دكتور أسامة عزام

دكتور أسامة عزام صفحة الدكتور أسامة عزام

09/06/2025

عدنا للعمل في العيادات من اليوم
وكل عام وحضراتكم بخير

يا ذنب في حياتي اللي لو بكرا أتغفربقية حياتي هعيده وأفضل أكرره💪💚💙🩵شمساوي على طول
29/05/2025

يا ذنب في حياتي اللي لو بكرا أتغفر
بقية حياتي هعيده وأفضل أكرره💪💚💙🩵
شمساوي على طول

أهم مشاكل الصيف الصحية.(الفرهدة والإغماءات) وضربات الشمس."ضربة الشمس" ودي مشكلة قاتلةدي عبارة عن احتباس داخلي للحرارة دا...
21/05/2025

أهم مشاكل الصيف الصحية.
(الفرهدة والإغماءات) وضربات الشمس.
"ضربة الشمس" ودي مشكلة قاتلة
دي عبارة عن احتباس داخلي للحرارة داخل الجسم، وهي تختلف تماما عن "الحمى"
لأن الحمى رد فعل طبيعي ضد الميكروبات وبتكون تحت سيطرة واعية للجسم ولا تزيد درجة الحرارة عن المعدل الحيوي 41 درجة، ولا يمكن للحمى أن تتسبب في تلف للخلايا.
أما "ضربة الشمس" فلا تخضع لتنظيم الجسم ولا سيطرته وممكن ترتفع فوق ال42 درجة وهي مميتة في حد ذاتها.
ولا تتأثر بالأدوية المخفضة للحرارة.
هي حالة من الغليان الداخلي. يصحبها فقدان للوعي وهلوسة وأشياء أخرى.
ودي علاجها مش طب ودواء دي علاجها التبريد الفيزيائي.
لو حد ناصح دخل المصاب بضربة الشمس تحت مية باردة، أو حط عليه ثلج في كل مكان فده بيقتله، لأن الجلد هو الطريقة الوحيدة للتبريد، لو أثرت على الجلد بماء بارد أو مثلج الدم الساخن هيهرب من الجلد ويروح يولع في المخ جوه.
الحل ببساطة ننزل المريض كبير أو صغير مجرد من الملابس إلا الضروري حسب سنه وجنسه، نقعده مثلا على كرسي بلاستيك تحت دوش "دافي" وحط تحت "دافي" مليون خط" دوش زي اللي بنستحمى بيه ده درجة حرارة بين 36-39. ماء جاري ونسلط عليه مروحة، إحنا هنا بنستخدم الجلد كأنه "راديتير" للجسم المية الدافية هتكفل لنا إن الشعيرات الدموية للجلد تقضل مفتوحة "مواسير الراديتير" يعني، بينما المراوح زي مراوح الراديتير بتقوم بالتبريد.
المهم هتفضل حاطه بالشكل ده والدم يخرج من الداخل للجلد يبرد ويرجع ويجي غيره لحد ما درجة الحرارة تتظبط، ولما تلاقي المصاب قام وقال لك "إيه اللي أنتوا عاملينوا ده يا ولاد ال....." تعرف إن فاق من الهلاوس.
أما بالنسبة للفرهدة والإغماءات فبتكون نتيجة هبوط في ضغط الدم
وده ناتج عن إن الجسم في الحر بيحاول يبرد الدم ويخفض درجات الحرارة بالتالي بيفرش الدم على الجلد بالسعة القصوى، وده بياخد الدم من الدورة الدموية المركزية يفرشوا داخل الشعيرات الدموية للجلد، بالتالي الدم اللي في الدورة الدموية حجمه بيقل جدا، وكأن الشخص ده انضرب بالنار ونزف، فالضغط بينزل ويحصل هبوط في الدورة الدموية وإغماء تماما كالجريح اللي بينزف.
الحل الفوري لو لاقيت حد وقع من طوله في الحر، مش تروح تقعده، هو وقع من طوله علشان الدم موصلش للمخ، فأنت لما تقعده بتضره، ارفع رجله لفوق وخلي راسه تحت علشان شوية دم يروحوا للمخ يشعلوه.
وانقله لمكان بارد.
الحل الوقائي تجنب السير في الحر خاصة لأصحاب الضغط المنخفض.
وشرب العرقسوس، أيوه زي ما قرأتها كدة "العرقسوس" مشروب بيقلل افراز البول وبيعمل احتباس للسوائل فبيرفع الضغط، مشكلة العرقسوس في غرابة طعمه مش "وحاشة طعمه" بعد أول كوبيتين هتتعود عليه.
شارك لغيرك يمكن تلحق حد

