Psy Eman Ayman

17/03/2026

🩷🩷🩷

09/03/2026

حين يلتقي ما تعلمناه نظريًا
بالتطبيق العملي على أرض الواقع…
تتحول الرحلة إلى تعلم حقيقي
وفهم أعمق للنفس الإنسانية 🤍.

08/03/2026

مش كل حد قال "حاضر"…
يبقى فعلًا اقتنع.
فيه فرق بين احترام الحد…
وتحمّله لحد ما تضعف.

سلسلة: علاج ولا حدود؟ (5) والأخير

إزاي تعرف إن بتُحترم… ولا بيتم تجاوزها؟

أوقات بتحط حد…
واللي قدامك يوافق بسرعة.

بس بعد شوية تكتشف إن:
الأسلوب رجع.
التجاوز رجع.
ويمكن أقوى من الأول.

ساعتها تسأل نفسك:
هو أنا كنت واضح؟
ولا هو بيختبرني؟

🔹 اختبار الحد أكتر من مرة 🔄
يحاول بنفس الأسلوب…
لكن بطريقة أهدى.
يشوف هتسكت ولا لأ.

🔹 اللعب على وتر الذنب 🎭
"أنا زعلان منك…"
"كنت فاكر إنك أقرب من كده…"
تحويل الحد لاتهام.

🔹 دور الضحية 😔
يخليك تحس إنك ظلمته
لمجرد إنك طلبت احترام.

🔹 السخرية من الحد 😏
يضحك عليه.
يقلل منه.
أو يتعامل كأنه دلع زائد.

🔹 العقاب غير المباشر 🛑
صمت.
تجاهل.
برود مفاجئ.
مش علشان هو متأذي…
لكن علشان يرجعك مكانك القديم.

الحد اللي بيُحترم…
بيبان في الاستمرارية.
مش في أول رد فعل.
لكن في السلوك بعد كده.

خليك فاكر:
أنت مش مطالب تقنع حد بحقك في الراحة.
اللي يحترمك…
هيحترم حدّك.

📌في النهاية…
الحدود مش هدفها إننا نختبر الناس.
هي بس بتكشف الحقيقة بهدوء.

بتوضح مين بيحترمك فعلًا…
ومين كان متعود على وجودك من غير مقابل.

مش كل حد هيعرف يتأقلم مع حدودك.
ومش كل علاقة هتفضل بنفس الشكل بعد ما تتغير أنت.

بس افتكر دايمًا:
اللي يحبك بصدق…
هيحترم مساحتك حتى لو اتعلم دا متأخر.
واللي بيتضايق من حدّك…
غالبًا كان مستفيد من غيابه.

خليك ثابت.
وخليك واعي.

والحدود اللي بتحميك…
هي اللي بتخليك تختار صح.

💡الحدود مش بتغيّر الناس…
هي بس بتكشف حقيقتهم.


#الحدود

03/03/2026

الحدود مع الغريب سهلة
لكن مع اللي بتحبهم؟
هنا القلب بيتلخبط 💓

سلسلة: علاج ولا حدود؟ (4)

إزاي تحط حدود… مع أقرب الناس ليك؟

أصعب حدود…
هي اللي بتحطها مع حد بينك وبينه عشرة.
لأنك مش بس خايف تزعلهم…
أنت خايف تخسرهم.

بس خليني أقولك حاجة بهدوء:
الحدود مش ضد العلاقة…
هي اللي بتحافظ على توازنها.

خلينا نشوف نعمل دا إزاي بشكل عملي👇

🔹 أفصل بين الحب والسلوك ⛓️‍💥
ممكن أحب أمي…
وأرفض أسلوب معين.
ممكن أحب شريك حياتي…
وأرفض طريقة كلام.
رفض السلوك مش رفض للشخص.

🔹 أختار التوقيت الصح ⏰
ما تحطش الحد وأنت منفعل.
ولا وأنت بتنتقم.
الهدوء بيخلي كلامك يوصل…
مش يجرح.

🔹 ابدأ بالاحتواء قبل الحد 🤍
"أنا مقدر نيتك…"
"أنا عارف إنك بتعمل ده من خوفك عليا…"
وبعدين قول الحد.
دا بيقلل المقاومة.

🔹 أستحمل لحظة الزعل 😔
أيوه… ممكن يزعلوا.
وممكن يحاولوا يرجعوك لنفس الدور القديم.
بس الزعل المؤقت…
أهون من الاستنزاف المستمر.

