معامل مدينتي للتحاليل الطبيه وامراض الدم

21/05/2026

12/05/2026

في دراسة إتنشرت مؤخرًا في "Nature Medicine" بعنوان:
“Prevention of type 2 diabetes through prediabetes remission without weight loss”
وأعتقد إنها من أهم الأبحاث إللي قرأتها في 2025 عن السكري والتمثيل الغذائي، لأنها بتناقش نقطة المجتمع كله تقريبًا كان بيبص لها بشكل مبسط جدًا:
هل فعلًا المشكلة الأساسية في الوزن نفسه؟
ولا في طريقة تعامل الجسم مع الدهون؟

إحنا متعودين نربط ما قبل السكري والسكري النوع التاني بالسمنة ومقاومة الإنسولين بشكل مباشر، لكن الدراسة دي بتقول إن الصورة أعقد من مجرد رقم على الميزان.

الباحثين لقوا إن ناس كتير رجّعوا السكر لمستويات طبيعية، وإنخفض خطر تحولهم للسكري النوع التاني بشكل واضح، من غير نزول وزن حقيقي مهم.

إيه اللي اتغير إذًا؟
إللي إتغير هو “مكان الدهون”.

فيه فرق ضخم بين الدهون تحت الجلد subcutaneous fat، والدهون الحشوية visceral fat إللي حوالين الكبد والبنكرياس والأعضاء الداخلية.
الدهون الحشوية تعتبر أخطر بكتير من الناحية الأيضية، لأنها مرتبطة بالالتهاب المزمن، وزيادة cytokines، وارتفاع free fatty acids، وظهور insulin resistance.

إللي الدراسة لاحظته إن المرضى إللي اتحسنوا حصل عندهم إعادة توزيع للدهون.
الدهون بدأت تقل حوالين الأعضاء الداخلية، وتتخزن أكتر تحت الجلد.
يعني الجسم ما خسرش الدهون بالكامل، لكنه نقلها لمكان أقل ضررًا.

ودي نقطة عبقرية في الباثوفسيولوجي، لأن الكبد والبنكرياس لما يقل الضغط الدهني عليهم، يتحسن التعامل مع الجلوكوز، يقل hepatic glucose output، وتبدأ خلايا بيتا تستعيد جزء من وظيفتها بدل ما تكون تحت ضغط مستمر من glucotoxicity وlipotoxicity.

وده يفسر ليه أحيانًا شخص وزنه ثابت تقريبًا لكن السكر إتحسن جدًا، وشخص تاني خسر وزن ولسه عنده إضطراب أيضي واضح.
لأن الميزان ما بيقولكش الدهون كانت فين، ولا كانت بتأثر على إيه.

البحث ده مهم كمان لأنه بيكشف الفرق بين الطب المبني على الأبحاث، وبين المحتوى السريع إللي بيختزل الأمراض المعقدة في نصيحة أو ريل مدته دقيقة.

السكري النوع التاني مش مجرد “أكل وسكر”.
إحنا بنتعامل مع شبكة كاملة فيها:
هرمونات
التهاب
إشارات خلوية
دهون حشوية
وظيفة بنكرياس
وإستجابة أنسجة مختلفة للإنسولين

ولما مجلة بحجم "Nature Medicine" تنشر دراسة بالمستوى ده علشان تشرح إن تحسين توزيع الدهون ممكن يقلل خطر السكري حتى بدون نزول وزن، تعرف قد إيه المرض أعقد من أي طرح سطحي بيتقال على السوشيال ميديا.

وده ليه نقطة مهمة جدًا:
العلاج الحقيقي بيتبني على فهم الباثوفسيولوجي، وعلى أبحاث وتجارب ومتابعات طويلة، مش على انطباعات شخصية أو نصائح عامة.

وعشان كده مفيش بديل عن الطبيب المتخصص في أمراض معقدة زي السكري والضغط وكل ما يتبع مقاومة الأنسولين، لأن فهم المرض محتاج دراسة للميكانيزمات نفسها ، مش مجرد متابعة أرقام أو إعادة كلام متداول ، فنصيحة قبل ما تنخدع ف أي محتوي علي فيس وأي شخص كاتب قبل إسمه دكتور ، إتأكد إنه خريج طب أصلا ، قبل ما تسلمه نفسك ومرضك.

