Göygöl Rayon Mərkəzi Xəstəxanası

11/04/2026

Əllərdə titrəmə, hərəkətlərin yavaşlaması, bədənin sərbəst idarə olunmasında çətinlik, əzələ sərtliyi və bəzi hallarda psixoloji dəyişikliklər Parkinson xəstəliyinin əsas əlamətləri sırasındadır.

Bu xəstəlik zamanla gündəlik fəaliyyətləri məhdudlaşdıraraq əlilliyə səbəb ola bilər, lakin əksər hallarda insanın şüuru pozulmur.

Son illərdə dünyada Parkinson xəstəliyi daha geniş yayılaraq ciddi sosial və tibbi problemlərdən birinə çevrilib. Xəstəliyin əsasında beyində baş verən neyrodegenerativ dəyişikliklər dayanır və bu dəyişikliklər hərəkətlərin koordinasiyasına birbaşa təsir göstərir.

11/04/2026

İnsult yaradan səbəblər!

Yüksək qan təzyiqi, sağlam olmayan qidalanma və zərərli vərdişlər insult riskini artıran əsas amillərdəndir.

İnsultun yaranmasına səbəb olan faktorlar və risklər barədə qısa və maarifləndirici məlumatları diqqətinizə çatdırırıq.

08/04/2026

08/04/2026

TƏBİB-in Müşahidə Şurasının tərkibi təsdiqlənib

"Tibbi Ərazi Bölmələrini İdarəetmə Birliyi" publik hüquqi şəxsin (TƏBİB) Müşahidə Şurasının tərkibi təsdiqlənib.

Prezident İlham Əliyev bununla bağlı Sərəncam imzalayıb.

🔗 https://president.az/az/articles/view/72061

07/04/2026

Kənd tibb məntəqələrinin fəaliyyəti ilə bağlı Tibbi Şura iclası keçirilib.

İclasda direktor müavini, baş həkim Vüsalə Qələndərova, Səhiyyə xidmətlərinin təşkili şöbəsinin müdiri Firuz Zeniyev, kənd tibb məntəqələrinin müdirləri və tibb işçiləri iştirak ediblər.

İclas zamanı baş həkim Vüsalə Qələndərova çıxışında tibbi xidmətin vacibliyini vurğulayaraq, sənədləşmə işinin düzgün aparılması, peyvəndləmə və dispanser qeydiyyatın gücləndirilməsi, əhali ilə ünsiyyət, ilkin yardımın təşkili, vətəndaş məmnuniyyəti və mövsümi hazırlıq üzrə tövsiyələrini verib.

Səhiyyə xidmətlərinin təşkili şöbəsinin müdiri Firuz Zeyniyev, kənd tibb məntəqələrində mövcud vəziyyətin təhlilini apararaq, aşkarlanan çatışmazlıqların vaxtında aradan qaldırılmasının vacibliyini qeyd etmiş, resursların səmərəli istifadəsi, işçilərin fəaliyyətinin optimallaşdırılması, peyvənd və profilaktik tədbirlərin tam həyata keçirilməsi, həmçinin patronaj xidmətlərinin keyfiyyətinin yüksəldilməsi istiqamətində konkret göstərişlər vermişdir. O, eyni zamanda kənd həkim tibb məntəqələrində təhlükəsizlik və ehtiyat tədbirlərinin gücləndirilməsi, işçilərin nizam-intizamı və davamiyyətinə ciddi riayət olunması ilə bağlı göstəriş verib.

İclasın yekununda iştirakçıların sualları cavablandırılmış və mövzular üzrə əlavə tövsiyələr verilib.

07/04/2026

Rəqəmsal reseptlərin yazılması və elektron xəstəlik vərəqələrinin düzgün tərtibinə dair təlim keçirilib

Göygöl Rayon Mərkəzi Xəstəxanasında Azərbaycan Respublikası Prezidentinin 15 avqust 2023-cü il tarixli 2298 nömrəli Fərmanından, həmçinin qüvvədə olan normativ-hüquqi aktların tələblərindən irəli gələrək rəqəmsal reseptlərin yazılması və elektron xəstəlik vərəqələrinin düzgün tərtibinə dair tibb işçiləri üçün təlim təşkil edilib.
Təlim çərçivəsində Səhiyyə Nazirliyi tərəfindən yaradılmış elektron resept sistemi və “Vahid Səhiyyə İnformasiya Sistemi”nin müvafiq modulları üzrə tətbiq edilən yeniliklər, reseptlərin elektron formada yazılması qaydaları, eləcə də elektron xəstəlik vərəqələrinin düzgün tərtibi prinsipləri iştirakçıların diqqətinə çatdırılıb.

