Nurse mode on

06/04/2026

مش عارف ابدأ منين بس انا حزين جداً..

ست ف ال35 من عمرها دخلت عندنا الرعاية...

تخيل السبب؟!

خدت حقنة IM من حقن "منع الحمل" بتاعة ال3 شهور...

الحقنه من الواضح انها جت غلط يعني
وعملت Abscess ومن ثم حصل Necrosis!!

وده بسبب ان الست لما خدت الحقنه حصل منها تورم وAbscess والست طنشت الموضوع وكبرت دماغها وقالت ان الخراج ده هيروح لوحده مع الوقت زي ما كل الناس بتعمل...

بس اللى حصل كان عكس المتوقع الحاله دخلت الرعاية ب Septic Shock، ضغط غير مسموع، بيكارب 3

حقنة عاديه اتاخدت غلط عملت Abcsess عادي بعدين Necrosis والحالة دخلت ب Septic shock ودخلت العمليات عملت Debridement للAbcsess اللى وصل للعضم، الحالة arrest اشتغلنا 2 Cycle وبعدين ROSC..

الحالة حالياً 3/15 Flat... ع جهاز Vent وع Levo..

الغرض من ده كله انك متستهونش باي حاجة حتى لو كانت بسيطة... فربما قد تؤدي ان الإنسان يDie...

تعديل:

بلغوني ان الحالة Die دلوقتي ربنا يرحمها ويغفرلها ويسكنها فسيح جناته ويصبر أهلها واطفالها الصغيرين...

01/04/2026

والممرضة المسلمة تدرك أن الطريق ليس سهلاً،
وأن الثبات في بيئةٍ تختلط فيها الحدود جهادٌ يومي،
لكنها تمضي…
بقلبٍ معلق بالله،
تعلم أن من صدق مع الله
ثبّته الله ولو كثرت الفتن من حوله.

01/04/2026

النهاردة هتلاقي كل الناس بتتكلم عن زيادة الحد الادنى للأجور والكلام ده كله...

بس احنا ف مستشفى بني سويف الجامعي وبالأخص انا مش هنتكلم عن زيادة الحد الادنى للأجور او اي حاجه من اللى عماله تنزل دي..

لأننا لحد دلوقتي ف مستشفى بني سويف الجامعي مبناخدش الحد الادنى للأجور بتاع السنين اللى فاتت اللى الوزارة اصلاً اتكلمت عنه قبل كده...

تخيل تبقى ممرض وتاخد 5100 مقابل اكتر من 17 شفت شهرياً والمفروض ان ده الحد الادنى للأجور عندنا!!

30/03/2026

الريأكت والكومنت مش هياخدوا منك دقيقة بس ده هيكون سبب ان صوتنا يوصل ان شاء الله...

لك ان تتخيل اننا ف مستشفى جامعة بنى سويف بنقبض 5100 جنيه!! وبناخد اكتر من 17 شفت ف الشهر

أه والله زى ما سمعت كده مبلغ لا يكفى مصروفات شخص لوحده من أكل ومواصلات!!!!

ما بالك بقا بأشخاص متجوزين وفاتحين بيوت ٫وسط استغاثات بالجملة مننا گ تمريض مستشفى جامعة بني سويف ياريت نلاقى حد من السادة المسؤولين المحترمين يحل موضوعنا فى اسرع وقت!!!

احنا حقيقي مش عارفين نعيش ومضغوطين من كل الجوانب!!

28/03/2026

وكم من شبابٍ يُرتجى طول عمرهم
وقد أدخلت أجسـادهم ظلمة القبرِ

بقلوبٍٍ منكسرة حزينة، ونفوس راضية بقضاء الله وحُكمه، ننعي زميلنا الدكتور حسام طبيب الامتياز
الذي أصيب منذ أيام في المستشفي بعدوى إلتهاب السحايا المميتة meningitis بعد تعامله مع أحد المرضي المصابين دون أن يعلم ، يُمسي ابن آدم ويصبح والموت أقرب من شراك نعله..

نسأل الله أن يجعل دراسته وطلبه لعلم الطب شفيعا له عند ربه، وأن يجعل هذه الليلة في قبره خير لياليه، وأن يُيَمّن له الكتاب وييسر له الحساب ويثبته عند السؤال وأن يرحمه رحمة واسعة إنه ولي ذلك والقادر عليه.

27/03/2026

اسوأ حاجة شوفتها ف مجال التمريض..

