10/10/2024
علابالكم بلي بوصفاير ماشي مرض ؟
بوصفاير عرض وليس مرض راح نفهمكم واش هو؟ وعلاش عرض ماش مرض ؟ ومن واش يجي ؟؟
🔴 بوصفاير هو زيادة فوق الحد تاع وحد الصبغة صفرة تزيد في الدم اسمها بيليريبين bilirubine
🔵 ومنين يجي هذا ؟
🔴 في الطحال تتفكك كريات الدم كي تدي لاروترات تمدلنا بيليروبين ⬅فالكبد يصرالو تحولات ⬅بعدها يروح للمرارة ⬅ و يتفرز في المعي و يمدلنا ايروبيلين urobiline مسؤول عن لون البول و ستركتوبيلين مسؤول عن لون البراز
🔴تسما كي يزيد فوق الحد تاعو معناها كاين بروبلام يا اما:
#الكبدة :
◾كي يكون مشكل في انتاج الانزيمات (مواد محللة) لي تحلل البيليريبين
◾التهاب الكبد الفيروسي Hepatite A , B, C
◾تليف الكبد cirrhose (الصورة في التعليقات)
#المرارة :
◾ كي يكونو القنوات بين المرارة و الكبد مسكرين يروح للدم عوض يطرح خارج الجسم عبر البول ولا البراز
في الكريات الحمراء :
◾كاين بزاف انواع تاع لانيمي سببهم ان الكريات الحمراء يخرجوا مشوهين 😢 و ما يخدموش خدمتهم تسما الجسم يبقى يدوموندي فالكريات حمراء بالتالي يزيدو و يبداو يتحللوا خاطر ميصلحوش و منه تزيد نسبة تاع البليريبين و الجسم ما يقدرش يتخلص منو
◾مرات يجي بسبة بعض الادوية
◾و لي يجي للذراري صغار 65%ما يكونش كاين مشكل خاطر الكبدة تاعهم تكون مازال ما اكتملش النمو تاعها بصح لازم يروح للطبيب خاطر 35% تكون سبتها امراض
🔴في الاخير هاذو بعض الأسباب و بوصفاير مجرد عرض من الأعراض و الطبيب هو القادر على تشخيص السبب أي المرض
🔴ان شاء الله تكونو استفدتوا 🙏❤️
