06/08/2023
بنشوف السؤال بتاع ( بنزل الجيم وملتزمة على الدايت بس مش بنزل في الوزن ) تقريبًا يومياً خمس مرات على جروبات الرياضة وخصوصًا من البنات بسبب عدم علمهم بتفاصيل الچيم والرياضة..
ببساطة كدة وبالمختصر المفيد
( الجيم مش هينزل وزنك على الميزان بل ممكن يزوده أصلًا لكن الجيم مع نظام دايت مظبوط هينزل دهونك وهيزودك عضلات وهيحسن من صحتك )
وهو المطلوب أصلًا من كل الهيصة دي كلها!
تاني بكل ببساطة لما بتيجي تقف على الميزان العادي فأنت مجرد بتشوف رقم عبارة عن تجميعة لكل محتويات جسمك الداخلية علي الشاشة، وبعد فترة من الإلتزام بتبدأ تجميعة المكونات الداخلية نسبة كل شيء منهم يتغير نحو الأفضل ( عضلات تزيد دهون تقل مياه تقل كثافة عظم تزيد ) وهو المطلوب إثباته!
عشان كدة ممكن تشوف شخصين نفس الوزن على الميزان لكن واحد جسمه رياضي ومظبوط ومتناسق والتاني جسمه مش حلو ومترهل وغيره!
عشان كل واحد نسبة مكوناته الداخلية مختلفة تمامًا عن التاني..
ودايمًا احنا هدفنا الرئيسي في العيادات أو في الجيم بيكون خسارة دهون مش خسارة وزن!
د/ عمر الشلبي.
دكتور العلاج الطبيعي والتغذية جامعة القاهرة.
