Aisha Academy for Special Education

05/10/2025

30/09/2025

لما بيحصل التشخيص بمتلازمة ريت، دور التدخل المبكر بيظهر كـ "خط أمان" مهم.
التدخل المبكر هنا مش بس “علاج”، لكنه خطة لحياة متكاملة بتجمع بين التأهيل والتعليم.

الجانب التأهيلي داخل المركز:
-العلاج الطبيعي: هدفه انه يحافظ على مرونة العضلات والحركة، تقليل التشنجات.
-العلاج الوظيفي: تدريب الطفلة على الأنشطة اليومية (الأكل، اللعب، العناية الذاتية) مع تعديل طبعًا البيئة بما يتناسب مع قدراتها ويزود فرصتها في الاعتماد على نفسها في الأنشطة اليومية.
-التكامل الحسي: عشان تقدر تنظم الاستجابات الحسية وتقلل الاضطرابات السلوكية المرتبطة بالجانب الحسي.
-التواصل والتخاطب: سواء من خلال زيادة التعزيز للتواصل أو البدائل المتاحة زي PECS (اللى هو التواصل باستخدام الصور)، عشان نضمن وجود وسيلة تعبير فعّالة تقدر تعبر بيها عن مشاعرها ورغباتها. وده بيرجع جزء من العلاقة بين الطفلة وأهلها.
الجانب التعليمي:
-تصميم خطة تعليمية فردية (IEP) مبنية على تقييم دقيق لقدرات الطفلة مع تهيئة بيئة مناسبة.
ندمج الوسائل البصرية والملموسة عشان نعزز الفهم والتعلم.
-التركيز على المشاركة الاجتماعية في الأنشطة واللعب الجماعي عشان نزود وننمي التفاعل والمهارات الاجتماعية.
نشتغل بشكل مركز على مهارات معرفية أساسية (زي التمييز البصري والانتباه المشترك) عشان يكون مدخل انها تتعلم المهارات المختلفة.
يعني بصراحة التدخل المبكر مع متلازمة ريت مش مجرد علاج، لكنه بيمنح الطفلة فرصة أكبر للاحتفاظ بمهاراتها وتنمية قدراتها، وبيمنح الأهل مسار علمي واضح يقلل من القلق والارتباك.

وفي الاخر احنا رسالتنا هي الأمل؛ مش في إننا نوقف المتلازمة، لكن في إننا نفتح للطفلة ولأهلها أبواب جديدة للتعلم والتطور، خطوة بخطوة.

27/09/2025

نصيحة من القلب لولي الأمر في كل مراكز مصر 💚
بعد ١٧ سنة خبره في مجال ذوي الأحتياجات
حفاظا على طفلك من الأنتكاسات وضياع الوقت والمجهود والعمر لأبنك ، بنتك
لما مركز يجيب مع أبنك نتيجة كمل فيه .
لما مركز يحط خطة تأهيليه لأبنك وبيتطور يبقى لازم تمشي معاه على نفس الخطة .
لما مركز يوجهك في الصح لأبنك وجاب معاك نتيجة يبقى نستمع لتوجيه لانه أدرى للناس بحالته وتحقيق النتائج .
المدير الفني للمركز : عائشة أحمد

25/09/2025

انتشر في الأيام اللي فاتت كلام منسوب لـ ترامب عن وجود علاج جديد لاضطراب التوحد… والحقيقة إن الكلام ده مفيهوش أي أساس علمي ❌.
لغاية دلوقتي مفيش أي بحث علمي موثوق أثبت وجود دواء يعالج التوحد بشكل كامل.
إحنا كمختصين… أكتر ناس نفسنا يكون في علاج فعّال ونهائي للتوحد.
ولو ده حصل، هنكون أول ناس نرحب ونشجع 💪 وننشر المعلومة ونساعد الأطفال وأسرهم يوصلوا له.

اللي مؤكد حاليًا ✅
إن التدخل المبكر 🧩، البرامج التأهيلية، والدعم الأسري ...هم الأساس في تحسين مهارات أطفالنا ودمجهم في المجتمع.
فلازم نخلي بالنا… مش أي تصريح أو خبر يتم تداوله على السوشيال ميديا يبقى صحيح، وخصوصًا في موضوعات حساسة زي صحة أولادنا ❤️.

