https://www.facebook.com/104828518853310/

الدكتور محمد مصطفى مطر للغدد الصماء والباطنة والكلى والسكر, ابوحماد شرقية بجوار المزلقان الجديد فوق اتيليه مسيو عمرو, Abu Hammad al Mahattah (2026)

17/04/2026

📢 آنسة عمرها 21 سنة جت العيادة تشوف عندها مشكلة في الغدد والهرمونات ولا ايه بالظبط لأنها بقالها فترة بتعانى من مشاكل صحية وبتروح تكشف تقريبا فى معظم التخصصات من جلدية ونساء وباطنة بالإضافة للتغذية و الريجيم ‼️
📌هى جاية تشتكى إن وزنها زائد وكمان عندها حالة من الهبوط والإعياء بتحصل ليها بعد الأكل مع إحساس مستمر بالرغبة فى تناول السكريات والحلويات .
✏️ بالفحص وجدنا زيادة محيط البطن مع وجود دهون بالكبد مع ظهور بقع داكنة حول الرقبة وزوايد جلدية .
📌 سألناها عن انتظام الدورة الشهرية قالت إنها غير منتظمة وكتير جدا بتقطع بالشهور وأحيانا بعض الشعر الزائد فى أماكن غير مرغوب فيها مع تساقط شعر الرأس.
📌 طلبنا منها تعمل فحوصات تحاليل وأشعة وجت تعرض عليا نتائج الفحوصات لقينا تحليل الغدة الدرقية كويس ولاحظنا ارتفاع فى هرمون الذكورة وهرمون DHEA-S
مع ارتفاع شديد فى الدهون الثلاثية والكوليسترول وازدياد فى نسبة السكر التراكمي عن المعدل الطبيعي .
والأشعة أظهرت وجود تكيسات بالمبايض مع وجود دهون كثيفة حول الكبد ‼️
📌 البنت دى عندها متلازمة تكيس المبايض ومقاومة الأنسولين ودى شائعة جدا جدا عند البنات والسيدات وبتلخبط الهرمونات والدورة الشهرية وبتسبب زيادة هرمونات الذكورة وظهور الشعر الزائد فى أماكن غير مرغوب فيها مع تساقط شعر الرأس وظهور بقع سوداء وداكنة حول الرقبة والإبطين مع زوائد جلدية وكبد دهنى وتراكم الدهون بالبطن والشعور المستمر بالرغبة فى تناول السكريات والحلويات .
📌 طيب يا دكتور ايه هى متلازمة مقاومة الأنسولين ؟❓
✏️ بداية لازم نعرف إن الأنسولين هرمون بيفرز من البنكرياس ووظيفته يدخل السكر والأكل اللي بيتحول لسكر زى النشويات (العيش والأرز والمكرونة والبطاطس) بيدخلهم داخل خلايا الجسم علشان الجسم ياخد الطاقة ولكن مع زيادة تناول السكريات والنشويات يبدأ البنكرياس يفرز انسولين أكتر ولكن خلايا الجسم مش قادرة تستقبل السكر لأن حجم السكريات بقى كتير جدا وعامل زحام شديد على مستقبلات الخلايا والخلايا مش عارفه تستفيد منه وهنا تبدأ مرحلة مقاومة الأنسولين والإحساس المستمر بالرغبة فى تناول السكريات والحلويات مع الشعور بالهبوط لأن خلايا الجسم مش عارفه تستفيد من السكر لكثرته المبالغ فيها ويفضل البنكرياس يفرز انسولين لعند ما يحصل ليه إجهاد ويقل إفراز الأنسولين ويحصل مرض السكري ولكن قبل المرحلة دى الدهون تتراكم في الجسم وخاصة محيط البطن وتبدأ التغيرات تحدث على شكل الجسم من ظهور بقع داكنة وزوايد جلدية وتكيسات المبايض واضطرابات الدورة الشهرية وغيرها من الأعراض .
📌طيب الحل ايه يا دكتور ؟❓
✏️ الحل هو التوقف عن تناول السكريات والحلويات والعصائر والمياه الغازية وتقليل النشويات وتناول الخضروات والبروتينات واتباع نظام غذائي صحي وممارسة الرياضة أبسط شىء المشى يوميا حتى لو داخل البيت مع بعض الأدوية التى تحسن استجابة الخلايا للسكر .
📌 طيب يادكتور فيه تحليل منتشر اسمه HOMA IR وبيطلب كتير هل هو مناسب وكافى للتشخيص ؟❓
✏️ للأسف التحليل منتشر على إنه بيشخص مقاومة الأنسولين ولكن غير دقيق وكمان احنا كل اللى محتاجين نتابعه لتطور أعراض مقاومة الأنسولين هو السكر التراكمي والدهون الثلاثية والكوليسترول لكن مقاومة الأنسولين بتتشخص بالفحص الطبي والأعراض الظاهرية .
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
٠١٥٥٠١٤٤٢٩١
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

