Journey with science رحلة مع العلوم (2026)

16/12/2023

اللهم بارك🥺🥺 ربنا يحفظك ياحبيبي ويبارك فيك ويكثر من أمثالك 🤲🤲🤲

25/07/2023

مريض جلطة جالك يعمل تحاليل دهون و اتفاجئت إن ال Cholesterol طبيعي!!! اومال الجلطة دي سببها إيه 🤔
هنروح لسبب مهم جداً و بيعمل مشاكل كتير منها :
زيادة الوزن
ارتفاع الضغط
ورم القدم
تضخم البروستاتا
تصلب الاوعية الدموية. 🤦‍♀️
إيه العامل المشترك بين كل دول ؟ 🤔.
زيادة الإنسولين 🤷‍♀️
HYPERINSOLINEMIA
هنمسك نقطة نقطة كدة نشوف سببها إيه 🫣
قبل أي حاجة خليك عارف ان ربنا خالق طبيعة جسمك كل الخلايا فيه عندها حساسية للإنسولين و مستقبلات ليه.👀
إيه بقي ممكن يخلي الإنسولين يزيد ؟ و هل أي مريض سكر الجلوكوز عنده عالي يروح ياخد إنسولين ؟🤔
الإنسولين دة زي م قولنا قبل كدة إنه Anabolic Hormone يعني هرمون بنائي أو Fat storage Hormone هرمون تخزين الدهون. 🫣
دلوقتي إنت أكلت عشان محتاج طاقة 🤷‍♀️ البنكرياس (تحديداً beta cells) بتفرز الإنسولين عشان تاخد الجلوكوز تدخله الخلايا و تديك طاقة ، ف إنت لما تزود في اكلك كربوهيدرات الجلوكوز هيزيد ف افراز الإنسولين هيزيد 🤷‍♀️، تكرار الدايرة دي 🔁هتخلي الخلايا عندك حساسيتها للإنسولين هتقل 🤦‍♀️ ، ف هتجوع ، و تاكل ، و السكر يزيد ، و الإنسولين هيزيد ، بس مش هيعرف يدخله للخلايا ، ف هتفضل جعان و بتاكل كتير و السكر عالي و الانسولين عالي و بردو مش هتعرف تاخد طاقة🔁.
كدة انت حصلك مقاومة إنسولين 🤦‍♀️
إيه بقي أضرار الكلام دة ؟ و ايه التحليل اللي يعرفني إذا كان في مقاومة إنسولين ولا لا 🤔
1- الجلوكوز في الدم عالي و جسمك مش عارف يستفيد بيه ف الإنسولين هياخده يخزنه في صورة دهون (fat storage Hormone)🫣 ف هيحصل سمنة 🤦‍♀️
2- ارتفاع الضغط ؟ ممكن يكون ضغطك دايما عالي و بتاخد علاج و مقلل دهون و ملح و مفيش نتيجة 🤷‍♀️ السبب إن عندك مقاومة إنسولين 🤦‍♀️ لما الإنسولين بيزيد ، بيرتفع معاه هرمون الألدوستيرون اللي بيزود كمية الملح فالبتالي المية كمان هتزيد ف هيحصل احتباس للمية دي وورم في رجلك و ارتفاع الضغط 🤦‍♀️
3- عشان ضغط الدم يكون مظبوط لازم يكون في مرونة في الاوعية الدموية ، اللي بيسبب تمدد و مرونة الاوعية الدموية هو اكسيد النيتريك بس مش بيتفرز إلا ب أمر من الإنسولين اللي خلايا جسمك مش عارفه تتسقبله أصلا ف هيزيد ضغط الدم 🤦‍♀️
4- الجلطة اللي بتتكون في الدم فيها مستقبلات للإنسولين ف هيدخل في بنائها و تبتدي تزيد و يحصل لا قدر الله جلطة وانت الكوليسترول عندك أصلا طبيعي 🤦‍♀️
ازاي بقي تتجنب كل الكلام دة من بدايته ؟🤔
قلل نشويات⬇️ زود فيتامينات ⬆️ خصوصاً فيتامين د
قلل توتر ⬇️👀 إيه العلاقة ؟ التوتر بيزود هرمون الكورتيزول ، فالسكر هيزيد ⬆️ ف الإنسولين هيزيد ⬆️