20/09/2025

في مركزنا، إحنا شايفين إن الـ Support Teacher مش مجرد "مرافِقة للطفل"… هي جزء أساسي من فريق التدخل والدعم.
إزاي؟..
مش بنسيبها تواجه الموقف لوحدها، بالعكس ⬇️
🔴بنعمل جلسات تعريفية مع الـ Support Teacher نشرح لها شخصية الطفل، نقاط قوته، سلوكياته، واحتياجاته، والتحديات اللي ممكن تقابلها.
🔴بنسلمها خطة متكاملة (أكاديمية + سلوكية + اجتماعية) مبنية على تقييم دقيق للطفل.
🔴بندربها على استراتيجيات عملية تساعدها تتعامل مع مواقف الفصل المختلفة من إدارة السلوك، للتواصل، للتعليم داخل الفصل.
(مشكلات زي تشتت الانتباه، الصعوبة في التفاعل الاجتماعي، أو المواقف الانفعالية).
وبعدين.... مش بنسيبها لوحدها!
إحنا بنتابع معاها بشكل دوري، نراجع التقدم، ونعدل الخطط حسب احتياج الطفل عن طريق (اجتماعات – تقارير – ملاحظات صفية)
يعني الرحلة مش فردية… الطفل، الـ Support Teacher، والمركز في دايرة واحدة، شغّالة مع بعض عشان نضمن إن الطفل مش بس يتعلم، لكن يعيش تجربة مدرسية مريحة، آمنة، وفيها نجاح.

نجاح الطفل في المدرسة مش مسؤولية فرد واحد… ده شغل فريق كامل.

16/09/2025

كل أب وأم بيستمتعوا وهم بيشوفوا خطوات بنتهم الأولى في الحياة... ابتسامة صغيرة، كلمة بتنطقها، حركة بإيديها. اللحظات دي بتفضل محفورة في القلب والذاكرة.
ولما يبدأوا يلاحظوا إن بعض المهارات دي مش بترجع زي الأول أو بتتراجع مع الوقت، بيكون الإحساس صعب ومربك، ومليان أسئلة ومشاعر متداخلة.
الألم النفسي هنا مش مجرد مواجهة إعاقة، لكنه مواجهة (الفقد التدريجي للمهارات بسبب الاصابة بمتلازمة ريت)؛ فقد شيء كان حاضر وبقى غايب.
وده بيخلّي صدمة الأهل أعمق وأصعب.
لكن في النقطة دي بالذات، دور الأختصاصيين في المرحلة دي بيكون جوهري؛ لأن التدخل المبكر والدعم المستمر بيساعد البنت إنها تحافظ على أكبر قدر من المهارات، وتعيش بجودة حياة أفضل.
كمان الدعم النفسي بيساند الأسرة في مواجهة الحزن والضغط المستمر.
وهنا ييجي دور المتخصصين:
بنوفّر مساحة آمنة لسماع مشاعر الأهل، من غير حكم أو تقليل من ألمهم.
بنشرح لهم بشكل علمي مبسط إيه اللي بيحصل، وليه الفقد التدريجي جزء من المتلازمة.
بنوضح إن فيه طرق عملية للتدخل المبكر (علاج طبيعي، وظيفي، وتواصل بديل).
والأهم، بنساعدهم يشوفوا إن الرحلة دي مش لازم يخوضوها لوحدهم… المتخصصين موجودين عشان يدعموا كل خطوة.
دورهم مش بس مع الطفلة، لكن مع الأهل كمان أولًا... نحتوي صدمتهم، نديهم أدوات للتعامل، ونفتح لهم باب أمل علمي وإنساني في مواجهة تحدي كبير.

05/09/2025

تخيّلوا معايا إن رحلة ولادنا في التطور زي لعبة مستويات 🎮…
كل مستوى محتاج يتلعب ويتقفل صح قبل ما يفتح اللي بعده.
المهارات اللي بيتعلمها الطفل – تركيز، انتباه، ضبط سلوك – حتى الرياضة... بتتبني واحدة فوق التانية. ولو استعجلنا أو فوتنا خطوة، المستوى اللي بعده هيبقى أصعب وممكن يحس الطفل إنه تايه.
عشان كده الجلسات أو الوحدات التدريبية ليها وقت وخطوات لازم تتعمل بالكامل. هي مش مجرد مواعيد، دي أحجار أساس لبناء أكبر وأقوى
واكيد برضو لو وقفنا على درجة فترة طويلة، بنفقد وقت كان ممكن يساعده يطلع أسرع ويقرب من أصحابه اللي في نفس سنه.
عشان كده، مهم جدًا إن كل وحدة تخلص في وقتها المحدد ⏳، من غير ما نطوّل أكتر من اللازم. إحنا دايمًا بنسابق الزمن، والسرعة هنا مش رفاهية، دي أمان للمستقبل.

