08/11/2025
وسائل منع الحمل كتير
هنتكلم عنهم بسرعة وباختصار
ولو في اي سؤال
اكتبيه في التعليقات وهنرد عليك
اللولب بأنواعه المختلفة
ميزته باختصار أنه ما بيلعبش في الهرمونات
يعني لا نخاف من تخن ولا ضغط ولا جلطات ... الخ
عيبه أنه ممكن يزود الدورة الشهرية أو يزود الدم بين الدورة والتانية والعيب ده بنتغلب عليه باللولب الهرموني
الحقن الشهرية
حقن عضل كل شهر
ميزتها انك لو بتنسي الحبوب بتاخدي الحقنة كل شهر وتنسيها
عيبها أنها هرمونات
حقن الثلاث شهور
ميزتها انك هتاخديها مرة كل تلات شهور وتريحي دماغك
ما بتأثرش عاللبن لو بترضعي
عيبها ممكن تنشف جدار الرحم و تمنع الدورة و تأخر الحمل لما تبطليها
الحبوب أحادية الهرمون ( حبوب الرضاعة )
ميزتها أنها ما بتأثرش عاللبن يعني مناسبة للي بترضع وخصوصا اول ٦ شهور بعد الولادة اللي الطفل المفروض ما بياخدش فيهم غير الرضاعة
عيبها أنها ضعيفة شوية بس مع الرضاعة بيقووا بعض
وممكن تنزل عليك نقط دم
الحبوب ثنائية الهرمون ( الحبوب العادية )
ميزتها أنها فاعليتها كبيرة لو انتظمتي عليها وبتظبطلك الدورة ( وإن كانت عالمدى البعيد ممكن تمنعها برضو)
الأجيال الجديدة منها ما بتأثرش عالوزن
عيبها لو نسيتيها في يوم ولا اتنين ممكن تحملي
وممكن تزود وزنك
( آثارها الجانبية كتير زي الضغط ولا قدر الله الجلطات وفي دراسات بتربط بينها وبين زيادة نسبة الإصابة بالأورام وخاصة اورام الثدي )
طبعا كل الآثار دي مرتبطة بالهرمونات عموما
الكبسولة اللي بتتحط تحت الجلد في الذراع
ميزتها أنها بتقعد ٣ سنين ما بتفكريش فيهم اخدت الحقنة ولا ما اخدتهاش نسيت الحباية ولا لا
فعاليتها كبيرة جدا
عيبها ممكن تسبب نزول دم في بعض الأحيان غير أنها هرمونات برضو
الواقي الذكري
ميزته مالوش علاقة بالهرمونات خالص
عيبه الفعالية مش كبيرة خصوصا لو انقطع
