أخصائية التخاطب أ / رضوى عادل

20/01/2026

أساليب سلبية للتعامل مع سلوكيات الأطفال المزعجة 👩🏻‍⚕️♥️

أخصائية التخاطب أ / رضوى عادل

28/06/2025

"ابني مدمن موبايل؟!"

كتير مننا بقى ملاحظ إن الأولاد مش قادرين يسيبوا الموبايل أو التابلت أو الشاشة ، ولو أخدناه منهم بيعيطوا أو يتعصبوا.

ده اسمه "إدمان الشاشات والموبايل"، وبيأثر على نفسية وسلوك الطفل بشكل كبير.

يعني إيه إدمان شاشات والموبايل؟

هو استخدام الطفل للموبايل أو التابلت أو الشاشات لفترات طويلة يوميًا، وصعوبة فصله عنها.
وبيأثر على سلوكه وصحته زي الإدمان بالضبط.

أعراض إدمان الشاشات:

عصبية أو نوبات غضب عند سحب الجهاز

تأخر في الكلام والنطق

ضعف في التركيز والتواصل

نوم متقطع وخمول

تعلق مرضي بالموبايل أكتر من الأهل

ليه ده بيحصل؟

لأن الشاشات بتقدم محتوى جذاب ومكافآت فورية

ولأن الأهل أحيانًا بيكونوا مرهقين أو مشغولين

ولأن الطفل مش لاقي بديل ممتع في الحياة اليومية

الحل؟

حددي وقت ثابت للشاشة (ساعة مثلاً)

استخدمي مؤقت أو تطبيق للتحكم في الوقت

شاركيه وقت الشاشة بدل ما يفضل لوحده

قدمي بدائل: رسم، لعب، قصص، أنشطة

كوني قدوة وقللي استخدامك قدامه

أولادكم محتاجين حضن وتواصل حقيقي، مش فيديوهات وألعاب.
ابدئي بخطوة بسيطة، وهتشوفي الفرق في سلوك ابنك وفي حياتك إنتِ كمان.

22/06/2025

لو حد محتاج اي استفسارات او بيواجه مشكلة يبعت ليا على لينك الصراحة 👇👩‍⚕️

ارسل لي رسالة سرية دون أن أعرف من انت , انقر هنا وادخل الصندوق السري الخاص بي , كن صادقاُ معي

22/06/2025

مرحلة العض والضرب والصفع عند الأطفال

لو عندك طفل ما بين سنة ونص لـ ٣ سنين، فأكيد عديتِ بالمرحلة دي!
فجأه كده وبدون أي مقدمات:
يصفعك على وشك! 👋
يشد شعرك! 💇‍♀️
يعضك! 🦷
يضرب طفل تاني!

ماتقلقيش... دي مرحلة طبيعية كل الأطفال بيمروا بيها، والأهم نعرف ليه بتحصل ونتصرف إزاي.

طيب إيه أسباب العض والضرب؟
فيه سببين رئيسيين:
1️⃣ الاهتمام:
الطفل في السن ده بيحس إنه محور الكون، وعاوزك دايمًا تبصي له، تلعبي معاه، تهتمي بيه...
لو حس إنك مشغولة أو تعبانة؟ هيضربك عشان ياخد انتباهك! ⚡

2️⃣ التعبير:
الطفل مش بيعرف يعبر بالكلام، فيلجأ للعض أو الضرب عشان يقولك:
"بصيلي"، "العبي معايا"، "سيب الموبايل"، "اللعبة دي بتاعتي" 🗣❌

نعمل إيه بقى؟
✅ افهمي إن دي وسيلته للتواصل، مش لأنه شرير.
✅ امسكي إيده قبل ما يضرب وقولي له بهدوء: "الضرب مرفوض"
✅ ماينفعش تسيبيه مع أطفال لوحدهم.
✅ إوعي تضربيه! إزاي هتعلميه ما يضربش وإنتي بتضربي؟
✅ لو جعان، نعسان، تعبان… هيكون أكتر عرضة للعنف.
✅ قللي الحلويات والسكريات الكتير! 🍭🚫
✅ راقبي اللي بيشوفه في الشاشات.
✅ أقل من سنتين؟ مفيش شاشات خالص! 📺❌
✅ وأخيرًا، تأكدي إن ابنك مش بيتعرض لأي عنف من أي حد.