🔹 ما تتراجعش بس علشان الموقف بقى متوتر ✊
أكتر لحظة بتبوظ الحد…
لما تحس بعدم راحة فتقول: "خلاص ماشي".
كل مرة بترجع… بتطول معاناتك.

الحدود مع القريبين مش قسوة…
هي إعادة ترتيب للمسافات.

الحب الناضج…
يستوعب إنك مش امتداد للأخرين.

أنت ليك مساحة…
وليك صوت…
وليك حق تختار أيه يناسبك.

📌لو جربت تحط حد مع حد قريب منك…
النتيجة كانت إيه؟
أكتب في الكومنت شعورك أو إحساسك بعد الخطوة دي.

🔗 والبوست الجاي هيكون عن:
"إزاي تعرف إن حدودك بتُحترم… ولا بيتم تجاوزها ؟"


#الحدود

28/02/2026

أحيانًا المشكلة مش في الحدود نفسها…
المشكلة في إحساس الذنب
اللي بيظهر أول ما نحطها. 💭

سلسلة: حدود ولا علاج؟ (3)

إزاي تحط حدود… من غير ما تحس بالذنب؟

كتير مننا أول ما يبدأ يحط حدود
يحس إنه بقى قاسي…
أناني…
أو بيكسر خاطر اللي قدامه.

بس الحقيقة؟
الذنب مش دايمًا دليل إنك غلط.

أحيانًا الذنب بيظهر
لأنك بتعمل حاجة جديدة
مش متعود تعملها.

خصوصًا لو اتربيت على إن رضا الناس
هو طريق الأمان.

تعالى نشوف إزاي تحمي نفسك وتحط حدودك بوعي 👇

🔹 افهم إن الحدود مش عقاب ⚖️
أنت مش بتحط حد علشان تعاقب حد.
أنت بتحطه علشان تحمي نفسك.

في فرق كبير
بين الانتقام
وبين التنظيم النفسي.

الحدود وسيلة اتزان
مش وسيلة سيطرة.

🔹 الذنب أحيانًا بيكون استجابة قديمة 🧠
لو طول عمرك بترضّي غيرك
فطبيعي أول ما تقول "مش هينفع"
تحس بتوتر أو جلد ذات.

ده مش معناه إنك غلط.
ده معناه إنك بتكسر نمط قديم.

🔹 فرّق بين التعاطف… وإلغاء نفسك 🤍
ممكن تحتوي، وتفهم
وتقدّر ظروف غيرك
من غير ما توافق على الأذى.

أنا بحترمك…
بس مش هقبل الطريقة دي.

🔹 حدّد إيه اللي مضايقك بالظبط 📝
قبل ما تتكلم اسأل نفسك:
أنا متضايق من الأسلوب؟
ولا التكرار؟
ولا التوقيت؟

كل ما كنت محدد
كل ما كلامك يطلع أهدى
وأوضح.

🔹استخدم صيغة "أنا" ✍️
بدل: "أنت دايمًا بتتجاوز"
قول: "أنا مش مرتاح بالطريقة دي."

لما تتكلم عن إحساسك
بتقلل دفاع اللي قدامك
وبتحافظ على احترامك لنفسك.

🔹قول الحد في جملة قصيرة واضحة 🗣️
"مش هقدر أرد بعد الساعة 11."
"مش بحب الهزار بالشكل ده."

من غير قصص طويلة
ولا تبرير مبالغ فيه.

الحدود الواضحة
مش محتاجة إذن.

🔹التزم بتصرفك ✅
لو قولت مش هرد
ما تردش.
ثباتك هو اللي بيثبت الحد
مش كلامك.

🔹 توقّع مقاومة… وما تفسرهاش إنك غلط ⚡
اللي كان مستفيد من عدم وجود حدود
مش هيحب النسخة الجديدة منك.

انزعاجه
مش دليل إنك قاسي.

🔹 راجع نيتك 🔍
اسأل نفسك بعد أي حد:
أنا عملت ده علشان أحمي نفسي؟
ولا علشان أوجع؟

لو نيتك حماية
حتى لو حسيت بذنب
الحد مازال صحي.

أنت شخص طيب…
وعشان كده فكرة الحدود بتوجعك شوية.

بس الطيبة مش معناها تستحمل كل حاجة.
ومش معناها تسكت علشان ما تزعلّش حد.

من حقك تحب الناس…
ومن حقك كمان تحمي نفسك.

الحدود مش ضد حد،
الحدود علشان العلاقة تفضل صحية…
وعلشان أنت تفضل مرتاح جوّاها.

