Salyan Rayon Mərkəzi Xəstəxanası

03/04/2026

03/04/2026

Salyan Rayon Mərkəzi Xəstəxanasında aprel ayının ilk həftəsonu yığıncağı keçirilib

Salyan Rayon Mərkəzi Xəstəxanasında kənd həkim və tibb məntəqələrinin müdirlərinin iştirakı ilə yığıncaq keçirilib.

Tıbb müəssisəsinin direktoru Şirin Səmədova bildirib ki, Ramazan və Novruz bayramları ilə əlaqədar qeyri-iş günlərində — 20 mart 2026-cı ildən 30 mart 2026-cı ilədək (10 gün ərzində) xəstəxanaya 2591 ambulator müraciət qeydə alınıb və 9421 ambulator xidmət göstərilib. Bu müddətdə stasionar müraciətlərin sayı 163, göstərilən stasionar xidmətlərin sayı isə 2181 olub.

Qeyd olunub ki, həmin dövrdə xəstəxanada 55 planlı və 33 təcili olmaqla ümumilikdə 88 cərrahiyyə əməliyyatı icra edilib. Təcili tibbi yardım şöbəsi fasiləsiz və gücləndirilmiş rejimdə fəaliyyət göstərərək 985 nəfərə ilkin tibbi yardım göstərib. Travmalar üzrə 173 ambulator müraciət qeydə alınıb, bunlardan 51-i stasionar müalicəyə cəlb edilib. Eyni zamanda 1 zəhərlənmə, 5 bıçaqlanma, 2 yanıq, 62 heyvan dişləməsi və 14 yol-nəqliyyat hadisəsi ilə bağlı travma faktı qeydə alınıb. 15 xəstə müxtəlif tibb müəssisələrinə təxliyə olunub.

Bayram günlərində 38 nəfər oftalmoloq, 90 nəfər kardioloq, 57 nəfər nevropatoloq, 10 nəfər isə allerqoloq müayinəsindən keçib.

Yığıncaqda şöbələrdə və kəndlərdə tibbi xidmətin vəziyyəti, mövsümi xəstəliklərə qarşı profilaktik tədbirlər, dərman təchizatı və təsərrüfat məsələləri də müzakirə olunub. Tədbirdə baş həkim Emin Abasov və direktorun inzibati məsələlər üzrə müavini Nazim İbrahimov da çıxış ediblər.

03/04/2026

Yaz yorğunluğu, yoxsa depressiya?

“Həkim məsləhəti” rubrikasında Salyan Rayon Mərkəzi Xəstəxananın həkim-uşaq psixiatrı Aynurə Xaspoladova danışır:

“Yaz fəslinin gəlişi adətən enerji artımı, əhval-ruhiyyənin yaxşılaşması və aktivliyin yüksəlməsi ilə əlaqələndirilir. Lakin bəzi uşaqlarda və yeniyetmələrdə bunun tam əksi müşahidə olunur — yorğunluq, halsızlıq və motivasiyanın azalması ön plana keçir. Bu vəziyyət çox vaxt “yaz yorğunluğu” kimi qiymətləndirilsə də, bəzi hallarda daha ciddi psixoloji vəziyyətlərin — məsələn, mövsümi affektiv pozuntu və ya depressiyanın başlanğıcı ola bilər.

Yaz aylarında gün işığının müddəti artır, hormonal balans — xüsusilə melatonin və serotonin səviyyələri — yenidən tənzimlənir. Qışdan sonra vitamin ehtiyatlarının azalması və sinir sisteminin yeni şəraitə uyğunlaşma prosesi də bu vəziyyətə təsir edir. Yeniyetmələrdə isə bu proseslər hormonal dəyişikliklər, imtahan stresi və sosial münasibətlərdəki gərginliklə daha da dərinləşə bilər.”

Həkim bildirir ki: “Bu dövrdə uşaqlarda davamlı yorğunluq və halsızlıq, yuxululuq və ya yuxu pozuntuları, diqqətin zəifləməsi, dərs göstəricilərinin pisləşməsi, əsəbilik və ağlağanlıq, əvvəllər maraq göstərilən fəaliyyətlərə laqeydlik, iştah dəyişiklikləri, tez-tez baş ağrıları və ümumi zəiflik müşahidə olunur.

