05/02/2025
التريند اليومين دول مع الأباء والأمهات في عالم أمراض المخ والأعصاب عند الأطفال هو "ضمور المخ" ..
هديكم الخلاصة أو الزتونة🫒
1️⃣ضمور المخ معناه ان المخ أصغر من حجمه الطبيعي بالنسبه لسن الطفل الفعلي
بمعنى أصح إن المخ يبقى "خاسس" شوية أو خاسس كتييير.
يعنى ممكن يبقي :
- كل المخ خاسس يعني الضمور يشمل كل خلايا المخ
- أو جزء منه فقط
2️⃣ ونحب نكرر ونقول إن ضمور المخ ده مش مرض في حد ذاته ..
بس هو نتيجة لمرض تاني أو مشكلة أخرى حصلت قبل كده ..
زي مثلا واحد "خس "جدا و وزنه نزل كتير من غير ما يكون عامل دايت ..أكيد هنقول عنده مرض أدى إلى كده مش هنقول عنده مرض "الخسيه"
و علشان كده ما ينفعش نقول إيه هو علاج الضمور؟
لأن الضمور أسبابه كتيييير جدا و المفروض نسأل عن السبب أولا و يبقي سؤالنا عن علاج" سبب الضمور"
3️⃣ الضمور الكلي للمخ:
أشهر أسباب لضمور المخ كله هو غالبا نقص الأكسجين قبل أو أثناء الولادة و كمان ممكن بعض الأمراض الوراثية و التمثيل الغذائي
وده بيبقى واضح في الأشعة كأن المخ خاسس وعايم في مياه أو الجمجمة واسعة على المخ وفي فراغات كتير تحت العظم
4️⃣ الضمور الجزئي: يعني إن في جزء من المخ حصلت له إصابة زي (الجلطات أو النزيف بالمخ اللي ممكن يحصل أثناء الولاده أو بعدها و كل ده بيعمل تلف بالخلايا فالجزء ده بيخس و يضمر و يسمي ذلك "تلين" وبتبقى واضحة في الأشعة وضوح الشمس
5️⃣ وهنا لازم نعرف إن الضمور كضمور مالهوش علاج يزود حجم المخ ..لأن اللي بيروح من خلايا المخ لا يعوض
و لكن ممكن نشتغل علي اللي موجود من خلايا عصبية سليمة ونقوم بتحسين وظيفتها
والكلام ده ممكن نوصله بعلاج دوائي و يساعد معانا كمان العلاج الطبيعي علشان الأمور الحركية اللي ممكن بتكون متأخرة
6️⃣ طيب هي إيه أعراض الضمور ؟ ونعرف إزاي؟ أو نشك إمتى؟
نشك إن الطفل ممكن يكون عنده ضمور
لو هناك تأخر عام في المهارات الذهنية و الحركية للطفل ده لو كان ضمور كلي
أما لو ضمور ناحيه واحدة أو تلين ناحية واحدة ده ممكن يخلي حركه جانب واحد من الجسم أضعف من الجانب الآخر اللي بنسميه خذل نصفي أو شلل نصفي
7️⃣ وناخد لبالنا إن ساعات الطفل يعمل أشعة على المخ بالصدفة مثلا وهو ماعندوش شكوى ولا أعراض من اللي قولناها فوق والطفل ذهنيا وحركيا سليم
ولكن البعض القليل من تقارير الأشعة علي المخ في الأطفال قد تتسرع في الحكم بوجود ضمور ..
والأهل يترجموا تقرير الأشعة إن الطفل عنده ضمور ، ده بيبقي غير حقيقي
زي مثلا اتساع الفراغ بين الجمجمة
أو الطفل بيعاني من فترة من جفاف
فالمقصود هنا إن لما نقول الطفل ده عنده ضمور بالمخ لازم يكون أصلا هناك تأثير على الطفل مثل التأخر الذهني أو الحركي وبنتأكد بعد كده بالأشعة
8️⃣ اشهر أسئله من الآباء والأمهات
- نسبه الضمور كام في الميه؟
(الضمور مفيهوش أرقام)
- طب نعمل أشعة إمتى لمتابعه نسبه الضمور ؟
غالبا مش بنحتاج للمتابعة بالأشعة ( المتابعة بتكون بمتابعة الطفل نفسه و مدي تطوره الذهني والحركي)
- الضمور ممكن يخف ؟
إحنا اتفقنا إن الضمور مش مرض .. يبقي نسأل عن السبب اللي عمله ..
و عموما إحنا مش بنعالج الضمور إحنا بنعالج السبب اللي أدى للضمور وبنحاول نحسن الخلايا الباقية الغير مصابة وكمان بنعتمد على العلاج الطبيعي.