ان احساس التقصير والذنب عمره ما بيسيبك وبيفضل ملازمك طول الوقت وانت مخلص شفتك ومروح ف المواصلات وانت قاعد بتأكل ف البيت حتى وانت ف خروجه مع اصحابك وبتحاول تغير مودك شويه وممكن الاحساس يوصل ويجيلك ف احلامك حتى وانت نايم..

حتى وانا بتعمل كل اللى عليك وبتبذل أقصى مجهود عندك وممكن توصل انك تقعد اكتر من 6 ساعات متواصلين واقف ع رجلك شغال مع الحاله..

وبرغم كل اللى بتعمله والمجهود ده كله دايماً بتسمع صوت جاي من جواك بيقول "كان ممكن تعمل أكتر"

حقيقي احساس صعب ومتعب لأي حد
ويبخت اللى مبيحسش بالاحساس ده لان الانسان دايماً بيحس بالتقصير والذنب حتى لو بيعمل اللى عليه...

ربنا يرضى عن كل ممرض بيعمل شغله وبيحاول يطلع كل المجهود اللى يقدر عليه ❤

27/03/2026

كنت ف شفت امبارح وحد من الامتياز سألني السؤال ده

ليه ممنوع ندي أكسجين كتير لمريض الCOPD؟!!

وليه الSaturation بتاع مريض الCOPD مبيوصلش ل100% زي باقي المرضى؟!

وبصراحه كان معايا شغل كتير مع الحالتين بتوعي وقولتله هخلص شغل واشرحهالك ونسيت اقوله

بس هقوله هنا وان شاء الله يكون متابعني والمعلومة توصله😅

اول حاجة تعالى اقولك اختصار COPD..

"مرض الانسداد الرئوي المزمن"

Chronic Obstructive Pulmonary Disease

تعالى اشرحلك بقا..

مريض الـ COPD جسمه دايماً متعود على نسبة أكسجين قليلة وثاني أكسيد كربون عالي شوية..

ف بالتالي طريقة التنفس عنده مختلفة شوية عن الطبيعي..

اول حاجة فقدان الـHypoxic Drive

من الطبيعي عند اي حد ان التنفس بيتحفز بزيادة CO₂.. يعني الإنسان الطبيعي لما نسبة CO₂ تزيد عنده ف الدم المفروض يبقى محتاج O₂ اكتر!!

لكن ف مرضى الCOPD الجسم بيكون اتعود على CO₂ العالي فبيبدأ يعتمد على نقص الأكسجين (Hypoxia) كحافز للتنفس...

يعني مريض الCOPD يتنفس اكتر لما نسبة الO₂ تقل ف الدم مش لما نسبة الCO₂ تزيد ف الدم...

لكن بقا لما تدي أكسجين عالي لمريض COPD الأكسجين يعلى فجأة الجسم “يفتكر” إن مفيش مشكلة مركز التنفس يهدى → المريض يقل تنفسه وممكن يدخل ف فشل تنفسي وهو ما يسمى بال Respiratory Failure..

الحاجة التانية وهي احتباس ثاني أكسيد الكربون (CO₂ Retention)..

الأكسجين العالي بيسبب:

↓ تهوية الرئة
↑ تراكم CO₂

ممكن يدخل المريض في:

Narcosis (غيبوبة CO₂)
Respiratory acidosis

تالت حاجة وهي خلل في V/Q mismatch ف مرضى الCOPD، بعض أجزاء الرئة شغالة وبعضها لا
الجسم بيعمل تضييق للأوعية في الأماكن البايظة (عشان يوجه الدم للمناطق السليمة)..

لكن بقا لما تدي أكسجين عالي: الأوعية توسع في كل الأماكن ويبدأ الدم يروح لأماكن مش بتتهوى كويس وتبادل الغازات يسوء..

الخلاصة بقا ف مرضى الCOPD

مش "ممنوع" الأكسجين
لكن لازم بحذر وبنسبة قليلة..

الهدف هو اننا نحافظ على الSaturation ما بين ال88–92%..

وده بيكون عن طريق

Nasal cannula (1–2 لتر/دقيقة)

او نحط المريض ع CPAP وده ف حالات معينة..

او نحط المريض ع HFNC برضو ف حالات معينة..

وممكن توصل اننا نحط العيان ع جهاز تنفس صناعي..

لكن امتى بقا نخلي المريض ع 100% Oxygen او نحطه ع جهاز تنفس صناعي؟!

لو المريض دخل ف:

_ صدمة

_ توقف تنفس

- الsaturation نزل جداً

ساعتها بقا حياة المريض أهم من القاعدة وندي أكسجين عالي ونفضل مع المريض ع الMonitor لحد ما حالته تستقر...

