19/08/2025
ده عنده توحد و مش هيتكلم ، و ده عنده ابراكسيا و مش هيتكلم ، وديت جلسات كثير و مفيش تقدم او تقدم بسيط جدا .. اشتغلي مع ابنك بنفسك و هتشوفي نتيجة .. كلام بشوفه كثير علي جروبات الاهالي سواء من اللي كاتبين البوست او الردود و حابة اعلق عليه .
مين قال الابراكسيا عمره ما بيتكلم ، الابراكسيا مع العلاج الصح بيتكلم ، الحالات الشديدة جدا و اللي هي نادرة جدا بيتكلم بس مش بتتكلم بطلاقة ، بيقول كلمة واحدة و بعض الحروف ممكن متطلعش.
التوحد الغير ناطق تماما ، ٧٪ فقط من كل حالات التوحد اللي وصل نسبته ل ١ من كل ٦٤ طفل، و بتكون حالات شديدة جدا .
و في الحالتين دول بنستخدم طرق تواصل بديلة و مع الوقت و تقدمهم في استخدام طرق التواصل المختلفة بننسي ان عندهم مشكله في التواصل أصلا ( تجربتي الشخصية مع ابني )
اي حالة صعبة ممكن تتحسن ، المهم اختيار المهارات اللي نشتغل عليها و اللي ممكن تحسن حياتهم و حياة أسرهم .. مش لازم كله يوصل انه يدخل المدرسة و مش كل الاطفال بتشتغل نفس البرامج ،
ايه قيمة انه يعرف الفرق بين الخضروات و الفواكه .. هيفرق ايه في حياته ..و غيرها من البرامج عديمة القيمة اللي بستعملها الاطفال في مراكز كثير وهو مزنوق ظهره للحيطة و الترابيزة قافلة عليه و كاره نفسه و حياته و صابر و مستحمل و مش عارف ليه أصلا بيحصل له كده
المهم اننا نوصلهم لتحقيق اقصي إمكانياتهم و نخلي حياتهم و حياة أسرهم احسن و هنا يجي دور محلل السلوك المعتمد ، اللي بيشرف علي شغل الاخصائين سواء في مركز او اونلاين .. لان دراسته تسمح له تحديد الخطة المناسبة و اللي تفرق في حياته و طريقة التعليم المناسبة و متابعة التنفيذ و التطور و التعديل لحل العقبات .
الاخصائي الشاطر طبعا له قيمة كبيرة و بيفرق جدا انه وهو بينفذ الخطة و طرق التدريب يبقي بينفذ صح و بيلاحظ المشاكل و نقط الخلل في الخطة و يبلغ بيها المشرف علشان المشرف يلاقي لها حل و الاخصائي الشاطر يقدر ينفذ خطط تعديل السلوك بفاعليه كبيرة .. هو ده دور الاخصائي اللي لايمكن الاستغناء عنه ، الاخصائي هو فني التنفيذ ، زي كده فني الاشعة و فني المعمل و فني السونار و اللي كل ما يكون شاطر و ينفذ الحاجات ديه بفنيات صحيحة و يكتب تقرير صح بيسمح للطبيب انه يشخص صح و يكتب علاج صح ، لكن مفيش طبيب أشعة بيكتب علاج.
طيب اشتغلي مع ابنك في البيت .. لو واحد بيغرق و حد بيعرف يعوم يروح ينقذه .. غالبا الاثنين هيغرقوا .. لازم المنقذ المدرب علي الإنقاذ هو اللي يطلع اللي بيغرق .. انتي ام ممتازة ، لكن بتجيبي مدرس رياضيات و مدرس علوم و مدرس عربي و انتي بتعرفي عربي اكيد يساعد ولادك ، انتي ممكن تتابعي انهم حلوا الواجب ، تسمعي ، و ده نفس الوضع بالنسبة لولادنا و الشغل معاهم .. المتخصصين يعلموا و انتي تستخدمي اللي علموه في البيت و توظفيه.
في الاخر لازم اقول كلمة اخيرة .. مكشوف، لما الاقي الطفل تقدمه بطئ فلازم اغير حاجة في طريقة التعليم او الحاجة اللي بعلمها ، فلما تلاقي التقدم بطئ لازم تسألي ، طيب و غيرتوا ايه او هتحاولي تحلوا الموضوع ده ازاي .. لو الاجابة ان مفيش حاجة ثانية تتعمل .. يبقي غيري المكان، لما طفل بيتوقف في نقطة معينة ، لازم اغير الطريقة او احيانا اغير الهدف بهدف ثاني يساعد لما ارجع لنفس الهدف .
“ If a child can’t learn the way we teach , we should teach the way they learn “