تحليل :
Homa - IR (مقاومة الإنسولين)
C-peptide (كفاءة البنكرياس)
متنساش تعمل فولو
و إستني
#كل #يوم #معلومه #جديده

22/07/2023

واحد راح يحلل سكر اول ما صحي من النوم لقاه 205 ، إيه اللي ممكن يعلي الجلوكوز كدة ؟🤔 و الصيام بيقلل الجلوكوز في الدم ولا بيرفعه ؟🤔

أولاً ارتفاع الجلوكوز في الدم الصبح ظاهرة طبيعية جداً 🤷‍♀️ بتحصل لأي حد مريض سكر أو لا ، مريض سكر من النوع الأول او التاني 🤦‍♀️ إسمها ظاهرة الفجر أو dawn phenomenon
طيب ايه سببها ؟🤔
هرمونات 🤷‍♀️
الإنسولين وظيفته ⬅️ ياخد الجلوكوز من الدم و يخزنه في الكبد و العضلات.
في هرمونات تانيه بتكون معاكسة للإنسولين اول ما يقل تبدأ تشتغل هي.
إيه الهرمونات دي ؟🤔 الكورتيزول ، هرمون النمو ، الجلوكاجون.
بياخد الجلوكوز اللي متخزن و يرفعه في الدم.
طيب أمتي أصلا الانسولين بيقل ؟ في الصيام او وقت النوم 🤷‍♀️
إيه دة يعني الصيام مش بيقلل الجلوكوز ؟😳
لا 🫣اللي بيقلل الجلوكوز في الدم هو الجرعات العالية من الانسولين او خلل في الكبد ، و عشان كدة في تحليل السكر الصايم (FBG) يفضل صيام من 6 ل 8 ساعات بس لان اعلي من كدة الجلوكوز هيبدأ يعلي بتأثير الهرمونات دي 🫣
طب إيه يخليك تتغلب عالظاهرة دي ؟🤔
1- الرياضة
2- القرفة بعد الوجبات ، خل التفاح بين الوجبات.
و دي الفكرة اللي قايم عليها الصيام المتقطع ، إن الإنسولين يقل فالهرمونات المعاكسة تشتغل و تاخد الجليكوجين و الدهون المتخزنة تحولها ل جلوكوز عشان الطاقة 🤷‍♀️
بس دة باستثناء طبعا مرضي السكر اللي بياخدو أدوية لازم استشارة طبيب متخصص. 🤍

متنساش تعمل فولو
واستني
#كل #معلومة #جديدة

14/07/2023

تفتكر جسمك بيعرف منين ان ضغط الدم فيه قل ؟ ولما بيعرف بيعمل إيه ؟🤔
هناخد القصة من بدايتها ف ركز فالكلام الجاي دة عشان مهم جدا جدا 😉👈👉
القصة بتبدأ من عند الكِلية 🚶‍♀️
الدم بيدخل يتفلتر من ناحية يخرج من الناحية التانيه ، وهو داخل بيدخل من بوابة إسمها Afferent arteriols و بيخرج من بوابة إسمها efferent arteriols 🤷‍♀️
وهو داخل في خلايا بتقابله إسمها
Juxtaglomerular cell
(Juxta) (glome) (rular)(cell)
بتعمل إيه الخلايا دي ؟ 🤔ولا أي حاجة طول ما ضغط الدم مظبوط 🤷‍♀️، اول ما الضغط يقل بتبدأ تدي انذارات و تفرز هرمون ال Renin في الدم 👀
ركز بقي عشان من هنا السلسلة هتبدأ 💪

الهرمون دة بيعمل إيه ؟ 🤔بيروح لهرمون بيتفرز من الكبد إسمه Angiotensinogen
(Angio) (ten) (sino) (gen)
الهرمون دة بيكون غير فعال ، وظيفة ال renin انه يحوله لهرمون فعال إسمه ⬅️ Angiotensin 1 بس الهرمون دة بطئ ف بيروح للرئة عشان يقابل هناك ACE
(Angiotensin converting Enzyme)
و يتحول ل⬅️ Angiotensin 2

