What are the opening hours?

Monday 9am - 10pm Tuesday 9am - 10pm Wednesday 9am - 10pm Saturday 9am - 10pm Sunday 9am - 10pm

https://www.facebook.com/175959462277725/

سماح عماد-Samah Emad, مصر, مصر (2025)

22/09/2025

الناس بتعاملك بنفس الطريقة اللي إنتي شايفة بيها نفسك.
لو شايفة نفسك جميلة ومهمة وليكي قيمة، هيتعاملوا معاكي بنفس الشكل. ولو شايفة نفسك ضعيفة ومالكيش قيمة، هتلاقي المعاملة جاية كده برضه...

الموضوع كله بيبدأ من جواكى. لما تدي لنفسك حب واهتمام، وتصدقي إنك تستحقي، الإحساس ده هينعكس على العالم حواليكي وهيتعاملوا معاكى باستحقاق...
عاملي نفسك بالحب والأمان بدل اللوم والغضب… هتشوفي الفرق في معاملة الناس ليكي..

05/08/2025

فيه رجالة لما يشوفوا ست قوية… مش بيتشدوا ليها،
لأ… بيخافوا منها!
مش لأنها مؤذية...
ولا لأنها مغرورة…
بس لأنها عارفة هي مين، ورافضة تعيش دور الضحية.

لأنها مش بتمسك في حد عشان "الناس تقول"،
ولا بتسكت على الغلط عشان "ما تخربش بيتها"،
ولا بتمثل الطيبة الزايدة عشان "تكسب قلبه".
الست القوية اللى عارفة قيمتها مش بيملى عينيها اى راجل غير رجل ناضج واعى مسؤول فاهمها يحتويها شايفاه كبير فى تصرفاته وفى علاقاته مع اللى حواليه...
هي مش محتاجة تثبت إنها "كويسة كفاية"،
هي بس مش عايزة تكون في علاقة تهزها أو تقللها.
وده بيوجع الراجل اللي مش واثق في نفسه…
اللي اتعود يشوف الست تابع، أو تفضل ساكته مهما اتوجعت.

الست القوية بالنسباله مرآة،
بتفكره بكل اللي هو مش قادر يكونه…
وبدل ما يتعلم، بيخاف ويبعد، ويسميها "متعالية" أو "مش بتتفاهم".او عنيدة"

الحقيقة؟
الست القوية مش صعبة…
هي بس مش هتتفاوض على كرامتها،
ولا هتمشي على أطراف صوابعها عشان ترضيك،
ولا هتبقى نسخة مشوّهة من نفسها بس عشان تكمل معاك.
الفرق فى مستوى الوعى والثقة بالنفس
ولو أنت شايف دي مشكلة،
فالمشكلة مش فيها… المشكلة فيك.
نقول تانى 👇
الست القوية اللى عارفة قيمتها مش بيملى عينيها اى راجل غير رجل ناضج واعى مسؤول فاهمها يحتويها شايفاه كبير فى تصرفاته وفى علاقاته مع اللى حواليه مش هترضى ابدا بأشباه رجال 😅

26/07/2025

✨نعيم الجهل؟ ولا جحيم الوعي؟✨
من فترة، كنت قاعدة مع واحدة بتحكيلي عن حياتها قبل ما تبدأ رحلة وعيها. قالتلي 👇
_كنت عايشة مرتاحة… ولا بهتم أفهم الناس، ولا كنت بسأل نفسي أنا عايشة إزاي ...وعشان ايه .. كنت حاسة إن الجهل وعدم معرفتى بامور كتير كده مريح ليا اكتر ..
بس مرة واحدة لقيت نفسي في موقف كسرني، اكتشفت فيه حاجات عن الناس وعن نفسي أنا شخصيا ماكنتش عايزة أشوفها. ساعتها اتمنيت لو كنت فهمت من بدري...
الوعي وجعها في الأول، بس لما بدأت تفهم وتتعلم
قالتلي 👇
_دلوقتي بقيت عارفة أتعامل، بقيت محمية أكتر، حتى لو ساعات بحس الحمل تقيل...
اللي بيختار "نعيم الجهل" بيعيش مرتاح… لحد ما يتصدم..
واللي بيختار "جحيم الوعي" بيتوجع الأول… بس بعد كده بيتحرر..
لو عايزة حياة سهلة طول الوقت، الجهل هيساعدك، بس هيغرقك أول ما تيجي الحقيقة.
ولو عايزة حياة حقيقية، هتدفعي تمن الوعي الأول، لكن بعدين هتبقي أقوى من أي صدمة..

