Dr/ Marwa Samy Clinic

12/12/2025

شكراااا اسعدتوني
شكرا حضانة ميني هارفارد شارع كلية الآداب
وشكراااا لكل تيم العمل والمشرفات علي الترحيب والمقابلة وحسن الضيافة 🌷🩵
شكراااا شركة Elixir وشكراااا د يحي
❤️❤️❤️❤️❤️❤️❤️

11/12/2025

الأب اقتحم غرفة الكشف...انا هكشف قبل كل الناس دي وحضرتك هتسمعيني
قولتله حضرتك اقتحمت باب مكتبي بدون اذني....فأنا مش هسمعك ولا هكشف اصلا علي الطفل الا في بالذوق والاحترام
وتعتذر للمساعدين اللي انت زعقت
معاهم
الاب....قالي لمعلوماتك انا اصلا مش محترم ومش متربي ⁉️😁

قولتله ...يا فندم واضح والله وضوح الشمس مش محتاج تأكد المعلومة

قالنا كل الدكاترة معندهاش ضمير
😁😁😁
صحيح انا مردتش عليه والستات اللي في العيادة قاموا بالواجب

بس قررت يا سووووعاد
اقلب علي الرجالة الاشرار
واحب الستات الطيبين واخدهم معايا الجنة إن شاء الله
ومش هندخل الرجالة خلاص 😁😁😁😁😁

هم يبكي وهم يضحك
يخربيت المخدرات
#حدث بالفعل 😁

07/12/2025

يروحوا المدرسة....يرجعوا مقتولين
يروحوا يلعبوا رياضة....يرجعوا مقتولين
يروحوا الدرس....يرجعوا مقتولين
ميروحوش في حتة يبقوا سرسجية يشربوا مخدرات ويرجعوا مقتولين

طيب العيال دى تروح فين يا بلد
مفيش مسؤل يطلع راجل ويقول أنا مقصر واستحق العقاب والله عقاب الدنيا أبسط كتير من عقاب الله
لا بارك الله فيكم
ربنا يربط علي قلوب الأمهات
حسبنا الله ونعم الوكيل
ربنا يكفينا شر ذوال نعمتك يارب
وتحول عافيتك وفجأة نقمتك
يارب ألطف بيهم وبينا
السيد وزير الرياضة ورئيس الاتحاد ياكش يجيلكم نوم كده أن شاءالله

06/12/2025

الجميلة رشا وفيق
أختي وصديقتي وزميلتي وصاحبتي وشريكتي في حب الأمهات والأطفال 😉🥰

مليوووون مبروووك يا حبيبتي ❤️
نجاح المؤتمر التاسع لسكر الأطفال وأمراض الغدد الصماء للاطفال
عودا حميدا ونجاحات مستمرة ربنا يديمها عليكي ويفرح قلبك ويجبر بخاطرك ومتغيبيش ابدا عن حبايبك
مجهود معمول بحب وماشاء الله حضور قوي كل اللي حضر جاي عشان بيحب رشا وفيق وجاي عشان يشوف رشا وفيق وجاي يسمع علم ويشوف نجوم الأطفال والسكر والغدد الصماء حبايب رشا وفيق
ربنا يجعلك محبوبة في الأرض والسماء
ويبارك خطواتك ويوفقك ويعافيكي ويسعدك ويفرح قلبك بأولادك ويجعل تعبك مع ولاد الناس أثر طيب يبقي ابدا 🌷
اتبسطت جدا جدا جدا اني شفت خوخة
Kholoud M Hassan 💚
🤍 💚 عشان يشوفها مرة كل سنة عندك
دمتي متألقة ومحبوبة وموفقة وتعيشي وتجمعينا وسط حبايبك 🥰♥️💚🩵
Rasha Wafeeq ❤️
ربنا يبارك فيكي ويخليكي ليا 🌹🥰