11/05/2026

🚨 إوعى تعمل كده لو كلب عضّك… حتى لو الناس حواليك بيقولوا كده بثقة.! ⚠️
90% من اللي بيتعضوا من كلب في مصر… بيعملوا نفس الغلطة أول 5 دقايق

في عز زحمة الكلام عن أزمة الكلاب في شوارعنا والجدال اللي مبيخلصش بين (المحبين والمعارضين) في فجوة وعي مرعبة ممكن تضيع حياتك في ثانية إحنا مش قدام مجرد جرح إحنا قدام سباق مع الزمن ضد فيروس (السعار) اللي لو تمكن من الجهاز العصبي بتبقى نسبة الوفاة 100%.. ملوش علاج في العالم كله 🛑

الخطورة مش في العضة بس الخطورة في سيستم الجدعنة"
الغلط اللي بنشوفه في الشارع من الناس اول ما تلاقي حد اتعض من كلب : 👇
🚫 أوهام الإنقاذ اللي بتسرّع الموت:
📍كتم الجرح بالبن : أول ما حد بيتصدم بمنظر الدم بعد العض .. تلاقي اللي بيجري ويقولك اكتم الجرح بسرعه بشوية بُن عشان النزيف يوقف
بس الحقيقة أن البُن بيعمل سدادات خشنة بتحبس لعاب الكلب الملوث بالفيروس جوه الأنسجة وبتحميه من الماية والمطهرات. إنت كدة بتخزن الفيروس جوه جسمك وبتديله الأمان عشان يوصل لأعصابك أسرع

📍 مشكلة الرباط الضاغط : بتشوف الناس بتربط فوق العضة بحزام أو قماشة جامد جداً فاكرين إن اللى دخل جسمهم سِم و بيمشي في الدم وعايزين يمنعوه يوصل للقلب بسرعة

بس الحقيقة أن فيروس السعار (Rabies) بيمشي في الأعصاب (زي سلك الكهرباء) مش في الدم. الربط ده مش هيوقفه ثانية واحدة لكنه هيقطع الدورة الدموية عن إيدك أو رجلك تماماً لحد ما تموت الخلايا وتعمل (غرغرينا) تضطرنا للبتر.. وإنت لسه في خطر السعار

📍جريمة خياطة الجرح: أحياناً الجرح بيكون واسع فالناس تجري على دكتور (مش متخصص) عشان يلم الجرح ويخيطه فوراً
و الحقيقة أن خياطة جرح عضة الكلب مُحرمة طبياً في البداية لأن الفيروس ده (لاهوائي) وخياطة الجرح يعني إنك بتقفل عليه الأوكسجين وبتوفر له البيئة المثالية عشان يتكاثر بجنون جوه جسمك

✅ تعالى بقي أقولك البروتوكول المنقذ (إزاي تدمر الفيروس قبل ما يدمرك) :
1️⃣ الصابون هو (السلاح السري): الناس بتستهون بالصابون وبتبحث عن مطهرات غالية لكن العلم بيقول إن فيروس السعار محاط بغلاف دهني الصابون هو المادة الوحيدة اللي بتعمل (Dissolve) وتذويب للغلاف ده فتدمر الفيروس فوراً. اغسل الجرح بماء جاري مع اى نوع صابون لمدة 15 دقيقة متواصلة.. الخطوة دي أهم خطوة قبل خطوة المصل نفسه

2️⃣ سيب الجرح ينزف ويتهوى: النزيف البسيط في الأول مفيد لأنه بيطرد اللعاب لبره. والجرح لازم يفضل مكشوف وممنوع تغطيه ببلاستر أو شاش مكتوم نهائياً .. لازم يفضل مكشوف

3️⃣ سباق الـ 24 ساعة: لازم تتوجه بعدها فوراً لمستشفى (الحميات) لعمل اللازم المصل (Immune Globulin) بيتحقن حوالين الجرح لمحاصرة الفيروس واللقاح بيتاخد بجدول محدد لبناء المناعة

🔑 الخلاصة
حياتك مش مجال للتجارب ولا للوصفات البلدي. السعار ملوش فرصة تانية.. الماية والصابون والمصل هما طوق النجاة الوحيد.
♻️المنشور ده لازم يوصل لكل بيت في مصر.. شير (Share) فوراً معلومة واحدة صح ممكن تنقذ روح من مصير مأساوي
✍🏻 Dt Mohamed Riad ✍🏻