ولو الذنب ظهر في البداية…
افتكر إنك بتتعلم مهارة جديدة
مش بتتحول لشخص قاسي.

📌 لو حاسس إن الموضوع بيلمسك
أكتب في الكومنت: "الحدود مش أنانية." 🤍

🔗 والبوست الجاي هيكون عن:
" إزاي تحط حدود مع أقرب الناس ليك ؟ " 🤝



#الحدود

26/02/2026

أصعب حاجة مش إنك تتأذى…
أصعب حاجة إنك تحتار:
أحتويه؟ ولا أحط حدود؟ 🤔

سلسلة: حدود ولا علاج؟ (2)

إزاي نفرّق عمليًا بين اللي محتاج علاج واللي محتاج حدود؟
أديك معايير واضحة تساعدك تشوفي الصورة أوضح 👇

◾ هل فيه وعي بالضرر ؟ 🔍
اللي بيعاني نفسيًا
ممكن يأذي من غير قصد،
أو يكون مش واعي تمامًا بتأثير أفعاله على الآخرين.
يعني أحيانًا الألم اللي بيحصل مش مقصود،
والمريض النفسي محتاج دعم وفهم وعلاج
للتعامل مع نفسه ومع تأثيراته.

أما اللي عنده أمراض النفوس
فغالبًا أفعاله مؤذية بوعي،
وتكون جزء من سلوك أو تمرد مستقل عن أي حالة مرضية،
وده محتاج وضع حدود واضحة لحماية نفسك.

👈لو حابب تفهم الصورة أكتر، ممكن ترجع للبوست السابق: "الفرق بين الأمراض النفسية وأمراض النفوس"

● هل فيه وعي بذاته ؟ 🧠
اللي محتاج علاج
غالبًا حاسس إن فيه صراع جواه،
وإنه مش مرتاح مع نفسه.

اللي محتاج حدود
غالبًا مرتاح وهو بيأذي،
وشايف ده “طبيعته”.

● الأذى عرض… ولا نمط متكرر؟ 🔄
الاضطراب النفسي
ممكن يسبب سلوك مؤلم،
لكن بيكون مرتبط بحالة أو أعراض،
وغالبًا مش مقصود.

أما أمراض النفوس
فالأذى بيبقى أسلوب ثابت،
متكرر، ومحسوب، حتى من غير ضغط.

● بعد ما تتألمي… هو بيعمل إيه؟ 💬
هل يحاول يفهم تأثير أفعاله عليك؟
ولا يقلل من مشاعرك؟
ولا يقول لك “أنتِ حساسة زيادة”؟

طريقة تعامله بعد الأذى
بتكشف أكتر من الأذى نفسه.

التفرقة مش علشان نحاكم الناس،
لكن علشان نحمي نفسنا🛡️.

مش كل حد يحتاج احتواء…
ومش كل حد يستحق فرصة بلا حدود✋.

▫️اسألي نفسك بهدوء:
أنا قدام شخص بيصارع نفسه وبيؤذي أحيانًا من غير قصد❤️‍🩹؟
ولا شخص بيستنزفني بوعي❤️‍🔥؟

📌لو حسّيتي إن النقاط دي وضّحت لك موقف معين،
اكتبي في الكومنت: “الصورة أوضح.”

🔗وفي الجزء الجاي هنتكلم عن:
إزاي تحط حدود من غير ما تحس بالذنب.



#الحدود

23/02/2026

في ناس محتاجة علاج…
وناس محتاجة حدود.
والفرق بينهم أكبر بكتير مما نتخيل.

سلسلة: حدود ولا علاج؟ (1)

فيه فرق واضح بين:
🧠 الأمراض النفسية
و
💔 أمراض النفوس

وخلط الاتنين بيخلينا نقع في خطأين خطيرين:
يا إما نظلم شخص بيعاني فعلًا…
يا إما نبرر أذى متعمد.

خليني أبسط الصورة 👇

◾ الأمراض النفسية
زي الاكتئاب، اضطرابات القلق، الوسواس القهري…
دي اضطرابات معترف بيها علميًا،
ليها أسباب بيولوجية ونفسية واجتماعية.
الشخص فيها غالبًا بيتألم داخليًا،
وبيحتاج دعم وعلاج، مش لوم ولا وصمة.

المريض النفسي مش بيختار اضطرابه،
وغالبًا بيصارع نفسه قبل أي حد تاني.