27/03/2026

📢 شاب عنده 35 سنة دخل العيادة جاى مع حد من قرايبه تبدو عليه علامات التوتر العصبى والهزال وايديه بتترعش ونظرات عينيه حادة💔
📌 أول ما قعد قلت ليه انت بتاخد علاج للغدة النشطة من امتى ؟❓ استغرب هو وقريبه من السؤال وقال يادكتور انا بقالى كام سنة ماشى على علاج دكاترة النفسية والعصبية وكانوا عايزين يبعتونى اتحجز فى المستشفى النفسى علشان مش مستجيب معاهم للعلاج وفى الاخر طلبوا تحاليل كتير من ضمنهم تحليل الغدة الدرقية واكتشفوا بعد السنين دى إن السبب الأساسى للعصبية الشديدة ورعشة الأعصاب اللى مبتبطلش وقلة النوم وغيره من الأعراض اللى باشتكى منها إن الغدة الدرقية عندى نشطة جدا وهى اللى تاعبانى السنين دى كلها واحنا مش عارفين !!‼️
📌 طبعا الحالة دى كانت جاية متشخصة لوحدها بس الغريب جدا إن حالة الشاب ده اتشخصت متأخر جداً لأن الشاب من شدة العصبية اللى كان فيها كان ممكن يكسر أى حاجة ويتخانق مع أى حد علشان كدة أهله كانوا بيعالجوه عند دكاترة النفسية والعصبية وأحيانا كانوا بياخدوه لمعالج روحاني لما ما يلاقوش نتيجة فى العلاج النفسى والتوتر العصبى الشديد !!‼️
📌 تشخيص الحالة دى كانت مرض جريفز المناعى وللأسف كان نسبة نشاط الغدة الدرقية عنيف وزايد جداً جداً لدرجة إنها تسببت فى اضطرابات عصبية شديدة للشاب ده ‼️
📌 أحيانا الإنسان يبقى عنده مشكلة ما ولكن لم يحن الوقت لعلاجها لأنه للأسف الشديد بيسلك الطريق الخطأ من البداية لحل مشكلته أو تشخيص مرضه 💔
📌 أحيانا كتير الحل بيبقى بسيط جدا ولكن فى حاجة على عينينا بتجعلنا فى غفلة عنه ومش قادرين نشوفه
علشان كدة دور التوعية مهم جدا للناس خاصة الناس البسطاء اللى مش عارفين يروحوا لتخصص إيه يعالج مشكلاتهم ‼️
📌 على النقيض تماماً تأتى سيدة فى الأربعينات من عمرها بتعانى من اكتئاب شديد وصعوبات فى النوم ووساوس واضطرابات فى الذاكرة وشرود ذهنى وميل للوحدة والعزلة وعدم الرغبة فى الاجتماعيات والاختلاط بالناس مع كسل إنها تقوم بمتطلبات بيتها لنكتشف أنها تعاني من خمول بالغدة الدرقية أثر على الجانب النفسى عندها ‼️
📌 فى الحالتين اللى ذكرناهم سواء التوتر العصبى الشديد بسبب نشاط الغدة الدرقية أو الاكتئاب بسبب خمول الغدة الدرقية لما بدأوا علاج والتزموا بالجرعات الصحيحة استجابوا جدا للعلاج والاعراض تحسنت كثيرا عندهم .🙏
📌 فحص هرمونات الغدة الدرقية لأى شخص يعانى من عصبية شديدة أو اكتئاب مهم جدا قبل البدء فى العلاج النفسى.
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

09/03/2026

📢 حالتين مروا على العيادة في أيام مختلفة وتقريبا السبب واحد
🟣 أول حالة كانت سيدة 45 سنة معندهاش ضغط ولا سكر ولا أى مشاكل صحية وزنها زائد شوية جت تشتكى من تورم بالقدم اليسرى مع ألم بالساق فحصنا الحالة كويس وجدنا التهاب خلوى بالساق اليسرى وتبين وجود دوالى بالساق طلبنا منها فحص أشعة دوبلر على أوعية الساقين مع تحاليل وجت النتائج لتؤكد تكوين جلطة بالأوعية الدموية العميقة بالساق وجت نتائج التحاليل كويسة ولكن لوحظ ارتفاع نسبة D.dimer نتيجة حدوث الجلطة مع ارتفاع شديد بنسبة الكوليسترول خاصة الكوليسترول الضار LDL بشكل ملفت للنظر .‼️
📌 بدأت علاج بمضادات التجلط ومضادات الالتهابات وعلاج خافض للكوليسترول والحمد لله تحسنت جدا خلال اسبوع
✏️ والجدير بالذكر إن حالات جلطات أوعية الساقين عرضة لتكرار حدوث الجلطة خاصة مع وجود وزن زائد ودوالى الساقين وهى شائعة وكمان بنبه على خطورة جلطة الساق لأنها لو لم تكتشف بتكمل طريقها إلى الرئتين وتسبب جلطة بأوعية الرئتين والشريان الرئوى وتؤدى إلى الوفاة وعلشان نتفادى حدوثها لازم نكمل على مضادات التجلط وعلاج خافض للكوليسترول باستمرار مع المشى وتقليل الوزن واتباع نظام غذائي سليم.
🟣 الحالة الثانية كانت لشاب عنده حوالي 36 سنة لا يدخن ولا يعانى من أمراض مزمنة ووزنه كويس مش زائد جه العيادة يشتكى من ألم شديد بفم المعدة وحرقان بالصدر مع قيئ وهبوط وإعياء
تم فحصه وطلبنا منه يعمل رسم قلب وتحاليل وفوجئنا بوجود جلطة حادة بالشريان التاجى للقلب ونتائج التحاليل وجدنا فيها ارتفاع نسبة انزيمات القلب وارتفاع شديد بنسبة الكوليسترول في الدم خاصة الكوليسترول الضار LDL . تم تحويله لعناية القلب لعمل قسطرة وإذابة الجلطة .
🟣 كمان من الحالات الشائعة جدا الناس اللى بيشتكوا من دوخة مستمرة ودوار بدون أسباب فى الأذن أو العين بعدها نكتشف إن ارتفاع الكوليسترول عندهم هو السبب فى قصور الدورة الدموية الدماغية والدوخة المستمرة
📌 السبب الخفى للنهجان والدوخة والسكتات القلبية أو الدماغية وحدوث الجلطات الدموية اللى بتسبب الموت المفاجئ هو الكوليسترول ومعظم الناس عندهم ارتفاع نسبة الكوليسترول في الدم وللأسف ما بيتعالجوش منه ولا بيتابعوا
📌 مرضى السكر لازم يتابعوا نسبة الكوليسترول وتوصى المنظمات الصحية بأن مريض السكر لازم يمشي على علاج خافض للكوليسترول باستمرار
📌 أيضا مرضى الكلى والاعتلال الكلوى مهم جدا متابعة الكوليسترول معاهم
📌 كمان مرضى خمول الغدة الدرقية غالبا بتبقى نسبة الكوليسترول مرتفعة عندهم وتسبب النهجان والدوخة
📌 أغلب الناس بقى عندهم مشكلة كبيرة خفية وهى ارتفاع معدل الكوليسترول بالدم نتيجة الزيوت المهدرجة والمشبعة والوجبات السريعة والحلويات والزيوت النباتية زى زيت النخيل بالإضافة إلى زيادة الوزن والأكل الغير صحى والتدخين لذلك ننصح بالأكل اللى بيقلل نسبة الكوليسترول الضار زى السمك المشوي والبقوليات والخضروات والفواكه والمكسرات وزيت الزيتون .
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
٠١٥٥٠١٤٤٢٩١
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

