05/04/2025
السلام عليكم ورحمه الله وبركاته
المنشور ده شفته من زمان وضايقني الحقيقة من عدة وجوه
في تعميم ونظرة ضيقة وظلم لكثير من السيدات الفضليات، وإعانة الظالم على ظلمه.
وممكن غيري يشوف حاجات كتير تانية خفية في الكلام ده، سواء المكتوب أو المتقال.
فيه تعميم كبير،،
الكلام ده ممكن يكون موجود آه بس في فئة معينة مش على الإطلاق كده.
عزيزي الرجل، المفترض أن تكون الأعقل والأحكم والخبرة في الناس بحكم احتكاكك بهم وكده، أرجو من سيادتكم التوجه إلى الإصلاح مش التكتيم { وارضي بحالك أيتها المرأة واحمدي ربنا على اللي انت فيه أيا كان هو ايه بدل ما تتمرمطي، }
وليه المرمطة أصلا!!!
ما ديننا الحنيف نظم كل حاجة، لمن يفقه.
وزي ما في ستات يتفات لها بلاد ففي رجال لا يعلمون شيئا عن الرجولة إلا وفعلوا عكسه.
ليه ترضى بظلم وقلة قيمة وإهانة وعيشة لا تؤدي إلا إلى أمراض نفسية على أفضل تقدير!!!
أتفهم أن ممكن تكون رغبة أحدكم التقليل من الطلاق عمال على بطال،، بس مش بالطريقة "الرخيصة" دي،، وعذرا على اللفظة، فلم أجد غيرها للوصف.
حضرتك ممكن توجه توعيات للرجل أنه يعامل الزوجة والأبناء بما يرضي الله ،بالحسنى، طب وإذا استحالت العشرة ؟؟
*فتسريح بإحسان* أوفر وأكرم وأبرك.
نظفوا القلوب ،
مش معنى أن زوجتك مش عاوزاك يبقى انت وحش فتتعامل إنك وحش،، ممكن أوي يكون زي ما بنقول مافيش كيميا بينكم ،، مافيش تواصل وتفاهم صح، يا تتعلموا أنتم الاتنين ازاي تتواصلوا وتتفاهموا وتتعاملوا ،، يا تسريح بإحسان ،،
لكن الإهانات والذل والبهدلة لا تخرج إلا من ضعاف النفوس.
محتاجين معسكرات لتقوية النفوس وتنقيتها من الضعف اللي فيها.
ده في ناس كتير انفصلوا (اتطلقوا ) وأحسن من ناس متزوجين بس منفصلين جوا نفس البيت،
المشاكل النفسية موجودة سواء بانفصال أو بدونه لو لم يتم التعامل بشكل صحيح بين أفراد الأسرة.
والمرأة بكلمة حلوة بتلين، والشدة مطلوبة في بعض الأحيان مش هي الأساس
الرجل الذكي هو اللي يعرف يخلي المرأة تقيدله صوابعها العشرين -مش العشرة بس- شمع.
اعرفوا سيدنا محمد صلى الله عليه وسلم كان بيتعامل ازاي وهديه إيه ،، وإيه توصياته،، هو وسيدنا أبوبكر وعمر وعثمان وعلي رضوان الله عليهم أجمعين.
وماتقولوش أما تبقى زي زوجاتهم نبقى نعمل زيهم ،، لا حضرتك اعمل اللي عليك، اعمل الصح على رأي أ.غسان. انت مش رد فعل حضرتك ،، سيادتك مش كرة بينج بونج.
سيدنا الحبيب المصطفى صلى الله عليه وسلم قال ابدأ بنفسك
ربنا سبحانه وتعالى قال :- قوا أنفسكم
أما هتقف بين ايدين رب العزة والجبروت هتقف لوحدك،، وهاتتسأل لوحدك، هل هتعرف تقول أصل هي اللي استفزتني واللا قصرت معايا فأنا استخدمت سلطتي أو أيا كان المبررات اللي هتقولها!!
وبدل ما تتشطر على الكائن الأضعف زي ما بتقول، اتشطر على نفسك في المقام الأول وزود مهاراتك في التعامل مع مراتك حلالك، ازاي تروضها بالمعروف إن كانت شرسة، وازاي تتعامل بالإحسان اذا استحالت العشرة ، وهنا بيبان الأصل والأخلاق الحقيقية .
دمتم بوعي وسلام
#رحاب-حمام
#براح-رحاب