◾ أمراض النفوس
زي الحقد، التلاعب، تعمد الإيذاء، الاستغلال…
دي مش تشخيصات طبية،
لكن أنماط سلوكية يتحمل صاحبها مسؤوليتها.

الفرق الجوهري ؟
المرض النفسي يحتاج علاجًا 🤝.
ومرض النفس يحتاج وعيًا وحدودًا واضحة ✋.

التعاطف مهم…
لكن من غير وعي ممكن يتحول لتبرير.
ووضع الحدود مش قسوة…
ده حماية لنفسك 🛡️.

الوعي الحقيقي إنك تعرف:
إمتى تحتوي…
وإمتى تحط حد.

📌لو البوست ده فرّق معاك في فهم موقف معين،
اكتبلي في الكومنت:
“احتواء” ولا “حدود” — وليه ؟💛

🔗وفي الجزء الجاي هنتكلم عن:
إزاي نفرق عمليًا بين اللي محتاج علاج واللي محتاج حدود؟



#الحدود

21/02/2026

⚡" الاحتياجات النفسية"
هي الوقود الداخلي اللي بيحرك حياتنا.

زي ما جسمنا محتاج أكل وشرب ونوم،
نفسنا كمان محتاجة احتياجات أساسية
تحافظ على توازننا النفسي.

💡 عشان كده النهارده هتكلم عن الاحتياجات النفسية الأساسية والمهمة...
عشان تشوف الصورة الكاملة وتعرف كل اللي النفس محتاجاه فعلاً :

🔸 الأمان
إنك تحس إن مشاعرك مش هتستخدم ضدك...
إنك متبقاش عايش مترقب هجوم أو تقليل.

🔸 الاستقرار
إن الظروف حواليك ما تتغيرش
بشكل مرعب ومفاجئ طول الوقت.

🔸 النظام
إن حياتك ما تبقاش عشوائية.
في ترتيب يخليك تعرف تعمل إيه وإمتى.

🔸 الدعم
إنك تلاقي حد واقف جنبك وقت ما تقع…
مش واقف مستني يقولك “مش قولت لك؟”

🔸 الحب
إن وجودك يفرق…
مش بس وقت ما تكون مفيد.

🔸 القبول
إنك تبقى مقبول بعيوبك قبل مميزاتك.

🔸 الاهتمام
إن حد يلاحظ تغيرك…
ويسأل “مالك؟”

🔸 المشاركة
إنك متحسش إنك لوحدك في الحياة.

🔸 الاحترام
إن رأيك يتحسب له حساب...
حتى لو مختلف.

🔸 التعاون
إنك تحس إن اللي حواليك بيكملوك...
مش بينافسوك طول الوقت.

🔸 الثقة
إنك تقول: “أيوه أقدر أحاول”...
حتى لو جواك خوف.

🔸 النجاح
إحساس إن تعبك له نتيجة.

🔸 التقدير
إن مجهودك يتشاف ويتقالك “شكرًا”.

🔸 الاستقلال
إنك تعتمد على نفسك وتاخد قراراتك.

🔸 الحرية
إنك تختار من غير خوف دائم من العقاب.

🔸 التعبير
إنك تقول “أنا زعلان”...
من غير ما يتقال لك “كبر دماغك”.

🔸 الهدف
إن يومك ما يكونش مجرد تكرار…
في سبب يخليك تكمل.

🔸 التعليم
إنك تفضل تكبر فكريًا...
ومش واقف مكانك.

⚠️لو احتياج منهم ناقص…
ده مش ضعف.
ده إشارة إن في جزء محتاج رعاية.

📌 قولي:
💬 إيه أكتر احتياج حسيت إنه مهم ليك دلوقتي؟ 🤍

19/02/2026

مش أنت بتاكل وتشرب وتنام…
ناقصك إيه تاني❓
زعلان ليه يعني❓
إيه اللي تعبك⁉️

الجُمل دي مش بس اتقالت في الطفولة…
دي جُمل لسه بتتكرر في بيوت كتير لحد النهارده.

وغالبًا كانت بتتقال بنية كويسة…
بس أثرها مكنش دايمًا كويس.

لأنها -من غير ما نقصد -
بتختزل الإنسان في احتياجاته الجسدية بس.

🔶الإنسان مش جسد بس… هو جسد ونفس.
🔸الجسد له احتياجات بيولوجية.
🔸والنفس لها احتياجات نفسية.

والاحتياجات النفسية مش رفاهية.
هي زي البنزين للعربية…
من غيرها الإنسان يستهلك نفسه وهو ماشي في الحياة.

