Alamain Hospital NICU - حضانة مستشفى العلمين

  • Home
  • Egypt
  • Alamein
  • Alamain Hospital NICU - حضانة مستشفى العلمين

Alamain Hospital NICU - حضانة مستشفى العلمين وحدة العناية المركزة لحديثي الولادة

كل سنة وانتم طيبين نتمنالكم عيد سعيد من أسرتنا لأسرتكم
20/03/2026

كل سنة وانتم طيبين
نتمنالكم عيد سعيد من أسرتنا لأسرتكم

🌸 سما 🩷رحلة شجاعة وأمل 🌸الفترة اللي فاتت استقبل فريق الـحضانة عندنا طفلة صغيرة اتنقلت لنا بعد حادثة طريق صعبة جدًا. للأس...
18/03/2026

🌸 سما 🩷رحلة شجاعة وأمل 🌸
الفترة اللي فاتت استقبل فريق الـحضانة عندنا طفلة صغيرة اتنقلت لنا بعد حادثة طريق صعبة جدًا. للأسف والدها توفى في الحادث، ووالدتها في حالة غيبوبة.
رغم الإصابات الخطيرة اللي تعرضت لها، و من بينها بعض الكسور اشتغلنا كفريق واحد مع قسم جراحة العظام علشان نوفر لها افضل رعاية ممكنة، سما أثبتت إنها مقاتلة قوية. وبفضل رعاية فريقنا ودعم الناس اللي حواليها، قدرت تتعافى بشكل رائع 💜
النهاردة خرجت من عندنا ورجعت بيتها مع جدتها، وبدأت فصل جديد مليان أمل وشفاء.
قصتها بتفكرنا إن حتى في أصعب اللحظات، القوة والحب ممكن ينوروا الطريق. ✨


طفلة صغيرة… وقصة بداية مليانة أمل 💛وصلت لنا بعد الولادة بساعتين فقط… طفلة من توأم، مولودة في الأسبوع الـ33، ووزنها 1650...
07/03/2026

طفلة صغيرة… وقصة بداية مليانة أمل 💛

وصلت لنا بعد الولادة بساعتين فقط…
طفلة من توأم، مولودة في الأسبوع الـ33، ووزنها 1650 جرام.

في أول لحظات من حياتها احتاجت مساعدة بسيطة عشان تاخد أول نفس ليها.
لحظات قليلة لكنها كانت فارقة… وبعدها بدأت تتنفس وتستجيب.

دخلت الحضانة للملاحظة والرعاية…
وأيام قليلة كانت كفيلة إنها تثبت قد إيه الأطفال الصغيرين دول عندهم قوة كبيرة.

واحدة واحدة:
التنفس اتحسن
الأكسجين اتشال
وبدأت تعتمد على الرضاعة وتزيد في الوزن.

النهارده حالتها مستقرة…
والأجمل إن ماما جت ورضعتها بنفسها 🤱
والحمدلله خرجت مع ماما ورجعت لتوأمها بالسلامة ❤️

كل يوم في الحضانة بيبدأ بتحدي…
لكن كتير من الأيام بينتهي بقصة أمل جديدة ✨


✨ قصة بطلة صغيرة… أسيل ✨أسيل وصلت لنا وهي مولودة في الأسبوع الـ ٢٨ من الحمل،ووزنها أقل من كيلو 🤍جاتلنا محوّلة من مستشفى ...
28/02/2026

✨ قصة بطلة صغيرة… أسيل ✨

أسيل وصلت لنا وهي مولودة في الأسبوع الـ ٢٨ من الحمل،
ووزنها أقل من كيلو 🤍

جاتلنا محوّلة من مستشفى تانية، وكانت حرارتها منخفضة وحالتها محتاجة دعم سريع ودقيق.

اتحطت على جهاز التنفس الصناعي عشان نساعدها تاخد نفسها بأمان،
وبدأنا معاها تغذية خارجية (عن طريق الوريد) لحد ما جسمها الصغير يقدر يتحمل التغذية بالتدريج.

واحدة واحدة…
خطوة صغيرة ورا خطوة 🤍

بدأنا نفصلها تدريجيًا من جهاز التنفس،
وبدأت تعتمد على نفسها في الرضاعة،
وكل يوم كانت بتثبت لنا إنها أقوى من كل التحديات.

