Fuad Salmanov, Hüseyn Abbasov və Ənvər Kuçkaryov, Yevlax və digər ətraf rayon mərkəzi xəstəxanaların direktorları və baş həkimləri, həmçinin Səhiyyə Nazirliyinin Gigiyeva və Epidemiologiya Mərkəzinin regional şöbələrinin rəhbər şəxsləri, Ağciyər Xəstəlikləri Mərkəzinin regional xəstəxanalarının baş həkimləri iştirak edib.

Ağciyər Xəstəlikləri Mərkəzinin direktoru Nəhmət Rəhmanov bildirib ki, Yevlax Regional Xəstəxanası Yevlax rayonu ilə yanaşı, Mingəçevir şəhəri, eləcə də Kürdəmir, Ucar, Ağdaş, Zərdab, Ağdam, Ağcabədi, Bərdə və Tərtər rayonları daxil olmaqla ümumilikdə 1 şəhər və 9 rayonun əhalisinə tibbi xidmət göstərəcək. Bu isə region üzrə vətəndaşların ixtisaslaşmış tibbi xidmətlərə əlçatanlığının təmin olunmasında mühüm rol oynayır.

İki mərtəbədən ibarət olan xəstəxanada İnzibati bölmə, Şüa-diaqnostika, Ambulator, Anesteziologiya, reanimasiya və intensiv terapiya, eləcə də Stasionar şöbələr təşkil olunub.

Şüa-diaqnostika şöbəsi rəqəmsal rentgenoqrafiya, flüoroqrafiya, habelə elektrokardioqrafiya (EKQ) və ultrasəs müayinə (USM) avadanlıqları ilə tam təchiz edilib.

Tənəffüs funksiyalarının qiymətləndirilməsi və diaqnostikası məqsədilə Spirometriya otağı yaradılıb.

Stasionar şöbədə xəstəxanadaxili infeksiyanın yayılmasının qarşısını almaq məqsədilə basilyar xəstələr üçün tək çarpayılıq palatalar yaradılıb.

50 çarpayılıq Stasionar şöbənin palataları da müasir tələblərə uyğun şəkildə təchiz edilib.

5 çarpayılıq Anesteziologiya, reanimasiya və intensiv terapiya şöbəsi oksigen təchizatı, monitor kompleksləri, süni tənəffüs cihazları və digər müasir tibbi avadanlıqlarla tam təmin olunub.

Xəstəxanada ikinci səviyyəli mikrobakterioloji və klinik-diaqnostik laboratoriya təşkil olunub ki, burada mikobakteriyaların moleykulyar-genetik müayinələri aparılacaq.

Xüsusi yaradılmış Video-müşahidə otaqlarında müasir telekommunikasiya sistemləri quraşdırılıb. Bu sistemlər vasitəsilə tibb bacıları tərəfindən ambulator müalicədə olan pasiyentlərlə fasiləsiz və operativ əlaqə təmin olunur, müalicə prosesi, eyni zamanda dərman qəbulu da gündəlik nəzarətdə saxlanılır.

Bu təşəbbüs müalicənin səmərəli təşkili, pasiyentlərin uzunmüddətli müalicəyə sadiqliyinin artırılması, dərman vasitələrinə əlçatanlığın təmin edilməsinə xidmət edir.

Xəstəxana ümumilikdə ventilyasiya, isitmə və soyutma sistemləri ilə təchiz olunub. Həmçinin Aptek bölməsi pasiyentlərin dərman vasitələri ilə fasiləsiz təminatını həyata keçirir. Pasiyentlərin və əməkdaşların asudə vaxtının səmərəli təşkili məqsədilə tibb müəssisəsində kitabxana da yaradılıb.

Yevlax Regional Xəstəxanasının istifadəyə verilməsi regionda ağciyər xəstəliklərinin, xüsusilə vərəmin vaxtında aşkarlanması, effektiv müalicəsi və profilaktikasının gücləndirilməsi istiqamətində atılmış mühüm addımdır.

05/02/2026

Tibb bacıları “Vərəmin profilaktikasında immunoprofilaktikanın rolu” mövzusunda təlimə cəlb olunub.

Ağciyər Xəstəlikləri Mərkəzinin təlim üzrə mütəxəssislərinin təşkilatçılığı ilə mərkəzin Bakı Regional Xəstəxanasının Poliklinika şöbəsində “Vərəmin profilaktikasında immunoprofilaktikanın rolu” mövzusunda tibb bacıları üçün üç günlük təlim təşkil olunub.

Təlim TƏBİB-in tabeliyində fəaliyyət göstərən doğum evləri və poliklinikalarda çalışan tibb bacıları üçün nəzərdə tutulub.

Ağciyər Xəstəlikləri Mərkəzinin Bakı Regional Xəstəxanasının Poliklinika şöbəsinin həkim-ftiziatrı Gülnarə İbrahimova və həmin şöbənin tibb bacısı Pərvanə Əbülhəsənovanın moderatorluğunda baş tutan təlimin ilk günündə iştirakçıların bilik səviyyəsinin qiymətləndirilməsi məqsədilə pre-test keçirilib.

