https://www.facebook.com/100126999535168/

Aya Ezzat -آية عزت, Cairo (2025)

16/08/2025

الأحلام: الطريق الملكي إلى اللاوعي

سيجموند فرويد كان عنده رؤية ثورية عن الأحلام. هو ما اعتبرهاش مجرد صور عشوائية بيخلقها دماغنا أثناء النوم، لكنه شاف إنها نافذة سحرية بتودينا مباشرة لأعماق النفس.

الإنسان في وعيه اليومي بيكبت حاجات كتير: رغبات، مخاوف، مشاعر اتعلم إن ما ينفعش يعبّر عنها. كل ده مش بيختفي، لكنه بينتقل لـ اللاوعي. وهنا بتيجي الأحلام: بتشتغل كإنها "مسرح داخلي" تظهر فيه الحاجات اللي مش قادرين نقولها أو نعيشها في الواقع.

فرويد سماها "الطريق الملكي إلى اللاوعي" لأنها ببساطة أقصر وسيلة نفهم بيها نفسنا الحقيقية. من خلال الأحلام نقدر نكتشف إيه اللي جوانا محتاج نواجهه، وإيه الرغبات أو الصراعات اللي بتحرك سلوكنا من غير ما نشعر.

وبالرغم من إن تفسير الأحلام مش علم دقيق 100%، لكن مجرد التفكير فيها بيفتح لنا باب لفهم أعمق عن دواخلنا. يمكن تكون الأحلام "لغة النفس الخفية" اللي بتكلمنا بطرق رمزية، وكل اللي علينا نحاول نصغي ونفك الشفرات.

إختلفنا او اتفقنا مع فرويد ولكن هتظل أرارءه لحد انهاردة محل مناقشة وسؤال !

12/08/2025

بس للتوضيح: أنا مابعملش جلسات علاج نفسي على التليفون أو المكالمات الصوتية، وكمان مش على الشات.
في حالات استثنائية جدًا، ومع عميل بنتعامل معاه بالفعل، ممكن أوافق على مكالمة لو في ظرف طارئ، وده بيكون بشكل محدود قوي.
أنا مؤمنة إن التواصل البصري جزء أساسي علشان تبني علاقة علاجية صحية ونستفيد إحنا الاتنين.
احترامًا لأخلاقيات شغلي، ده النظام اللي ماشيه عليه. شكرًا 🩵 لتفهمك

10/08/2025

أن ترى بعين شخص آخر، أن تسمع بأذن شخص آخر، أن تشعر بقلب شخص آخر… هذا هو جوهر الإنسان – ألفرد أدلر

المقولة دي بتلخص معنى التعاطف الحقيقي.
أدلر، كان شايف إن الإنسان ما يقدرش يعيش حياة صحية أو سعيدة من غير ما يكون عنده قدرة على فهم غيره بصدق. مش بس تسمع الكلام، لكن تحاول تشوف الدنيا من منظور الشخص التاني، وتسمع زي ما هو بيسمع، وتحس زي ما هو بيحس.

التعاطف بالشكل ده بيكسر الحواجز بين الناس، ويخلي العلاقات أعمق وأقوى. كأنه بيقولنا: السر مش إنك تعيش لنفسك بس، لكن تعرف تشارك قلبك وعقلك مع الآخرين.

وفي عالم مليان اختلافات، يمكن ده يكون أكتر شيء محتاجينه… إننا نشوف ونسمع ونحس ببعض 🤍

07/08/2025

"عشان يتحب… اضطر يخبّي نفسه."
– جابور ماتيه

في أطفال بيتعلموا بدري جدًا إن مشاعرهم مش مقبولة…
فيسكّتوا، ويعملوا نفسهم تمام،
عشان يكسبوا حب أو على الأقل… ما يخسروش.

جابور قال:
"لما الطفل يضطر يتخلى عن جزء من نفسه عشان يتحب…
ده اسمه جرح، مش تكيّف."

إيه الجزء من نفسك اللي خبّيته زمان؟
ولسه مستني ترجعه؟

25/07/2025

هل الأدوية النفسية إدمان؟
أكتر جملة بنسمعها لما نرشح لحد دواء نفسي:

"بس كده هبقى مدمن؟!"
❌ الحقيقة؟ لأ.