09/01/2026

📢 ٱنسة عندها ٢١ سنة بقالها فترة تعانى من هبوط بالدورة الدموية وانخفاض بضغط الدم لدرجة ممكن تفقد الاتزان والوعى أحيانا مع تسارع بضربات القلب وبرودة بالأطراف وصداع وأحياناً قيئ واضطرابات في الجهاز الهضمي.
📌 هى اتعودت كل ما ضغطها ينخفض إنها تعلق محلول ملحى ويضاف ليه حقن وبعد كذا يوم ترجع ليها الدوخة والهبوط من تانى .‼️
📌 زارتنى النهاردة فى العيادة وهى يبدو عليها الإعياء والهبوط الشديد لقينا ضغط الدم منخفض جدا حوالى 70/50
وبالفحص وجدناها بتشتكى من سرعة ضربات القلب وصداع وبرودة بالأطراف وميل للقيئ واضطرابات بالجهاز الهضمي وآلام بالجسم ووهن بالعضلات مع ظهور بعض التصبغات الجلدية.
📌 قررنا نعطيها محاليل وريدية وعلاج تمشى بيه علشان يحسن الضغط شوية ويقلل الأعراض اللى بتشتكى منها لعند ما تعمل الفحوصات اللى طلبتها منها .
✏️ جت تعرض عليا نتائج التحاليل وجدنا نقص شديد فى نسبة الكورتيزون الصباحي والمسائى مع انخفاض فى نسبة الصوديوم والجلوكوز فى الدم
ولكن وجدنا ارتفاع فى نسبة الهرمون المحفز لإفراز الكورتيزون وهو هرمون الغدة النخامية ACTH .‼️
✏️ بعد عمل مزيد من الفحوصات الدقيقة للبنت وجدنا إن عندها خلل فى الغدة الكظرية اللى مسئولة عن إفراز هرمون الكورتيزون ما يسمى بمتلازمة أديسون Addison وده نوع من الأمراض اللى بتصيب الغدة الكظرية اللى فوق الكلى وينتج عنها نقص في إفراز هرمون الكورتيزون وظهور حالة الإعياء والهبوط وآلام الجسم والعضلات واضطرابات المعدة والجهاز الهضمي .
📌 بدأت علاج تعويضى للهرمون وعلاج لضبط مستوى العناصر بالجسم وبعد فترة حوالى أقل من شهر بدأت الأعراض تتحسن تماما والحالة الصحية لها بقت أفضل من الأول.‼️
📌 جدير بالذكر إن متلازمة أديسون أو نقص هرمون الكورتيزون موجودة بالفعل فى أوساطنا ولكن متفاوتة في الشدة والخطورة بين المصابين بها وتحدث غالبا بسبب مهاجمة المناعة الذاتية للغدة الكظرية الموجودة فوق الكلى وتسبب نقص في إفراز هرمون الكورتيزون وبالتالى تحدث الأعراض اللى وجدناها مع حالة البنت دى .
✏️ مريض أديسون لازم يتجنب التوتر الشديد والعدوى قدر الإمكان لأن حالته بتتدهور أكثر أثناء العدوى الشديدة والتوتر العنيف.
📌 محتاجين نعرف إيه اسباب انخفاض ضغط الدم علشان نقدر نعالجها .
✏️ الغالبية من الناس اللى عندهم انخفاض بضغط الدم بيكون لعوامل وراثية أو نفسية مع التوتر والقلق والصدمات النفسية بيحدث انخفاض بضغط الدم .
🟣 سوء التغذية ونقص المعادن والفيتامينات يسبب إنخفاض بضغط الدم .
🟣 الجفاف وفقدان السوائل والعناصر من الجسم يسبب إنخفاض بضغط الدم .
🟣 أمراض القلب والأوعية الدموية تسبب انخفاض ضغط الدم .
🟣 العصب الحائر وتأثيره القوى على ضغط الدم .
🟣 مشاكل الكبد والكلى احيانا تسبب انخفاض ضغط الدم .
🟣 بعض العلاجات والأدوية تسبب انخفاض ضغط الدم .
🟣 الحساسية الشديدة لبعض الأدوية أو المأكولات تسبب انخفاض ضغط الدم.
🟣 العدوى الشديدة تسبب انخفاض ضغط الدم وده شائع دائما مع الإصابات الفيروسية والعدوى البكتيرية الحادة.
📌 رسالتي للناس اللي بيشتكوا من هبوط مستمر بالدورة الدموية وانخفاض بضغط الدم إنهم لازم يعرفوا إيه السبب اللى يؤدى إلى إنخفاض ضغط الدم لديهم علشان يستبعدوا المشكلات الصحية الجسيمة اللى ممكن تكون السبب فى التعب المتكرر عندهم.
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