Nəzəri hissədə həkim-ftiziatr G.İbrahimova tərəfindən KJB vaksinasiyası və revaksinasiyası üzrə mövcud tələblər, risk qrupları, KJB vaksininə əks göstərişlər, tibb işçilərinin məsuliyyəti, vaksinin xüsusiyyətləri, dozası və yeridilmə texnikası barədə ətraflı məlumat verilib.

Eyni zamanda vərəmin aşkarlanması və diaqnostikasında mantu və diaskin sınaqlarının əhəmiyyəti izah olunub.

Təlimin praktiki hissəsində P.Əbülhəsənova tərəfindən vaksinin hazırlanması, testlərinin düzgün yeridilmə texnikası, aseptika və antiseptika qaydalarına riayət olunması, eləcə də tibbi sənədlərin düzgün doldurulması mövzularında praktik biliklər nümayiş etdirilib.

Mövzu ətrafında geniş müzakirələr aparılmış və iştirakçıları maraqlandıran suallar cavablandırılıb.

Sonda iştirakçılar üçün post-test keçirilərək, qiymətləndirmə aparılıb. Təlimi uğurla başa vuran tibb bacılarına arayışlar təqdim olumub.

30/01/2026

Milli Məclisin Səhiyyə Komitəsinin üzvü, Parlamentarilərin Qlobal Vərəm Koalisiyasının Şərqi Avropa və Mərkəzi Asiya üzrə həmsədri, deputat Pərvanə Vəliyeva “Ağciyər Xəstəlikləri Mərkəzi”nin kollektivi ilə görüş keçirib.

Görüşün məqsədi Milli Məclisin 2026-cı ilin yaz sessiyasında vərəmlə bağlı keçiriləcək ictimai dinləmələrlə əlaqədar Azərbaycanda vərəmlə mübarizə sahəsində görülən işlər, mövcud vəziyyət, problemlərin və onların həlli yollarının müzakirəsi olub.

Mərkəzin direktoru Nəhmət Rəhmanov vərəməleyhi müəssisələrin infrastrukturdan səmərəli istifadə edilərək idarəetmə və koordinasiya işinin optimallaşdırması istiqamətində həyata keçirilən tədbirlər, Mərkəzin tabeliyində olan müəssisələrdə aparılan məqsədyönümlü işlər, 2025-ci il üzrə vərəm xəstəliyi ilə bağlı müayinə və müalicə nəticələrinin göstəriciləri, eləcə də qarşıda duran vəzifələr barədə ətraflı məlumat verib.

Həmçinin ağciyər xəstəliklərinin diaqnostikası, müalicəsi və reabilitasiyası sahəsində tətbiq olunan müasir yanaşmalar, xidmət keyfiyyətinin artırılması istiqamətində görülən tədbirlər haqqında da təqdimatla məlumat verilib.

Görüş zamanı vərəm və digər ağciyər xəstəlikləri ilə mübarizədə əməkdaşlığın gücləndirilməsi, kadr hazırlığı, təlim proqramlarının genişləndirilməsi və beynəlxalq təcrübənin tətbiqi məsələləri ətrafında fikir mübadiləsi aparılıb.

29/01/2026

Valideynlərin tez-tez qarşılaşdığı problemlərdən biri də uşaqlarda yaranan öskürəkdir.

Bəzən bu, sadəcə soyuqdəymənin əlaməti olsa da, bəzi hallarda daha ciddi xəstəliklərin carçısı ola bilir.

Ağciyər Xəstəlikləri Mərkəzinin tabeliyində fəaliyyət göstərən Uşaq Vərəm Xəstəxanasının şöbə müdiri, həkim-ftiziatr Esmira Mehdiyeva uşaqlarda uzun müddət davam edən öskürəklə bağlı bildirir ki, öskürəyin səbəbi və növləri müxtəlif ola bilər.

“Müalicə də məhz buna uyğun aparılmalıdır. Uşaqlarda öskürək allergik, virus, bakterial və başqa səbəblərdən yaranır. Hərarət və halsızlıq olmadan davam edən öskürək allergiya ilə əlaqəli ola bilər. Tozlu mühit və yeyilən bəzi qidalar bu vəziyyəti daha da ağırlaşdıra bilər”.

E.Mehdiyevanın sözlərinə görə, astma zamanı öskürək, əsasən, gecə saatlarında və fiziki aktivlik zamanı güclənir, sinədə xırıltı, nəfəs darlığı ilə müşayiət olunur:

“Qrip virusları burun-boğaz-bronxları zədələyərək quru öskürəyə, pnevmoniya isə yüksək hərarət, sinə ağrısı və nəfəs darlığı ilə müşayiət olunan yaş (bəlğəmli) öskürəyə səbəb ola bilər. Azyaşlı uşaqlarda döş qəfəsi daxilində olan limfa düyünlərinin böyüməsi quru öskürəyə səbəb olur. Uşaqda uzanmış vəziyyətdə öskürəyin şiddəti artır. Bu, bir cox hallarda yaranmış vərəm prosesinin ilkin əlamətlərindən sayılır”.