ولو اتأخرنا، الفجوة بينه وبين اللي حواليه هتفضل تظهر وتكبر كل شوية… عشان كده دورنا مش بس نكمل التدريب، لكن كمان نشتغل على تعويض الفوارق اللي ممكن تحصل.
لو اتأخرنا في درجة، مش بس بنقف، لكن الزمن بيجري واللي حوالين الطفل من سنه بيطلعوا لفوق أسرع💪❤️.

03/09/2025

كل عام وانتم بخير 🌿

30/08/2025

المهارات الحركية في مرحلة الطفولة الوسطى (سن ٩:٦ سنين) بتكون أساس لنمو الطفل جسديًا ونفسيًا 💪.
الطفل في المرحلة دي لما يتحرك ويتسلق ويجري 🏃‍♂️🧗، ده بيقوي عضلاته وبيعزز توازنه وثقته في نفسه ⭐️.
كمان بيساعده يندمج مع أصحابه في اللعب الجماعي 🤝 ويتعلم التعاون والمشاركة .
النمو الحركي في السن ده بيدعم كمان التركيز والانتباه لأن الحركة مرتبطة بالقدرات الإدراكية 🧠.
ومع الوقت بتكون المهارات دي خطوة مهمة للاستعداد الأكاديمي والأنشطة المدرسية 🎒✏️.

20/08/2025

طفلك مش صعب… بس محتاج حد يفهمه بجد!
في طفل لما بيتشد عليه بيهدى… وطفل تاني لما تشد عليه "ينفجر"!
في طفل لما تقول له: "خلاص!"، يستوعب… وطفل تاني عينيه تتملي دموع، بس مش لأنه عنيد… لأنه مش فاهمك!
في طفل عنده فرط حركة، بس حقيقي (مش قادر) يهدى…
هو مش بيستفزك! ده هو نفسه تعبان من طاقته اللي مش عارف يسيطر عليها.
في طفل عنده حساسية من الأصوات أو اللمس أو اللبس… بس كل اللي حواليه شايفينه "بيبالغ"!
وفي طفل غير ناطق، بس بيفهم كل حاجة، وموجوع من جواه لأنه مش لاقي طريقة يعبر بيها.
ممكن صوت بسيط يزعجه ويعيط
ممكن شراب ضيق ينكد عليه
وممكن حضن يوجعه بدل ما يطبطب عليه
الطفل ده مش بيتدلع ومش بيبالغ ومش قليل أدب
الطفل ده عنده مشكلات حسيّة ونفسية وسلوكية بتتداخل بشكل معقّد
والمعادلة دي مش بتتحل بـ تأديب أو إجبار… لكن بـ فهم، احتواء، واستراتيجيات حقيقية تناسبه
عشان كده قبل مانزعل منه
نسأل نفسنا الأول هو محتاج حضن؟ ولا محتاج مسافة؟
محتاج هدوء؟ ولا محتاج يفرغ طاقة؟
هو مش بيسمع الكلام؟ ولا مش قادر يفهم أصلا؟
كل تصرف غريب وراكب على أعصابه… وراه احتياج!
وكل سلوك عنيف… وراه ألم مش مفهوم

13/08/2025

في طفل ممكن تصحى الصبح تلاقيه بيضحك
وبيهزر وأحضان وبوس...
وتاني يوم؟!
زعيق، صريخ، رفض لكل حاجة، حتى حضنك مش عايزه 😅
تبقى واقف مش فاهم... هو إيه اللي حصل؟
يوم فُله شمعة منورة وعسل… ويوم تاني مش فاهمين حصل إيه!
أنا نفس الشخص، وهو نفس الطفل، بس... المزاج؟ اتقلب فجأة!
وده مش دلع، ومش "بيشتغلنا"، ولا "متغير من غير سبب"...
ده جزء من الحالة نفسها.
الجهاز العصبي مش ثابت، المشاعر فوق وتحت، والنظام الحسي ساعات بيكون عامل زي الراديو اللي بيشبك على كل الترددات مرة واحدة! 📻
لو انت مش متخيل ده شكله إزاي...
جرب تعيش يوم كامل بعقله الزحمة، ومشاعره المتوترة، وجسمه اللى مش طايق هدومه!
هتفهم شويه هو بيحس بإيه.
فـ أيوه، هو نفس الطفل، بس يومه مش دايمًا نفس اليوم.
وده بيحتاج "نفس طويل" مننا❤️