29/12/2025

📢 بنت صغيرة حوالى 12 سنة والدتها جابتها العيادة وقلقانة جدا من اللى بنتها بتشتكى منه الفترة اللى فاتت .
🖍️ ألف سلامة البنت بتشتكى من ايه ؟❓
✏️ الله يسلمك يا دكتور هى بقالها حوالى شهر بتشتكى من كثرة دخول الحمام للتبول بصورة ملفتة للنظر لدرجة إنها بالليل وهى نائمة مبقتش بتتحكم فى المثانة أثناء النوم والموضوع بقى متكرر واحنا خايفين من مرض السكر لأن العائلة معظمهم مرضى بالسكر .
🖍️ طيب حضرتك عملتى ليها تحاليل سكر ؟❓
✏️ اه يادكتور احنا كشفنا عليها والدكتور طلب نعمل تحاليل سكر وبول ولقينا معندهاش مشكلة في السكر ولكن لقينا نسبة صديد والتهاب بمجرى البول والدكتور طلب مزرعة الصديد وكتب ليها علاج ولكن مفيش نتيجة لسة بتدخل الحمام كتير ولسة ما بتتحكمش فى البول أثناء النوم .‼️
📌 بعد سماع شكوى الأم بدأنا نفحص البنت وسألتها عن حجم وكمية البول اللى بتنزل منها كل ما تدخل الحمام قالت إنها كمية كبيرة كل مرة‼️ سألناها عن أكل الأملاح وشرب المشروبات اللى بتسبب كثرة إدرار البول زى الشاى والقهوة والصودا قالت إنها منعتهم ومنعت الأملاح علشان الموضوع يتحل وبرضه مفيش فايدة ‼️
🖍️ سألت الأم عن الجانب النفسي للبنت هل حد بيخوفها أو بيضربها أو بتزعل أو عندها أى اضطرابات نفسية قالت مفيش مشاكل إطلاقاً معاها .
📌طلبنا نعيد التحاليل تانى ونشوف تحليل البول علشان التهابات مجرى البول ونسبة الصديد وجت النتائج كويسة فى تحليل السكر بالدم والبول ولقينا مفيش صديد أو املاح فى البول ولكن وجدنا إن تحليل البول فيه مؤشر مهم جدا وهو اللى كنت عايز أركز عليه علشان أتأكد من التشخيص وهو إن الكثافة النوعية للبول منخفضة بشكل ملحوظ ودى حاجة مرتبطة بمرض السكر الكاذب اللى بيحصل نتيجة نقص هرمون بالغدة النخامية بالمخ يسمى (ADH)
Anti Diuretic Hormone
📌 وطبعا اسمه سكر كاذب علشان بيعمل نفس أعراض مرض السكر الشائع زى كترة التبول والجفاف والعطش وفقدان الوزن وعدم التحكم فى البول أحيانا ولكن نيجى نحلل نسبة السكر في الدم والبول نلاقى نسبة السكر مظبوطة
السكر الكاذب مش شرط يحدث بسبب نقص هرمون ADH ممكن يحدث بسبب مشاكل في الكلى وأحياناً بسبب اضطرابات نفسية وتوتر زائد .‼️
📌 الحمد لله بعد التشخيص لحالة البنت بالسكر الكاذب بدأت فى العلاج واتحسنت تماما فى خلال فترة قصيرة..
🖍️ أطفال كتير أهاليها بتشتكى من عدم تحكم أبناءهم فى البول أثناء النوم وللأسف المشكلة بتستمر سنوات مع الأطفال وبتفضل معاهم بدون حل .
📌 برضه الحالة النفسية للطفل وإحساسه بالأمان بتأثر على التحكم فى البول ‼️
🖍️ فيه بعض الناس عندهم ما يسمى بالمثانة العصبية تخليهم كل شوية عايزين يدخلوا الحمام ويسبب ليهم إحراج خاصة لو خارجين أو فى سفر‼️
🖍️ كمان بعض كبار السن والناس اللى عندهم سكر بيشتكوا من ضعف فى المثانة وصعوبة في التحكم في البول .
📌الأسباب اللى بتأثر فى كثرة إدرار البول مختلفة من شخص لآخر وعلاجها بيختلف على حسب الحالة المرضية .
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

