28/01/2026
بعد وقت مش قليل ومش بطيء
بتلاقى نفسك عملت رحلات وصفقات وعقود وشغل ورحلات
كنت اعزب خطبت اتجوزت بقيت بابا بقيت جدو
بتدور على شغل ومخلتش باب الا وخبطت عليه
بقيت موظف قاعد بيأمر ويتباهى بمكانه وانجازاته
كنت طالب طالع عينك فى الدراسة او فى خدمة الجيش ومنتظرها تخلص
كلمت طوب الارض على شغل اشتغلت وظهرت منك اخلاق جديده, نستي كنت فين وبتدور ازاى ودلوقتى بقيت مختلف عنك عن نفسك عن ماضى قريب منك.
المكان والكرسي والزمان والبيئة بيغيروا فينا اه وجداااااا
بس السؤال مش هنا..
هل انت فعلا فعلا فعلا
شايف ربنا؟ بجد شايفه؟
شايفه فى اعجازه وعطائه؟
ولا بس فاكره فى المنع لما يحصل لك؟
متدبره وواعى لامره وحكمته, لما اعطاك اعطاك اعطاااااااااااااااك
وفجأة أخذ منك ... ليه؟
عشان يعلمك يفهمك يلفت انتباهك او يرقيك فى العطاء او المكانه عنده.
بس أخذ منك؟ واخد بالك من حكمة المانع اللى قبلها؟ انه سبحانه كان لك معطى؟
لو واخد بالك كويس
يبقى انت مؤمن فعلا ان الدوام لله
والبقاء لله
وان الكل فى رساله والفالح اوى هو اللى:-
*-باصص فى ورقته كويس,مالوش دعوه مين اترقى مين اتجوز مين خلف
مين جاب عربيه مين اشتري شقه مين سافر مين رجع, مالوش دعوه
*- باصص فى نفسه وبيلف ويدور حوالين المعطى.. امتى وليه وازاى اعطى
وايه رسالتى لما اعطي والمطلوب منى وقت ما اعطانى؟ اساعد؟ اتصدق؟ امنح؟ اهب غيري؟ افرج عن غيري كربه؟ اسامح فى دين مادى او معنوي؟ شوف ورقتك فيها ايه.
*- باصص فى ورقته مع اسم الله المانع سواء له او حتى فى تدبر خلقه من البشر وحتى الحيوانات فيها حكم مش حكمه لما واحد يبخل فايبعت للحيوان اكل مع غيره واللى منع خسران واللى اعطي كسبان.
*- متخيل تلاقى صفوف حيوانات جايه تشهد لك ومعاك انك حققت اسم لله فى الارض ووفيت الامانه باسم الله المعطى؟ مع اهلك اخواتك جيرانك اصحابك ومع الاغراب عنك؟ حققت جزء, جزء من اللى اخدته.
*- عملت اللى عليك فعلا؟ فى كل موقف فى خطوبه كنت امين, فى زواج كنت امين, فى انجاب كنت امين ... تحملت مسؤولية الامانه فعلا؟ فعلا فعلا؟ متأكد؟
*- وراك مكتب زي الصورة كدا, اديته حقه؟ اشتغلت وانت شايف الله ولا على قد فلوسهم؟ كنت امين فى كل ذرة فى شغلك, ذرة يعنى قلم الشغل ما تكتبش بيه رقم تليفون صاحبك لان دا امانه للشغل فقط ولو عملت كدا يبقى الصدقة اللى هتخرجها عن نفسك هاتنظف منك ولك.
*- الامانه اللى لم تتحملها الجبال ولا السموات ولا الارض.. دول رفضوا لما جالهم اختيار حمل الامانه... وانت قبلتها تخيل
قبلتها وقبلت تتحملها .. يبقى انت فى اختبار فى الدنيا توفى مش اللى عليك بس تؤ تؤ -- دا كمان من اللى عليك, توفى من الدين اللى عليك ولا لحقت تنسي المعطي؟
لو حصلت معاك وزرت المقابر مثلا لشخص كنت تعرفه صاحب مكان ورحل, او كان ليك شرف حضور غسل متوفى وانا قاصد اقول شرف عارف ليه؟ لان دا اكتر مكان مليان ملائكة رحمة وتخيل انت وسط زحمتهم بتشارك ازاى, شوف بقى عاوزهم يشهدوا انك حضرت ليه؟ وعشان تعمل او تقول ايه؟
اخر كلمة..
طول ما عينك بتقع على كلام يفكرك بربك, او حد يقابلك يفكرك بربك, او تشوف حدث فى حكمه تفكرك بربك... يبقى انت فى فيض من نعم الله عليك من حبه لك وبيفكرك انك تكمل او تزيد او تراجع نفسك.
راجع نفسك بجد, راجع قبل فوات الاوان..
دمتم بخير ورعاية الله وحفظه
رزقنا الله واياكم فقه الحكمه وحسن الخاتمه
اللهم امين
