21/02/2025
صباح الخير
(المنقذ-الضحية)
كنت زمان بفكر...ليه علاقة (المنقذ-الضحية) مبتكونش علاقه ناجحة مستمرة ؟؟
علاقة بين اتنين ليهم احتياجات بيشبعوها لبعض...واحد بيشيل و ينقذ و يدي و يؤدي دور البطل و التاني عايش في مأساته و معاناته...و عايش جوا الخذلان اللي بيتعرض له دايما و مستني العوض اللي هيعوضه عن كل اللي جرى له واللي هو (المنقذ)...ليه العلاقة دي متستمرش و تنجح كمان...مع العلم انها بتعيش فترة كويسه لكنها بتنهار في كل الاحوال...
احنا متفقين ان العلاقات دايما بتدور حولين (القيمة)...كل ما كان كل طرف عارف قيمة الاخر كانت علاقة ناجحه و مستمرة
في علاقة (المنقذ-الضحية) -و هي الاكثر انتشارا بين الناس علي فكرة- تكون القيمة مش الاشخاص...مش اطراف العلاقة و قيمتهم...ف القيمة بالنسبه للمنقذ هي بطولته...تضحيته....عطاءه اللي بيأكد بيه لنفسه (l'm good enough ). الجملة اللي بتزن جواه من الصغر كتساؤل...تساؤل لم يشبع في نشأته...فهيفضل ف العلاقة طول ما هو بينقذ و يلعب دور البطل و يتقاله انت بطل و جامد...ف القيمة اللي باقي لاجلها ف العلاقه هي قيمتة الضايعه ف عينه و بيدور عليها مش الاخر...فلو شيلنا الطرف الاخر و بدلناه باي حد يديله القيمه دي هتستمر العلاقة
اما الضحية فهو صورة عكسيه للمنقذ...حد شايف نفسه لايستحق و غير جدير من داخله...بيرجع اي معاناه تعرض ليها لطيبته الزايده و اللي محدش مقدرها...بينما هو دايما بيفرط في حفه و حدوده لانه شايف من جواه انه لا يستحق...شايف ان محدش هيحبه الا لو اعطى بزياده...تجاهل الاذي....تنازل عن الحق...لازم يعمل دا عشان يفضلو....وطبعا كل دا بيؤدي انه بيتأذي فعلا...فينتظر (المنقذ) اللي عارف قيمته عشان يأكدله انه يستحق بعطاءه المفرط...فقيمة المنقذ عند الضحية هي العطاء اللي بيأكد للضحيه انه له قسمة و يتحب...لو خد العطاء دا من شخص اخر هتستمر العلاقه بغض النظر عن اختلاف الاشخاص.
عشان كدا طول ما انت (منقذ) هتدور علي ضحيه و طول منت (ضحية) هتدور علي منقذ و هتستمر المعاناة في البحث المزيف عن قيمتك و تتعاظم المعاناه بنتهاء حتمي للعلاقه.