16/11/2025

📢 سيدة عندها 42 سنة عندها سكر من النوع التاني بتشتكى إن رجليها بتورم وجسمها بيتنفخ وكشفت كتير قبل كدة علشان تورم الجسم وعملت أشعات وتحاليل وظائف كلى ووظائف كبد وأشعة إيكو على القلب وأشعة تليفزيونية على البطن والحوض وأشعة دوبلر على الأوعية الدموية للساقين وكل حاجة كويسة وهى بتاخد مدر للبول علشان التورم يخف شوية ولكن بيرجع زى الأول ومفيش استجابة ‼️
📌 طلبت منها أشوف العلاج اللى بتاخده للسكر والضغط لقيت إن السبب الأول فى احتباس السوائل فى جسمها هو علاج السكر اللى ماشية بيه لأن للاسف النوع ده من العلاج ب يتسبب فى تورم الجسم مع المدى الطويل وهى طبعا ماشية عليه بقالها سنوات طويلة بدون تغيير .‼️
واحنا علشان الأمانة بنقول إن العلاج اللى فيه مادة بيوجليتازون مع طول مدة استخدام العلاج بيورم الجسم ويحبس السوائل ويزود الوزن ‼️
✏️ تانى حاجة سألتها حضرتك بتاخدى علاج للسكر بقالك كام ؟❓
قالت حوالى سبع سنوات قلت ليها عملتى تحاليل الاعتلال الكلوى قبل كدة ؟ ❓قالت انا بعمل وظائف الكلى وبتطلع كويسة !‼️
مش هو ده قصدك بتحاليل الاعتلال الكلوى يادكتور ؟❓
📌 قلت لأ هو آخر حاجة فى الاعتلال الكلوى هى تحليل وظائف الكلى ولكن أهم حاجة إن مريض السكر يفحص تحليل معدل ترشيح الكلى للبروتين فى البول لأن هى دى بداية الاعتلال الكلوى لمريض السكر ‼️
✏️ وبالفعل طلبنا منها تعمل التحليل وهو بالمناسبة تحليل بول ب نقيس فيه نسبة ترشيح البروتين في البول وليه معدل لو ارتفع عن 30 يبقى فيه ترشيح.
ولكن فوجئنا إن نسبة ترشيح البروتين عندها 2350 وطبعا ده رقم كبير وده للأسف الشديد هو السبب الرئيسي فى تورم جسمها وعدم استجابتها لمدرات البول لوحدها .‼️
📌 طلبنا نعيد تحليل نسبة الألبيومين والبروتينات فى الدم وجدنا إن النسب قليلة
✏️ بدأنا معاها بروتوكول علاجى مختلف بداية إن إحنا وقفنا علاج السكر اللى بتاخده وغيرناه لنوع آخر يناسب حالتها
🖍️ وثانيا اشتغلنا على علاجات تقليل ترشيح الكلى للبروتين.
📌 بعد شهرين جت العيادة والحمد لله تحسن ملحوظ جدا على مستوى تورم الجسم والوجه وعلى مستوى التحاليل قل جدا معدل ترشيح الكلى للبروتين فى البول .
📌 رسالتى لإخواتنا وحبايبنا مرضى السكر إنه ممكن حضرتك بتاخد علاج السكر يكون بيظبط السكر فعلا بس بيضر حاجة تانية ويكون غير مناسب لحالتك ‼️
📌 والرسالة التانية إن أى مريض سكر لازم يفحص الكلى ويشوف هل فيه بداية اعتلال كلوى ولا إيه كل 6 شهور او سنة على الأكثر لأن المدة الزمنية الطويلة للإصابة بمرض السكر وعدم التحكم فيه بيضر الكلى .
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

07/11/2025

📢 سيدة عندها حوالى 57 سنة زارتنا فى العيادة بتشتكى من سخونية وآلام فى الجسم والمفاصل وعرق وضربات قلب سريعة.
📌 راحت لكذا دكتور بنفس الأعراض ولسة برضه بتشتكى ومفيش تحسن .💔
📌 سألتها مالك يا أمى حضرتك بتشتكى من إيه ؟❓
✏️ قالت عندى سخونية بتروح وبتيجى ووجع فى جسمى ومفاصلى وعرق شديد وزهقت من اللف على الدكاترة والعلاج مضادات حيوية ومسكنات للألم والسخونية ومفيش فايدة كل شوية يكتبولى على محاليل فيها مضاد حيوي ومسكن اخدها والأعراض زى ما هى .‼️
📌 بعد ما سمعت شكوتها بدأنا الفحص نقيس الضغط لقيناه كويس !! ‼️نقيس درجة الحرارة لقيناها كويسة!!‼️ راجعت تحاليل كانت عملاها قريب الوظائف كويسة مفيش سكر وتحاليل الغدة الدرقية مظبوطة !!‼️
📌 حضرتك يا أمى بتشتكى من الأعراض دى بقالك قد إيه ؟❓
✏️ بقالى كذا سنة يا دكتور بس بتيجى على فترات ممكن تبقى فترات بعيدة وغالبا فترات قريبة .
📌 الدورة قطعت عندك من كام سنة ؟❓
✏️ قطعت عندى من زمان من عمر 45 سنة .
📌 طيب يا أمى خير انتى كويسة ومعندكيش حمى ولا سخونية ولا حاجة انتى عندك الهبات الساخنة اللى بتحصل للسيدات بعد سن اليأس وانقطاع الدورة الشهرية بتعمل معاكى احساس الصهد والسخونية والفوران والتعرق الشديد وضربات القلب السريعة ووجع المفاصل وللأسف حضرتك كل ما تروحى لحد من الدكاترة تقولى عندى سخونية ووجع فى جسمى ياخد بالشكوى ويتعامل على أنها حمى أو برد فى الجسم والمفاصل ويكتب مضاد حيوي ومسكن وبدون فايدة !!‼️
📌 حالة النهاردة لأم من أمهاتنا والاعراض اللى بتشتكى منها شائعة جدا ولكن للأسف أحيانا الأمور بتختلط ببعضها ولا نميز الفرق بين ادوار البرد والحمى وبين الهبات الساخنة اللى بتتشابه فى أعراضها احيانا مع ادوار البرد .‼️
📌 الهبات الساخنة هى شيئ شائع جدا عند أغلب أمهاتنا بعد انقطاع الدورة الشهرية وبتحصل بسبب نقص هرمون الاستروجين وينتج عنه أعراض السخونة والصهد والفوران والتعرق الشديد وآلام المفاصل وضربات القلب السريعة.
📌 اللى حصل مع هذه السيدة إن هى أخدت علاج تعويضى لنقص هرمون الاستروجين وعلاج يهدأ من حدة الأعراض وبعد أسبوع زارتنى فى العيادة وهى فى منتهى السعادة إن الأعراض اللى كانت تعباها ومزهقاها اختفت من غير ما تاخد مضاد حيوي أو مسكن أو محاليل زى ما هى اتعودت.‼️
📌 لازم نسمع شكوى المريض كويس علشان نعرف نشخص صح ونكتب علاجنا صح وربنا يكتب الشفاء على ايدينا .
📌 أسهل حاجة عند المريض إنه ياخد المسكن والمضاد الحيوي عمال على بطال وللأسف نلاقى بعد كدة مشاكل الكلى والكبد والمعدة بسبب التعود على المسكنات.
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

