13/05/2025
Fibromyalgia
فايبروميالچيا
احنا اللي صرفنا دم قلوبنا وسنين عمرنا وتعب أعصابنا مع الدكاتره ومعامل التحاليل ومراكز الأشعة عشان نوصل بس لتشخيص صحيح ونفهم نتعامل معاه ازاي
احنا اللي بنعاني 24 ساعة نايمين وصاحيين
من آلام رهيبة في الظهر والكتف والرقبة
والمفاصل والعضلات والأوتار
وعظام الحوض ومفصل الفك
ومعصم اليد و الأصابع
وحساسية الضوء و الصوت
و حساسية الأنف و الجلد والشعور بالوخز والحرقة
وعدم احتمال السخونة أو البرودة
وغمامة بالعين
ومتلازمة القولون العصبي
والتهابات اللثة المتكررة و حرق اللسان
والأرق واضطراب النوم
والصداع المزمن وألم جلد الرأس
وقلة الإدراك والتركيز وضبابية المخ
و نوبات الاكتئاب..
وكل دا وأكتر بسبب ان مستقبلات الألم في المخ تشعر بأبسط درجات الإحساس وتفسره على أنه آلام عنيفة جدااا
محارب الفايبرو ما بيزيدش ألمه هم وغم إلا لعدم تحمل الأشخاص المحيطين به لمعاناته أو عدم تفهمهم
أو اللي بيعتبروه موهوم ولا بيتدلع عشان نتايج فحوصاته اللي بتظهر بيكون أغلبها سليمة تماما
محارب الفايبرو اللي اغلب اللي حواليه مش فاهمين او مش عارفين يتعايشوا مع إصراره على النجاح وهو بيتألم وبيعاني!
صدقني.. محارب الفايبرو يتمنى يعيش يوم بلا ألم
وينجح في عمله ويرتقي بنفسه
ويتفسح ويلعب مع ولاده
ويفرح بتجمع الأهل أو الأصدقاء
لكن والله والله.. أغلب الوقت بيكون مش قاااادر
عيش معاه على قد قدراته هو مش قدراتك انت..
عيش إحساسه اللي قادر بس يظهره وتأكد إنه جواه أكتر
احترم صعوبة تواصله مع المجتمع
ارحم أعصابه.. هو بيجاهد ويحارب وبيعمل كل اللي بوسعه رغم الحرب المشتعلة جوا جسمه وراسه طول حياته
كل عام ومحاربي الفايبرو بخير
كل عام وأبطال التحمل والصبر بخير
كل عام وأصحاب المعارك ما بين الخسارة والفوز بخير
-منقول بتصرف..