الحاجة السخنة للأطفال.لما حد كبير بيجيله دور برد بيشرب مشاريب ساخنة.وبتكون لها تأثير ملطف جيد.لكن في الأطفال خاصة الرضع،...
20/05/2025

الحاجة السخنة للأطفال.
لما حد كبير بيجيله دور برد بيشرب مشاريب ساخنة.
وبتكون لها تأثير ملطف جيد.
لكن في الأطفال خاصة الرضع، ملهاش أي لازمة.
إحنا ككبار بنستفيد من المشروبات الساخنة لأننا بنشفطها مفحفحة وساخنة لحد ما.
أما الأطفال لا يمكن يشربوها ويتقبلوها غير لما تكون بقت في درجة حرارة جسمهم، بالتالي هتكون مجرد سائل.
طيب السائل ده إيه مكوناته؟!
شوية مية بسكر، ومش كدة وبس كمان "مختلة الضغط الأسموزي" بالتالي كثرة تلك السوائل تؤدي إلى تقليل الضغط الاسموزي للدم واختلال في التوازن بين أملاح الدم، وتلاقي الطفل بدأ يفقد الشهية وربما يرجع.
السوائل مطلوبة بالفعل خاصة في حالات السخونية والحمى لأنها بتعوض فقد الماء الغير محسوس بالتبخر من الجلد والتنفس، لكن يفضل تكون سوائل "عيارية" ذات ضغط اسموزي منضبط.
والضغط الاسموزي المنضبط هو "بصمة الحياة" وإبداع الخالق "أي سائل" لأي كائن حي "منضبط اسموزيا"
يعني العصائر الطبيعية الغير مخففة بشكل مبالغ فيه، يعني عصير برتقال غير مخفف عصير عنب.
دي العصائر اللي تعوض المية وتعوض الأملاح وتحافظ على توازن الضغط الاسموزي.

احتفاء الناس بمواعيد العيادة مخفضة الأجر يوم الجمعة ومشاعر الامتنان، هي أكبر دافع لاستمرارنا فيها.مازال عرض الكشف بأجر ر...
09/05/2025

احتفاء الناس بمواعيد العيادة مخفضة الأجر يوم الجمعة ومشاعر الامتنان، هي أكبر دافع لاستمرارنا فيها.
مازال عرض الكشف بأجر رمزي يوم الجمعة من الساعة 2 للساعة 4 مستمر
والدال على الخير كفاعله، لو انت مستغني دل غيرك يكتر خيرك.

طب الهشتكةكان من دواعي سعادتي أمس تعليقات الأمهات والأباء على منشور لشخص يسأل عني.وطبعا كانت قمة سعادتي بالتعليق الذي نش...
06/05/2025