02/11/2025

📢 طفلة صغيرة حوالى 10 سنوات والدتها بتشتكى من إن بنتها مستواها فى التعليم بيقل وكل ما تحفظ حاجة تنساها ودايما المدرسين بتوعها بيشتكوا إن البنت شاردة ومش مركزة إطلاقا واستيعابها ضعيف جدا.⁉️
📌 والدتها عرضتها على دكتور مخ وأعصاب والبنت مازالت بتتأخر ومستواها بيضعف يوم بعد يوم.
📌 فحصنا البنت كويس وسألت والدتها كانت بتاخد علاج قبل كدة أو كانت بتعانى من حاجة ❓قالت مفيش مشاكل صحية معاها طلبنا منها فحوصات ولما ظهرت النتائج اكتشفنا إن البنت عندها خمول شديد فى إفراز هرمون الغدة الدرقية وهو السبب إن البنت عندها شرود فى الذهن وصعوبة شديدة فى التحصيل الدراسي .
بدأنا العلاج التعويضى لهرمون الغدة الدرقية مع بعض الفيتامينات والمكملات المنبهة للمخ والحمد لله بعد شهر من العلاج بدأت الأمور تتحسن كثيرا وبدأت تستجيب أكثر للتعلم .‼️
📌 طبعا ممكن نستغرب ازاى ممكن علاج الغدة الدرقية يحسن وظائف المخ والذاكرة والانتباه والإدراك ولكن ده فعلاً حقيقة ومثبت علميا ٠‼️
📌 والأسوأ من كدة حالة لبنت صغيرة 4 سنين والدتها بتاخد رأيى فى إن بنتها بقت حركاتها وتصرفاتها غريبة أشبه باللى عندهم تأخر عقلى سألتها البنت راحت لدكتور مخ وأعصاب يقيم حالتها ومستوى ذكاءها قالت الدكتور قالها إن الطفلة عندها فعلاً تأخر عقلى ومقياس الذكاء قليل عندها .⁉️
📌بسأل والدة الطفلة عملتى تحليل الغدة الدرقية ليها ؟❓ وفاجأتنى إن هى كانت بتاخد العلاج وهى صغيرة لأنها اتولدت عندها قصور في الغدة الدرقية ومشيت على العلاج لعند الغدة بقت مظبوطة وتابعت والدكتور قالها خلاص الغدة ظبطت وسيبنا العلاج.‼️
📌أنا نصحت والدتها إنها تعيد ليها تحاليل الغدة الدرقية لنفاجأ بأن الغدة خملت تانى بنسبة كبيرة وللأسف فضلت كام سنة من غير علاج على أساس إن الغدة ظبطت لعند ما أثرت على النمو العقلي عندها وسببت تأخر عقلى بقى ملحوظ وصعب تحسنه بالعلاج.
📌 أنا فى البوست ده بوصل رسالة لأولياء الأمور إن أحيانا يكون تأخر ولادنا فى التحصيل الدراسي وعدم قدرتهم على الاستيعاب ممكن يكون بسبب قصور الغدة الدرقية واحنا مش آخدين بالنا .
📌كمان بقول للناس اللى أطفالهم مولودين بقصور الغدة الدرقية إن ما ينفعش نسيب علاج الغدة الدرقية لطفل صغير فى مرحلة النمو علشان التحاليل بقت كويسة!!‼️ احنا ممكن نقلل الجرعات ممكن ناخد كذا يوم فى الأسبوع ونوقف باقى الأسبوع لكن نمنع العلاج تماما بحجة إن تحليل الغدة عند الطفل بقت مظبوطة ده خطأ فادح وجرم خطير فى حق الطفل علشان هيحرمه من النمو البدنى والنمو العقلى الطبيعى زى باقى الاطفال.
📌ونظرا للأهمية البالغة للغدة الدرقية عند الأطفال ، أول ما الطفل بيتولد بيتعمل ليه تحليل إجبارى للغدة الدرقية أثناء التطعيمات بيتاخد عينة من كعب الطفل بتتحلل بدقة شديدة ولو ظهر فيها مشكلة يبلغ والدى الطفل للمتابعة والعلاج.
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

