27/09/2025
📍الاكتئاب بيحب التأجيل
طول الوقت بتحس إنك “مش قادر دلوقتي”…كل حاجة محتاجة مناهدة، وكل خطوة فيها فرهدة.
فتقول: “بكره”، “بعد شوية”وفجأة تلاقي حاجات كتير كانت ماشية… وقفت، مش لأنك كسول، لأ…بس لأن الاكتئاب بيعطّل الطاقة ويخلّي أبسط حاجة تبان جبال
بس خد بالك… التأجيل مش راحة، التأجيل بيزود الحمل وكل ماتراكمت الحاجات زاد الإحساس بالفشل
ابدأ بأي حاجة… حتى لو صغيرة
ليه صعب تعمل ده.؟؟
لأنك بتدور – جواك من غير ما تحس –على حاجة تثبتلك إنك تقدر… وإنك كفاية بس لما ما تلاقيش الإثبات ده فورًا،ما بتقدرش تستحمل حتى تعمل الحاجات العادية.
بس الحقيقة؟ أي تقدم حقيقي في الدنيا بيبدأ بالحاجات العادية اللي بنعملها كل يوم،حتى لو ماكانش ليها نتيجة فورية، حتى لو عملتها وإنت مش مصدّق… لا في نفسك، ولا في الحياة.
وده أصعب ما في الموضوع: إنك تمشي في طريق من غير ضمانات،من غير تصفيق، ومن غير ما تشوف النتيجة بسرعة بس هو ده الطريق الوحيد للخروج
ممكن تبدأ بـ “حاجة مالهاش معنى” دلوقتي،
بس بعد شوية…هتبقى هي السبب إنك ترجع تحس إنك موجود ولسه مستسلمتش.