25/03/2026

ف الوقت اللى انت قاعد فيه ف البيت وسط اهلك واصحابك ومتدفي وبتشرب شاي وبتتفرج ع اللى انت عايزه ف اجواء الشتاء الجميلة دي وواخد اجازة..

الممرضين معندهمش اجازات رايحين شغلهم دلوقتي عادي وسط المطر والرعد والبرق والطين...

رايحين يرعوا المرضى ف المستشفى اللى ممكن يكون فيهم حد من اهلك ويقدمولهم كل الرعاية التمريضية اللى انت ممكن تتخيلها...

حفظ الله كل الممرضين ورضي عنهم وجزاهم خيراً❤

25/03/2026

يا طالبةَ التمريض...

تذكّري أن الضرورة تُقدّر بقدرها،
فما جاز للتعلّم أو العلاج لا يُتوسّع فيه،
والفقيهة في عملها من عرفت متى تقف.

لا تسمحي لضغط البيئة أن يُضعف تمسّككِ بدينكِ،
فالاستقامة في ميدان صعب أعظم أجرًا عند الله من الاستقامة في طريق سهل.

24/03/2026

بما انكم دلوقتي ف فترة تسجيل الرغبات ف بص يبني وركز معايا عشان نتكلم عن جهة من الجهات الموجوده ف رغبات التكليف وهي:

"المستشفيات الجامعيه"

بما اني مستلم تكليفي ف مستشفى جامعي وده اجباري للأسف...

المستشفيات الجامعية هي الأسوء ما بين باقي الجهات...

المستشفيات الجامعيه دي بتكون مستشفى واحده ف كل محافظه غالباً زي مستشفى بني سويف الجامعي وغيرها من المستشفيات الجامعيه التانيه ودي بيتكلف فيها كل خريجي معهد فني تمريض من بعد ثانويه عامه وده بيكون اجباري لأن ملمهش رغبات اصلاً...

مفيش حد من خريجي معهد فني صحي شعبة تمريض عام بيكتبوا المستشفيات الجامعية ف الرغبات عشان قد اي هم عارفين عيوبها ف للأسف بيلبس فيها الغلبان بتاع فني تمريض بعد ثانوي عام اللى ملوش رغبات بيلبس فيها إجباري...

المستشفيات الجامعيه شغلها تقيل وكتير جداً وفيها ضغط رهيب هتلاقي المحافظة كلها عندك ف المستشفى...

الشغل فيها اكتر من 40 ساعه ف الاسبوع وفيه مستشفيات بتدي 48 ساعه وفيه أكتر كمان وده بسبب ضغط الشغل ف المستشفيات الجامعيه وحاجة العمل...

الميزة الوحيدة ف المستشفيات الجامعيه انها ف نفس محل اقامتك يعني ف نفس محافظتك يعني خريجي معهد فني تمريض بني سويف هيتكلفوا ف مستشفى جامعة بني سويف خريجي معهد فني تمريض القاهرة هيتكلفوا ف القصر العيني وهكذا...

ممكن تشتغل ف القسم اللى انت حابه بالاتفاق مع رئيسة التمريض ده لو معاك واسطة بقا زي الرمد والتجميل والعيادات....

بس لو مش معاك واسطه هتترمي ف الرعايات اللى كلها ضغط شغل وتعب وروستر زي الزفت زي الICU والSICU والTICU..

فيها جزاءات كتيرة جداً بدون سبب وبدون داعي من غير حتى ما رئيسة التمريض او مدير المستشفى يحققوا ف المذكرة اللى اتكتبت ويعرفوا اي سببها...

لا هم بيدوا الجزا الاول وبعدين يشوفوا حوار التحقيق والكلام ده...

بالنسبة للمرتب ف هو أقل ما يكون واسوء مما تتخيل واقل من كل الجهات التانية بس ده مش ف كل الأماكن يعني فيه أماكن عادلة ف بتاخد حقك مقابل ضغط شغل وتعب ومرمطة وعدد شفتات ظالم.. واغلب الأماكن التانية لا مبتاخدش مرتب يرضي ربنا..

بالمناسبة عشان فيه ناس كتير عندي هنا من بني سويف ع البيدج ف احنا ف مستشفى بني سويف الجامعي من دفعة 2023 وطالع بنقبض 5200 بعد خصم الحزمة وكمان مبنقبضش الحد الادنى للأجور..