18/10/2025

📢 آنسة 21 سنة عندها قصور في الغدة الدرقية من حوالي 5 سنوات وماشية على علاج تعويضى بهرمون الثيروكسن ووزنها كويس ونسبة الهرمون مظبوطة فى التحاليل بقالها مدة بتشتكى من نهجان وتقل فى النفس وضربات قلب سريعة مع المجهود لدرجة إن طلوع السلم والمشى بقى بيسبب ليها نهجان والموضوع ده من تكراره معاها بدأت تشوف إيه المشكلة وتعالج السبب .
📌 كتير من متابعى الغدة الدرقية غالبية متابعتهم فى عيادات الغدد الصماء عبارة عن ظبط مستوى الهرمون وجرعة العلاج ‼️ لكن الحقيقة الغدة الدرقية مش مجرد إن المريض يمشى على جرعة الهرمون مظبوطة وخلاص وإن الهدف اللى بيروح يتابع عيادة الغدد الصماء علشانه إن الهرمون يكون مظبوط ، لأ طبعا الغدة الدرقية بتأثيرها على كل الجسم ممكن تلاقى إضطرابات كتيرة وتكون الغدة هى السبب فيها ‼️
وده اللي حصل مع الحالة دى ، إن اكثر اسباب النهجان مع الغدة الدرقية هو إن خمول الغدة يسبب ارتفاع نسبة الدهون والكوليسترول الضار في الدم وترسيبها فى الشرايين ومع الوقت بيعمل مشكلة قصور شرايين القلب وممكن يؤدى إلى الذبحة الصدرية وجلطات القلب.‼️
📌الكوليسترول ممكن يبقى نسبته معقولة فى الدم لكن نسبة الكوليسترول الضار مرتفعة وده اللي بيرسب فى الشرايين ويسبب قصور في شرايين القلب والنهجان وطبعا علشان احنا الأكل بتاعنا بقى غير صحى زى مثلاً الزيوت النباتية اللى بنستخدمها فى القلى والطبخ وزى الدهون النباتية اللى موجودة فى أغلب أنواع الجبن وغيرها من الدهون المشبعة والمعجنات والحلويات ، تلاقى معظمنا عنده نسبة الكوليسترول الضار مرتفع. ‼️
📌النهجان معناه إن الواحد يحس بصعوبة فى التنفس مع تسارع ضربات القلب أثناء المجهود .
🖍️ غالبا بقى كتير جدا من الناس عندهم مشكلة النهجان متكررة مع المجهود ومحدش بيفكر إنه ممكن يكون ده عرض لحاجة مرضية عنده ومحتاج علاج .
🖍️ احنا لما بنمشى شوية أو نطلع سلم تلاقى حد مننا يبدأ ينهج ونفسه يقصر وده مع الوقت مش كويس .
📌 طيب ايه اللى ممكن يعمل نهجان يادكتور ؟❓
🟣 أكتر اسباب النهجان زيادة الوزن ومعاها بنلاقى إن الدهون والكوليسترول الضار بقى نسبتهم مرتفعة فى الدم وبتعمل النهجان مع المجهود
🟣 مشاكل فى القلب زى قصور الشريان التاجي و اضطرابات ضربات القلب ومشاكل الصمامات وضعف عضلة القلب
🟣 مشاكل الصدر زى الحساسية المزمنة والربو الشعبى وارتشاح الرئتين .
🟣 الأنيميا ونقص الكالسيوم بتعمل برضه نهجان مع المجهود .
🟣 التوتر العصبى والتعب النفسي بيسبب صعوبات تنفس ونهجان .
🟣 ارتفاع ضغط الدم وقصور وظائف الكلى والكبد .
🟣 الضغط المنخفض بيعمل نهجان وصعوبة في التنفس .
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

07/10/2025

📌 عيادة الدكتور محمد مصطفى مطر
استشارى الغدد الصماء والباطنة والكلى والسكر
استشارى الغدة الدرقية والسكر
عضو الجمعية الأمريكية والأوروبية للغدد الصماء
والكلى والسكر
الكشف بالأشعة التليفزيونية ورسم القلب الكهربى
-----------------------------------------------------------------------
📌 عيادة أبوحماد شرقية بجوار المزلقان الجديد أمام صيدلية د.أميرة الأعصر أعلى أتيليه مسيو عمرو يومياً
من الساعة 6 مساء حتى الساعة 10 مساء
للتواصل والحجز 📞
01270015676
------------------------------------------------------------------------
📌 عيادة الأسدية أبوحماد شرقية أمام كوبرى الشمايسة بجوار صيدلية د.عبد الباسط العقيد يومياً من الساعة 3.30 مساء حتى الساعة 5.30 مساء
للتواصل والحجز 📞
01004117614
------------------------------------------------------------------------

