17/04/2025
حدث بالفعل
ايام العيد بمركز السموم هي من اصعب الايام واكثرهم كثافه سواء من ناحيه ازدياد توافد المرضي اوخطوره حالات التسمم التي نستقبلها
وفى اول يوم عمل بعد اجازه شم النسيم ..إذ برجل يدخل استقبال مركز السموم منهار يحمل ابنه الصغير بين يديه ساكنا لا يتحرك تماما ، بالفحص السريع اتضح انه يعاني من توقف في عضله القلب..تم استدعاء فريق الانعاش الطبي أو ما يعرف بالcode blue و بدأ الانعاش القلبي الرئوي للمريض في ظل بكاء الاب فى مشهد مأساوي وهو بيقول ''ده مكنش فيه حاجه وكنا متجمعين في شم النسيم من يومين بناكل فسيخ وكان زي الفل '' بعد ٧ دقائق من الانعاش الرئوي رجع قلب المريض للحياه لكنه كان في شلل تام كأن عضلات جسمه كلها توقفت عن العمل... جسمه كله اشبه بالحجر.
دخل المريض الرعايه المركزه علي الفور علي جهاز تنفس صناعي وبينما كنا منهمكين مع حاله الطفل واذ بممرضه الاستقبال تظهر بالرعايه بالمركز قائله: سياره الاسعاف جت بباقي افراد عائله الولد الصغير.
وبالفعل قمنا الى الاستقبال لفحص باقى افراد العائله والذي كانوا افضل حظا من الطفل
كلهم يعانوا من اعراض الجهاز العصبي بدرجات متفاوته
فالام تعاني من ازدواج رؤية وصعوبه بالبلع و ارتخاء عضلات الجفون بينما كانت الاخت الكبري تعاني من تغير فى الصوت و الاب كان يعاني من جفاف بالحلق متجاهلا هذا العرض.
عائله وتشاركوا وجبه فسيخ بشم النسيم ثم ظهرت الاعراض بعدها بيوم..هذابالتاكيد تسمم الbotulism لا شك
قمنا بعمل الاسعافات الاوليه اللازمه لباقي العائله واعطاء المصل المضاد حسب الدواعى الطبيه لكل منهم..
وتعافت العائله بالتدريج الا ان الطفل قضي عده اشهر في الرعايه طريح الفراش فاقد الحركه وكل يوم خلال هذه الاشهر نفس السوال
هو هيبقى كويس يا دكتور؟
كل دا حصل ليه؟!
نتيجه مرض خطير جدا و ممكن يكون مميت ال Botulism
الBotulism بيحصل بعد الإصابة بالسم اللي ينتجه بكتيريا إسمها Clostridium Botulinum و اللي بتنشط في ظروف لاهوائية وبتنتج السم في ظل غياب الأكسجين.
خلينا ندخل في الموضوع على طول ...
الأسماك المملحة و المعلبة وخصوصا الفسيخ اللي بيتخزن في براميل مقفولة واللحوم سيئه التخزين او المعلبه غير المعقمه ممكن يحفز إنتاج البكتيريا للسم في حالة التخزين الخاطئ و ده بالتالي هيصيب اللي هياكله ب الbotulism .
طيب إيه الأعراض؟! ....
في خلال من 8 - 48 ساعة بعد الأكل واحيانا تصل ل 8ايام وهتبدأ بعض الأعراض تظهر زي القئ, ثم, صعوبة في البلع, زغللة في العين و إرتخاء في جفن العين و جفاف في الحلق ... اعراض من الممكن ان يتجاهلها الكثير منا
طيب ليه المرض ده خطير؟! ..
زي ما إحنا شايفين المرض ده بيعمل شلل في العضلات مثل عضلات العيون والوجه و بيوصل لإنه بيعمل شلل في عضلات الجهاز التنفسي و اللي بيؤدي لفشل تنفسي و اللي نتيجته الوفاة لو متلحقش.
لو إتلحقت الحالة عن طريق المصل و ما الي ذلك من التدخلات الطبيه حسب الحاله مثل جهاز التنفس الصناعي ممكن المريض يظل لشهور بالرعاية أو يتعمله عملية شق حنجري ده غير التأهيل اللي بيحتاجه المريض لمدة طويلة كلها تكاليف عالية عشان يرجع لحياته الطبيعية تاني .... كل ده من أكلة فسيخ!
أنا مش جاي أقولك متاكلش فسيخ أو كُل ... دي حاجة ترجعلك.
لو هتقولي ده هي مرة في السنة و إحتفال وناس كتير بتاكل ومبيحصلش حاجة, هقولك إن الموضوع مش محتاج أكتر من مرة واحدة
مره واحده فقط ..القرار قرارك والمخاطره بايدك
مره واحده وربما اخيره
عند الشعور باي اعراض من التي ذكرناها عقب تناول الفسيخ يجب التوجه مباشره الي اقرب مركز سموم.
