Mental health_ الصحه النفسيه

19/05/2024

النفوس المريضه بتفضل تضغط فى اللى حواليها وتغل عليهم لحد ما يتحولوا لمرضي زيهم اللى هو اشمعنى انا باعانى لازم تعانى زيي
لما يظهرلك الوش دا امشي من سكات مفيش امل فى النقاش ابعد بدل ما تتحول زيهم

29/08/2023

أزال اللهّ بعض الأشخاص من حياتك
لأنهّ سمع محادثات لم تسمعها أنت. فكل تدابير الله خير

26/08/2023

ربنا لما هيجي يحاسب الظالم ان شاء الله مش هيحاسبه لوحده ..فيه اللي سنده و فيه اللي قواه و فيه اللي دبر وخطط و فيه اللي قاله براڤو اكتر كمان وشجعوا علي الظلم !!

هيحاسب اللي عرف انه ظالم و حاول يقنع المظلوم انه غلطان و عيشه فاقد الثقة ف نفسه و فاكر انه معندوش حق و هو صاحب حق تالت و متلت ..

هيحاسب اللي صدق من غير ما يتأكد و بني صورة ابعد ما تكون عن الحقيقة

هيحاسب اللي سكت و اللي خاف واللي اتهرب انه ينصر الحق و هو عارف الحقيقة ..

هيحاسب اللي رمي الفكرة في ملعب الظالم و قاله العب ..

هيحاسب اللي ضحك ضحكة صفرة ف وش المظلوم و قالوا كلمة مستفزة ..

"ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار"

"مفيش حاجة هتعدي بالساهل كده ..ان الله لا يغفل ولا ينام "

19/08/2023

أهل جايبين بنتهم المستشفي مغمى عليها من البكاء نتيجه إنهيار عصبي، فهمنا من الأم إن حصل زعل بينها وبين زوجهاوالزوجه إتعصبت جامد وبدأت بتشنج لحد ما وصلوا للمرحلة دي...
الغريب إن ملامح الزوج مكانش متأثر نهائي مش فارق معاه وجاي معاهم غصب عنه تقريبًا، واقف برا المستشفى كل اللي فارق معاه إنه عايز الموضوع يخلص ويروحوا.

شباك الأوضة بتاعتي فاتح على الجهة الأمامية للمستشفى، فكنت شايف الموقف من أول وصولهم.. فضلت شوية متابع الزوج غصب عني لحد ما جاتله مكالمة وفضل يزعق ويقول هي كل يومين تعمل نفس الموضوع ونجيبها المستشفي؟!! ..
المكالمة كانت طويلة وكلها قسوة، لفت نظري جملة قالها في وسط المكالمة:
".. لا مش هدخل لها، أمها معها جوة هبقي أراضيها بكلمتين لما تخرج ونروح"

فات ساعة وأنا كل شوية أخلص حاجة وعيني تقع تاني على ملامح الزوج اللي مش باين عليه أي حاجة غير الجحود...
لحد ما جت اللحظة اللي الأمن نادى فيها على اسمها
وقام الراجل بامتعاض شديد يرد، وعرفت إن ده اسم زوجته
وقاله كلمتين...
"البقاء لله زوجتك توفيت وتعالى عشان والدتها مغمي عليها جوه!"
كانت الكلمة كافية إن الزوج يوقع على الأرض في لحظتها واتحول الجحود على وجهه لبكاء شديد، وصراخ وهستيريا طفل مش راجل كبير!!
كان عمال يردد: "خلاص والله قولولها ترجع، وأنا مش هزعلها تاني، مش هضايقها مش همد إيدي عليها خلاص أنا غلطان والله، أنا كنت فاكرها بتكدب لما كانت بتقول قلبي بيوجعني

الزوجه أتوفيت نتيجة الإصابة بمتلازمة القلب المكسور،
أو ما يعرف بـ
"Broken heart syndrome"
واللي أحد أهم أسبابها فعلا الشعور بالحزن المستمر والضيق والضغط العصبي.