ال5200 اللى بنقبضهم دول كمان ممكن يتخصم منهم وتلاقي نفسك بتقبض اقل من 4500 ده مقابل ضغط شغل وتعب وروستر متبهدل واكتر من 17 شفت ف الشهر... ف تخيل عشان تقدر تشتغل برايڤت جنب ال17 شفت دول اللى مبتاخدش فيهم روسترك اصلاً...

ف فكر كويس!!

تعديل التكليف من المستشفيات الجامعيه حاول تنساه لانها اصعب جهة ممكن تعمل منها تعديل تكليف عشان كده بقولك حاول بقدر الإمكان متستلمش ف المستشفيات الجامعية...

طبعاً لو معاك واسطه الوضع هيختلف تماماً... عشان كل حاجة ماشية بالواسطه ولنا الله..

حتى لو بلغت مرضي مبتعرفش تاخد المرضي بتاعك وانت تعبان وممكن تروح الشغل وانت لسه تعبان...

المكافأت اللى بتنزلك بتدخل تحت بند "التخضيع" وبيتخصم منها ومتعرفش ليه ولحد دلوقتي معندناش إجابة الفلوس دي بتروح فين..

مكافأت بتنزل لكل الجهات وانت لا وتسأل عن السبب مفيش إجابة!!

مش هتعرف تسافر حتى لو معاك عقد عمل بحجة حاجة العمل وزميلك اللى معاه واسطه هيسافر عادي عشان معاه واسطه..

زي ما قولتلك فوق المستشفيات الجامعية هي الأسوء ما بين كل الجهات ف حاول تبعد عنها ع قد ما تقدر حاول تخليها ف اخر الرغبات عشان مفيش سبب اصلاً يوحد ربنا يخليك تختارها..

•ضغط شغل

•مرمطة

•روستر ظالم بعدد شفتات كتيرة

•مرتب قليل ومخصوم منه وخصوصاً انك هتبقى من الدفعات الجديدة..
مذكرات وخصومات بداعي وبدون داعي وبدون تحقيق حتى من الشئون القانوية..

•مكافأت بتنزلك بتتخضع وبيتخصم منها متعرفش ليه..ومكافأت مبتنزلش اصلاً

•لو تعبان مبتعرفش تاخد مرضي اللى هو حقك الطبيعي عشان انت تعبان..

•مش سهل تمشي منها وتعمل تعديل تكليف حتى لو نقلت من المحافظة نفسها...

•مش سهل تسافر منها حتى لو معاك عقد عمل بحجج فارغة..

ف قولي انت بقا تفتكر اي السبب اللى يخليك تستلم ف مستشفى جامعي؟!

انا عملت اللى عليا قدام ربنا وقولتلك اللى محدش قاله لما جيت استلم التكليف...

حرفياً المستشفيات الجامعية دي كابوس وضغط شغل وتعب رهيب بدون مقابل او تقدير ف اهرب بقا والحق نفسك..

لو عندك اي سؤال تاني بخصوص رغبات التكليف اتفضل؟!

24/03/2026

ومن تمام فقه الممرض أن يتحلى بحسن الخلق،
فيكون لين الجانب، طيب المعشر، بشوش الوجه،

فإن المريض في حال ضعفٍ وحاجة، وهو أحوج ما يكون إلى كلمةٍ طيبة، ونظرة رحيمة.

وربما كان أثر الخلق الحسن في نفس المريض
أعظم من أثر بعض الأدوية، وذلك لأن النفس إذا اطمأنت قويت، وإذا اضطربت ضعفت.

22/03/2026

• لو انت دفعة 2024 اللى بتكتب رغبات ف البوست مهم جداً عشانك..

• الموقع فتح ومعاك لمدة 15 يوم ان شاء الله وهيقفل يوم 5/4/2026 ممكن يمدوا الفترة دي تاني عشان لو حد ملحقش يسجل....وده اللينك اهو بتاع التسجيل عشان لو حد لسه نايم ومش عايش معانا ع الكوكب

http://mhealthmobasn.cu.edu.eg

• لو موقع الرغبات قفل وانت مسجلتش استنى بقا لما تروح ادارة التكليف وحوار كبير بقا...ف ياريت اللى عارف يعرف اللى مش عارف ومنشن لزمايلك واعمل شير للبوست وخصوصاً الناس اللى ف الجيش يجماعه عشان الموضوع مفيهوش اي هزار...