24/09/2025

📢أم من أمهاتنا الطيبين عندها حوالي ٥٨ سنة بتتردد على العيادة كل فترة تتابع الغدة الدرقية والأمور مستقرة والحمد لله .
📌هى عندها نشاط فى الغدة الدرقية وطبعا احنا فى حالات نشاط الغدة الدرقية بنمشى العيان على أقراص كاربيمازول أو البدائل وممكن العيان يكون النشاط زائد جدا ونحتاج إنه ياخد جرعات عالية من الدواء علشان نسيطر على زيادة إفراز هرمون الغدة الدرقية.
✏️بقالها أسبوع بتشتكى من دوخة شديدة وعدم اتزان وراحت كشفت أنف وأذن والدكتور كتب لها علاج للدوار والدوخة ومفيش تحسن .‼️
✏️النهاردة الست الطيبة دى دخلت العيادة بتشتكى برضه من دوخة شديدة وعدم اتزان مع أعراض قلة تركيز وفوران فى الجسم ورعشة فى الأعصاب ، وأنا بفحص الحالة الصحية بشوف الضغط والنبض والحرارة لقيت الضغط كويس والحرارة كويسة بس النبض هو اللى سريع ومش منتظم سألتها يا أمى حضرتك أخدتى علاج الغدة النهاردة قالت أنا بصراحة يادكتور معدتى وجعتنى من العلاج وبقالى اكتر من اسبوعين ما اخدتش العلاج !! ‼️
✏️الحقيقة شكيت فى شيئ ما وحبيت أتأكد منه عملت ليها رسم قلب وفعلا أكد التشخيص .
🖍️للأسف الحاجة كان الهرمون متظبط عندها على كذا قرص كاربيمازول مع اندرال لضبط معدل نبض القلب وهى لما تجاهلت العلاج لمدة أسبوعين أو أكثر ده تسبب فى زيادة مفرطة لنشاط الغدة الدرقية من جديد وبدأ الهرمون يزيد جدا فى الجسم ويسبب أعراض النشاط الزائد من رعشة وتوتر وضربات قلب سريعة ولكن للأسف أحيانا ضربات القلب من سرعتها الشديدة ما تكونش منتظمة وده اللى حصل بالظبط معاها إن الهرمون الزائد جدا تسبب فى ذبذبة أذينية سريعة إسمها الطبى Atrial Fibrillation بنختصرها دايما في شغلنا ب AF وطبعا الأطباء عارفين إن تذبذب القلب بيخلى الدورة الدموية الدماغية يحصل فيها خلل وهى أكبر سبب لحدوث الجلطات الدماغية ! وكمان تكرار حدوث الجلطات الدماغية بيكون غالبا بسبب الذبذبة الأذينية للقلب.‼️
📌طبعا أعراض الجلطة الدماغية عند الحاجة مكانتش ظاهرة فى شكل شلل لا قدر الله أو ضعف فى الحركة أو تقل اللسان أثناء الكلام إنما الجلطة الدماغية كانت جاية فى مركز الوعى والإدراك وطبعا هى السبب فى الدوار الشديد والدوخة اللى بتشتكى منها .‼️
✏️فورا بدأنا نظبط الهرمون من تانى علشان نسيطر عليه وبدأنا بروتوكول علاج الذبذبة الأذينية وطبعا أخدت حقن كليكسان علشان نذيب التجلطات الدماغية وفى أقل من أسبوع كانت الحمد لله أفضل مما كانت وطبعا بقت اكتر التزاما بالعلاج علشان الدرس كان قاسى جدا. 💔
📌احنا كل يوم يحصل معانا حالات من كدة بس غالبا بسبب الضغوط اليومية و كثرة الانشغالات ما يبقاش عندنا وقت كافى نسرد فيه الحكايات اللى بنحب نوعى الناس بيها ونشد انتباههم علشان يركزوا أكتر فى التفاصيل الصغيرة اللى ممكن تقابلهم .
📢البوست ده رسالة لكل الناس إنهم يلتزموا بالعلاج الأساسى اللى ما ينفعش يقف زى مثلا علاج الضغط والسكر والقلب والغدة وغيرهم
🖍️كمان بنلفت انتباه الناس لشيئ مهم جدا وهو إن الدوخة مش دايما من الأذن أو الضغط أو السكر ممكن تكون برضه بسبب جلطة دماغية وأحيانا مصدرها سبب فى القلب زى الذبذبة الأذينية للقلب .‼️
📌المتابعة مهمه جدا علشان دكتور الغدد يقدر يعرف حالة المريض بتاعه ويشخص أى أعراض جديدة تظهر عليه علشان كدة لازم نتابع نسبة الهرمون ونظبط جرعات العلاج كل فترة لأنها بتتغير تبعا لنسبة الهرمون.
📌عافانا الله وإياكم جميعاً من سيئ الأمراض.
#دمتم سالمين
_والغدد الصماء _والكلى _السكر

العنوان 📌
📌 عيادة أبوحماد بجوار المزلقان الجديد أمام صيدلية د.أميرة الأعصر أعلى أتيليه مسيو عمرو
للتواصل والحجز 📞
٠١٢٧٠٠١٥٦٧٦
📌 عيادة الأسدية كوبرى الشمايسة بجوار صيدلية د عبد الباسط العقيد
للتواصل والحجز 📞
٠١٠٠٤١١٧٦١٤

الدكتور محمد مصطفى مطر للغدد الصماء والباطنة والكلى والسكر

17/04/2026

27/03/2026

09/03/2026

09/01/2026

29/12/2025

16/11/2025

07/11/2025

02/11/2025

18/10/2025

07/10/2025

24/09/2025

Address

Telephone

Website

Alerts

Shortcuts

Share

Category