ولو الاحتياجات دي ما اتلبتش،
ممكن يبدأ يكون أفكار سلبية عن نفسه
أو يحاول يلبي احتياجه بطرق مؤذية.

قولي في الكومنتات:
إيه الكلمة أو الجملة اللي اتقالتلك وغيرت نظرتك لنفسك وخلتك تشك في إحساسك أو قيمتك؟

📌 في البوست الجاي هتكلم عن أهم الاحتياجات النفسية اللي لو ما اتلبتش… بتسيب أثر كبير جوه الإنسان.
تابعوا البيدچ.


#الاحتياجات

10/02/2026

💌 الدعوة عامة لكل أم حابة تفهم طفلها أكتر وتطمن على نموه.

💌 الرسائل الخفية للطفل

كل لحظة في نمو طفلك ليها قيمة… وخطوة صغيرة النهارده ممكن تفرق في مستقبله كله 🕰️🤍
كل تصرف بيعمله طفلك وراه رسالة، والمشكلة بتبدأ لما منعرفش نفهم معناها.

عشان كده بنقدّم لكم ورشة "الرسائل الخفية للطفل" ضمن فعاليات حملة
«نحو طفولة آمنة… طفلي بيكبر صح» 🌱

هنتكلم فيها عن:
✨ ما وراء سلوكيات طفلك
🫂 الاحتياجات الحقيقية للطفل
🤔 نصائح عملية للأم للتعامل في البيت

🎁 ولكل الأمهات الحاضرات: هيكون فيه تقييمات نمو مجانية للأطفال في يوم مخصص لاحقًا ضمن خدمات الحملة.

📆 موعدنا: الخميس 12/2/2026
🕦 الساعة: 11:30 صباحًا
📍 المكان: فيلا ٢٠١ شارع طيبة – كليوباترا

الدعوة عامة لكل أم حابة تفهم طفلها أكتر وتطمن على نموه 🤍

05/02/2026

أخر بوست في سلسلة العلاقات المؤذية.
ليه الانسحاب من العلاقة المؤذية صعب...👀
وإزاي نبدأ التعافي❓
هنعرف السبب ونتعلم خطوات التعافي خطوة بخطوة...

ليه الانسحاب من العلاقه المؤذيه بيكون صعب ⁉️
مش لأن العلاقه آمنه
ولا لأنك مش شايف الأذى.

لكن لأن الأذى مش دايماً بيجي لوحده
العلاقه المؤذيه غالباً بتيجي معاها:
▪️شويه حب
▪️شويه اهتمام
▪️شويه وعود
▪️وشويه أمل إن "بكره يتحسن"

ودا اللي بيخلي الانسحاب صعب…
مش ضعف، دا «تفسير نفسي» 👇
1️⃣التعلق مش بيكون بالشخص…
ولكن بالنسخة اللي كنتِ مستنياها منه
النسخة اللي قالك هيبقى عليها،
واللي رسمتيها في خيالك.

2️⃣المخ أتبرمج علي القليل
لما الأذى يبقى هو الأساس…
أي لحظة حلوة بتحس إنها طوق نجاة، مش حق.

3️⃣الخوف مش من الفراق... الخوف من الفراغ
مين هيملى المساحة اللي اتعودتي عليها؟

4️⃣اللوم على النهاية
تفضل تقول:
"يمكن لو صبرت أكتر كان أتحسن؟"
"يمكن العيب فيا أنا؟"

والحقيقة❓
العلاقة اللي بتوجعك أكتر ما ترتاحي فيها
مش محتاجه صبر...محتاجه شجاعة.

طيب… نعمل إيه بعد ما نفهم🤔 ؟
الحل مش في النسيان
ولا أنك تقنع نفسك أنك تمام.

البداية أنك تعترف إن اللي حصل كان مؤلم فعلاً❤️‍🩹.

◾التوقف عن تبرير الأذى
اللي وجعك وجعك
حتى لو كان بيحبك
حتى لو كان عنده ظرف
الأذي ملوش مبرر.

◾قطع الاتصال عشان تلحق نفسك
مش عشان تعاقبه
لكن عشان قلبك وعقلك يهدوا.
كل رسالة = جرح جديد
قطع الاتصال مش قسوة…
دا إسعاف أولي.

◾مش مطلوب منك تكره
مطلوب منك تحب نفسك كفايه أنك مترجعش للأذى.