Həkim-ftiziatr qeyd edir ki, əgər öskürək üç gündən artıq davam edərsə, habelə yüksək hərarət, nəfəs darlığı, nəfəsalma çətinliyi yaranarsa, mütləq həkimə müraciət olunmalıdır. Həkim təyinatı olmadan antibiotiklərin qəbulu və inqalyasiyaların edilməsi yolverilməzdir.

Öskürəyin müalicəsi mütləq səbəbinə uyğun aparılmalıdır. Xəstəliklər zamanı həkimin təyin etdiyi dərmanlar qəbul edilməli, istirahətə və bol maye qəbuluna diqqət yetirilməlidir. Eyni zamanda evdə otağın havasının nəmli saxlanılması faydalıdır.

28/01/2026

Ağciyər Xəstəlikləri Mərkəzinin Yevlax Regional Xəstəxanasının əməkdaşları üçün təlim keçirilib.

“Uğur" Gənclər Təşkilatının təşkilatçılığı ilə Ağciyər Xəstəlikləri Mərkəzinin Yevlax Regional Xəstəxanasının tibb işçiləri üçün “İş mühitində stressin idarə olunması” mövzusunda təlim keçirilib.

Təşkilatın əməkdaşları İnqilab Şirinli, Rafil Əşrəfli və Günel Əliqızının təqdimatında baş tutan və 2 gün davam edən təlimdə iş münasibətlərində stressin idarə olunması, zərərli vərdişlərin tibbi personal və pasiyentlər arasında yayılmasının qarşısının alınması, tibbi personal arasında konfliktlərin həllində stressin idarə olunmasının rolu, aqressiv xəstələrlə düzgün rəftar olunması ilə bağlı mövzular müzakirə olunub.

İnteraktiv formada davam edən təlimdə müxtəlif məşğələlər aparılıb.

26/01/2026

Azərbaycanda ağciyər xəstəlikləri ilə bağlı mövcud vəziyyətə dair Ağciyər Xəstəlikləri Mərkəzinin direktorunun müalicə işləri üzrə müavini İftixar Qurbanov "ARB 24" televiziyasında yayımlanan “İşgüzar Səhər” verilişində sualları cavablandırıb.

Videoreportajı təqdim edirik.

20/01/2026

Vətənimizin azadlığı uğrunda canlarından keçən şəhidlərimizin əziz xatirəsini qürur və ehtiramla anırıq!

20/01/2026

19/01/2026

18/01/2026

16/01/2026

Tibb müəssisələrinə vaxtında müraciət edilməsi, həmçinin düzgün diaqnoz təyin olunması xəstəliklərin zamanında aşkarlanmasında və qarşısının alınmasında önəmli rol oynayır.

Ağciyər Xətəlikləri Mərkəzinin Bakı Regional Xəstəxanasının Poliklinika şöbəsinin müdiri Nurlanə Şirinova bu və digər önəmli məqamlar barədə məlumat verir.

15/01/2026

Vərəm xəstəliyinin az amma rast gəlinən növlərindən biri göz vərəmidir.

Ağciyər Xəstəlikləri Mərkəzinin Bakı Regional Xəstəxanasının Poliklinika şöbəsinin oftalmoloqu Rəhilə Rzayeva bildirir ki, göz vərəmi çox vaxt digər göz xəstəliklərinə oxşadığı üçün düzgün diaqnoz təyin olunması mürəkkəbləşir.

Xəstəlik vaxtında aşkar edilmədikə görmə qabiliyyəti zəifləyir, bəzən isə tamamilə görmənin itirilməsinə səbəb ola bilər.

R.Rzayevanın sözlərinə görə, göz vərəmində əsas əlamətlər gözün qızarması, görmənin zəifləməsi və torlanması, gözdə ağrı və işığa həssaslıqdır:

“Bu əlamətlər digər göz xəstəliklərində də olduğu üçün xəstəliyin diaqnozu çətinləşir. Göz vərəminin diaqnozu gözün obyektiv və instrumental müayinəsi, bakterioloji yaxma, laborator analizlər, tuberkulin testi, rentgen və kompüter tomoqrafiyası (KT) vasitəsilə müəyyən olunur. Müalicəsi isə həkim-ftiziatr və oftalmoloqun birgə nəzarəti altında aparılmalıdır. Müalicə zamanı vərəm əleyhinə dərmanlar və yerli simptomatik müalicə təyin edilir”.

Həkim-mütəxəssis qeyd edir ki, profilaktika üçün gigiyenik qaydalara riayət etmək, əlləri tez-tez yumaq, şəxsi əşyaları paylaşmamaq və xəstələrlə birbaşa təmasdan qaçınmaq çox vacibdir. Çünki göz vərəmi də yoluxuculuq xüsusiyyəti daşıyır.

Hər hansı narahatlıq hiss etdikdə mütləq vaxtında həkim-mütəxəssisə müraciət etmək lazımdır, çünki vaxtında müayinə və müalicə sayəsində ağırlaşmaların qarşısı alına bilər.