سكر وحياة Sokar & Hayaa

03/02/2026

الحمد لله بفضل ربنا وكرمه تمت حفلتنا امبارح، وكان يوم جميل بكل تفاصيله، مليان ضحكة أطفال، ومحبة، وتعاون حقيقي من ناس بقلوب صافية 🤍

شكر خاص لمؤسسة موطني على الوجبات الجميلة والتنظيم الراقي
وشكر كبير لشباب تحيا مصر على وقفتهم القوية معانا وتنظيمهم لليوم بكل حب وإخلاص،
وشكر من القلب لكل الناس اللي شرفتونا ونورتونا وشاركتونا الفرحة، وجودكم فرق جدًا 🌸

ويستاهلوا شكر خاص الناس اللي جت في آخر اليوم وبرضه حرصوا يفرّحوا الأولاد بهدايا وحاجات حلوة، لأن الفرحة مالهاش توقيت ❤️

يارب دايمًا متجمعين على الخير، ودايمًا سكر وحياة مساحة للفرح والأمل والدعم الحقيقي 🌟
#السكري #صحةنفسية

02/02/2026

26/01/2026

صباح الخيرات
بمناسبة قرب شهر رمضان
يسعدنا دعوتكم ليوم توعوي ترفيهي للأطفال
يوم معمول مخصوص علشان جبر الخاطر قبل أي حاجة 🤍

📍 المكان: نادي المعلمين – سيدي جابر – الإسكندرية
📅 اليوم: ٢ / ٢
⏰ الساعة: ٤ عصرًا

🎈 اليوم هيشمل:
• فقرة دعم نفسي للأطفال
(نفهمهم بهدوء وبحب ليه بعضهم مش هيصوموا، وإنهم أبطال زي غيرهم)
• توعية بسيطة للأهالي عن الاستعداد لرمضان
• حفلة DJ وفقرات ترفيه
• وجبة
• هدايا للأطفال 🎁

🌙 بنرحّب بكل طفل بطل
سواء مصاحب للسكري
أو مصاحب لأي مرض مزمن
يمنعه من الصيام 🤍 وحابب يحس بفرحة رمضان
اليوم ده معمول علشان الطفل يطلع وهو حاسس إنه:
مش أقل
مش محروم
ومش لوحده

📌 التسجيل مُسبق ومحدود
علشان التنظيم والهدايا
وفي حالة الاعتذار يفضّل الإبلاغ قبلها بوقت كافي
علشان نفسح المجال لطفل تاني 🫶

رمضان قرب
والفرحة لما تتشارك… بتكبر ✨

🔗 للتسجيل اضغط هنا:
https://forms.gle/vvszHsdYGRRbgho27

#سكري #صحة #صحةنفسية #رمضان #صيام #أطفال #السكري #جبر

25/01/2026

كل صبر اتدفع
له عوض
وكل وجع صادق
له جبر أجمل مما تتخيل
وبشر الصابرين 🤍🤍

#السكري #الابتلاء #صحة #سكري #طبطبة 💙 💙💪🏼

23/01/2026

مساء الخير وجمعة مباركة عليكم جميعًا 🌙✨
بمناسبة الأيام المباركة دي… وبفضل الله وكرمه تم اعتمادي كمدرب معتمد من المجلس الأعلى للجامعات والمركز القومي للتدريب كمدرب معتمد في التنمية الذاتية ومساعدة المصاحبين للسكري على التعايش.

سكر وحياة مش مجرد صفحة للتثقيف أو نشر معلومات عن السكر
سكر وحياة حلم بدأته، وتوكلت على الله، وخدت بكل الطرق عشان أقدر أنفع نفسي وبنتي وكل مصاحب للسكري…
عشان يلاقي حد يفهمه ويساعده ياخد بيده بشكل صحيح.

سكر وحياة كيان ومساحة أمان مبنية على المعايشة، الخبرة، وكمان المنهج العلمي اللي يساعدك.
هنا هتلاقي:
• تثقيف سكري
• دعم نفسي
• ومعايشة حقيقية للسكري سواء كنت مصاحب للسكري أو ولي أمر

ولسه الأفضل جاي بإذن الله ❤️
يارب يمنى علينا جميعًا بالشفاء، ويطمنا على أولادنا ويقر أعيننا بيهم 🙏

#السكري #الابتلاء #صحة

21/01/2026

صباح الخير 🌿
كل سنة وحضراتكم بخير.

في حياتنا مع السكري، المشكلة مش بس في المرض…
المشكلة إن في ناس بتحاول تستغل احتياجنا لتحقيق مكاسب.

عايزة أشارككم تنبيه مهم جدًا كأهالي ومصاحبين للسكري.