قبل ما نتوه من بعض 🤦‍♀️🫣
احنا معانا 2 هرمون هقول كل واحد بيتفرز منين ووظيفته إيه 👀
*1-Renin*
بيتفرز من Juxtaglomerular cell

ووظيفته : بيحول ال Angiotensinogen (غير فعال وبيتفرز من الكبد ) ⬅️ Angiotensin 1 (بطئ)
*2-ACE*
(Angiotensin converting Enzyme)
في الرئة و بيحول ال
Angiotensin 1 ➡️
Angiotensin 2.
🫶
كدة وصلنا لل Angiotensin 2 وظيفته إيه بقي ؟ 4 حاجات 🫣
*1-* انقباض للاوعية الدموية
Vasoconsritction
عشان يبدأ يرفع ضغط الدم
*2-* بيحفز ال Adrenal gland عشان تفرز هرمون ال Aldosterone اللي بيعمل إيه ؟ بيبدأ يسحب الصوديوم و يوديه للدم ف يرفع ضغط الدم (المية H2O بتحب الصوديوم و بتمشي وراه ف هتروح للاوعية الدموية ورا الصوديوم ف ضغط الدم هيزيد).
*3-* بيحفز منطقة ال posterior pituitary gland عشان تفرز هرمون ال ADH ، بيعمل إيه ؟ بيروح لمنطقة فالنفرون (الوحدة الوظيفية للكلية) إسمها collecting duct عشان تسحب مية توديها للدم.
*4_* بيحفز ال أدرينالين عشان يزود ضربات القلب و معدل النفس. 🤍
ال system دة إسمه
*Renin Angiotensin Aldosterone system* ✌️
و مهمته بيرفع ضغط الدم يعني انا لو عايزه اقلل الضغط قدامي كذة طريق.

*1-* ممكن اقفل السلسة من أولها من عند ال Renin

*2-* ممكن استخدم ACEI يعني
Angiotensin converting Enzyme inhibitor
مثبطات لل ACE اللي بتنتجلي ال Angiotensin 2

*3_* ممكن استخدم ARBS
(Angiotensin receptor blockers)
ان انا اقفل ال2 Angiotensin نفسه.

و دة هنعرفه في مقال تاني لوحده👀
طولنا شويه المرة دي بس الموضوع شيق و ممتع و مهم جدا ❤️😉
متنساش تعمل فولو
واستني
#كل #يوم #معلومه #جديده

12/07/2023

لو جالك 2 روشتة لراجل و ست :
- واحدة عملتلها تحاليل سكر و طلعت مريضة سكر و لقيت الدكتور كاتبلها الفنترن بعد الاكل علي طول 🤌

- واحد عملتله semen analysis و طلع عنده high viscosity (لزوجة عالية) ، و بردو مكتوبله الفنترن. 🤦‍♀️

إيه اللي ممكن يخلي الدكتور يكتب للاتنين الفنترن ؟ هو مش دة مضاد للالتهابات و التورم ؟🤔
عشان تفهم القصة إيه هنروح للموضوع من بدايته و في كذة حاجه محتاجين نعرفها. 🫣
الألفنترن المواد الفعالة فيه هي
Trypsin & chymotrypsin.
المادتين دول بيتشغلو ك مضاد للالتهاب و التورم ، بس اللي متعرفوش ان المادتين دول بيتفرزو في جسمك طبيعي أصلا من البنكرياس 🫣 ليه ؟ إنزيمات هاضمة للبروتين🤷‍♀️لما بيحصل كدمة او تورم ، الورم دة بيكون عبارة عن مجموعة بروتينات ميتة ، ف بتحتاج للمادتين دول من برة في صورة الفنترن🤷‍♀️
بس ايه يضمنلي انه يستهدف بروتينات الورم مش بروتينات المعدة ؟ بيتاخد علي معدة فاضيه سواء قبل الاكل ب ساعة او بعد الاكل بساعتين 👈👉
طيب بردو ايه علاقة العقم و مرض السكر بيهم ؟
بالنسبة للعقم⬅️ ال high viscosity بيبقي سببها تجمع من البروتينات ، الألفنترن المواد الفعالة فيه بتكسر البروتينات دي من غير ما تأثر علي ال semen.👈👉
بالنسبة للسكر ⬅️
ارجع 4 سطور ورا هتلاقيني قلتلك معلومتين مهمين جدا :
التربسين و الكيموتربسين
1- بيتفرزو من البنكرياس
2-انزيمات هاضمة
مريض السكر مع الوقت البنكرياس عنده مبيفرزش الانزيمات دي ف بيحصله عسر هضم عشان كدة بياخد الالفنترن بعد الاكل علي طول عشان يهضم بروتينات الاكل 🤷‍♀️ انما لو في تورم يبقي علي معدة فاضيه 👀
متنساش تعمل فولو
واستني
#كل #يوم #معلومه #جديدها

