19/11/2025
المضاد الحيوي مش عصير ولا بنبوني
🔴 المضاد الحيوي من أعظم اختراعات البشرية في القرن الماضي، وربنا سبحانه وتعالى هدى الإنسان إليه بفضله، وده سبب منع وفيات كتير على مستوى العالم.
🔴 لكن المضاد الحيوي ده مش مايه ساقعة بيتجاب من على رف الصيدلية علشان تاخد قرص أو قرصين تموت بيهم الميكروب وخلاص.
🔴 المضاد الحيوي لازم -لو شراب- يتحل صح، ويحفظ صح، ويتاخد بجرعة صح، وقبل ده كله يتاخد ولا لأ؟، وينفع مع علاجات تانية ولا لأ؟
🔴 الأدوار اللي بتصيب معظم البشر أكتر من ٨٠٪ منها فيروسية مش محتاجة مضاد حيوي، وبتخف لوحدها، ودور الطبيب أنه يعالج أعراضها، ويوجه المريض إلى كيفية التعامل معها ومع مضاعفاتها.
🔴 أدوار الالتهابات الفيروسية أحيانا بتقلب بالتهابات بكتيرية ثانوية، وهنا المضاد الحيوي بيكون مهم، يعني ممكن ما أبدأش مع الطفل أول ما يتعب بالمضاد، ولكن نختم بيه عادي، علشان كده بننتظر ونشوف، وأنا مش بستعجل مع كامل تقديري لأهل الطفل مش بتأثر بضغطهم.
🔴 المضاد الحيوي زي ما هو مهم لكن ليه أضرار احنا في غنى عنها على المدى القريب والبعيد زي انه في كتير من الأدوار الفيروسية بيموت البكتيريا النافعة في القولون، وبالتالي بيقلل المناعة ويطول الدور على الشخص.
👈🏻 وده لمسته في حالات كتير في العيادة أطفال كتير أسابيع ماشيين بحقن مضاد حيوي وشراب والحرارة ماراحتش ولا خفوا إلا بعد ما وقفنا المضادات تماما.
والكلام كتير بس كده كفاية.