Təlim Göygöl Rayon Mərkəzi Xəstəxanasının keyfiyyətə nəzarət üzrə mütəxəssisi Camalə Bəkirli tərəfindən keçirilib.

Sonda iştirakçıların sualları cavablandırılıb və mövzu ilə bağlı praktiki tövsiyələr verilib.

07/04/2026

Sağlamlıq təsadüf deyil, düzgün seçimlərin nəticəsidir.

06/04/2026

Fiziki aktivlik yalnız bədəni formada saxlamaq deyil, eyni zamanda ürəyinizi gücləndirir, tənəffüs sistemini yaxşılaşdırır, sümükləri möhkəmləndirir və gündəlik enerjinizi artırır. Aktiv həyat tərzi stressi azaldır, əhval-ruhiyyəni yüksəldir və depressiya riskini minimuma endirir.

Sağlam qalmaq üçün böyük addımlar atmağa ehtiyac yoxdur. Həftədə ən azı 3 dəfə, gündə minimum 60 dəqiqə orta intensivlikdə hərəkət – yürüş, velosiped sürmək və ya idmanla məşğul olmaq artıq sağlam gələcəyə atılan böyük addımdır.

Hərəkət – sağlam və enerjili həyatın ən güclü təməlidir.

03/04/2026

Göygöl Rayon Mərkəzi Xəstəxanasında daha bir ixtisaslı həkim fəaliyyətə başlayıb.

Gülarə Ələsgər Göygöl Rayon Mərkəzi Xəstəxanasının Cərrahiyyə şöbəsində həkim uşaq-cərrahı vəzifəsində fəaliyyət göstərir.

Ələsgər Gülarə Həsən qızı 1993-cü ildə Gəncə şəhərində anadan olub.

Təhsili və peşə fəaliyyəti:
2011-2017-ci illərdə Azərbaycan Tibb Universitetinin Müalicə işi fakültəsində təhsil alıb
2019-2024-cü illərdə Azərbaycan Tibb Universiteti Tədris Cərrahiyyə Klinikasının Uşaq cərrahlığı kafedrasında rezidentura təhsili alıb

2025-2026-cı illərdə Şəmkir Rayon Mərkəzi Xəstəxanasının Cərrahiyyə şöbəsində uşaq-cərrahı kimi fəaliyyət göstərib.

Yeni fəaliyyətində həkimimizə uğurlar arzulayırıq!

02/04/2026

2 Aprel Ümumdünya Autizm Məlumatlandırma Günüdür
Autizm erkən yaş dövründə başlayan, uşağın sosial münasibətlərinə, ünsiyyətinə və davranışlarına təsir edən inkişaf pozuntusudur. Əlamətləri adətən 1,5–2 yaşdan etibarən üzə çıxır. Uşaq göz kontaktından qaça, adına reaksiya verməyə bilər, yaşıdları ilə ünsiyyətdə çətinlik çəkər, nitqi gecikə və ya fərqli inkişaf edə bilər. Həmçinin özünə qapanma, təkrarlanan hərəkətlər və dəyişikliklərə qarşı həssaslıq müşahidə oluna bilər.
Bu əlamətlərdən bir neçəsi olduqda vaxtında psixoloq və ya mütəxəssisə müraciət etmək vacibdir. Erkən müdaxilə uşağın inkişafına müsbət təsir göstərir.
Müasir yanaşmalara görə autizm mərkəzi sinir sisteminin inkişaf xüsusiyyətləri ilə bağlıdır. Onun yaranmasına genetik faktorlar, maddələr mübadiləsinin anadangəlmə pozğunluqları, hamiləlik və doğuş zamanı baş verən ağırlaşmalar, həmçinin bəzi infeksiyalar və nevroloji vəziyyətlər təsir göstərə bilər. Autizm fərqli formalarda özünü göstərir və düzgün dəstək ilə uşağın həyat keyfiyyətini artırmaq mümkündür.

02/04/2026

Azərbaycanın bütövlüyü uğrunda canını qurban verən şəhidlərimizin xatirəsini ehtiramla yad edirik.

🇦🇿

31/03/2026

31 Mart - Azərbaycanlıların Soyqırımı Günü