24/07/2025

أنا مش مع موضة الـ independent woman اللي شايفة إنها تقوم بدور الراجل وتاخد مكانه...
أنا مش ضد إن الست تبقى قوية وتحقق ذاتها،
بالعكس… حققي أهدافك، طوري من نفسك، اتعلمي واشتغلى وسافري..
بس دايمًا افتكري إنك ست أنثى… زوجة، وأم، وحبيبة، ومصدر أمان ودفا لعيلتلك ...
أنا مش مع الست اللي عايشة دور الرجل طول الوقت،
اللي ناسية فطرتها وبتقاوم طبيعتها،
أنا مع الست اللي فاهمة قوتها في رقتها، في ذكاءها العاطفي،
في إنها تعرف تختار راجل يحتويها ويديها أمانها،
وتعيش في قوامة راقية… مش تحكم،
وتفرح إنها ست، بكل ما تحمله الكلمة من معنى..
انتى تستحقى تعيشى فطرتك كأنثى 🌹🌹

24/07/2025

بتحسي إنك زهقانة من كل حاجة؟
مش طايقة صوت الأولاد؟ مش قادرة تتكلمي مع حد؟
حاسة إنك عايزة تنامي أو تختفي شوية… من غير ما حد يسألك "مالك؟"
بتحاولي تضحكي... بس كل حاجة تقيلة.
حتى الحاجات اللي كنتي بتحبيها، بقيتي بتعمليها وانتى مضغوطة ومتألمة ومش طايقة نفسك.

لو بتعدي بالحالة دي، فـ أنا عايزة أقولك:
إنتي مش غريبة، ومش لوحدك، وده ليه اسم هو 👇
*متلازمة الاحتراق النفسي*

🧯 إيه هو الاحتراق النفسي؟
هو حالة بتوصلي فيها لإجهاد نفسي وعقلي وبدني بسبب الضغوط المستمرة، وتراكم المسؤليات، وعدم وجود وقت لنفسك ولا مساحة تتنفسي فيها.

بتكوني طول الوقت في وضعية:
لازم أكون قوية، لازم أخلص، لازم أتحمل، لازم أعدي…
لحد ما بيجي وقت بتنهاري فيه بهدوء… ومحدش بيلاحظ.

طيب نبدأ منين علشان نخرج من الدوامة دي؟

🤍 خطوات صغيرة، لكن بتفرق:

1. اسألي نفسك كل يوم: أنا محتاجة إيه دلوقتي؟
(راحة، أكل، مشي، فضفضة، نوم… اسمعي جسمك وقلبك)

2. فضّفي مشاعرك على ورقة حتى لو بكلام مش مترتب، المهم تطلعي اللي جواكي.

3. وقت لنفسك كل يوم حتى لو 10 دقايق من غير تليفون، من غير مسئوليات.

4. قولي لأ عند اللزوم. مش كل حاجة لازم تعمليها دلوقتي، ومش كل طلب لازم يتنفذ فورًا.

5. شاركي مشاعرك مع حد بترتاحى فى الكلام معاه...
ولو مفيش، أنا هنا معاك ♥️ اكتبيلي في الكومنت أو رسالة

الست اللي بتاخد بالها من نفسها، مش أنانية… دي حكيمة.
اهتمي بنفسك… عشان تفضلي قادرة تحبي وتدي بحب.