طب الهشتكة
كان من دواعي سعادتي أمس تعليقات الأمهات والأباء على منشور لشخص يسأل عني.
وطبعا كانت قمة سعادتي بالتعليق الذي نشرت صورته.
لفت نظري في التعليق كلمة "هشتكة"
بس أنا عايز أقول إني "أمارس طب الهشتكة لكن في صمت" فما هو طب "الهشتكة"؟!
مجال طب الأطفال ينقسم قسمين
القسم الأول "الطفل المريض" Ill child
القسم الثاني "الطفل السليم" Well child
بالنسبة للقسم الأول وهذا ما اشتهرت به والحمد لله، واللي دخلت كلية الطب علشانه، واللي سبحت ضد التيار لأجله، وضحيت لأجله بأشياء الله وحده يعلمها.
وهو الطب المختص بعلاج المشاكل الصحية التي تؤثر وتهدد بشكل مباشر حياة الطفل أو حيوية أجهزته.
وهذا بفضل الله صار طريقي الذي اشتهرت به وربنا سبحانه استعملني فيه.
أما القسم الثاني
"الطفل السليم"
وهو المهتم بما هو بعيد عن محاربة الأمراض، طب النصائح والمتابعة لمحددات النمو.
وده رغم أهميته وكونه من صميم عملنا، لكن كان يتم اسناد تلك المهام الروتينية السهلة في الماضي وحتى الآن في الوحدات الصحية للممرضات والرائدات الريفيات.
واللي انخرط فيه قطاع عريض من الأطباء بشكل مبتذل فاق حد الاسفاف، لدرجة تسمية أنفسهم "جوز خالة العيال" وكلام جعلني بجد ندمت إني تخصصت أطفال، وده لأن المجال لم عيال واللي يجيب دبدوب يحميه ويغير له، وحاجات كدة زي "محمد رمضان في أمريكا".
واللي السيدة الفاضلة في تعليقها عبرت عنه بكلمة "هشتكة".
أكيد من حق أي طفل ياخد كل حقوقه، وأنا بفضل الله أعطي الحق والفضل بفضل الله تعالى.
أنا أمارس طب الهشتكة لكن بشكل وقور يليق بمقام الطب وجلال رسالته، وكمان يليق بشخصي وطباعي الشخصية، وشكلي.
فأي طفل أمه جيباه مهما كان سنه، جيباه بمرض مهما كان شدته، لا أنشغل بالمرض عن المريض، في أول زيارة ينصب اهتمامي على المرض وعلاجه، وأي ملاحظات على الطفل نفسه بأسجلها في صمت مثل الطفل باهت عنده أنيميا قصير على غير هيئة أهله، هزيل ..... إلخ.
وبعد علاجه في الاستشارة بعد ما يستعيد حالته الطبيعية، لو فيه ملاحظات باتعامل معاها.
فمجرد إن ابنك وقع في مجال نظري ولم أبدي لك أي ملاحظات عليه، فهذا يعني أنه تم فحص طوله ووزنه والتناسق بين الطول والوزن ومحيط الرأس وكمان نسبة هيموجلوبينه ومستوى الكالسيوم دون أن أنصب لك السيرك وأجيب المازورة وأقعد أعمل عليه حفلة.
بيجي لي أطفال سن 6 شهور لسنتين كانوا عند بتوع الهشتكة وبيتعمل عليهم حفلات وينصب لهم السيرك، وبلاقي عليهم ملاحظات تهدد حياتهم، لم تلفت نظر المهشتكاتية.
وكمان النصائح، بأعطي النصيحة لمن يحتاجها.
يعني لما يجيني رضيع 6 شهور وزنه 9 كيلو وما فوق وبيرضع طبيعي، أعتقادي إنه من الإسفاف ومن الحرت في المحروت، إني أدي الأم نصائح في الرضاعة الطبيعية، في حين أي مولود حديث الولادة بأعطي الأم أو أم الأم اللي جاية مع الوليد، محاضرة كاملة في الرضاعة الطبيعية بكل أبعادها المتعلقة بالأم والمولود ولا أبخل عليهم بالوقت، لدرجة زباين العيادة بقوا عارفين إن حظهم بيبقى وحش لو اللي داخل قبلهم "مولود" لأنه هيطول جوه في غرفة الكشف.
فالطب الراقي الشامخ هو طب "التفصيل" Tailored
المصمم لصاحبه.
كل مريض روشتته متفصله له زي الترزي لكل زبون مقاسه، ولكل مريض نصائحه، أما الشغل التجاري بتاع الكل روشتة واحدة والكل كلام موحد، ده اسفاف وحرق جاز عالفاضي.
ومع ذلك عن قريب سنوكل أمر "الهشتكة" على صفحتنا لمن تهشتككم، وسنغير من سياسة الصفحة بإسناد مهمة إدارة الصفحة لدكتورة تكون حلقة وصل بين كلاسيكيتي المحافظة، وبين رغبات الأمهات في لغة حوار أسهل واستمتاع بأمومتهم.
أحلامكم أوامر، ولو الهوا اللي حواليكم منعكش نرتبه لكم

