01/01/2026
حاجات تنور قلبك في 2026
1- جرب تنزل تصلي الفجر وتتمشى في الشارع وهو فاضي.. الهوا بتاع الوقت ده فيه "سر" مش موجود في باقي اليوم؛ ريحته بتغسل الصدر.
2- هات لك "سبحة" خشب (كوك أو يسر).. ملمس الخشب الطبيعي في الإيد بيمتص التوتر، وكل ما تعتق معاك وتغمق كل ما هتحبها أكتر.
3- اشتري "راديو" صغير وحطه في المطبخ أو المكتب واضبطه على إذاعة القرآن الكريم.. صوت "الشيخ رفعت" مع شوشرة الإشارة الضعيفة بيعمل حالة "نوستالجيا" إيمانية بتطمن البيت.
4- اخلق لنفسك "خلوة" إجبارية.. اقعد في البلكونة بالليل (من غير موبايل) وبص للسما.. عد النجوم وكلم اللي خلقها.. قوله "أنا تعبت" هيرد عليك بـ "سكينة" ملهاش وصف.
5- السندوتش الزيادة اللي بتعمله وأنت رايح الشغل عشان تديه لغلبان.. ده مش أكل، ده "تأمين شامل" على يومك.
6- اشتري "عطر" نضيف.. واتعطر بيه قبل ما تنام.. الملايكة بتحب الريحة الحلوة، والأحلام بتبقى أروق.
7- اقرأ في سير الصالحين.. الناس اللي باعوا الدنيا واشتروا روحهم.. هتعرف إن الدنيا أتفه من إنك تحرق دمك عشان ترقية أو خناقة.
8- استنضف نوع الشاي والقهوة.. المزاج الرايق بيخليك تعبد ربنا بروقان.. العبادة مش محتاجة تكشيرة.
9- وسع على عيالك وأهلك في الأكل والفسح.. دي "صدقة" بتتحسب لك وأنت بتستمتع، ومعادلة ربانية مكسبها مضمون.
10- خلي ليك ورد من "الصلاة على سيدنا النبي" بأي صيغة تحبها.. دي "الاسانسير" اللي بيطلعك فوق لما السلالم تعطل.
11- بلاش تدعي بصيغة "الأوامر"؛
ادعي بصيغة "العبد المحتاج"
قوله "يا رب دبرها عشان أنا غلبت"
12- "جبر الخواطر" أهم من قيام الليل.. كلمة حلوة لحد مكسور بتبني قصور في الجنة.
13- اقرأ "الحكم العطائية".. كلام قليل بس بيعمل "دماغ" عالية، وبيفهمك قوانين التعامل عند ربنا.
14- افرح بالنعم.. جاكيت جديد، أكلة حلوة، قعدة حلوة.. {لئن شكرتم لأزيدنكم}.. الفرح بالنعمة شكر.
15- زور المقابر مرة كل فترة.. القعدة هناك بترتب الأولويات وبتعرفك إن الخناقة اللي أنت فيها دي ولا تسوى.
16- يقال: "كل ساق سيُسقى بما سقى".. اسقي حب اسقي خير اسقي جبر.. عشان لما تعطش تلاقي اللي يسقيك.
17- صاحب "القرآن" كأنه صاحبك الانتيم.. مش لازم تقرأ كتير بس لازم تقرأ "بانتظام" وبفهم.. آية واحدة "ترن" في ودنك طول اليوم كفاية.
18- "اليقين" عضلة.. كل ما تمرنها في المواقف الصعبة بتقوى.. ارمي حمولك عليه وجرب تسيب إيدك.. هيمسكك.
19- مشايخنا علِّمونا: "من وجد الله فماذا فقد؟".. لو حسيت بمعيتة، ولا يفرق معاك مين مشي ومين فضل.
انتهى.... منقول لكاتبه
نصحيتي الشخصية اللي هفضل مؤمن بيها كمعاذ
ازرعوا #الحب و #المودة تجنوا #السعادة #
Moaz Ali Pasha
moazalipasha
وكل عام وأنت بخير يا صديقي