10/07/2023

تفتكر إيه فايدة هرمون ال أدرينالين لمريض السكر ؟ و ليه مريض السكر اللي عنده الضغط في أدوية معينة مينفعش ياخدها ؟🤔

زي ما اتعودنا بناخد الرحلة من أولها 🫣
دقيقتين تركيز بقي عشان الكلام إللي جاي دة مهم جدا جدا 😉

لما بتبذل مجهود كبير او مريض سكر و خدت جرعة زيادة اللي بيحصل ان الجلوكوز في دمك بيقل🤦‍♀️ بس من رحمة ربنا بينا ان جسمك بيعرف يتصرف 🫶 إزاي ؟ اول ما مستوي الجلوكوز فالدم يقل الغدة النخاميه (pituitary gland) بتحفز ال adrenal gland عشان تفرز هرمون ال أدرينالين 👀 بيعمل إيه الهرمون ده ؟ بيمشي فالدم و يروح مكانين✌️
1- بيروح القلب و يرتبط ب مسقبلات هناك إسمها بيتا 1 ف يخلي ضربات قلبك تزيد و تعرق و يديك اشارة ان الجلوكوز في دمك قل
2- بيروح للكبد و يرتبط بمستقبلات إسمها بيتا 2 و يخليه يخرج جلوكوز ، بس ازاي ؟ الجليكوجين اللي متخزن فالكبد بييجي دوره هنا ويقوم الكبد بعمليه (glycogenolysis) عشان يحوله ل جلوكوز و يظبط مستواه تاني فالدم ❤️👩‍🔬

طب إيه علاقة دة بمريض الضغط والسكر و ان في أدوية ضغط مينفعش ياخدها ؟

عشان اجاوبك لازم تبقي عارف الأول إن في أدوية ضغط زي كونكور بتبقي beta blocker بمعني ؟ 🤔شوفت المستقبلات اللي علي الكبد و القلب اللي بيرتبط بيها ال أدرينالين عشان يزود ضربات القلب و يديك اشارة ان الجلوكوز قل ؟🫣 و في نفس الوقت بيروح للكبد عشان يخرج جلوكوز و يظبط مستواه تاني ؟ لما اكون انا مريض سكر وأخد أدوية ضغط تقفلي المستقبلات دي 🤌، ال أدرينالين هيرتبط بأيه ؟ 🤷‍♀️ولا حاجه و هتفضل مش عارف ان الجلوكوز عندك قل و ممكن لا قدر الله تدخل في غيبوبة🤦‍♀️ ، ف لو انت مريض سكر و ضغط تابع مع الدكتور و متاخدش أي دوا ضغط و خلاص 👀❤️
متنساش تعمل فولو
واستني
#كل #يوم #معلومه #جديده