Valideynlər vəziyyəti düzgün qiymətləndirməli, uşaqları ilə açıq və səmimi ünsiyyət qurmalı, onların hisslərini diqqətlə dinləməli, problemlərini kiçiltməməli və tənqid əvəzinə dəstək göstərməlidirlər. Uşağa dəstək olmaq üçün gündəlik rejim tənzimlənməli, kifayət qədər yuxu təmin olunmalı, yatma və oyanma saatları sabit saxlanmalı, fiziki aktivlik artırılmalı, açıq havada vaxt keçirmək təşviq edilməli, günəş işığından maksimum faydalanmaq təmin olunmalıdır. Eyni zamanda elektron cihazların istifadəsi məhdudlaşdırılmalı, ekran qarşısında keçən vaxt azaldılmalıdır. ”

A.Xaspoladova qeyd edir ki: “Zülal baxımından zəngin qidalar, vitamin və minerallarla təmin olunmuş menyu — xüsusilə B qrupu vitaminləri, maqnezium və dəmir — orqanizmin bərpasına kömək edir. Vitamin dəstəyi isə yalnız həkim məsləhəti ilə verilməlidir.

Unutmaq olmaz ki, yaz yorğunluğu tənbəllik və ya “naz” deyil. Bu, uşağın orqanizmi və psixikasının adaptasiya dövründə verdiyi təbii reaksiyadır. Bu mərhələdə anlayış, diqqət və qayğı göstərmək uşağın psixi sağlamlığını qorumağın ən doğru yoludur.

Erkən diaqnostika və vaxtında müdaxilə isə daha ciddi problemlərin qarşısını almaqda həlledici rol oynayır.”

02/04/2026

02/04/2026

2 Aprel Ümumdünya Autizm Məlumatlandırma Günüdür

Autizm erkən yaş dövründə başlayan, uşağın sosial münasibətlərinə, ünsiyyətinə və davranışlarına təsir edən inkişaf pozuntusudur. Əlamətləri adətən 1,5–2 yaşdan etibarən üzə çıxır. Uşaq göz kontaktından qaça, adına reaksiya verməyə bilər, yaşıdları ilə ünsiyyətdə çətinlik çəkər, nitqi gecikə və ya fərqli inkişaf edə bilər. Həmçinin özünə qapanma, təkrarlanan hərəkətlər və dəyişikliklərə qarşı həssaslıq müşahidə oluna bilər.

Bu əlamətlərdən bir neçəsi olduqda vaxtında psixoloq və ya mütəxəssisə müraciət etmək vacibdir. Erkən müdaxilə uşağın inkişafına müsbət təsir göstərir.

Müasir yanaşmalara görə autizm mərkəzi sinir sisteminin inkişaf xüsusiyyətləri ilə bağlıdır. Onun yaranmasına genetik faktorlar, maddələr mübadiləsinin anadangəlmə pozğunluqları, hamiləlik və doğuş zamanı baş verən ağırlaşmalar, həmçinin bəzi infeksiyalar və nevroloji vəziyyətlər təsir göstərə bilər. Autizm fərqli formalarda özünü göstərir və düzgün dəstək ilə uşağın həyat keyfiyyətini artırmaq mümkündür.

02/04/2026

Bu gün Aprel döyüşlərindən 10 il ötür

2016-cı ilin aprelində Azərbaycan Ordusu düşmənin təxribatının qarşısını qətiyyətlə alaraq igidlik və qəhrəmanlıq nümayiş etdirdi, strateji əhəmiyyətli Lələtəpə və digər yüksəklikləri geri qaytardı.

Bu şanlı tarix eyni zamanda qəhrəman şəhidlərimizin xatirəsi ilə əbədiləşdi. Onlardan biri də Salyan rayonunun Yuxarı Xalac kəndində doğulan Baş leytenant Rəşid Rövşən oğlu Mehdiyevdir.

O, Vətənə sədaqətlə xidmət etdi, Aprel döyüşlərində könüllü olaraq cəbhəyə yollandı və qəhrəmancasına şəhid oldu. Ölümündən sonra “İgidliyə görə” medalı ilə təltif edildi.

Rəşid Mehdiyev və bütün şəhidlərimizin əziz xatirəsini ehtiramla yad edirik.

