01/12/2024
تفتكروا في وصفة سحرية ممكن تخسسنا في غمضة عين؟!
بدون رغي كتير أنا مش جاية النهاردة أتكلم عن أدوية أو وصفة سحرية في يومين؟!
--- أنا جاية أقولكم إن السر كله
في التقبل، تقبلك لنفسك في كل الأوقات وحبك ودعمك ليها أكبر سلاح مع الإرادة القوية طبعاً، ولأن الدهون والوزن الزايد مش وليد اللحظة دا عادات وسلوكيات وأسلوب حياة كامل بقاله شهور وسنين عشان بفكر نفسي وبفكركم بشوية حاجات بسيطة مهم إننا نعرفها ودي مش عشان أي حد عاوز يخس بس، لأ دي عشان أي حد حابب يحافظ على نفسه وصحته وحابب يعيش Life style صحي يريح صحته الجسدية وقبلها النفسية..🤍🤍🤍❤️🩹
✨-السر في التقبل زي ما قولنا، أحب نفسي وهي رفيعة وهي تخينة وهي مكتئبة وهي محبطة وفي نفس الوقت أساعدها تكون أحسن.
✨-نشرب ميا كتير من ٢.٥ لـ ٣ لتر يومياً وعلى حسب الوزن بتاعنا طبعاً ومش شرط ميا بس ممكن مشروبات صحية خفيفة من غير سكر.
✨-نلعب رياضة ونتحرك على الأقل نص ساعة يومياً (مشي-جري-نط حبل_............)
✨-نقلل سكريات ونشا ودهون غير صحية ونخلينا في الدهون الصحية (زيت الزيتون، زيت جوز الهند، الزبدة البلدي الطبيعي، زيت الذرة،زيت العباد، الصويا، المكسرات...)
✨-ندخل الخضار والفاكهة في يومنا بما يتناسب مع سعراتنا، وكله زي ما اتفقنا بالمعقول .
✨-نظبط نومنا وناكل ببطء، نتعود نمضغ الأكل ونديله فرصة يتهضم عشان مندخلش في مشاكل هضمية إحنا في غنى عنها، ربنا يكفيكم شر غضب الجهاز الهضمي بتقلباته وسلطاته وحبشتكناته( باختصار نحاول نستمتع بالأكل ميكنش مجرد بلع وبس).
✨-نقلل توتر وقلق، مفيش حاجة مستاهلة والله، كله بيعدي، ربنا زي ما بيبعت الابتلاء والضغط والاختبارات والمحن بيكون مجهز معاها المنح والعطايا، فما علينا غير الصبر وبس وتقبل الأمور بكل سكينة وسلام و توقع الأفضل.
انستونا الشويتين دول، أشوفكم مع كوميكس جديد ومعلومة بطريقة بسيطة وشيك..
#رفيداحسن