15/07/2025

في آية دايما بستوقف عندها وبتأكدلي قد ايه ربنا خلق كل حاجة بحكمة ربنا قال فى كتابه الكريم
"فطرة الله التي فطر الناس عليها لا تبديل لخلق الله"

يعني كل واحد فينا اتخلق بفطرة ربنا زرعها فيه، لا تتغير ولا تتبدل، لأنها جزء من نظام الكون اللي ماشي بانسجام.

الراجل ليه طبيعة وفطرة، والست ليها طبيعة وفطرة.
الراجل فطر على القيادة، القوة، السعي، الحماية.
والست فطرت على اللين، الاحتواء، الحنية، الرقة، والجمال.

لما كل واحد فيهم يعيش فطرته زي ما ربنا خلقه، الدنيا بتمشي بسلاسة.
لكن لما نحاول نغير ده، ونلبس بعض أدوار مش بتاعتنا، بنبعد عن طريق ربنا ونبدأ نحس بخنقة، وتوهان، وصراعات ملهاش آخر.

الفطرة مش ضعف
ولا الرجوع ليها رجعية
دي رجوع للأصل.. رجوع للراحة

فخليكي أنثى زي ما ربنا خلقك
وخليك راجل بمعنى الكلمة زي ما ربنا قصدك
وصدقني وصدقيني
مفيش راحة في إننا نبقى نسخة مشوهة من فطرة ربنا.

13/07/2025

رأيى المتواضع فى شخصية "مسعد" من مسلسل فات الميعاد
إصرار مسعد على حضانة بنته مش حب حقيقى..
اللى بيحب مش بيكسر.. واللى خايف على ولاده مش بيهدد أمانهم.
اللى بيحصل من مسعد هو رغبة فى الانتقام من ريم مش أكتر، عارف إنها بتتعلق ببنتها، وعارف إن دى نقطة ضعفها،
واستخدم ده ضدها.. مش معاها.
💔 الحب مش لعبة قوة..
ولا وسيلة تأديب للطرف التانى،
الحب الحقيقى بيشوف:
"فين مصلحة بنتى؟ فين الأمان اللى هتنمو فيه؟"
دى بنت صغيرة، عايشة فى حضن أمها، مستقرة، متعلمة، متربية كويس،
هتاخدها ليه؟
هتعيشها إزاى؟
إنت حتى مش ثابت فى شغلك،
ولا ضامن أسلوب حياتك،
إثبت.. وكوّن نفسك،
والبنت لما تكبر وتشوفك راجل واعى وسوى وخايف عليها فعلاً،
هى اللى هتيجى لك،
لكن لما تاخدها دلوقتى، هتشوفك إزاى؟
👎🏼 اللى بيحب ابنه أو بنته، ما يحرمهمش من الأمان علشان "يربح معركة" لأن الأبوة مش خصومة، ولا ساحة حرب.

🎯 رسالتى لكل أب فى نفس الموقف:
ما تخليش مشاعرك ناحية أم أولادك تطغى على مصلحتهم..
فكر فى أولادك بقلوبهم مش بقلبك إنت..
هم مش وسيلة ضغط ولا نقطة ضعف..
هم أمانة.

ًا

13/07/2025

فى مسلسل فات الميعاد شوفنا نموذجين للأب السوى..
أبو بسمة، وأبو عاصم..
👈أبو بسمة مكانش كتير الكلام، لكنه كان كبير فى حضوره وحكمته.. فى عز الوجع، كان هو مصدر الأمان..
شاف قهر بنته، حس بيها، ما حاولش يدفن إحساسها أو يضغط عليها ترضى اللى مش شبهها..
حطها فى عينه، وسندها بعقله وقلبه..
هو اللى قدر ينقذها من الغرق وسط علاقة مسمومة،
مش لأنه شديد، لكن لأنه سوي.. وواعى.. ومحب.