04/12/2025

افتح القوس يابني
زود الجديري المائي وخلي القوس مفتووووووح
ولسسسه

01/12/2025

القواعد العشرة للطفل حديث الولادة :
عزيزتي الام...
عشرة مفيش....عشان متفتيش :D

١-مفيش حاجة اسمها ندي البييي رضعه بيبي درينك...الرضاعة يعني لبن الام
٢_مفيش حاجة اسمها الينسون والكراويه بينضفوا معدة الطفل واالله معدته نضيفة جدا ومعقمه كمان
٣_مفيش حاجة اسمها شربي الطفل مية عشان الكلام يبقي سهل....اللبن ٧٠%منه ميه اصلا....مش محتاج يشرب
٤_مفيش حاجة اسمها لبن الام خفيف ومبيشبعش....والله لبن الام ربنا خالقه علي حسب احتياج الطفل ووزنه وعمره ونموه الرحمي..
٥_مفيش حاجة اسمها نخف اللبن الجاموسي بالميه والسكر ونديه للطفل..ده اسمه مهلبيه والله لبن وسكر وميه...افتكاسه مصرية
٦_مفيش حاجة اسمها سقف حلق الطفل واقع ومحتاجين نرفعه عند الدايه بشوية بن....لو سقف الحلق واقع...يبقي محتاج كيلو اسمنت ابيض يترفع بيه
٧_مفيش حاجة اسمها حقنه الصفرا...والله مافي حقنة للصفرا....ده فيتامين ك...وبنديه بس عشان نقلل حدوث امراض النزف...اللي ممكن تعمل صفرا...بس مش كل اسباب الصفرا
٨_مفيش حاجة اسمها مبيحبش الدوا يا دكتورة....مانا حضرتك يا هكتب ادويه يا هقول تعليمات...ساحرة انا ولا مش ساحرة
٩_مفيش حاجة اسمها معدة الطفل صغيرة مش هتستحمل ادوية...انا عارفه بكتب اية ومناسب لعمره ولا لا...
١٠_مفيش حاجة اسمها الطفل ينام سبعتلاف ساعة...اصل النوم غذا...حضرتك الطفل انسان بيصحي وينام عادي جدااا بساعات معينه هيقولهالك دكتور الاطفال حسب عمر الطفل وحالتة ونموه....

عزيزتي الام...
متطلعيش الدكتور اللي جواكي مع ابنك....البنك الاهلي هيديكي قرض وابقي ادخلي طب...بس بلاش فتي لو سمحتي..

30/11/2025

هذا المنظر...أحبه
من توفيق ربنا وكرمه
وقفنا الصناعي تماما وبدأنا طبيعي في عمر ٣ شهور و اسبوعين ووقفنا الصناعي واتبرعت بعلبة اللبن للبطلة اللي بعدها.....عااااش 💪🏆انتي بطلة
الرضاعه الطبيعيه مش سهلة...بس مستاهلة💚

28/11/2025

احتفاليه ملوك السكر للسنه التاسعة بالمنصورة تحت قيادة سكر المسكرين
الدكتورة الجميلة رشا وفيق
استشاري امراض غدد الأطفال
مستشفى المنصوره للتأمين الصحي
♥️♥️

25/11/2025

الصورة دى فيها ٢٥ سنة دراسة طب
الصورة دي عشان ربنا ينعم عليا واقدر اتصورها ...أخدت من عمري حرفيا خمسة وعشرين سنة حرفيا من بداية دراستي للطب حتي أصبحت استشاري لطب الأطفال وحديثي الولادة
بفضل الله أولاً وأخيراً
ثم دعوات جدتي و والدي ووالدتي
ومجهود أهلي وأخواتي
ومحبتكم ودعمكم ومساعدتكم ليا وتشجعيكم وامتنانكم لمجهودي البسيط وغفرانكم لذلاتي واخفاقاتي
شكرااااا لكل حد طيب خاطري وساعدني عشان أقدر أقف علي منصة مع أكبر وأعظم أساتذة في الطب عموما وعلماء ونجوم طب الأطفال خصوصا
بارك الله في أساتذتي الأفاضل ربنا يجعل لكم أثرا طيبا وعملا صالحا في الدنيا والآخرة
شكرااااااا ❤️🌷
اللهم عرفني علي نعمك بدوامها وتمامها وأرزقني شكرك عليها ابدا ما أحييتني
🩵🤍💚❤️