أطفالنا محتاجين فهم واحتواء مش عصبية وضرب

06/02/2025

بفضل الله وتوفيقه، أصبح جزء من حلمي حقيقة✨
أعلن عن ورشة عمل مجانية أونلاين بالتعاون مع أكاديمية Bright Hope حول اللدغات في مجال التخاطب، مع شهادة حضور مجانية
الحمد لله، خطوة جديدة على الطريق، وأتمنى أن أكون مصدر إلهام للآخرين لتحقيق أحلامهم ♥️🫣

الموعد: الخميس 13 فبراير 2025، الساعة 9 مساءً."

لحضور الورشة هتبقي لايف تلجرام

https://t.me/+BPMpjv5eIwwxMDY0

22/01/2025

أهم أسباب مشكلة العناد لدى الاطفال ؟! 👩‍⚕️

يعاني الآباء من سلوك الرفض والعناد عند أطفالهم في معظم المواقف. وقد تتطور هذه المشكلة بمرور الوقت لذلك ينبغي حلها بأسرع فرصة ممكنة. ولكن تختلف الأسباب من طفل لآخر ويمكن أن يشترك أكثر من سبب لظهور هذه العادات السيئة عند الاطفال تتضمن :

📌الدلال المفرط، من الأسباب التي قد لا ينتبه اليها الوالدين عند التعامل مع أطفالهم. فهو الدلال الزائد وتلبية جميع طلبات الأطفال مما يؤدي إلى ظهور هذا السلوك السيء متمثلاً بالعند والرفض لمعظم الأوامر والنصائح.

📌عدم إشباع رغبات الطفل يمكن أن يكون العناد كرد فعل لعدم تلبية حاجات الطفل الأساسية مثل الجوع، التعب، أو النعاس. مما يؤدي إلى توتر نفسي يظهر بشكل عناد.

📌التقليد، يمكن أن يكون العناد موجوداً عند الآباء وبالتالي الاطفال يقوموا بتقليدهم. لذلك علينا مراقبة أفعالنا وتصرفاتنا أمام الأبناء حيث أن ” الآباء مرآه للأطفال”.
الظروف النفسية والاجتماعية، فالطفل الذي يمر بظروف نفسية صعبة أو ضغوطات اجتماعية ستؤثر بشكل أكيد على نفسية الطفل.

وبالتالي محدثة تغييرات لسلوكيات الطفل ويمكن أن يكون العند أحد النتائج الحاصلة للطفل.

📌التلفاز أو الهاتف، يمكن أن يؤثر بشكل ملحوظ ما يشاهده الطفل على الشاشة من مشاهد للعناد . فالطفل بطبعه يقلد ما يشاهده من دون قصد وهذا سبب مهم يجب الانتباه اليه ومراقبة ما يعرض أمام أطفالنا.

📌ووجود خلل فسيولوجي، يمكن أن تكون هناك إصابة بالدماغ تؤدي إلى ظهور هذا التصرف عند الاطفال.

📌فرض القيود، فالطفل بطبيعته يحتاج للحركة بحرية بالمنزل وقد يفرض بعض الآباء حدود للحركة. قد يكون بسبب ضيق المنزل أو وجود عدد من التحف الثمينة. بالتالي يتم حرمانه من ممارسة نشاطه الطبيعي فينعكس سلبيا على سلوكه وظهور العناد كردة فعل.