◾الرجوع لنفسك اللي ضاعت
أعمل الحاجات اللي كنت بتحبها قبل العلاقة
هواياتك، شغلك، أسلوبك
كل دا كان موجود قبله.

◾أسمح لنفسك تحزن
متستعجلش القوة
الدموع مش ضعف...
دي تفريغ.

◾غير الأسئلة
بدل: ليه عمل فيا كدا؟
أسأل: إزاي أحمي نفسي من الأذى في العلاقات بعد كدا؟

📌العلاج الحقيقي بيبدأ لما تختار نفسك
مش لما تنساه
مش لما يعتذر
لكن لما تقول:
"أنا أستاهل علاقة متكسرنيش".

التعافي مش أنك تبقى جامد
التعافي أنك تبقى أحن علي نفسك.

🔗 سلسلة العلاقات المؤذية (3 بوستات):
1️⃣ إزاي العلاقة المؤذية بتبدأ
🔗 https://www.facebook.com/share/p/1Bh7REpdYi/
2️⃣ علامات الإنذار اللي مينفعش تتجاهلها
🔗 https://www.facebook.com/share/p/18caKxxJjM/
3️⃣ ليه الانسحاب صعب وإزاي نبدأ التعافي
(البوست دا)

💬 قولي في الكومنت:
أنهي مرحلة حسيت نفسك فيها أكتر؟
ولو البوست لمسك،
اعمل شير…
يمكن حد محتاج الصورة كاملة دلوقتي ❤️‍🩹


#العلاقات #التعلق

02/02/2026

⚠️ في علامات صغيرة لو تجاهلناها، العلاقة بتتحوّل لحِمل تقيل

في البوست اللي فات اتكلمنا إزاي العلاقة المؤذية غالبًا ما بتبدأش بالأذى،
لكن النهارده هنتكلم عن:
🚨 علامات الإنذار اللي ممكن تظهر بدري، وما ينفعش نتجاهلها.

🔍 علامات ممكن توضح إن العلاقة ماشية في اتجاه مؤذي:
1️⃣ الخوف من ردّ الفعل على مشاعرك
تحسي إنك قبل ما تتكلمي لازم تفكري:
هيتريق؟ هيغضب؟ هيقلل؟
فبتفضلي السكوت.

2️⃣ السخرية من مشاعرك أو التقليل من إحساسك
كلام زي:
“إنتِ حسّاسة زيادة”
“مكبرة الموضوع”
“بتبالغي”

3️⃣ تحويل الغلط عليكِ دايمًا
حتى لو المشكلة واضحة،
تلاقي نفسك في الآخر اللي بتعتذري.

4️⃣ انتقادات مستمرة على تفاصيل صغيرة
طريقتك، كلامك، اختياراتك…
نقد متكرر يخليك تحسي إنك دايمًا مش كفاية.

5️⃣ منعك من استكشاف الجديد و الخوف من استقلاليتك
أي خطوة ليكِ لوحدك تتحول لمشكلة،
وكأن قوتك أو تطورك حاجة مقلقة للطرف الأخر.

6️⃣ عدم احترام حدودك أو كلامك
تتكلمي وتطلبي، بس طلبك وكلامك ما يتحطش في الاعتبار.

7️⃣ شعور دائم بعدم الإستقرار
قرب شديد فجأة،
وبعده برود أو اختفاء من غير تفسير.

8️⃣ قلة الإهتمام والاختفاء المفاجئ
تحسي إنك دايمًا مستنية،
رسالة، اتصال، اهتمام بسيط.

9️⃣ لوم ذات مستمر على كل اللي بيحصل
تبدأي تسألي نفسك:
“أنا السبب؟”
“لو اتصرفت غير كده كان هيبقى أحسن؟”

🔟 العيش على جملة: “يمكن يتغيّر… أو يمكن أنا اللي ببالغ”
وتفضلي معلقة بالأمل، على حساب نفسك.

📌 خدي بالك:
العلاقة المؤذية مش بس بتأذي مشاعرك،
هي بتعيد تشكيلك على مقاس الخوف،
وتخليك تقلل من نفسك، وتسكت عن حقك،
وتفتكر إن ده الطبيعي… وهو مش طبيعي.

🔖 لو حسيتي بالكلام ده…
احفظيه، يمكن تحتاجيه بعدين.

في البوست الجاي هنتكلم عن:
ليه الانسحاب من العلاقة المؤذية بيكون صعب، وإزاي نبدأ رحلة التعافي خطوة خطوة 🌱


#العلاقات #التعلق