31/12/2023
❤️❤️❤️
كي مات سيدنا سليمان ، الجن ولات تحوس تحت كرسي سليمان على الكتب اللي كان يكتبها، وهاديك الكتب فيها كلش على الملك و الشريعة والأحداث اللي صرات، وكي الشياطين لقات هاد الكتابات وخرجتهم بداو يكتبوا ما بين الاسطر كلمات تاع سحر وكفر ودعاء غير الله، وخرجوا للناس وقالولهم هاذي كتب سليمان، وانو سيدنا سليمان كان مسخّر الجن والطير والريح بهاد السحر، ايا ناس حكموا الكتابات وولاو يقراو فيها لقاو بلي فعلا فيها سحر وكفر بالله فقالو انو سليمان ساحر لقوله تعالى"وَاتَّبَعُوا مَا تَتْلُو الشَّيَاطِينُ عَلَىٰ مُلْكِ سُلَيْمَانَ"، ايا ربي بعث هاروت وماروت في صورة رجلين صالحين، راح تقولولي وين؟، بعثهم ربي لمدينة بابل فالعراق، هاد الملكين كانت المهمة تاعهم انهم يدافعوا على سيدنا سليمان وبلي ربي رزقوا بملك لا ينبغي من بعده لاحد وبلي ماهوش ساحر، هاروت وماروت كانوا يعلموا الناس السحر، ويفهموهم بلي كاين فرق بين السحر والنبوة لانوا السحر يقدر اي شخص يتعلموا لكن النبوة هي اختيار من ربي وماشي حاجة لي نقدرو نتعلموها، وهاروت وماروت قعدوا يفهموا فالناس تاني بلي الشياطين هي لي كفرت وكدبت ماشي سيدنا سليمان لقوله تعالى"وَمَا كَفَرَ سُلَيْمَانُ وَلَٰكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ"، وحذروهم وقالولهم لازم تفهموا بلي السحر هذا راه كفر بربي وبلي هاروت وماروت فتنة واختبار وابتلاء من ربي عز وجل وانو هذا الامر ممكن يضيعكم اذا ما تاقيتوش الله في انفسكم لقوله تعالى "وَمَا يُعَلِّمَانِ مِنْ أَحَدٍ حَتَّىٰ يَقُولَا إِنَّمَا نَحْنُ فِتْنَةٌ فَلَا تَكْفُرْ"، لكن الناس ماسمعتش الهدرة ولاو يتعلموا السحر ويطبقوه ويفرقوا بين الرجل ومرتوا لانو ابغض سحر عند الله هو سحر التفريق"فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ"، لكن ربي ذكر حاجة مهمة واللي هي انو انو عمرنا لا راح يضرنا سحر ولا جن الا بالاذن تاع ربي "وَمَا هُم بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ ۚ وَيَتَعَلَّمُونَ مَا يَضُرُّهُمْ وَلَا يَنفَعُهُمْ"🌸