• خلينا نخلص من فني تمريض بعد ثانوي عام عشان صدعونا...خريجي معهد فني تمريض بعد ثانوي عام ملهمش تسجيل اي حاجه كل اللى عليك انك هتستنى الناس اللى بتسجل رغبات دي يخلصوا تسجيل ونتيجة رغباتهم تظهر وبعدين يطلع رقم القرار ف نفس اليوم اللى رقم القرار بتاعهم هيطلع فيه انت كمان رقم قرارك هيطلع ان شاء الله معاهم...كده خلصنا من فني تمريض بعد ثانوي عام محدش يتكلم تاني بقا..

• لو انت مسجلتش بيانات قبل كده او رقم الخريج ضاع منك الموضوع سهل الموقع فتح....وفتح بيانات ورغبات تاني مع بعض ف متقلقش بس خليك فاكر اني دي اخر فرصة...

• الناس اللى ليها رغبات انت لازم تكتب كل الرغبات يعني لازم تكتب ال726 رغبه كاملين مينفعش تسيب اي واحده فيهم فاضية...

رقم ال726 رغبة ده رقم مهول وغريب جداً ودي اول مره عدد الرغبات دي ينزل وده عشان الدور الاول والدور التاني هيتكلفوا مع بعض ودي محصلتش من زمان...

ال726 رغبة محتاجين ناس كون ان فيه رغبة موجودة ف ده معناه انهم محتاجين ولكن الفرق ان مش كل الأماكن هتاخد نفس عدد الناس فيه مكان هتلاقيه محتاج 100 مكان محتاج 200 وهكذا....

• متستعجلش انك تسجل خد وقتك وقرر براحتك لسه معاك لحد يوم 5/4/2026...الاستعجال وحش وهتندم...

• اللى بيسجل الاول زي اللى بيسجل ف الاخر يعني لو انت سجلت الاول مش هتتكلف الاول او مش هتجيلك الرغبه الاولى عشان سجلت الاول مثلاً..

• كل ما كان مجموعك اعلى كل ما كنت فرصتك انك تجيلك الرغبات اللى بتكتبها اعلى والعكس صحيح...

• مينفعش تقول هكتب اول 10 رغبات بس عشان انا عايزهم الموقع مش هيرضى يحفظ الرغبات اصلاً...

• الوزاره بتوزع بشكل منُظم وعارفين هم بيعملوا ايه كويس جداً وعارفين كل مستشفى عايزه كام واحد وفيه كام خريج وعارفين المجاميع بتاعتكم وكل حاجه عشان يعدلوا سوء التوزيع والتكليف ع حسب الاحتياج اللى وزير الصحه اتكلم عنه قبل كده...عشان كده الاعلان اتأخر شويتين تلاتة..

• بعد ما تخلص تسجيل خد الرغبات اسكرين برقم الايصال وخليهم معاك...

• تقدر تعدل ف الرغبات مليون مره وتقدر تدخل تبص مليون مره طول ما الموقع مفتوح يعني لحد يوم 5/4 عدل براحتك وشقلب واعمل اللى انت عايزه...

• الرغبات بتتحفظ ع اخر وضع واخر تعديل..ودايماً خد اسكرين لاخر تعديل..

• الرغبات نازله طبقاً لاحتياج الاماكن والمجموع....

• مثلاً مستشفى بني سويف الجامعي عايزه 100 ممرض راح 300 واحد كتبوها في الرغبات....يبقى كده مستشفى بني سويف الجامي هتاخد أعلى 100 في المجموع من ال300 اللي كتبوها ف الرغبات.. وبالتالي هتدخل على الرغبة اللي بعديها و بعد اللي بعديها لحد ما ييجي رغبه يكون مجموعك من ضمنها...

•مفيش حاجة اسمها الرغبات الاخيرة مش هتيجي ممكن تيجي عادي امال هم حاطينها ف الموقع ليه؟!!

• أي جهة نازلة ضمن ال 726 رغبة انت من المُحتمل تروح فيها عادي جداً..يعني ممكن يجيلك الرغبة ال277 عادي..

• نتيجة الرغبات بتظهر بعد ما الموقع يقفل ب اسبوعين او اربع اسابيع بالكتير...

• وبعد ما نتيجة الرغبات بتظهر بيطلع قرار التكليف ووقتها تقدر تجهز ورقك وتروح الجهة اللى جتلك وتستلم تكليفك..

كل اللى عايز اقوله ليكم اوعى حد فيكم يستهتر بالتريب والله هتندموا وهتلفوا حوالين نفسكم بعدين...

بتمنالكم كل خير وان شاء الله كل واحد فيكم يجيله الرغبة اللى بيتمناها...

تسجيل البيانات تسجيل الرغبات للبحث عن رقم الخريج عن طريق الأسم شرح كيفيةإستخدام الموقع