27/04/2025
انا عايزة اقول علي تجربتي مع المرض لعلها تفيد حد أو تبقي عبرة وعظة لحد
انا عندي ٣٩ سنة
مريضة روماتويد من ٢٤ سنة
مريضة انزلاق غضروفي متعدد من ١٦ سنة
خلال السنين دي انا بعاني من آلام مبرحة كنت متعايشة معاها بشكل أو بآخر وده كان غلط لان الدماغ لما تحملها فوق طاقتها في تحمل الالم بيبدأ خلاياه تضعف ودي معلومه معرفتهاش غير متأخر
في اخر خمس سنين الدنيا فرطت مني زي حبات السبحة اللي بدوب بقي في مشاكل عمالة تظهر و محدش عارف ايه السبب وصلت أن رجلي الشمال قعدت فترة مش بمشي بيها ضعفت
وكل تركيزي كان في الفقرات القطنية و الروماتويد
كل ما اروح تخصص الاقي خزوق ويبقي محتمل يبقي السبب
وكل ده وانا متناسية تمام اني عندي غضاريف عنقية من ١٦ سنة بردوا وكنت بنسي اقول عليه لاي دكتور ومش عارفه ده عمي بصيرة ولا غباء
المهم فضلت ١٦ سنة لا بعمل علاج طبيعي ولا اي رنين ولا اي حل للمشكلة اللي في العمود الفقري فوق وتركيزي كله علي المشكلة اللي تحت
لحد ما طفحت في وشي مرة وحدة وبدون مقدمات لازم عملية لأن الفقرات العنقية كلها فيها انزلاقات غضروفية
وأعراض من لخبطة في الكلام
لنسيان لنوم مستمر لحد ماوصلت في عدم التحكم في دراعي الشمال
عملت العملية شلت تلت غضاريف وسبت تلات منهم واحد ضاغط على الحبل الشوكي
ملخص الحدوتة عشان هي طويلة اوي وبايخة
متركزش علي حاجة واحدة ممكن الخزوق يجيلك من اللي انت مطمن منه ومتتوقعوش
متخلوش فكركم كله ينصب علي حاجة واحدة حاول ديما توسع دايرة رؤيتك للأمور وصدقني مش حتخسر حاجة لما تفكر بشكل أوسع ...بس حتخسر كتير لو حصل اللي مبصتش عليه
وبجد دي نصيحه غاليه اوي ياريت تستفيدوا منها