مبدأيا كدة وأنا بأكتب المنشور ده، جاني إشعار إن فيه ناس جايبة سيرتي في جروب.دخلت لاقيت التعليق اللي صورته تحت.😍🥰"فاللهم ...
05/05/2025

مبدأيا كدة وأنا بأكتب المنشور ده، جاني إشعار إن فيه ناس جايبة سيرتي في جروب.
دخلت لاقيت التعليق اللي صورته تحت.😍🥰
"فاللهم اجعلني فوق ما يظنون واغفر لي ما لا يعلمون"
وبجد مش عارف أشكر الناس الحلوة دي إزاي وممتن لهم جدا خاصة "أم آسر"💚💚
نكمل كلام عن "المضاد الحيوي😃
ليسوا سواء.
هو إيه اللي بوظ سمعة المضاد الحيوي.؟!
شوف يا سيدي.
اتكلمنا في المنشور السابق عن البنسلين باعتباره عمدة المضادات وجدهم.
لكن تقريبا في نفس توقيت اكتشافه تم اكتشاف عائلة أخرى من المضادات الحيوية، بتشترك معاه في أنهم مضادات للبكتريا، ولكن تقريبا عكس بعض.
بينما البنسلين تخصص في البكتريا "موجبة الجرام" اختصت العائلة التانية بالبكتريا "سالبة الجرام"
وبينما البنسلين بيشتغل على حاجة في البكتريا مفيش منها في الانسان وهي "الجدار الخلوي" وبالتالي لا علاقة له بالإنسان، كانت العائلة التانية عائلة "الأمينوجليكوسيد" بتشتغل على منع تخليق البروتين.
بالتالي عائلة البنسلين متخصصة لأبعد مدى، لا علاقة لها بأي كائن حي غير البكتريا.
أما عائلة الأمينوجليكوسيد، فكانت بتشتغل بنظام "عليّ وعلى أعدائي"، الكل هينضر بس البكتريا هتموت، والإنسان هينضر ضرر مؤقت طفيف بالجرعات العلاجية البسيطة.
وعلشان كدة، مهما زودنا جرعات البنسلين يكاد محال نوصل لجرعة سامة أو ضارة، وبالتالي على مدار ما يقرب من "قرن" لسة البنسلين شغال وفعال، وكل ما البكتريا تعمل مناعة ضده نزود الجرعة يرجع يشتغل تاني.
أما العائلة التانية، فبعد سنوات من استخدامها وجدوا البكتريا عملت ضدها مناعة، ولو زودنا الجرعة على البكتريا هنزودها على الإنسان ولو زادت على الإنسان هتضره ضرر كبير، وده اللي بنسميه في علم الأدوية، هامش الأمان الضيق.
فهامش الأمان هو المسافة بين الجرعة العلاجية والجرعة السامة، فهامش الأمان في عائلة البنسلين أوسع من المحيط الهادي، لسة لحد الآن لم نستهلك هذا الهامش فمع بداية البنسلين كان ربع جرام منه يعالج أمراض قاتلة، أما الآن فنفس تلك الأمراض بنعالجها ب18جرام بنسلين في اليوم ومازال بإمكاننا زيادتها بمنتهى الأمان.
أما عائلة الأمينوجليكوسايد فخلاص تم إقاف استخدامها لأن مينفعش نزود الجرعة، والجرعة العلاجية الآمنة لم تعد فعالة.
ولكن شعبنا العشري عايشة في ذاكرته وتتوارثها الأجيال انطباعات الأباء والأجداد عن المضادات الحيوية القديمة "الاستربتومايسن"، - أحد أفراد الأمينوجليكوسيد – اللي كان علاج فعال لكن كان سيء السمعة عالي السمية ومع ذلك خدم البشرية كعلاج فعال ضد كابوس "السل" وكان سبب في تشويه سمعة "المضاد الحيوي" لأنه كان بيتم استخدامه لمدة شهور وبالتالي كان عالي السمية يسبب "طرش" و"فشل كلوي".
بس العائلة دي أصبحت في خبر "كان" لم يعد لها وجود حاليا، ورغم ذلك بقت سمعتها السيئة تطارد الأجيال الحديثة من المضادات الحيوية.
وأنا باعتباري "طبيب أطفال" أعاني من الرواسب الفكرية الملوثة لعقول الأباء والأمهات، والموروثة عن المضادات الحيوية، بالرغم إن المضادات المخصصة للأطفال من أكثر وأحدث وأئمن أنواع المضادات.