08/07/2023

نعالج تساقط الشعر نفسه ❌
نعالج سبب تساقط الشعر ✅
تساقط الشعر ليه اسباب كتير ف قبل ما تشتري شامبو و products غالية ، اعرف السبب الأول 👀
و هنا هتسأل نفسك سؤالين ، هل التساقط دة سببه تقصف ولا من الجذور ؟🤔
1- سببه تقصف يبقي تستخدم شامبو كويس و المشكلة هتتحل 👈👉
2- من الجذور : هنا السبب بيبقي
-مشاكل هرمونية
-بعد الولادة
-حالة نفسية
-انيميا 🤦‍♀️
و هنتكلم شوية عن الانيميا ، ليه بتسبب تساقط الشعر ؟🥺
-انيميا ⬅️ يعني نقص كرات الدم الحمراء.
-كرات الدم الحمراء ⬅️ هي اللي بتنقل الاكسجين و الغذاء لكل خلايا جسمك.
يعني ال انيميا بتسبب نقص الاكسجين و الغذاء ف بتسبب تساقط الشعر 🫣
طيب نعالجها إزاي ؟🤔
أعرف السبب الأول 🤌
تحليل CBC ، واتكلمنا في بوست لوحده قبل كدة نعرف سبب الانيميا منين 🤷‍♀️
و عشان المشكلة الشائعة اكتر بتبقي نقص الحديد ف دي شوية تعليمات 👀
1- الحديد بيتاخد بعد الاكل ب ساعة ✅
2- ممنوع تشرب معاه شاي او قهوة عشان بيحتوي علي مادة ال tannic acid اللي بتقلل امتصاص الحديد ❌
3- ممنوع تاخد اي حديد او فيتامين قبل النوم❌
4- ممنوع تاخد حديد مع كالسيوم بيعملو complex مع بعض ومش هتستفاد ب حاجه منهم (للحوامل 👀) ❌
5- يفضل لو تشرب عصير ليمون او برتقال بعد اقراص الحديد او تاخد فيتامين سي بيخلي امتصاص الحديد 100%
متنساش تعمل فولو
واستني
#كل #يوم #معلومه #جديده

07/07/2023

خلي بالك 🙋‍♀️
النزلة المعوية ممكن يكون سببها :
1- بكتيريا
2-فيروس
3-طفيل
4- مضاد حيوي او فيتامين بتاخده

المضاد الحيوي للبكتيريا بس ، يعني مش أي نزلة معوية تاخدلها مضاد حيوي 🤷‍♀️
أعرف السبب الأول 👀، طب اعرف منين ؟
البكتيريا ⬅️ الم في البطن ، ترجيع ، إسهال ، درجة الحرارة اعلي من 38.5 ، الجسم همدان ومكسر (هيحتاج مضاد حيوي) 🤷‍♀️

الفيروس ⬅️ الم في البطن ، ترجيع ، إسهال ، درجة الحرارة أقل من 38.5 ، الجسم مش همدان (مش محتاج مضاد حيوي ، ادوية للاعراض بس) 🫣
الطفيل ⬅️ الم في البطن و إسهال فقط. (مفيش ترجيع ولا سخونية)
(stool analysis
عشان يعرف نوع الطفيل).
- الكلام ده لازم تكون عارفه كويس عشان مينفعش تاخد مضاد حيوي مع أي تعب و للأسف دكاترة كتير بتستسهل و تكتب مضاد حيوي علي طول.
هنتكلم في بوست لوحده عن المضادات الحيوية بتشتغل ازاي و ليه كترها غلط.
متنساش تعمل فولو
واستني
#كل #يوم #معلومه #جديده

05/07/2023

ليه في مسكنات غلط مريض الأزمة ياخدها ؟ إيه العلاقة 🤔
فاكر لما اتكلمنا علي ال Arachidonic acid ؟ ساعتها قولنا ان قدامه طريقين بيمشي فيهم.🤷‍♀️
و المسكن بيقفل طريق منهم عشان ميتكونش ال prostaglandin اللي بتسبب الألم.🤦‍♀️
ف معني كدة ان كل ال Arachidonic acid هتروح للطريق التاني. اللي هو Lox
Lipooxygenase.
و هنا بيتكون leuk otrienes.
يعني عشان منتوهش.
(Arachidonic acid +cox) ➡️ prostaglandin.
(Arachidonic acid + lox) ➡️ leuk otrienes.
طيب مالها ال leuk otrienes دي ؟🤔

بتعمل bronchospasm تقلصات فالرئة و ضيق تنفس ، عشان كدة ممكن حد يكون معلق محلول فيه مسكن زي كيتولاك و تلاقي نفسه ضاق وبيتخنق و عشان كدة في مسكنات (Nsaid) متنفعش مع مريض الأزمة. 👈👉
لو حاسس إنك توهت و أول مرة تشوف البوست ده ف مش فاهم ، دة لينك البوست الاولاني هيفهمك😉
https://www.facebook.com/100092244561856/posts/162591940158957/
طيب السخونية و الالتهاب بقي بيحصلو إزاي ؟🤔
متنساش تعمل فولو
واستني
#كل #يوم #معلومه #جديده