هل كل ال عنده مشكلة نفسية بيحتاج تدخل دوائي
❌ الحقيقة؟ لأ

-اذا ايه المقياس لدخول دواء !!
التشخيص وشدة الاعراض

معظم الأدوية النفسية مش بتسبب إدمان، ومش بتخلي الشخصية تتغيّر، ولا بتخلي الإنسان يفضل نايم أو "زومبي".
طيب إزاي؟
✅ أدوية الاكتئاب والقلق (زي SSRIs)

مش بتدي نشوة

مش بتعمل سلوك قهري

مفعولها بييجي تدريجي

الهدف منها يرجع توازن كيمياء المخ، مش تغييره

طب إيه الفرق بين الإدمان والتعوّد؟
الإدمان: احتياج نفسي وجسدي خطير، وسلوك قهري

التعود: الجسم بيتأقلم، وعلشان كده لازم يتوقف الدوا تدريجيًا، تحت اشراف طبي مش فجأة

يعني زي السجاير؟
لأ طبعًا… ولا في أي شبه.

طب وليه الدكتور ساعات يكتب دوا لفترة طويلة؟
عشان الاكتئاب أو القلق مش "نزلة برد"، دي حالات محتاجة وقت واستقرار.
والدوا جزء من العلاج، مش هو الحل الوحيد.

أكتر مخاوف منتشرة:
"هتغير شخصيتي"
→ غلط. الأدوية مش بتغيّرك، هي بتفكك من الأعراض اللي كانت بتعطلك.

"هحتاجها طول عمري"
→ مش شرط. في حالات بتتحسن وتوقفها تدريجيًا مع إشراف طبي.

"أنا ضعيف لو خدت دوا"
→ لأ، إنت قوي إنك بتعالج. الضعف الحقيقي إنك تفضل سايب نفسك بتغرق.
-مهم جدا تبقى عارف
الدوا مش عيب
ولا خطر
ولا إدمان
هو أداة ممكن تنقذ حياة، لو اتاخد صح وتحت إشراف متخصص طبيب نفسي فقط .

🧠 طب ليه الأدوية مهمة مع الجلسات ؟
العلاج النفسي مهم، لكن في بعض الحالات مش كفاية لوحده.
لما المخ بيكون خارج توازنه الكيميائي – زي في الاكتئاب الشديد أو القلق المزمن – الجلسات بتبقى عاملة زي محاولة دفع عربية مطفية من غير بنزين.

الدوا بيظبط التوازن الكيميائي
والجلسات بتشتغل على التفكير والمشاعر والسلوك

الاتنين مع بعض = أعلى نسب تحسّن، ونتايج تثبتها الدراسات في كل العالم ولكن دة في حالة انك فعلا محتاج ادوية او تدخل علاجي !
زي ما الجرح الكبير ساعات بيحتاج مضاد حيوي وجرح يتنضف ويتغَيَّر عليه الشاش… النفس كمان ساعات بتحتاج الاتنين سوا.

22/07/2025

"هو أنا جاي أرتاح ولا أذاكر؟!"

ناس كتير أول ما يسمعوا كلمة "واجب منزلي" في الجلسة، بيقولوا في سرّهم:
"هو ناقص؟! أنا جاي أفضفض، مش آخد تكاليف!"

بس الحقيقة؟
الواجبات في العلاج مش نوع من العقاب، ولا امتحان، ولا تحدي لـ"قد إيه أنت شاطر".

دي ببساطة جسر بيربط بين الجلسة… والحياة.
أداة صغيرة بتقول للمخ
"اللي اتقال جوه مش كلام وخلاص… ده ليه مكان بره كمان."
العلاج مش بيحصل في الجلسة بس
الجلسة بتفتح الباب
لكن التغيير الحقيقي بيحصل في الحياة اليومية… لما تجرب، وتغلط، وتلاحظ، وتتعلم.

والواجب؟
هو الخطوة الصغيرة اللي بتاخدها بعد ما تفتح الباب
وزي ماقال
🔸 آرون بيك (مؤسس العلاج السلوكي المعرفي):
"التغيير لا يحدث فقط داخل الجلسة، بل بين الجلسات أيضًا."
– كان دايمًا يشدد إن التمرين على المهارات خارج الجلسة هو المفتاح لتثبيت أي تحسن

19/07/2025

ليه حاجات زمان لسه بتوجعني؟ حتى لو نسيتها؟
فيه حاجات بنفتكر إننا "عدّيناها"،
بس الحقيقة إننا خبّيناها جوا،

جابور ماتيه بيقول:

"الصدمة مش هي اللي حصل لنا… الصدمة هي اللي حصل جوانا بسبب اللي حصل."

يعني ممكن الموقف خلص…
بس أثره لسه عايش في خوفك، سكوتك، أو رد فعلك اللي مبالغ فيه.

مش ضعف…
دي حتة منك لسه بتقول: أنا محتاجة أمان. 🤍

لو الحتة دي عايزة تتشاف… إحنا بنكبر فعلاً لما نسمعها.

