Göygöl Rayon Mərkəzi Xəstəxanası

27/10/2025

Süd Vəzi Xərçənginə qarşı bir addım öndə ol!

Süd vəzi xərçəngi dünyada qadınlar arasında ən çox yayılan xərçəng növüdür və vaxtında aşkarlanarsa, uğurla müalicə oluna bilər.

Bu xəstəliyə qarşı mübarizədə profilaktika və erkən diaqnoz əsas rol oynayır.

Hər bir qadın öz sağlamlığına diqqət etməlidir:

- 20 yaşdan etibarən hər ay süd vəzilərində dəyişiklikləri yoxlayın;
- 40 yaşdan sonra ildə bir dəfə həkim-mammoloqa müraciət edin və mammoqrafiya / USM müayinəsindən keçin;
- Ağrı, şişkinlik, rəng dəyişməsi və ya axıntı müşahidə etdikdə, dərhal həkimə müraciət edin.

Risk faktorları arasında irsi meyillilik, hormonal dəyişikliklər, düzgün qidalanmama, fiziki hərəkətsizlik və siqaret kimi zərərli vərdişlər dayanır.

24/10/2025

İnfeksiyaların Profilaktikası və İnfeksion Nəzarət (İPİN) həftəsi çərçivəsində tədbir

Hər il oktyabr ayının üçüncü həftəsi dünya üzrə İnfeksiyaların Profilaktikası və İnfeksion Nəzarət (İPİN) həftəsi kimi qeyd olunur.

İPİN həftəsinin keçirilməsində əsas məqsəd tibb müəssisələrində infeksiyaların qarşısının alınması və infeksion nəzarətin vacibliyi barədə məlumatlılığın artırılması, pasiyent və tibb işçilərinin təhlükəsizliyinin təmin olunmasıdır.

Bu münasibətlə Göygöl Rayon Mərkəzi Xəstəxanasında İPİN həftəsinə həsr olunmuş maarifləndirici tədbir keçirilib.

Tədbir İPİN komissiyasının sədri Vüsalə Qələndərovanın təşkilatçılığı ilə baş tutub. Tədbirdə çıxış edən xəstəxananın İPİN həkimi, infeksionist Əfsanə Verdiyeva infeksiyaların profilaktikası, nəzarət mexanizmləri, düzgün gigiyena və müasir infeksion nəzarət strategiyaları barədə ətraflı məlumat verib.

24/10/2025

Hər il oktyabrın 24-ü Ümumdünya Poliomielitlə Mübarizə Günü kimi qeyd edilir.

Poliomielit sinir sistemini zədələyən, əzələlərin iflicinə səbəb olan və ağırlaşmış halda ölümlə nəticələnə bilən yoluxucu xəstəlikdir.

Xəstəlikdən qorunmağın ən effektiv yolu peyvənd olunmaqdır. OPV və İPV poliomielit xəstəliyinə qarşı vurulan peyvəndlərdir.

Yoluxma fekal-oral (çirkli əllər, yoluxmuş qida, əşyalar, oyuncaqlar, çirkab sular və s.) və ya hava-damcı yolu ilə, əsasən, ağız boşluğuna virusun düşməsi ilə baş verir. Poliomielitə adətən 15 yaşa qədər uşaqlar, nadir hallarda isə böyüklər də yoluxa bilərlər. İlkin əlamətləri yoluxmadan sonra 3-35 gün ərzində müşahidə olunur.

Xəstəlik adətən soyuqdəymə simptomları və hərarətin yüksəlməsi ilə başlayır. Bir qədər sonra xəstədə möhkəm əzələ ağrıları və süst ifliclər inkişaf edir.

Bu zaman ətraflardan birinin, yaxud hər ikisinin hərəkət aktivliyi itir və tənəffüs əzələlərinin iflici nəticəsində tənəffüs çətinləşir.

Peyvəndin yalnız tam kursunu alan uşaqlar poliomielitdən qorunmuş hesab olunur.

24/10/2025

23/10/2025

Azərbaycan Respublikası Nazirlər Kabinetinin yeni qərarı ilə tibb müəssisələrində xidmət alan şəxslərin qida normaları ilə bağlı yeni qaydalar müəyyənləşdirilib.

🔗 Daha ətraflı: https://bit.ly/4o3GSjl

23/10/2025

Göygöl RMX kollektivi “Zəfər Kuboku” turnirində iştirak edib.

Göygöl Rayon İcra Hakimiyyətinin təşəbbüsü və Gəncə–Daşkəsən Regional Gənclər və İdman İdarəsinin Göygöl rayonu üzrə gənclər və idman sektorunun təşkilatçılığı ilə Göygöl Olimpiya İdman Kompleksində 8 Noyabr Zəfər Gününə həsr olunmuş idarə, müəssisə və təşkilatlar arasında “Zəfər Kuboku” minifutbol turniri keçirilib.

Göygöl Rayon Mərkəzi Xəstəxanasının əməkdaşları turnirdə aktiv iştirak etmiş və ilk qarşılaşmada Təhsil işçilərindən ibarət komandaya qarşı 6:1 hesablı qələbə qazanaraq uğurlu nəticə əldə ediblər.

