10/01/2023
مها بتسأل منى: "هتولدي طبيعي ولا قيصري؟" وإذ بالرد المفاجئ من منى: "هي هتفرق يعني! ما هو كدا ينفع وكدا ينفع" :D
بغض النظر عن الأسباب اللي بتخلي الستات يولدوا طبيعي أو قيصري عامة، في حقيقة صعبة شوية من ناحية استيعابها متعلقة بالبيبي الجديد.
تعرفوا إن فى دراسات كتير اتعملت على البيبهات اللي بتتولد طبيعي واللي بتتولد قيصري ولقوا في اختلافات كتيرة في الميكروبات النافعة اللي بتتكون عندهم!
ما تقلقيش يا ست الكل هنوضحلك الفرق 😃
في البداية لازم نعرف إن البكتيريا في منها النافع لينا وفي منها اللي بيسبب لنا أمراض ولكن نسبة اللي بيعملنا أمراض قليل جدا مقارنة بالنافع.
طب هتسأليني بتعيش فين الميكروبات النافعة دي؟
هي موجودة في جسمنا، وعددها كمان أكثر من عدد خلايا جسمنا تخيلي!
حتى العلماء بيسموها بالميكروبيوم، ودي موجودة على الجلد وفي الفم والأمعاء كمان..
اللي بيحصل بقى لما البيبي بيعدي في قناة الولادة وهو نازل بياخد معاه شوية ميكروبات نافعة حلوين من مامته، دول مش هيعرف يعوضهم من أي مصدر تاني غير من الأم، ودي بتساعده كتير في إنه يبقى مناعته قوية وكمان يحارب أمراض كتير طوال فترة حياته.
أما البيبي بقى اللي بيتولد قيصري بيتحرم للأسف من الميكروبات النافعة دي، المشكلة كمان إنه بيكتسب ميكروبات من بيئة المكان اللي اتولد فيه، ودا شيء مش لطيف خالص، ناهيك عن إنهم لقوا إن معظم أمراض المناعة والحساسية والسمنة كانت متعلقة أكتر بالأطفال اللي اتولدوا قيصري؛ ودا كله لإن الميكروبات النافعة دي بتساعدهم كتير في إنهم يبقوا أصحاء.
طب ودا حله إيه؟
الأبحاث ما وقفتش وكل محاولاتهم دلوقتي إزاي يعوضوا الأطفال اللي بتتولد قيصري بالميكروبات النافعة دي؟
عملوا تجربة إنهم يسمحوا بتجميع سوائل قناة الولادة قبل عملية الولادة القيصرية، وبعدين يحطوا فيها البيبي بعد ولادته.
الموضوع دا كانت نتائجه إيجابية بشكل جزئي، والبيبي فعلاً بيكتسب جزء من الميكروبات النافعة دي، بس هل هيفضل تأثيرها معاه لحد ما يكبر وطول حياته ولا لا؟
دا اللي لسه ما نعرفهوش، وبما إن الولادة القيصرية بتشكل نسبة كبيرة في عصرنا الحالي فنحاول نعوض البيبي بالتغذية الطبيعية بقى، ويُفضل تغذية الأم تكون سليمة جدا في فترة الحمل وبعيدة عن المضادات الحيوية والعلاجات اللي ممكن تسبب مشاكل للبيبى، كله تحت إشراف الطبيب مع رعاية نفسية وتغذوية.
وأخيرا حابين نقولك: ما تستغربش إن حياتك فعلاً بتتأثر من أول لحظة ليك فى الدنيا ومن احتكاكك بأول محيط بتتولد فيه.
وحياتك متوقفة على شوية بكتيريا نافعة مش متشافة أساساً.😉