الحلق ملوش غير مكان واحد فقط لا غير."شحمة الأذن" المعتادة.أي وخز أو خرم لصوان الأذن كما بهذا الشكل ممكن أو من شبه المؤكد...
03/05/2025

الحلق ملوش غير مكان واحد فقط لا غير.
"شحمة الأذن" المعتادة.
أي وخز أو خرم لصوان الأذن كما بهذا الشكل ممكن أو من شبه المؤكد، هيتسبب في التهابات، والالتهابات في المكان ده بتبقى زي البروما في شاسيه العربية، البرومة هتسحب في غضاريف صوان الأذن "القرقوشة" يعني، ولو الغضاريف التهبت بيحصل لها تحلل وتلاقي صوان الأذن بقى زي حتة القماشة من غير دعامات داخلية والودان تدلدل زي ودان الكلب
فانتبه وحظر غيرك من القرف ده

{يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُ...
02/05/2025

{يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ} (6) سورة الحجرات
وفي مجال الطب وجدت أفسق الفواسق هو من يتجنى على المضاد الحيوي بكلام ما أنزل الله به من سلطان، والطب والعلم أبرياء من كلامهم.
نخلص الموضوع قبل ما يبدأ
في كتاب كامل من 400 صفحة اسمه "المضاد الحيوي كمضاد للالتهابات"
Antibiotics As Anti-Inflammatory
كان عبارة عن بحث كان الباحثين يأملوا من خلاله الحصول على أي مضاد حيوي "يضعف المناعة" وبدأوا بالبحث في كل المضادات الحيوية الحديثة وحتى اللي اتلغت على أمل انهم يلاقوا مضاد حيوي "يضعف المناعة"
وفي خلال البحث عن هذا المضاد الحيوي اكتشفوا أن المضاد الحيوي "مضاد للالتهابات" واكتشفوا كمان إن في عائلة من المضاد الحيوي بتقوي المناعة الفيزيقية المتمثلة في تحريك أهداب الجهاز التنفسي لطرد الميكروبات والبلغم بشكل أسرع. وفي النهاية كتبوا الخلاصة بصيغة من الأسف مفادها.
"لم نجد مضاد حيوي له تأثير سلبي على المناعة" كانوا عايزين يلاقوا مضاد بيضعف المناعة ليه مش موضوعنا نبقى نحكي الموضوع بعدين.
نتكلم بتبسيط عن المضاد الحيوي، وناخد أبسط وأشهر نوع كمثال وما ينطبق عليه ينطبق على غيره مع فروق طفيفة
"البنسلين"
البنسلين زيه زي أي مادة بتدخل الجسم زي مثلا "الكفايين" في القهوة.
البنسلين والكفايين دخلو جسم بالفم ووصلوا لدمك.
تعالى نشوف سلوك كلا منهما.
الكافيين أي خلية في جسمك هيقابلها هيتفاعل معاها، المخ ينبهه الرئتين هيعلي التنفس القلب هيزود دقاته الكلى هيدر البول الأوعية هيقبضها حتى المعدة هيزود افرازاتها، حتى المصارين هيقلل حركتها .... إلخ.