Turnirin keçirilməsində məqsəd Zəfər Gününün əhəmiyyətinin təbliği, vətənpərvərlik ruhunun gücləndirilməsi, habelə kollektivlər arasında dostluq və sağlam rəqabətin təşviq edilməsidir.

Qeyd edək ki, Zəfər Günü xalqımızın şanlı tarixinin parlaq səhifəsi və milli qürur mənbəyidir. Bu münasibətlə təşkil edilən tədbirlərdə iştirak edən komandamıza uğurlar arzu edirik.

23/10/2025

Göygöl Rayon Mərkəzi Xəstəxanasının İnfeksiyaların Profilaktikası və İnfeksion Nəzarət (İPİN) üzrə məsul tibb bacısı Aytac Əliyeva 2025-ci il oktyabr ayında keçirilən İPİN həftəsinə həsr olunmuş “İnfeksiyaya nəzarətdə yeni dövr Texnologiya və Komanda İşi” adlı tədbirdə iştirak edib.

Tədbirdə TƏBİB-in Tibbi xidmətlərin inkişafı departamentinin rəhbəri Yaqut Qarayeva, Yoluxucu xəstəliklər və infeksion nəzarətin təşkili şöbəsinin müdiri Nilufər Məmmədova, TƏBİB tabeli tibb müəssisələrinin İPİN üzrə məsul şəxsləri və bir sıra mütəxəssislər iştirak edib.

TƏBİB-in dəstəyi və Azərbaycan Təlim və İnkişaf Mərkəzinin təşkilatçılığı ilə baş tutan tədbirdə tibb müəssisələrində infeksion nəzarət sisteminin gücləndirilməsi, pasiyent və tibb işçilərinin təhlükəsizliyinin təmin olunması istiqamətində görülən işlər, beynəlxalq təcrübələr və rəqəmsal texnologiyaların tətbiqi barədə geniş müzakirələr aparılıb.

Tədbirdə İPİN sahəsində bilik və bacarıqların artırılması, eləcə də yerli və beynəlxalq təlim proqramlarının davam etdirilməsinin vacibliyi vurğulanıb.

22/10/2025

Analiz verərkən nələrə diqqət etməliyik?

Laborator analizlər sağlamlıq vəziyyətinin qiymətləndirilməsində mühüm rol oynayır. Dəqiq nəticə əldə etmək üçün analizə gəlməzdən əvvəl aşağıdakı qaydalara riayət etmək vacibdir

-Səhər və acqarına gəlmək tövsiyə olunur. Qida və içkilər, xüsusilə şirin və ya yağlı məhsullar analiz nəticələrinə təsir göstərə bilər.
- Analizdən 1 gün əvvəl ağır qidalar, spirtli içkilər və çoxlu fiziki fəaliyyət məhdudlaşdırılmalıdır.
- Daimi dərman qəbul edirsinizsə, bu barədə mütləq həkim və laboratoriya əməkdaşına məlumat verin.
- Qan analizi üçün ən azı 8–12 saat ac qalmaq, yalnız təmiz su içmək icazəlidir.
- Sidik analizi üçün – səhər yığılan, təmiz qabda toplanmış ilk sidik nümunəsi ən etibarlı nəticə verir.
-Qadınlar üçün qeyd: Menstruasiya dövründə bəzi analizlərin (xüsusilə sidik və ginekoloji testlərin) verilməsi məqsədəuyğun deyil.

Analizdən əvvəl siqaret, stress və intensiv fiziki hərəkətlərdən uzaq durmaq tövsiyə olunur.

21/10/2025

Göygöl Rayon Mərkəzi Xəstəxanasının şüa diaqnostika üzrə həkimi Turxan Cəfərov Azərbaycan Radioloqlar Cəmiyyətinin V Beynəlxalq Elmi-Praktiki Konfransında iştirak edib.

Konfransda Sinqapur, ABŞ, Türkiyə, Qazaxıstan, Belçika, İtaliya, Avstriya və Çin kimi ölkələrdən dəvət olunan tanınmış professorların iştirakı ilə radiologiya sahəsindəki son yeniliklər, müasir tibbi avadanlıqların imkanları və innovativ texnologiyalar təqdim olunub.

18/10/2025

"Müstəqilliyimiz əbədidir, daimidir, dönməzdir!"

Ümummilli Lider Heydər Əliyev

🇦🇿

15/10/2025

27-ci Azərbaycan Beynəlxalq Tibb İnnovasiyaları Sərgisi - "Medinex", 30 oktyabr - 1 noyabr tarixlərində öz qapılarını ziyarətçiləri üçün açacaq!

Bakı Ekspo Mərkəzində keçiriləcək “Medinex” sərgisinin rəsmi dəstəkçilərindən biri də TƏBİB-dir.

Sərgidə siz tibb sahəsinin ən son texnologiyaları ilə tanış ola, əlavə tədbirlər proqramında iştirak edə, həmçinin peşəkarlarla ünsiyyət quraraq əlaqələrinizi genişləndirə bilərsiniz.

Daha ətraflı sərginin rəsmi saytından məlumat əldə edə bilərsiniz:

https://medinex.az/

Medinex Azerbaijan