👈أما أبو عاصم، شوفنا نوع تانى من الأب السوى:
اللى بيحترم خصوصية ولاده،
اللى مش بيقحم نفسه فى تفاصيلهم الصغيرة،
لكن لما يطلبوه، بيلاقوه..
بيدى رأى، بيساعد، وبيبقى فرحان لما يشوفهم فرحانين.
الأب اللى بيعرف إن أولاده مش ممتلكات.. دول بشر ليهم اختياراتهم، ودوره مش يسيطر، لكن يوجه بمحبة.

👵🏻 فى نفس المسلسل.. شوفنا عبلة، أم مسعد.
الست اللى افتكرت إن الأمومة معناها التحكم والتبرير والضغط العاطفى، ربت ابنها على الخضوع ليها مش لصالحه،
ودفعت تمنه هى وهو وبنته.

❗الفرق بين الأب السوي والأم المتسلطة كان واضح:
الأب الواعى بيطلع ولاد عندهم أخلاق واختيارات سوية.
الأم المتحكمة بتزرع الخوف، وعدم المسؤولية، والاعتماد على رضاها مش على ضميرهم..
👨‍👧‍👦 الأب مش دوره يختفى، ولا يكون قاسى ..
الأب دوره يكون حاضر بحب ووعى وحكمة..
تحية من القلب لكل أب بيختار يكون داعم، مش حاكم..
سند، مش سجن.

13/07/2025

رسالتك اليوم 👇
تغيير تفكيرك يمكن أن يغير حياتك بالكامل 👍

13/07/2025

ربنا قال فى كتابه الكريم
لقد خلقنا الإنسان في أحسن تقويم ده توكيد من رب العالمين لخلقه...
يعني إيه أحسن تقويم؟
يعني انتي مخلوقة على هيئة متوازنة، متكاملة، جميلة من كل النواحي
جسمك، عقلك، مشاعرك، روحك... كل حاجة فيك مصممة بحكمة...
يعني مش ناقصك حاجة علشان تكوني كافية.
مش محتاجة تقلدي حد، ولا تتغيري علشان حد يرضى.
أنتي فيك كل عناصر الجمال والذكاء والإبداع... جواكى..
ربنا ما خلقكيش بنقص، ولا عيب، ولا قليلة
خلقك في أحسن صورة، وبأحسن ترتيب…
بس أوقات بننسى، أو بنصدق اللي حوالينا لما يشككونا في نفسنا.
فكل ما تقفي قدام المراية، افتكرى تقولى لنفسك
أنا مخلوقة في أحسن تقويم… ومش بس شكلي، ده كياني كله...

08/07/2025

سعيدة بحضورى مؤتمر ملتقى الناجحين
"سيدة التأثير " بالنفع والتوفيق يارب العالمين

08/07/2025

خلي بالك من (عقلية المنقذ)…
لما تبقى دايما حاسة إنك لازم تنقذي ،تساعدي، تشيلي مشاكل الناس على حساب نفسك…
لما تحبي شخص تعبان نفسيا وتحسي إنك انتي الوحيدة اللي تقدري تعدليه…
لما تسكتي على التعب والإهمال علشان انتي فاهمة ظروفه…
لما تعتقدي إن حبك هيغيره، وإنك لو صبرتي أكتر هيبقى أحسن… ده مش حب، ده تعلق بعقلية المنقذ…
ودى مرهقة جدا وفيها استنذاف لطاقتك ...
لأن الحقيقة؟
اللي مش عايز يتغير مش هيتغير،
واللي مش بيختار يساعد نفسه، عمرك ما هتعرفي تساعديه.
اختاري شريك واعي مش محتاج منقذ…
اختاري علاقة فيها مشاركة مش إنقاذ.
اختاري صحتك النفسية الأول 👏

سماح عماد-Samah Emad

22/09/2025

05/08/2025

26/07/2025

24/07/2025

24/07/2025

15/07/2025

13/07/2025

13/07/2025

13/07/2025

13/07/2025

08/07/2025

08/07/2025

Address

Opening Hours

Telephone

Website

Alerts

Shortcuts

Share

Category

Monday	9am - 10pm
Tuesday	9am - 10pm
Wednesday	9am - 10pm
Saturday	9am - 10pm
Sunday	9am - 10pm