طيب البنسلين؟!
البنسلين مش شايفك أصلا، ولا فارق معاه أنت بشر ولا حيوان ولا نبات ولا حتى جماد، أنت مجرد ميدان حرب، مجرد مكان لمعركة بينه وبين البكتريا، يعني متفرقش معاه ساحة المعركة دي "طبق آجار" شوربة، ولا فوق نبات أو فطر أو في جسم فأر أو مخ حضرتك.
هتحط البنسلين على بكتريا فوق طبق آجار هيموتها، هتحطه على ورق نبات هيموتها هتدخله جسم فأر مريض هقتل البكتريا هتدخله جسمك هيعمل وردية داخل جسمك ويمشي بين خلايا جسمك أي بكتريا تخصه هيقتلها، ولما الوردية بتاعته تخلص بعد 6 ساعات ياخد بعضه ويخرج من الكلى بطريقة التصفية يعني بيعدي من الفلتر بسهولة وسلام وينزل في البول، ولا شافك ولا انت تفرق معاه، وطريقة قتله للبكتريا هي انه يستهدف حاجة في البكتريا مفيش عندك في خلاياك حاجة تشبهها، علشان كدة أنت مجرد ساحة تفتيش وهو دورية أمنية.
وأكبر دليل على كدة، أن البنسلين تقريبا ملوش جرعة سامة مهما زادت الجرعات، يعني مثلا، أقل من ربع جرام كافيين لو وصلوا دمك ممكن يسمموك، بينما البنسلين منذ اخترعوه لحد الآن جرعاته في ازدياد لحد ما وصلت لأكثر من 10 جرام وقربت على ال20 جرام، ومفيش تسمم منه، لأنه "مش شايفك" أساسا.
بعد ده كله يجي حد محسوب على المنظومة الطبية يشنع على المضادات الحيوية.
بدون المضاد الحيوي، كان زمان سكان الأرض حاليا أقل من "مليار".
المضادات الحيوية جعلت "الطاعون" مرض تاريخي انقرض زي الديناصورات، والجزام والكوليرا والتيفود.
عايشين في خيره وننكر جميله

هذا إعلان عن مواعيدنا الصيفية، ننشره هنا لمتابعينا على الصفحة.ومنه نسخة مطبوعة سنوزعها على أهلنا في قرى بنها غرب النيل، ...
01/05/2025

هذا إعلان عن مواعيدنا الصيفية، ننشره هنا لمتابعينا على الصفحة.
ومنه نسخة مطبوعة سنوزعها على أهلنا في قرى بنها غرب النيل، من #ميتـالحوفيين #الحوفيين شمالا مرورا ب #دملو و #ورورة وصولا ل #كفر الجزار، نزولا إلى #بطا و #كفرـبطا إلى ذكري جنوبا.
فرجاء المساعدة في النشر على الفيس، ومن يمكنه التفضل ومساعدتنا في توزيع ورق الإعلان المطبوع سواء محبة وأخوة أو حتى بالأجر في منطقته بعد صلاة الجمعة فليتواصل معي وسأرسل له كمية من الورق لحد مكانه.
وربنا يجعلنا في خدمة أطفالكم على أحسن وجه