لو وجع زمان لسه بيظهر في دلوقتي… ممكن نبدأ نسمعه سوا ؟

17/07/2025

"الشخص عالي الحساسية (Highly Sensitive Person - HSP)"
في ناس بتستقبل الحياة بحواسهم كلها…
نظرة، كلمة، ريحة، لمسة، إحساس في الجو… كل حاجة بتدخل قلبهم بسرعة وعمق.

لو انت/ي بتحس بدا كتير، ممكن تكون من الأشخاص الـ Highly Sensitive (HSP).
يعني جهازك العصبي بيشتغل بـ"فلتر حساس"، مش "زيادة عن اللزوم" زي ما بيقولوا.

✅ العلامات

بتحلل كل حاجة قبل ما ترد، وبتفكر في كل كلمة اتقالت

أي صوت عالي أو ضوء قوي بيوترك بسهولة

النقد حتى لو بسيط ممكن يكسرك

بتلاحظ تفاصيل صغيرة محدش بياخد باله منها

بتحتاج وقت أطول من غيرك عشان "تفوق" من خروجة أو شغل كتير

بتحس بمشاعر اللي حواليك كأنها مشاعرك

لو حد حواليك متضايق… أنت نفسك تتخنق

ممكن تبكي من جمال لحظة معينة… أو من إعلان مؤثر جدًا

دي مش مبالغة،
دي سِمة نفسية موثقة، بيمتلكها حوالي 15-20% من الناس، وبيتم دراستها من سنين

طب لو أنا HSP... أتعامل إزاي؟
مفيش حاجة "تتعالج" لأنك مش مريض…
لكن في أدوات تساعدك تعيش بسلام مع حساسيتك بدل ما تفضل تحاربها.

✅ خطوات بسيطة للعلاج الذاتي والدعم النفسي:
افهم نفسك: مجرد ما تفهم إنك HSP، نسبة التوتر بتقل لإنك بطلت تلوم نفسك
اتعلم تقول "لأ": مش كل حاجة لازم تعملها، حتى لو الناس منتظرة منك.
احترم حدودك: ، خد وقتك… من غير ذنب.
العلاج النفسي (لو محتاج):
العلاج المعرفي السلوكي (CBT) بيساعدك على عمل تنظيم المشاعر وفهمها بشكل
أكبر

مين حاسس إن الوصف ده شبهه؟
وإيه أكتر حاجة بتحس إنها بتستنزفك وسط الناس؟

14/07/2025

"الناس ما بتقابلش بعض صدفة، كل شخص بتقابله هو انعكاس لشيء فيك."
كارل يونج .

في العلاقات المضطربة، مش دايمًا "العيب فيهم بس"، أحيانًا بننجذب لناس معينة علشان في شيء جوانا محتاج ، يُشفى، أو يُفهم.

مش كل شخص بيأذينا شرير... أحيانًا بيكون جاي يعلمنا إحنا لسه محتاجين نحب نفسنا، نحط حدود، أو نكسر نمط قديم كنا فاكرينه "حب".🤍

29/06/2025

"نحن لا نرى العالم كما هو، بل كما نحن."
🔍 يعني إيه؟
اللي مرّينا بيه وإحنا صغيرين بيشكل "العدسة" اللي بنشوف بيها الناس، والمواقف، وحتى نفسنا.

✋ ممكن تشوف النقد تهديد، أو التجاهل كره، أو القرب خطر...
لكن مش دايمًا ده حقيقي.
أوقات بيكون مجرد ظل خوف قديم بيرقص قدامك… مش الواقع.

❤️‍🩹 افهم عدستك… هتعرف تشوف الحقيقة.
جابور ماتيه

21/06/2025

لو تقدر تبعت لنفسك زمان رسالة... هتقول لنفسك إيه؟
تخيل/ي إنك واقف قدام نفسك زمان، طفل صغير مستني كلمة تطمنه.
هتقوله إيه؟
هتطبطب عليه؟
هتشرحله إيه اللي حصل؟
ولا هتعتذرله إنك سكت؟
حتى لو جملة بسيطة ..

#أتكلم🗣

21/06/2025

There is no coming to consciousness without pain."
"مفيش وعي حقيقي بييجي من غير وجع."
(كارل يونج) .

يعني لو عايز توصل لفهم نفسك بجد، لازم تعدي على وجع. المواجهة مع الحقيقة مش سهلة، بس هي الطريق للراحة النفسية الحقيقية.

Aya Ezzat -آية عزت

16/08/2025

12/08/2025

10/08/2025

07/08/2025

25/07/2025

22/07/2025

19/07/2025

17/07/2025

14/07/2025

29/06/2025

21/06/2025

21/06/2025

Address

Website

Alerts

Contact The Practice

Shortcuts

Share

Category