وزنها يزيد…
تنفسها يتحسن…
وحالتها تستقر 🤍

لحد ما اليوم اللي كلنا بنستناه جه ✨
أسيل خرجت مع أهلها ووزنها ١٨٠٠ جم 💕

رحلة مليانة صبر، متابعة دقيقة، ورعاية مستمرة…
وفخورين بكل لحظة كنا جزء منها.

ربنا يحفظ كل أطفالنا ويدي القوة لكل أم بتعدي برحلة مشابهة 🤍



26/02/2026

حماية طفلك أولويتنا ❤️
Protecting your baby is our priority ❤️

ابراهيم جلال
Abdelrahman Ashraf
# #

كل سنه وأنتم طيبين رمضان كريم عليكم 🎉خلصنا اول يومين ندخل بقي بعد وحوي ياوحوي نقول مبروووك جالك بيبي وندي شويه نصايح مهم...
21/02/2026

كل سنه وأنتم طيبين رمضان كريم عليكم 🎉خلصنا اول يومين ندخل بقي بعد وحوي ياوحوي نقول مبروووك جالك بيبي وندي شويه نصايح مهمة لكل أم بعد الولادة ❤️

أول ما البيبي ينور الدنيا… الأم بتبقى تايهة بين فرحة وخوف 😅
خلينا نرتب أهم الحاجات اللي لازم تركز عليها 👇

🍼 1️⃣ الرضاعة ودي أهم حاجة تكون :
• رضاعة طبيعية أول ساعة بعد الولادة ودي مهمة جدًا بنسميها ال (golden hour)
• كل ما الطفل يعيّط مش معناه جعان بس… لان المعدل الطبيعي انه بيرضع كل 2–3 ساعات.

⸻

🌡 2️⃣ درجة الحرارة
• الطبيعي بتكون من 36.5 – 37.5
• سخونية أو برودة زيادة لازم تتقاس بترمومتر مش بالإيد.
• لف الطفل زيادة مش معناه انك كده بتحميه … الحرارة العالية خطر زيه زي البرد.

⸻

💤 3️⃣ النوم
• الطبيعي ينام 16–18 ساعة في اليوم ومش معنى كده بردو اننا نفوت رضعات لا نحاول نصحيه في معاد رضعته.
• دايمًا ينام على ضهره 👌 (عشان نقلل خطر الاختناق). لا قدر الله
• مفيش مخدات أو لعب في السرير.

⸻

🟡 4️⃣ الصفرا (الصفراء)
• اصفرار بسيط في أول أسبوع شائع.(صفرا فسيولوجيه )
• لو الاصفرار وصل للرجلين أو الطفل بقى نايم طول الوقت ومش بيرضع كويس → لازم كشف فورًا.

⸻

💩 5️⃣ البراز والبول
• أول براز بيكون أسود (ميكونيوم) طبيعي.
• بعد كده لونه أصفر مستردة مع الرضاعة الطبيعية 👌
• لو فيه إمساك شديد أو إسهال مائي كتير محتاجين ساعتها نراجع طبيب
⸻

💉 6️⃣ التطعيمات
• تطعيمات عند الولادة مهمة جدًا زي:
• Hepatitis B vaccine
• BCG vaccine
• الالتزام بجدول التطعيمات حماية لطفلك

#لو فيه اي استفسارات عند حضراتكم ياريت تكتبولنا ف الكومنتات

12/02/2026

ازيكم عاملين إيه هنبدأ النهارده سلسله حلقات توعويه للأم بشكل مبسط نحمي بيها طفلنا ونتحنب على اد مانقدر الموروثات الي ممكن تضرنا وتضر البيبي خلّينا نتكلم بصراحة شوية عن

🟥 القيصرية
مش دلع
مش فشل
مش عشان “مش مستحملة الوجع”
دي عملية جراحية محترمة بنعملها
لما الطبيعي يبقى خطر على الأم أو البيبي بناخد القرار ده

� أسباب تخص الجنين
• ❌ تعب في ضربات القلب أثناء الطلق
• ❌ وضع مش مظبوط (مقعدي – عرضي)
• ❌ حجم كبير قوي ومش هيعدّي
• ❌ نقص سائل حوالين الجنين
• ❌ مشاكل في المشيمة (نازلة، منفصلة)

👶 يعني البيبي بيقول:
“طلعوني بسرعة… الطبيعي خطر”

