19/12/2022
Insomnia ..(الأرق)
فى الموضوع ده هنتكلم بشكل مبسط عن أهم مشاكل النوم الا وهو الارق او الinsomnia فى كام نقطة كده يرتبولك دماغك فيلا بينا
1) الinsomnia ماهو الا مشكلة فى ٣ حاجات ايا منهم تحصلك تعنى insomnia
اما صعوبة ف الدخول للنوم يعنى صعوبة ف الinitiation of sleep سيادتك تدخل ع السرير تحاول تنام وتوفر لنفسك كل سبل الراحة لكن تقعد ساعتين تلاتة على ما تنام
او اما صعوبة فى استمرارية النوم يعنى سيادتك ماعندكش مشكلة خالص ف بداية النوم انت بتحط راسك ع السرير بتنام لكن ساعتين وتصحى من عز نومك ومتعرفش تدخل النوم بسهولة تانى
اما انك بتنام وكل حاجة بس بتصحى مقريف ومش مركز وحاسس ان حالتك صعبة رغم انك المفروض نايم كويس
ايا من التلاتة يعتبر مظهر من مظاهر الinsomnia وممكن ييجوا مع بعض عادى وممكن وده الشائع واحد يصيبك منهم
2) بشكل بسيط جدا جدا عاوزك تركز معايا ف ابجديات عملية النوم نفسها لانها بتتم على مراحل مش هشغلك بتفاصيلها لكن هنقول اللى يهمنا
A) Initiation of sleep
الفترة المعروفة من دخولك للنوم لحد انك اندمجت وعينك ( هتروح ) ف النوم
B) Non REM phase ..
كلمةnon REMمعناهاnon rapid eye movement ودى اطول مراحل النوم تحتها بتكون مراحل كتيرة اهمها مرحلة الrest والمرحلة دى لو حد همس ف ودنك هتصحى عادى لانك لسة مدخلتش ف مرحلة الاحلام
C) REM phase
اهم مراحل النوم اللى هى rapid eye movement سيادتك اثناء نومك بتحلم ووانت بتحلم عينك مابتكونش ثابتة لتتحرك وعايشة معاك الدور جدااا ودى المرحلة اللى لما بتتم على خير وبهدوء ف نومك بتصحى مزاجك مظبوط ودى المرحلة اللى لو حد صحاك فيها بتبقى عاوز تخبطه باى حاجة ف دماغه لانها اساس النوم
شوف بقى يا سيدى الفاضل اى خلل ف وقت المراحل دى هييجى ع التانى يعنى مثلا حضرتك اخدت منوم هيقصر على الinitiation time فهيطول الNon REM فهيلعب ف وقت الREM الاهم فهتصحى بردو مقريف حتى لو نمت فبما يعرف بالhang over effect
لذلك كل المنومات تقريبا هتنيمك لكن هتصحى مش مبسوط ف الغالب للسبب ده ونادرا ماتلاقى منوم مافيهوش الصفة الهم دى لكن بتتفاوت حسب طبيعة وقوة المنوم المستخدم
3) مهم جدا تعرف بردو ان عملية النوم بتحتاج ان الجسم نفسه يحس انك داخل تنام يعنى الجسم اول ما النور ينطفى ف اوضة ضلمة بيبدأ يفرز مواد زى الميلاتونين مثلا تساعد ف عملية النوم وتعملك shut down بهدوء لكن ده ما بيحصلش بسهولة لو سيادتك نايم ومشغل موبايل باصص فيه او مشغل تليغزيون او اى اضاءة حواليك او دوشة لان العين بتتعرف على كده باننا لسة الصبح مش بالليل يعنى مش وقت نوم حتى لو الفجر
4) قبل ما نخش فيما يهمنا كصيادلة وهو الدوا نتكلم ببساطة ف الNon pharmacological management للحالة دى قبل الدوا ويمكن تكون حل ومنها (الحل من غير أدوية)
ادخل نام واطفى النور ماحبكش الموبايل هيئ لنفسك جو النوم علشان يتفرز الميلاتونين طبيعى
وقفلى بقى الشاى والقهوى والعك بتاع الstimulants ده قبل النوم بفترة كبيرة 😀😀
ماتاكلش قبل ماتنام على طول لانك هتشغل جسمك بهضم كميااااات هاااااائلة من الطعام ومش هيكون فايق يعملك shut down قبل ما يهضم كميات الاكل ده كلو
اللى قبلينا قالوا ..اتغدوا واتمدوا ..واتعشوا واتمشوا ..والله كلام جميل
لو دخلت تنام وعملت كل ده ومانمتش وفضلت بتتقلب ع السرير بتفتكر زكريات زبالة من اى نوع كان وحبكت يعنى جلد الذات الساعة ٤ الفجر دى ماعندك طول اليوم فاضى معلش قوم من ع السرير نصاية غير جو اعمل اى حاجة وبعدها ارجع نام تانى هتلاقى نفسك ظبطت خصوصا لو قلبت المخدة ع المتطقة الساقعة هتظبط 😀
5) لو كل اللى فوق ده منفعش يبقى حضرتك مبروك انت عندك insomnia انسان سعيدالحظ جدا وهنا هنقول
بتطول معاك ف الاسبوع كام ليلة الهم ده بيحصلك بس الفترة مش اكتر من ٣ شهور ؟؟ ااه يبقى انت كده acute insomnia
طب لو اكتر من ٣ شهور ؟؟
طب chronic insomnia شوفت الدنيا لطيفة ازاىىى
العلااااااج بقى وبطل رغى رجاءا اوك بص ع النقطة اللى بعدها كده
(البوست القاااادم 🫡)
