29/07/2021
شربي الواد ميه ..... الجو حر 😡
طبعا موضوع شرب الميه من المواضيع اللي بتحظي بجدل واسع جدا
مش ما بين الامهات بس absolutely
وبين الدكاتره كمان 😫😂😂
طيب والحل ؟؟
تعالوا نحكي الموضوع واسيبكم انتوا تحكموا في القصه دي
من سنة ٢٠٠٠ والاطباء مختلفين لدرجة انهم عملوا دراسه اسمها
( هل يحتاج الاطفال الرضع لشرب الماء؟)
ولقوا ان حوالي ٢٥ ٪من الامهات اللي شربت الطفل ميه في اول شهر حصلهم اكتر من مشكله
علي سبيل المثال:
الطفل اللي بيشرب ميه ..بيشبع...فبالتالي ...بتقل رضاعته..فبالتالي..بيقل اللبن عند الام...فبالتالي بتتأثر تغذية الطفل ..فبالتالي ..يتأثر النمو 😰
دا الموضوع كبير بقا؟؟
خدوا كلام الناس الكبيره
منظمة الصحه العالميه WHO
الاكاديميه الامريكية لطب الاطفال AAP
اوصوا بالرضاعه الطبيعيه المطلقه لمدة ٦ شهور..ومعني مطلقه مش (مطلّقه) ان الطفل مياخدش من امه غير الرضاعه وبس ..يعني لا اعشاب ولا ميه ولا ينسون ولا يحزنون 😜
والناس دي لما بتتكلم لازم الكل يسكت
مفيش حاجه بعد كلامهم لانهم المرجع لكل اطباء العالم ..وكلامهم لانظري ولا ارتجال ولا تيته قالت ولا الكلام ده ...بيكون نتاج لابحاث ودراسات علي مدار السنين علي اطفال من بقاع مختلفه علي مستوي العالم لحد ماقدروا يثبتوا صحة توصياتهم وتتنشر وتتعمم ....
ويجي هنا بقا دور تيته 😡
ازاي طفل يقعد ٦ شهور بدون ميه؟؟ انت تقدر تقعد بدون شرب يوم حتي؟؟ ياعم دا ربنا بيقول (( وجعلنا من الماء كل شئ حي))
بحبك ياتيته والله وعارف انك ربيتي اجيال بس العلم كل يوم فيه جديد والكلام اللي ربنا سبحانه وتعالي قاله مفيش اي تعارض بينه وبين التوصيات واقولك ازاي!!!
لبن الام بيحتوي علي اكتر من ٨٠٪ من تركيبه ميه والنسبه دي مش ثابته كمان دي بتتغير من الصيف للشتا وبتختلف حساب المناخ اللي الام عايشه فيه وبتختلف حسب المرحله العمريه للطفل وبتختلف كمان في الرضعه الواحده !!!😀
ازاي طيب؟؟ فهمني!!
بداية الرضعه بتكون لبن معظم تركيبه ميه علشان يروي عطش الطفل في الاول وبعد كده بتزداد نسبة الدهون والمواد المشبعه مع افراغ الثدي من اللبن...
يعني لبن الام بيوفر للطفل كل الاحتياجات الغذائيه في اول ٦ شهور ((سبحان الله))
اياً كان الجو صيف ولا شتا ... ولكن الام المفروض تشرب ميه كتير في الجو الحر ودا اللي قاله طبيب كندي بن حلال
( بالطبع ,يجب علي الامهات المرضعات ان يشربن الكتير من الماء اثناء الطقس الحار) 👌
هتطلع ام تسألني عن الاضرار ولخص الدور ..
*شرب الميه وبالاخص في اول شهر بيزود زيادة الصفرا في الدم وكمان بيزود فترة وجودها عند الطفل (( الناس اللي بتكتب جلوكوز للصفرا كعلاج او بينصحوا بالاعشاب بدون داعي..ركزوا😈))
*يتداخل في تغذية الطفل وبيأثر علي رضاعته
*الطفل اللي بيشرب ميه عرضه للاسهال وسوء التغذيه والبكتيريا
*لبن الام بيقل علي المدي الطويل ودا بسبب قلة رضاعة الطفل لان شرب الميه افقده شهيته🍼
طبعاً كل الاعراض دي وارد تحصل مع ادخال الميه وشوفناها كتير ،،، لكن فيه بعض الاطفال شربوا ميه قبل ٦ شهور وربنا ستر ومحصلش حاجه ،، فياريت الام اللي محصلش لابنها حاجه 🙏🏻 متحاوليش تقنعينا في الكومنت اد ايه التوصيات دي ولا حاجه واد ايه الكلام دا اوفر وتعملي لباقي الامهات البحر طحينه ،، كل ام دكتورة ابنها في بيتها واحنا دورنا نوعي للصح ....لا_للفتى ❌
👌بالنسبة للأطفال اللي بترضع صناعي
بديهي كدا ،، الرضعة عباره عن ميكس مابين البودر وكمية محدده من المياه ،،ايه الداعي ازود عليه انه يشرب ميه قبل ٦ شهور ونعرضه للأضرار اللي ذكرتها ☝️،، ما الرضعه فيه ميه كفايه ياستو 😔
قبل ما انسي وحد يسألني ،، البيبي اللي شرب ميه عاااادي جداً نبطلها لما نعرف انه غلط ،، بطنه مش هتنشف من قلة الميه ولا هيجراله اي اندهاشه
انها_الخزعبلات 😩
واخيرا 😇
الطفل مش محتاج لشرب الميه في اول ٦ شهور غير مع بدأ الاكل قبل كده ومننساش ان كل التوصيات فضلت الاكل والشرب علي ٦شهور...
❤ربنا يحفظ ولادنا وبناتنا❤
لايك للصفحه وشير عشان تفيدى غيرك 👉
❤ د/ رائد محمد قمر ❤
أخصائى طب الأطفال وحديثى الولادة
عضو الجمعية المصرية لطب الأطفال
واتس 01069676347📞
💎عيادة شبين القناطر - بجوار سوبر ماركت أبو رقيه
(يوميا من ٥م - ٨م )
ماعدا الثلاثاء والجمعة
💎عيادة الاحراز - شارع الحبايبه
(يوميا من ١٢ظ - ٤عصرا)
ماعدا الثلاثاء والجمعة
💎مركز تبارك للأطفال - شبين القناطر - قبل بنزينة الوكلاء
(الثلاثاء من ١٠ص - ٨م)