📌 أي منتج منتهي الصلاحية (شرايط، أنسولين، أجهزة، سينسورات - ايبورتات ) لازم يتم التخلص منه فورًا.
المنتج المنتهي ممكن يعطي قراءات أو جرعات غير دقيقة، وهذا ممكن يؤدي لمضاعفات خطيرة جدًا.

💔 تجربتي الشخصية:
بنتي دخلت العناية المركزة بسبب قراءة غير دقيقة من سينسور منتهي الصلاحية.

⚠️ والأهم:
السينسور تم تزويدنا به كبديل من جهة موثوقة، وتم التأكيد لنا بأنه آمن للاستخدام وأن المسؤولية عليهم، وأنه “مسموح استخدامه” رغم انتهاء الصلاحية، بسبب عدم توفر بديل مناسب.

📌 أنا مش بقول إن الموضوع خطأ من جانب الأهالي…
أنا بقول إن سلامة الأطفال أهم من أي “تطمين” أو “تساهل”.

لو حد قالك “مش فارق” أو “على مسؤوليتي”
خدي بالك: في وقت الأزمة… الكل هيتهرب، ومفيش حد هيتحمل نتيجة الخطأ.

🟢 شارك/ي البوست ده عشان نوصل التنبيه لكل الأهالي، لأن التوعية ممكن تنقذ حياة.


#السكري

11/01/2026

مش مطلوب منك تبقى قوي طول الوقت
مطلوب منك بس تكمّل
وتصدق إن ربنا أرحم من خوفك
وأكبر من كل اللي شاغل بالك

هو سندك في أزمتك
وقوتك وقت ضعفك
ونورك في عتمتك
ودليلك في رحلتك

هو الملك والمليك والمالك
فقط…
استعن بالله ولا تعجز 🤍

#سكري #الامتحانات #السكري 💉 💉www

08/01/2026

مساء الخير والطمأنينة 🌿
وكل سنة وأخواتنا المسيحيين بخير… عيد سعيد عليكم 🤍

خلّينا نقولها بصراحة ومن غير تجميل:
فترة الامتحانات ضغط.
ضغط على أولياء الأمور،
وضغط مضاعف على ولادنا المصاحبين للسكري،
وأحيانًا على المصاحبين نفسهم قبل أي حد.

عشان كده مش مطلوب مننا نكون أبطال خارقين،
المطلوب بس إننا نستعد صح:
نفسيًا،
ومعنويًا،
ونرتّب دماغنا قبل ما نرتّب الجداول.

📌 بكرة الجمعة الساعة 9 مساءً
لايف مفتوح – دردشة من دردشات سكر وحياة على تليجرام
جلسة دعم نفسي حقيقية، مش محاضرة ولا تنظير

هنتكلم عن:
• مخاوفنا كأهالي
• توتر الأولاد
• نعدّي الفترة دي إزاي بأقل خسائر نفسية
• ونطمن بعض… لأن الوحدة في الوقت ده عدو

الدردشة مفتوحة:
✔️ لأولادنا المصاحبين للسكري
✔️ ولأولياء الأمور اللي حابين يشاركوا وينوّرونا

📍 الرابط:
https://t.me/olaa_rady

مستنياكم،
وربنا يوفق ولادنا جميعًا…
ويا رب الامتحانات تعدّي، والقلوب تفضل سليمة قبل الدرجات 🤍

03/01/2026

💚

01/01/2026

صباح الخيرات

✨ سنة جديدة، بداية حقيقية ✨

أنت مش في سباق أنت في رحلة طويلة
فيها تعب، وفيها فرح، وفيها أيام بتتلخبط.

لو قصّرت يوم، لغبطت، تهت، أو ما كنتش ملتزم ما توقفش. عدّي وكمل.
المهم إنك تستمر وتفضل عارف إنت عايز إيه.

الحياة مش مثالية، ولا عادلة
اعمل بس المطلوب منك، وخد خطوات بسيطة مستمرة.

اسأل نفسك:

“أنا عايز إيه من نفسي؟ من حياتي؟”

ابدأ بهدف واحد بسيط كفاية:
• ألتزم بالقياس
• أشرب مياه كفاية
• أقلل السكر شوية
• أتعلم معلومة جديدة
• أساعد غيري

الخطوات الصغيرة المستمرة هي اللي بتبني فرق حقيقي، وبتخلي كل يوم أقوى من اللي قبله.

💡 تذكّر: أنت الأساس، وانت اللي بتحكم على نفسك، مش الظروف ولا الناس.

🤍 يارب البدايات الجميلة والنهايات الجميلة والعون والكرم منك


💚 #الامل #سكري 💙