24/11/2025

طيب يلا نلبس الكمامة تاني بقي
شكرا وزارة التربية والتعليم

23/11/2025

متتاخروووش 💪🙏

✨ اليوم الطبي بحضانة الفرقان ✨

نعلن لأولياء أمور أطفالنا أن حضانة الفرقان ستشهد يوم الثلاثاء القادم يوماً طبياً مميزاً بحضور الدكتورة مروة سامي
استشاري طب الأطفال وحديثي الولادة 👩‍⚕️💙

ستقوم الدكتورة بإجراء الكشف الطبي الشامل على أطفال الحضانة، بالإضافة إلى تحليل المعادن للاطمئنان على صحتهم ونموّهم بالشكل الأفضل إهداء من شركة الكسير فارما (الراعي لليوم الطبي )

💛 نهدف دائماً إلى الحفاظ على صحة أطفالنا وضمان بيئة آمنة ومطمئنة لهم.
💫 كل الشكر للدكتورة مروة أختي وصديقتي الغاليه على تعاونها وأهتمامها بصحة أطفالنا ، شكراً دكتور يحيى على أهتمامه وحرصه أن يكون موجود معانا 💜
خالص الشكر لأولياء الأمور على ثقتهم الغالية.

مع حضانة الفرقان… صحة أولادكم أولوية واهتمامنا بهم رسالة. 🌿💚
@أبرز المعجبين
Anwar Eldeeb
Marwa Samy
Dr/ Marwa Samy Clinic

23/11/2025

ذا مومنت لما تقرر تفتح الواتس وترد علي أسئلة الأمهات

رسالة رقم ١
الام...لو سمحتي ابني سخن جدا
انا....مين ابنك واخر روشته من فضلك
الام....ابني الي بيكشف عندك
انا.......
الام تروح مصوره ابنها وباعته صورته
انا.....لا تعليق

رسالة رقم ٢
الأم....لو سمحتي ابني بيكح
انا ....اخر روشته من فضلك
الأم...انا عند حماتي مش ف البيت
انا....طيب ايه الأدوية اللي انا كاتباها
الام ...لا مكشفناش من فترة
انا....طيب روحي اقرب مكان يتفحص
الام....مينفعش تكتبيلي حاجه للكحة وخلاص؟؟؟؟
انا....لا تعليق

رسالة رقم ٣
الأم....لو سمحتي ابني سخن جدا
انا....من فضلك اخر روشتة
الام....بهدوء تصورلي روشته من أغسطس ٢٠٢٤
انا....حضرتك دي روشته من سنه ونص
الام....مانا بكررها كل مرة وبيخف
المرادي مش بيتحسن
انا......لا تعليق

رسالة رقم ٤
الام....لو سمحتي يا دكتورة بنتي سخنة وحطيتلها لزقة حراره ولسه سخنة
انا....اديها لبوسه سيتال الان ولا يكرر لحد ما اشوفك أن شاءالله
الام.....مينفعش دولفين
انا ....لا مينفعش مش مناسب لسن بنتك
الام....طيب مينفعش بروفين
انا....هو حضرتك بتفاصليني ليه
الام....اصل اسمع أن البروفين احسن من السيتال
انا......لا تعليق

كان يوم ازرق يوم ما فتحت الواتس
مناهدة ايفري وير
معندكوش اخوات دكاترة أطفال
يا اشرار يا قتلة يالي هتدخلوا النار
ادعي عليكم ب ايه طا
خلصت كل الدعوات عليكم🥺🥹🥹