� أسباب تخص الأم
• ❌ ضغط عالي شديد أو تسمم حمل
• ❌ سكر غير متظبط
• ❌ مشاكل في القلب أو التنفس
• ❌ ضيق بالحوض
• ❌ نزيف

• ❌قيصريتين قبل كده غالبا في الحالة دي الطبيعي بيبقي مش اامن حاجة طيب لو واحده هنشوف حالة الأم والجنين ونقرر وقتها

مش كل أم ينفع معاها الطبيعي
ومش كل قيصري كانت غلطة

👩‍⚕️ الصح = القرار اللي يحافظ على الاتنين
الأم والبيبي ❤️

⸻

🟢 الولادة الطبيعية
لو تنفع؟
يبقى بركة البركات ✨

✔️ الأم بتقوم أسرع
✔️ اللبن بينزل أسرع
✔️ البيبي بيتنفس أحسن
✔️ مناعة أقوى

البيبي بيطلع يقول:
“أنا اتعصرت شوية بس تمام فين الرضعة بتاعتي "😂

⸻
خلصنا المعضلة دي وأظن وضحت لينا كلنا ايه رأيكم نتكلم بإختصار كده سريعا عن :

💊 فيتامينات الحمل
مش رفاهية
مش دعاية
مش “لما نفتكر”
اهم حاجه بنركز عليها هي

🔹 فوليك أسيد → عشان يحمي مخ طفلنا
🔹 حديد → عشان الأم ما تقعش مننا من الأنيميا
🔹 كالسيوم + فيتامين د → تقوى عظامنا
🔹 أوميجا 3 → نزود التركيز ونشاط المخ وميخليناش ننسى كل الي فوق ده 😅

نسيانهم = إهمال
والانتظام = أمان ❤️

لو حابين تقترحو علينا المواضيع الي تهمكم وشاغله بالكم ياريت تكتبولنا في الكومنتات نجاوب عليها ونطمنكم بطريقه طبية مبسطة 🙏

قصة صغيرة… وأمل كبير 🤍مكة 👶اتولدت في عمر حملي ٢٨ أسبوعووزنها وقت الولادة كان ١٢٠٠ جراممكة جاتلنا محوّلة من مكان تاني، وب...
06/02/2026

قصة صغيرة… وأمل كبير 🤍

مكة 👶

اتولدت في عمر حملي ٢٨ أسبوع
ووزنها وقت الولادة كان ١٢٠٠ جرام

مكة جاتلنا محوّلة من مكان تاني، وبرغم التحديات اللي كانت موجودة، ما فقدناش الأمل، وكملنا معاها خطوة بخطوة، وإيماننا بربنا وبحالتها كان دايمًا موجود

دخلت الحضانة وكانت محتاجة رعاية دقيقة وصبر كبير 💙
يوم ورا يوم، وبفضل الله ثم مجهود الفريق الطبي والتمريضي، بدأت حالتها تتحسن وتكبر قدام عينينا.

✨ النهارده مكة خرجت من عندنا
ووزنها وصل ١٨٠٠ جرام
خطوة جديدة في رحلتها للحياة 🌱

كل طفل في الحضانة له حكاية،
وكل حكاية بتفكرنا قد إيه شغلنا مسؤولية وأمانة 🤍

دعواتكم لكل أبطال الحضانة 👶

أهلًا وسهلًا بكم في صفحة وحدة العناية المركزة لحديثي الولادة (NICU) 🤍عملنا الصفحة دي علشان نكون أقرب ليكم،ونشارككم دور و...
05/02/2026

أهلًا وسهلًا بكم في صفحة وحدة العناية المركزة لحديثي الولادة (NICU) 🤍

عملنا الصفحة دي علشان نكون أقرب ليكم،
ونشارككم دور وحدة العناية المركزة لحديثي الولادة في رعاية الأطفال المبتسرين وحديثي الولادة اللي محتاجين عناية خاصة.

هدفنا هو تقديم رعاية آمنة ومتميزة للأطفال،
وكمان دعم الأهل ومشاركتهم بالمعلومة الصحيحة بكل وضوح وبساطة.

Address

مستشفى العلمين النموذجي
Alamein

Website

Alerts

Be the first to know and let us send you an email when Alamain Hospital NICU - حضانة مستشفى العلمين posts news and promotions. Your email address will not be used for any other purpose, and you can unsubscribe at any time.

Shortcuts

Share

Category