04/07/2023

اسألة ال over thinking 🫣
ازاي جسمك بيحس بالألم ؟ و إزاي العلاج أصلا بيعرف مكان الألم ؟ 🤔
دقيقتين تركيز عشان تفهم و استعد 🤌
هنتكلم عن ال analgesics أو المسكنات 👀 تحديداً المسكنات البسيطة زي :
1- paracetamol
2- Nsaid (Non steroidal anti inflammatory drugs) 💪

أولا ازاي أصلا الألم بيحصل ؟
ال cell membrane اللي في الخلية موجود فيه مادة ال phospholipid مجرد ما بيحصل الم بتخرج المادة دي و تقابل إنزيم إسمه phospholipase A2
ف طبعا مش هتفضل زي ما هي و هتتحول ل Arachidonic acid 🙆‍♀️
و ال Arachidonic acid دة بيبقي قدامه طريقين بيقابل فيهم نوعين من الانزيمات ، واحد منهم اللي مهم دلوقتي 🤷‍♀️
1- Cox (cyclooxygenase)
و هنا مش هيفضل زي ما هو بردو و هيتحول ل prostaglandin اللي مسئولة عن ( inflammation - pain - fever) يعني التهاب - الم - ارتفاع درجة الحرارة.
يعني ببساطة 🤷‍♀️
Cell ➡️ cell membrane ➡️phospholipid ➡️(phospholipid + phospholipase A2) ➡️Arachidonic acid ➡️ (Arachidonic acid +cox) ➡️inflammation, pain, fever.

طيب دة كدة ميكانيزم الألم ، لو عايزة مسكن بقي المفروض يكون بيعمل إيه ؟ بيعملي بلوك لل cox عشان متتكونش ال prostaglandin ولا يحصلي التهاب او سخونية.

و لكن عشان منطولش ، هنخليها مرة تانيه نقول فيها المسكن بيشتغل ازاي و ايه علاقة تأثيره عالكلي و القلب و المعدة 🫶
متنساش تعمل فولو
واستني
#كل #يوم #معلومه #جديده

02/07/2023

نبذة بسيطة عن نزيف الأنف 🫣
إيه سببه ؟ إيه علاجه ؟ 🤔
مبدأيا نزيف الانف بيكون سببه نقص فيتامين C او الضغط العالي 👈👉
علاجه بيكون علي حسب كل حالة
هنقسمهم لتلاتة : 🫶
1- شخص اول مرة يحصله :
الخطأ المشهور جداً
يرجع راسه ل ورا 🤦‍♀️ غلط جداً الدم ممكن يدخل في مجري التنفس و يتخنق 🤷‍♀️ الحل انه يوطي راسه ل تحت ويسد النزيف بايديه لحد م يقف.

2- حصل نزيف للانف ومش راضي يقف ، مهما وطي راسه او سد النزيف مبيقفش. 🙆‍♀️ هنا بنلجأ ل
Local vasoconstriction
بمعني ؟ بيسخدم حاجه موضعية يوقف بيها النزيف ، زي ؟
حقنة أدرينالين ، بس مش هياخدها 🫣 هيكسر الامبول و يحطه علي قطنة و يحط القطنة مكان النزيف 👀
3- النزيف وقف بس رجع اتكرر تاني
هنا بنلجأ ل Antihemorrhagic drug ، بمعني ؟ ادوية ينتظم عليها زي haemostop.. بس دي جرعاتها حسب الوزن ف لازم تتابع مع دكتور و يعرفك تاخدها إزاي.
والاهم من كل دة تعالج سبب النزيف أصلا سواء نقص ال فيتامين او الضغط 🧘‍♀️
متنساش تعمل فولو
واستني
#كل #يوم #معلومه #جديده

Journey with science رحلة مع العلوم

16/12/2023

25/07/2023

22/07/2023

14/07/2023

12/07/2023

10/07/2023

08/07/2023

07/07/2023

05/07/2023

04/07/2023

02/07/2023

Address

Website

Alerts

Shortcuts

Share