كل الناس من حواليا رايحين ناحيه الراجل يطبطبوا عليه ويشيلوه من على الأرض وأنا رغم إشفاقي على حاله وابتلائه لكن كان جوايا كلام كتير عاوز أقولهوله...
كان نفسي أقوله شوفت إن الحياة مش دايمًا هتديلك فرصة تصلح اللي خربته؟! شوفت إن قسوتك عليها معملتش حاجه دي خدتها منك خالص! رفضت تدخل تراضيها بكلمتين كان ممكن يكونو فارقين معها
رغم إن القدر نافذ لكن على الأقل مش هتعيش محسور من بعده وحاسس بالذنب.

بلاش القسوة وبلاش العند وبلاش تأجلوا تصليحكم للغلط، الحياة مش على مزاجك وهتسيبك تختار الوقت اللي تصلح فيه غلطك...

الحياة مش دايما هتديلك الفرصة اللي أنت عايزاها!
في ناس بتفتكر ان الزعل والنكد المستمر عادى
#منقول😢

حافظوا عليهن من وجع القلب

18/08/2023

ماجده الخطيب مره سألوها فى برنامج وقالولها
- حضرتك ندمتي في موقف او حاجة عملتيها ؟
قالت....
= آه .. حبيت مرة إنسان مكانش لازم أحبه ، كان أقل من مستوايا العاطفي ، كان واخد الحب بطريقة سطحية جداً ، ما عرفش يقدر معنى العواطف الكبيرة ، يعني ايه واحدة تحب وتخلص و تتفانى ، بس هي بردو غلطتي أنا ، اني كملت مع إنسان غير أهل للثقة.....................................
كلمه كبيره اووووى ولها معنى كبير ..... أقل من مستواها العاطفى كل واحد له مستوى فى العاطفه بيقدمه للى قدامه الذكاء بقا أنه لو لقى اللى قدامه دا غير أهل للمستوى دا أنه يلحق نفسه مش يكمل وياخده الكبر وميقولش انا اخترت غلط ولازم اصلح الغلط لان اللى حييجي بعد الغلطه دى حيكون مصايب مش غلطات..
الغلطه ممكن تتصلح متستناش لما تبقي مصيبه

08/08/2023

الزواج الناجح مش هو الزواج اللي بيستمر ولو استمر 100 سنه ..
الزواج الناجح هو إللي لو الزمن رجع بيك تاني هتختار نفس الشخص .

07/08/2023

الأم في فتره من الفترات مابتبقاش محتاجه غير طبطبه ..
لا محتاجه انتقاد ولا تعديل ولا تعليق علي حاجه، لا جسمها ولا شكلها ولا شقتها عامله إزاي .. 😔
لو مش هنقدر نشيل عنها يبقي علي الأقل ندعمها ونقويها تعدي الفتره دي بدون مايجيلها إكتئاب او تعب جسماني ..
هي مش محتاجه غير كتف تسند عليه راسها وترمي عليه همومها ومسئولياتها .. 🥺

فكونوا السند والدعم لمن حولكم ..❤️

07/08/2023

عشان اى علاقه تدوم لازم تعامل اللى قدامك على أنه زبون وعايز تكسبه فبتوفرله كل احتياجاته عشان يفضل موجود ..لكن للاسف اللى بيحصل أن اللى بتضمنه بتعامله معاملة المحل ....دا بتاعى ومحدش ليه عندى حاجه وفرتله احتياجاته أو لاء اهو قاعد حيروح فين..ودا بقا أساس خراب اى علاقه

04/08/2023

مش البعد بس اللي بيعلم الجفا...
القسوة والإهانة في المعاملة بتعلم الجفا.. ورد الفعل الغير متوقع بيعلم الجفا.. الزعل بالكام يوم وكأنك بتربي اللي قدامك بيعلم الجفا.. احساس ان وجودك مش فارق بيعلم الجفا.. تكرار مواقف الخذلان بتعلم الجفا.. كسر الخاطر وعدم التقدير بيعلم الجفا...
وكل دة نهايته حاجة واحدة هى قطع حبال الود والمحبه

03/08/2023