16/12/2019
مصل الإنفلونزا، السرنجة المسبقة التعبئة اللى كان عليها كلام كتير الفترة اللى فاتت.
هل الموضوع فعلاً كان مستاهل كل الهلع و الذعر اللى حصل لما أختفى من الأسواق و منزلش فى معاده فى شهر أكتوبر؟
بدايةً كده إيه هو مصل الإنفلونزا أو الVaxigrip؟
الVaxigrip هو لقاح سنوى ضد مجموعة من ال Flu virus strains و بالتحديد نوع A و B ....المتوقع إنتشارها خلال سنة معينة.
طب هو بيحتوى على إيه؟ و بيشتغل إزاى؟
بيحتوى على Inactivated flu viruses اللى ليها القدرة على تحفيز الجهاز المناعى على إنتاج خلايا مناعية و الإحتفاظ بيها ضد الStrains المعينة دى.
مين ينفع ياخده، و جرعته قد إيه و بيتاخد إزاى؟
بيتاخد من سن ٦ شهور، ممكن أى شخص ياخده بشرط إن ميكونش فيه دور إنفلونزا قائم، و يعتبر أمن خلال فترة الحمل و الرضاعة و مفيش فى مكوناته أى مادة ممكن تأثر على الجنين أو الطفل فى فترة الرضاعة.
المصل بيتاخد فى العضل أعلى الذراع فى البالغين و الأطفال، و الرجل فى الرضع، و ممنوع إستخدامه عن طريق الوريد تماماً.
جرعته من سن ٦ شهور ل٣ سنوات نصف السرنجة تؤخذ مرة واحدة، و الجرعة للبالغين و الأطفال فوق ال٣ سنوات بتبقى السرنجة كلها و برضه تؤخذ مرة واحدة.
أحياناً بيبقى فى حاجة لتكرار الجرعة مرة أخرى فى نفس السنة فى الأطفال أقل من ٩ سنوات اللى أول مرة ياخدوا المصل.
إيه هى درجة الحماية اللى بيوفرها المصل؟
من ٤٠% ل٦٠% بحد أقصى, و لكن ممكن تبقى أقل بكتير زى ما حصل الموسم اللى فات و كانت درجة حمايته ٢٩% فقط حسب تقرير الCDC.
نيجى بقى للسؤال إيه مدى أهمية مصل الإنفلونزا؟ و هل المفترض كل الناس تاخده؟
مصل الإنفلونزا يعتبر لا غنى عنه لكبار السن، للCOPD patients، للAsthmatic patients، و أصحاب الأمراض المزمنة و الImmuno-compromised بشكل عام، و طبعاً الحوامل و الأطفال اللى مناعتهم ضعيفة...دول الفئات اللى مينفعش تستغنى عنه.
لكن إن كنت شخص بالغ و مش واحد من الفئات دى و مخدتش المصل هل دا يعتبر نهاية العالم؟
أكيد لأ، و زى ما وضحت أحياناً بتكون نسبة الحماية اللى بيوفرها ضئيلة جداً.
فلو كنت إنسان بالغ و سليم و مناعتك قوية مكانش فى داعى تلف الكرة الأرضية كلها علشان تلاقى المصل و كأن حياتك متوقفة عليه.
