11/11/2025
في كتاب جميل اسمه " أكثر خمس أشياء ندم عليها الناس علي فراش الموت "
"The Top Five Regrets of the Dying" للكاتبة الأسترالية Bronnie Ware، بتحكي عن تجربتها كممرضة كانت بتقضي وقتها مع الناس في آخر أيام حياتهم علي فراش الموت , يبان كتاب قاسي عن الموت و لكنه الحقيقة هو عن الحياة نفسها.
كانت بتسمع حكاياتهم وتسألهم سؤال بسيط لكنه موجع:
“لو الزمن رجع بيك… كنت هتغيّر إيه؟”
الغريب إن أغلبهم قالوا حاجات مشتركة تقريبًا.
الندم كان مش على الفشل، ولا على القرارات الغلط و لا عشان ما بقتش ال CEO أو ما اخدتش الدكتوراة أو ما جبتش الفيلا.
الندم كان على الحياة اللي ما عاشوهاش زي ما كانوا نفسهم يعيشوها.
👇 أكتر خمس حاجات ندموا عليها كلهم اللي كانوا بيتكلموا عنها:
1️⃣ "I wish I’d had the courage to live a life true to myself, not the life others expected of me."
"يا ريت كنت عشت الحياة اللي أنا عايزها، مش اللي الناس كانت متوقعة مني."
كتير بنمشي في طريق الناس رسموه لينا الناس و السوشيال ميديا ، المجتمع، التوقعات وننسى نفسنا في النص. لحد ما نكتشف متأخر إن حياتنا ما كانتش بتاعتنا كانت صور عايزين نتصورها مش أكتر
2️⃣ "I wish I hadn’t worked so hard."
"يا ريت ما كنتش اشتغلت كتير قوي كده ."
الشغل مهم، بس لما ياخد منك وقتك وصحتك ووجودك مع اللي بتحبهم، بيبقى تمنه غالي. النجاح نفسه زي ما فيه نجاح في الشغل في نجاح أخر بننساه مع نفسنا و عائلاتنا .
3️⃣ "I wish I’d had the courage to express my feelings."
"يا ريت كنت عبّرت عن مشاعري."
الخوف من الزعل أو الرفض بيخلينا نكتم، بس ساعات بنحتاج نتكلم زي ما ساعات بنحتاج مانقولش حاجة , في الحالتين محتاجين نكون فاهمين احنا حاسين بإيه و نعبر بيه حتى لو لنفسنا .
4️⃣ "I wish I had stayed in touch with my friends."
"يا ريت كنت تواصلت أكتر مع أصحابي."
الوقت بيعدي، وكل واحد بيغرق في حياته، بس العلاقات القديمة دي بتسندنا أكتر مما بنتخيل. كل مالزمن بيعدي بتعيد ترتيب أولوياتك من جديد و بوصلتك بتتغير من انجازات علي الورق و شهادات لانجازات في الحياة و في الناس و بتعرف انها الاهم .
5️⃣ "I wish I had let myself be happier."
"يا ريت كنت استغليت الوقت لنفسي أكون سعيد ."
ناس كتير كانت مستنية اللحظة المثالية عشان تفرح، لحد ما العمر خلص. السعادة مش لحظة بتيجي، مهمة بعد مهمة و شهادة بعد شهادة و فترة بعد فترة و في النهاية السعادة المنتظرة بتتأجل و ما بتجيش .
الكتاب في الحقيقة مش عن الموت…
هو عن الحياة.
عن إنك تعيشها دلوقتي بطريقة تخليك لما تيجي تبص ورا، ما تندمش.