Allah bütün şəhidlərimizə rəhmət eləsin.

02/04/2026

Azərbaycanın bütövlüyü uğrunda canını qurban verən şəhidlərimizin xatirəsini ehtiramla yad edirik.

🇦🇿

01/04/2026

01/04/2026

Enerji içkiləri: məktəbli orqanizminin qaldıracağı yük deyil!

“Enerji içkisi qəbul edən məktəblilərdə bir sıra ilkin əlamətləri müşahidə etmək mümkündür”.

“Sağlam məktəbli” rubrikasında enerji içkilərinin məktəblilərin sağlamlığına təsirindən bəhs olunur.

Enerji içkiləri uşaqların və yeniyetmələrin inkişaf etməkdə olan ürək-damar, sinir və endokrin sistemlərinə ciddi ziyan vurur.

Lökbatan Tibb Mərkəzinin həkim-pediatrı Aytən Bəşirovanın sözlərinə görə, enerji içkisi içən məktəblilərdə bir sıra ilkin əlamətlər olur:

“Bunlara həyəcan, ürək döyüntüsünün sürətlənməsi, yuxu pozuntuları, eləcə də mədə-bağırsaq problemləri daxildir. Bu əlamətlər çox vaxt valideynlər tərəfindən adi yorğunluq kimi qiymətləndirilsə də, əsas səbəb enerji içkilərinin istifadəsi ola bilər. Çünki həddindən artıq kofein qəbulu uşaqlarda və yeniyetmələrdə yuxu pozuntularına, narahatlıq riskinin artmasına və hətta beyin inkişafının mənfi təsirlənməsinə səbəb ola bilər. İnkişaf dövründə olan orqanizm bu cür yüklənməyə hazır deyil”.

Pediatrın sözlərinə görə, enerji içkiləri ürək döyüntüsünün artmasına, qan təzyiqinin yüksəlməsinə, yuxusuzluğa və yuxunun keyfiyyətinin aşağı düşməsinə səbəb olur. Eyni zamanda bu içkilər qıcıqlanma, narahatlıq və asılılıq riskini artıra, beyinin normal inkişafına mənfi təsir göstərə bilər:

“Ümumiyyətlə, enerji içkiləri məktəblilər üçün enerji mənbəyi hesab edilməməlidir. Uşaqların enerji ehtiyacını ödəmək üçün kifayət qədər yuxu, nizamlı fiziki aktivlik və balanslaşdırılmış qidalanma ən təhlükəsiz və effektiv üsullardır”.

Enerji içkiləri uşaqlar və yeniyetmələr üçün qəti şəkildə yolverilməzdir!

Valideynlər bu mövzuda diqqətli olmalı, uşaqların enerji içkilərinə istəkli olmasına və istifadə etməsinə imkan verməməlidirlər! Bu, onların sağlamlığı üçün təhlükəlidir!

01/04/2026

Bayramlarla əlaqədar qeyri-iş günlərində təcili tibbi yardım xidmətinə 50 minə yaxın müraciət daxil olub

20-30 mart tarixlərində Respublika Təcili və Təxirəsalınmaz Tibbi Yardım Mərkəzi gücləndirilmiş iş rejimində fəaliyyət göstərib.

Bakı şəhəri üzrə təcili tibbi yardım xidmətinə bu tarixlərdə 22 922 çağırış daxil olub. Çağırışlardan 2 107 nəfər müxtəlif tibb müəssisələrinə hospitalizasiya olunub, digərlərinə isə yerində zəruri yardım göstərilib.

59 region üzrə isə bayram günlərində təcili tibbi yardım xidmətinə 24 129 çağırış daxil olub. 2 059 nəfər müxtəlif tibb müəssisələrinə hospitalizasiya olunub, digərlərinə isə yerində zəruri yardım göstərilib.

Bakı şəhəri üzrə ən çox müraciət 21.03.2026-cı il tarixində qeydə alınıb.

Belə ki, müraciət sayı 2 255, hospitalizasiya olunanların sayı 243 nəfər təşkil edib.

Çağırış səbəbləri, əsasən, arterial təzyiqin yüksəlməsi, müxtəlif növ travmalar, dispeptik əlamətlər, kardioloji, respirator və digər xəstəliklərlə bağlı olub.