11/05/2026
من فترة كنت خبطت ضافري خبطة جامدة جدًا لدرجة انه اتكسر من نص اللحم والله كان وجع بشع كنت كل ما ألمسه أحس بوجع وحش اوى فضلت كام يوم مش عارفة أعمل إيه لا قادرة أقصه كله ولا قادرة أشيله والجزء اللي متعلق ده كان أكتر جزء بيوجعني 😭
وكل شوية كنت ابصله واقول اخلص منه وخلاص كنت مستعجلة اشده بعنف مره واحده و ارتاح !
بس كل مرة أحاول الوجع يزيد وأحس إني لو كملت هجرح نفسي أكتر فسيبته رغم إني كنت متضايقة ومستعجلة اشيله و اخلص
عدى يومين بدأ يطلع لوحده وكل شوية أقص جزء صغير بهدوء ولقيته بيتشال لوحده بسهولة جدًا من غير الوجع و لا مجهود منى
وقتها قعدت أبص لضافري و افكر احنا بنعمل كده مع نفسنا كتير أوي 🤔
بنستعجل نطلع من الوجع بسرعة ننسى بسرعة نتخطى بسرعة نقوم نفسنا بالعافية ونضغط على قلبنا علشان “يخف” مع إنه لسه مجروح وندخل علاقات بسرعة، أو نجبر نفسنا “نبقى كويسين” قبل ما نهدى فعلًا
📌بس الحقيقة إن في وجع لو شديناه بالعافيه هيوجعنا و يكسرنا اكتر فى حاجات كل اللي محتاجاه مننا شوية وقت ، وشوية هدوء ،وشوية رحمة بنفسنا
ومن يومها فهمت إن التعافي مش معركة لازم أكسبها بسرعة و أوقات بيكون مجرد إني أسيب الجرح يهدي لوحده 👌🏻♥️
📌 مش كل حاجة تتصلح بسرعة وفي جروح لو استعجلنا عليها نفتحها أكتر ، أوقات الرحمة بنفسك إنك تسيب الوقت ياخد دوره.
🤍 خفّ على نفسك التعافي مش سباق 👌🏻