20/04/2025

ملاك وشيطان.
من أول محاضرة عنه في الكلية ولحد الآن لا يمر في بالي إلا مقترن بصورة "عزت" (رشدي أباظة) في فيلم "ملاك وشيطان".
إنه فيروس الإلتهاب الكبدي من النوع (أ) Hepatitis A
التطابق بين الفيروس (أ) و(عزت) يكاد يكون تطابق تام.
عزت البلطجي السفاح اللي أسهل حاجة عنده القتل في أي راجل شايف نفسه.
بيتحول لحمل وديع حنون مع "سوسن" البنوتة الصغيرة.
نفس الكلام تماما مع الفيروس (أ) فبينما حضوره على الشخص البالغ يعتبر رسالة مفادها "حضر كفنك" إلا أن تحدث معجزة.
فنفس هذا الفيروس لما بيجي للأطفال بيتحول لمجدي تختوخ في فيلم "قلب أمه" و"عزت" في فيلم "ملاك وشيطان"
وبيبقى طيب وحنين وبعلاج أو من غير علاج بياخد بعضه ويمشي ويدي الطفل مناعة مدى الحياة.
لدرجة أساتذتنا حكوا لنا عن أساتذتهم أنهم كانوا بيقولوا لهم "لو ابن الجيران جاله الالتهاب الكبدي (أ) ابعت ابنك يلعب معاه علشان يتعدي وهو صغير وياخد مناعة، بدل ما يجي له على كبر ويموته.
سلوك الفيروس ما يزال لغز طبي علمي، مفيش لحد الآن أي تفسير علمي لسلوك الفيروس ده، ليه مفتري على الكبار، وحنون على الصغار.
حالات الفيروس دي كتييييييير جدا في الأطفال وفي الموسم بتاعه تقريبا كل يوم بيجي لي حالة على الأقل، والحمد لله كلهم بيتم الله لهم الشفاء على خير بأسرع وقت.
ومن خلال خبرات السنوات لاحظت إن التعافي بيكون أسرع وأسهل كلما كان التشخيص مبكر.
في شهر شعبان في أوله جاني طفل في الحضانة أبوه وأموه جابوه بأعراض بسيطة تشبه أي نزلة معوية، مغص وترجيع، لم يكن هناك أي علامات واضحة ولما طلعت الطفل على السونار مكانش لسة ظهرت أي علامات.
لكن هناك اصفرار صعب للعين غير الخبيرة رؤيته، لمحت هذا الاصفرار تحت ضوء الشمس المباشر، ولذلك اخترت غرفة الكشف قبلية علشان الشمس تدخلها مباشر، ولحسن الحظ كانوا جايين في الفترة الصباحية.
بعتهم عملوا تحليل انزيمات، وكانت لسة في بداية الارتفاع.
الطفل أخد العلاج وما شاء الله تعافى حتى قبل ظهور العلامات الكبرى من اصفرار شديد وتغير لون البول والبراز.
في أخر شهر شعبان.
وجدت أخ لي لم تلده أمي، ابنه شاب كبير عشريني باعت لي تحليل بول له فيه نسبة صفراء في البول.
قلت له مسافة السكة تكون عندي، وأول ما وصلوا بصيت في عينه وجدت خط رفيع أصفر في عينه أقل وضوحا من هلال رمضان.
اتشخص للأسف التهاب كبدي (أ) وفي شخص بالغ.
أنا وقتها كنت أبأس شخص على وجه الأرض، ابن أغلى الحبايب في موقف يهدد حياته، ومش قادر أصارح أبوه.
لو كان هذا الشاب ابن أي حد غير أخي هذا، كنت بالتأكيد هتنصل من علاجه ويكفي إني عملت معاه الواجب بزيادة بالتشخيص المبكر بل المبكر جدا جدا، يعني النتيجة من الكنترول.
وعمري ما كنت أتدخل في حالة الكتاب بيقول إن الأصل فيها "الموت".
لكن علشان ده مش أي حد ومش ابن أي حد، وعلشان عارف البروتوكول المتبع في كل المستشفيات وكل الزملاء، تعاملت مع ابنه زي ما باتعامل مع أطفال العيادة.
واللي جرأني على التعامل مع الحالة حاجتين.
الأولى إني باتعامل مع الحالات دي في الأطفال باستراتيجية مختلفة، فبينما الجميع بيتعامل بطريقة رد الفعل وبالتالي بتكون قراراتهم في العلاج دائما "قليل جدا ومتأخر جدا"
