22/03/2026
السلام عليكم ورحمة الله وبركاته
يقول فيلسوف:" لا نبتسم لأننا سعداء لكن سعداء لأننا نبتسم" ومن هذا المنطلق مر عليا مقال يتحدث عن
العلاج بالضحك؟ وحقيقة كاين منها قلت نتكلم عليه اليوم.
👈العلاج بالضحك (Laughter Therapy)😁 هو طريقة بسيطة وما فيهاش أدوية، تعتمد على الضحك باش تعاون الإنسان يحسّن حالتو النفسية وحتى الجسدية
يعتبروه علاج مكمّل، يعني يزيد يعاون مع العلاج الطبي، بصح ما يعوضوش
كيفاش يخدم في الجسم؟
كي تضحك، الجسم تاعك يدير عدة حاجات مفيدة:
🔸️يفرز مواد كيما “الإندورفين” (هرمونات السعادة)
🔸️ينقص هرمون التوتر (الكورتيزول)
🔸️يحسّن التنفس والدورة الدموية
🔸️يخليك تحس براحة وارتخاء
حتى الضحك المصطنع (يعني تضحك ذراع 🤣 ) يقدر يعطي نتيجة، بصح الضحك الحقيقي من القلب يبقى أقوى.
👈 كيفاش تكون جلسة العلاج بالضحك؟
تقدر تكون وحدك ولا مع جماعة، وعادة تكون :
1 -تمارين تنفس
تبدا بشهيق وزفير باش تريح الجسم
2 -ضحك إرادي😄
تبدا تضحك شوية بشوية حتى لو كان مصطنع، ومع الوقت يتحول لضحك حقيقي بدون ما تفيق.
3- حركات وتمثيل
حركات خفيفة ولا مواقف مضحكة باش تكسر الحشمة
4- استرخاء في الأخير
تقعد تهدأ وتحس بواحد راحة نفسية لا مثيل لها.
👈وش تقول الدراسات؟
الدراسات تقول بلي:
⚘️الضحك ينقص التوتر😅
⚘️يعاون في تحسين الحالة النفسية
⚘️يقدر يخفف شوية من الألم 🤗
⚘️وحتى في فترات صعيبة كيما جائحة COVID-19، كان عند دور في التخفيف من الضغط النفسي.
حاجة لازم تعرفها ماشي لازم تكون فرحان باش تضحك…
بالعكس:
اضحك 😄… تلقى روحك وليت فرحان 😊أضحك وفقط تبدأ مصطنعة ومبعد تولي حقيقة لهذا ما عليك الا ان تبتسم مهما كانت الظروف .
جربوها راح تنفعكم في الكثير من المواقف الصعبة.
الحكيمة كانوني أحلام عيادة طيبة Clinic Taiba
شكون الي فيكم جربها يحطلنا رأيو وشكراا؟