📌عدم الشعور بالأمان، فبعض الأطفال يشعر بالظلم والقهر بسبب بعض التصرفات والطلبات التعجيزية للأطفال. وبذلك يحاول الأطفال تنفيس هذه الضغوطات كرد فعل من الطفل.
فرض شخصية، يحاول بعض الأطفال فرض شخصية خاصة بهم والمحاولة للوصول للاستقلالية وإثبات الذات بهذا السلوك

أخصائية التخاطب أ / رضوى عادل 👩‍⚕️

21/01/2025

أسباب حدوث اللدغة و هل هى وراثية و لا لأ ؟

هي متعتبرش حالة مرضية، و لو الأم عندها لدغة هتعلم الطفل الحرف بالطريقة اللي هي بتنطق بيها و الطفل هيقلدها فبالتالي هتبان انها وراثة علشان كدة المشاكل المتعلقة باللدغة وراثية بسبب نطق الحرف، و في أسباب لظهورها زي :

1- أسباب عضوية:

وجود عيب خلقي في اللسان أو الحلق أو الأسنان زي الشفة الأرنبية بتمنع إخراج بعض الأصوات من مخرجها الطبيعي.

أو عدم انتظام الأسنان ، زيادة حجم الفك العلوي أو السفلي ، أو مشكلة في اللسان زي حجمه أو بروزه

2- أسباب مكتسبة زي تقليد المحيطين بالطفل

أخصائية تخاطب وتعديل سلوك 👩‍⚕️✨

30/11/2024

أخصائية تخاطب وتعديل سلوك ♥️👩‍⚕️

29/11/2024

تعديل سلوك 👩‍⚕️
الكذب عند الأطفال
ـــــــــــــــــــــــــــــــــــــــــــــــــــــــ

الكذب سلوك مكتسب من البيئه المحيطه وليس فطرى لازم علشان اقدر اعالج الكذب عند الأطفال أنظر الي نقطتين مهمين جدا

1-عمر الطفل ونوع الكذب

اول حاجه عمر الطفل لازم يكون ااقل حاجه ٤ سنين تحت السن ده بيكون مش فاهم يعنى ايه كذب هو ممكن يكون قال حاجه ماحصلتش بس هو مش فاهم ايه الفرق بين ال حصل وال ماحصلش

ـــــــــــــــــــــــــــــــــــــــــــــــــــــــ

2 تانى حاجه نوع الكذب
انواع الكذب كتير اوى اهمهم:

١-الكذب الخيالي
الطفل هنا مش عارف ايه الفرق بين الحقيقى والخيال
فمثلا يقول انا شفت أسد كبير واكلته لحمه
دور الاسره
يفهم الطفل يعنى ايه كلام حقيقي ويعنى ايه كلام خيالي.

٢-الكذب الالتباسي
شبه الخيالي شويه يعنى ممكن يحكى الحلم ال حلمه كأنه حصل بجد .

٣-الكذب الادعائي
هنا الطفل بيحاول يهرب من موقف معين ممكن مثلا يكون في موقف ضايقه في المدرسه فيقول بطنى وجعانى علشان مايروحش المدرسه

٤-الكذب الوقائى
بيجى لما اكون خايف اتعاقب فبقول كلام يبرر موقفى.

٥-الكذب التعويضى
بيحصل لما الطفل يحس بالنقص ويكون عايز يعوض النقص ده .

٦-الكذب الانتقامى
بيحصل لما الطفل يحس بالظلم أو أنه عايز ياخد حقه أو أن بابا وماما بيعاملوا اخوه احسن منه فيحكى موقف ماحصلش علي اخوه أو صديقه .

٧-الكذب التقليدى
ده بقي بيكون مكتسب من البيئه والمحيطين بالطفل
يعنى مثلا بقلد بابا في الصوت العالي وبقلد ماما في الضحك كمان بقلد بابا لو عمل حاجه وقالي ماتقولش الحقيقه فبالتالي بقلده وبعمل زيه.