"too little &too late"
أما أنا فدائما سابق الفيروس ومتوقع خطواته، فبأسبق الفيروس وأعوض الطفل عما سيتسبب الفيروس في خسارته.
وعلى مدار ربع قرن الدنيا ماشية تبارك الله.
ثانيا: معايا وقت يعني أنا هبدأ العلاج معاه قبل ما الفيروس يتمكن، أغلب حالات الفيروس ده في الكبار بيتم تشخيصها بعد خراب مالطا، وعندي ثقة إن التشخيص المبكر بيفرق جامد، وحالة الطفل اللي جاني أول شعبان دي كانت حالة ملهمة، لأن أول مرة كان يجي لي طفل بشكل مبكر كدة، غالبا الأهالي بيجيبوا لي الأطفال بعد ما الفيروس بيكون أتمكن من عيالها، أما حالة أول شعبان دي كأنها كانت جاية علشان خاطر هذا الشاب، في رسالة بتقول إن التشخيص المبكر يحقق المحال.
المهم أعطيت أخي الغالي ده روشتة العلاج وقلت له ده العلاج المقترح مع العلم إني طبيب أطفال ولك حرية التصرف أنا شخصته لك وده في حد ذاته كفاية.
كان ذلك ليلا، ولم يطلع النهار حتى كان قد عرف ما حاولت اخفاءه عنه إن الفيروس خطير جدا على البالغين، وذهب به للمستشفى وبقى حتى غروب شمس تاني يوم في المستشفى فقط لكي يصلوا للتشخيص، اللي هو أنا شخصته امبارح بمجرد النظر، ده كدة يوم كامل ضاع ولسة في مرحلة التشخيص.
المهم قرر الأب يعالج ابنه بعلاجي، ولله الحمد تم الله الشفاء على خير دون أي مضاعفات بل بدون اصفرار، وكان سلوك الفيروس مع الشاب بتاع آخر شعبان نفس سلوكه مع الطفل اللي أول شعبان.
أنا مش بأحكي لكم إنجازاتي ولا دي دعاية إني بأعالج الفيروس ده "للكبار" أنا في غنى عن ذلك الحمد لله، يكفيني حالاته في الأطفال، وكمان عمري ما هعالج أي حالة للفيروس للكبار. فالتعامل مع هذا الفيروس في "الكبار" مثل السير في حقل ألغام.
طيب إيه الرسالة اللي تفيدكم من الحكاية دي؟
أولا الفيروس ده مشهور إنه فيروس "الأطفال" وده مش صحيح، هو فيروس كل الأعمار، لكن لأنه فيروس شائع ومنتشر جدا فغالبا لن تمر طفولة طفل غير لما يكون قابله بالفعل وتعافى وخد مناعة، بالتالي "الكبار" بيتعرضوا للفيروس ده يوميا في سندوتشات الفول والطعمية والسلاطات والمخلل والفواكه، لكن خلاص خدوا مناعة منه زمان وهما صغار.
الكبار اللي بيجي لهم الفيروس ده، غالبا بيكونوا ناس اتكحرتوا ورمرموا على كبر، يعني كانوا أطفال نضيفة بزيادة، فمقبلوش الفيروس من بدري في طفولتهم، ولما كبروا رمرموا، يعني مهندس مدني متربي تربية القطط السيامي في طفولته، وراح الموقع أكل زي أي حد من العمال فول وطعمية ومخلل وسلطة فلبس في الفيروس على كبر.
فلو أنت ناوي ترمرم وأنت ابن ناس في نفسك، روح اتطعم.

Address

الأهرام/شارع فريد ندا فوق عجيبة ستور
Benha

Opening Hours

Monday 9am - 5pm
Tuesday 9am - 5pm
Wednesday 9am - 5pm
Thursday 9am - 5pm
Sunday 9am - 3pm
7pm - 10pm

Telephone

+201145885550

Website

Alerts

Be the first to know and let us send you an email when دكتور أسامة عزام posts news and promotions. Your email address will not be used for any other purpose, and you can unsubscribe at any time.

Shortcuts

Share