٨- كذب الخوف
الخوف من العقاب مثلا ورد فعل بابا وماما تجاه الطفل قد يدفعه للكذب علشان كده رد فعلنا لازم يكون هادى ومناسب للموقف ودايما افهم الطفل انى بحبك بس بكره السلوك الوحش لكن مش بكرهك انت ( انا بحبك جدا )

٩-الكذب المرضى
للأسف بيكون فشل او اضطراب في الشخصيه لا شعورى ومن الصعب تعديله
لانه الطفل بيكبر علي كده ومش بيكون حاسس انه بيعمل حاجه غلط .
في النهايه اي ان كان نوع الكذب فهو من السهل تغييره لو الطفل سنه لسه صغير قبل مايكون بقي عاده من الصعب تغيرها

ـــــــــــــــــــــــــــــــــــــــــــــــــــــــ
علاج الكذب

اول حاجه في علاج الكذب يكون فيه حوار مشترك بينى وبين الطفل ومايكونش فيه اسلوب تعنيف أو قسوه لما الطفل يحكى معايا اى موضوع يخصه ولو اعترف بالكذب اوعي تعاقبه واصاحب الطفل علشان مايكونش فيه سبب زى الخوف أو الهروب يؤدي للكذب
وبعدين اعرف ايه نوع الكذب ال عند الطفل وايه أسبابه واحاول اتخلص من الأسباب ال ادت للكذب ده
وبعدين اتكلم مع الطفل أن الكذب ده من الحاجات ال بضايق ربنا وان احنا اولاد ربنا وماينفعش اننا نكذب
وكمان ال بيكذب بيخلي ال قدامه مش بيكون عنده ثقه فيه بعد كده والناس بتبعد عنه ومش بتحب تتعامل مع ال بيكذب ولا بيحبوا يصاحبوه واشرحله أن الكذب ممكن يعرضنا لكتير من المخاطر زى أن يحصلك حاجه بجد وماحدش يلحقك علشان ساعتها نفتكر انك بتهزر أو أنك مش بتقول الحقيقه

أخصائية تخاطب وتعديل سلوك ♥️👩‍⚕️

26/08/2024

الضرب مش مبرر للتربية ،بلاش تضربوا اولادكم وهما صغيرين لسبب انكم كدة بتربوهم ،الترهيب والضرب والغلظة في المعاملة مع الاطفال بتسبب مشاكل نفسية بتستمر مع الطفل حتي بعد مايكبر ،يعني متستغربش اما تلاقي ابنك كبر وتلاقيه بيخاف يتكلم ،بيخاف من الناس ،بيخاف يقول رأيه ،بيخاف من ومن ومن ..

دا عشان اما قررت تعاقبه علي غلطة هو وصغير ضربته وقسيت عليه وسببت ليه عقدة ،هو بعد كدة مش هيغلط عشان بقي كويس ،لا هو في حاجة نفسية منعاه لمجرد ما هيحس ان الحاجز النفسي دا اتهد هيفرح ،ممكن يفرح بعدم وجودك ك أب ليه ف اوقات عشان يمارس حياته بحرية بدون خوف ورهبة ..

العقاب ممكن يكون حرمان ،من حاجة ابنك بيحبها او متعود عليها وتفهمه ان دا عقاب لغلطك ،ولو اتكرر هيبقي العقاب اكتر ،او ممكن يكون عقاب بالكلمة ،نصح ،الطفل بيتقبل كل دا وبيتعلم وبيعرف الغلط من الصح وقتها من غير عقد نفسية تسببله مشاكل بين الناس واصحابه اما يكبر عشان كدة ربوا عيالكم صح وخلوهم يشكروا فيكم ويفتكروا الكلمة الكويسة اللي خلتهم ناس ناضجة وكبيرة ويعتمد عليهم وماشيين في طريق صح بدون مشاكل نفسية

07/08/2024

تربية طِفل سوي نفسيًا، أهم وأصعب من تربية طِفل متفوّق دراسيًا

أخصائية تخاطب وتعديل سلوك 👩‍⚕️