https://www.youtube.com/channel/UCysoSjMrI0QgHtZKFZ0tlAA

د. مروان طلبة - Dr. Marwan A Tolba, Cairo (2026)

29/12/2025

لفتة لطيفة و هدية اعياد جميلة و لطيفة 🎁 من الفريق المساعد. و خلاص سموني نمبر وان في علاج سرطان البروستات😂🤣
شكرا ❤️

18/12/2025

📍هل تعلم بان السرعة اللي سؤالك بيروح فيها لشات جي بي تي ChatGPT و يعدي علي مئات النقاط و المستقبلات و الدول و الأسلاك و المحطات و بعدين الذكاء الاصطناعي يدور علي اجابة سؤالك في قاعدة بيانات عملاقة اكبر من تصورك و يجاوبك و يوصلك اجابة السؤال علي تلفونك هي سرعة خاطفة و هي تقدر بحوالي ٢٠٠ الف كم في الثانية يعني حوالي ثلثي سرعة الضوء! ⚡️

انت متخيل العلم وصل فين؟!!🤯 انت متخيل المخ البشري عمل ايه؟🤯

14/12/2025

لماذا سمي عرقوب القدم بوتر أكيليس و ماهي قصته؟

فيلم طروادة Troy ل براد بيت فيلم رائع وجميل

وهو مأخوذ عن القصة الشهيرة لدخول اليونانيون لطروادة وهي القصة التي وصفتها قصيدة الالياذة لهوميروس الشاعر الاغريقي الشهير مع بعض التغييرات الدرامية

تذكر الالياذة معركة اكيليس او أخيليس وهكتور حيث اشتاط اكيليس غضبا عندما علم ان هكتور قتل صديق عمره المقرب باتروكلس (في الفيلم قالوا انه ابن عمه)

وقد قتل باتروكلس لان هكتور ظن انه اكيليس بعدما ارتدى درع وخوذة اكيليس لاخافة الطرواديين

لكن بعد قتله اكتشف هكتور ان من قتله ليس اكيليس فاخذ لباس الحرب الخاص باكيليس وارتداه وهو لباس قيل في الاسطورة انه مبارك من الالهة

لذلك عاد اكيليس الى الحرب وقرر قتل هكتور امام ابيه وزوجته وجموع طروادة عندما تحداه للقتال

☝️الفرق بين الفيلم والاسطورة

ان الفيلم كان اكثر عاطفية وصور اكيليس بصورة اسطورية واخلاقية اكثر

في الفيلم كان التحدي والنزال مباشرين ومتفقا عليهما وخسر هكتور في مواجهة متكافئة

اما في الالياذة الاصلية فيذكر هوميروس ان هكتور عندما راى اكيليس امامه خاف وارتعب فهرب من مواجهته ودار ثلاث لفات كاملة حول اسوار طروادة واكيليس يطارده

لكن هكتور شعر بالخزي امام الجموع فجاءته الالهة الاغريقية اثينا وشجعته على المواجهة

في تلك اللحظة فكر الاله زيوس في انقاذ هكتور لكن اثينا ذكرته بان القدر محتوم ولا يمكن تغييره فامتنع عن التدخل

ثم ذهبت اثينا الى هكتور متنكرة في صورة اخيه ديفوبوس واوهمته انها ستقف بجانبه في القتال
فينخدع هكتور ويقرر مواجهة اكيليس

📍قال هكتور لاكيليس في بداية القتال

تعالي نعمل اتفاق ان من ينتصر يسلم جسد القتيل لاهله ليدفن ويكرم كما يليق به

فيرد اكيليس وهذه الجملة ذكرها الفيلم كما هي

"لا يمكن ان توجد اتفاقات بين الاسود والبشر"

يبدأ هكتور الهجوم ويرمي رمحه على اكيليس لكن اكيليس يصده بسهولة
يلتفت هكتور لياخذ رمحا اخر من اخيه فيجده قد اختفى

هنا يدرك هكتور انه اتخدع
و ان الالهة تخلت عنه
وان قدره محتوم

فينقض عليه اكيليس ويطعنه في موضع ضعف الدرع الحربي وهو الدرع نفسه الذي كان يخص اكيليس ويعرف نقاط ضعفه
وهو الفراغ بين الخوذة والدرع عند الحلق في الرقبة

يموت هكتور لكن قبل موته يقول لاكيليس نبوءته
سيقتلك باريس وبمساعدة الاله ابوللو عند بوابات طروادة

يربط اكيليس جسد هكتور من قدميه في عربته الحربية
ويجره ممرغا في التراب حول طروادة
ليشاهده ابوه وزوجته والجموع
ثم ياخذه معه

و بيروح أبوه و يرجع جسده بعد ما يبوس ايد اكيليس و بعد ذلك يدخل اليونانيون طروادة بخدعتهم الشهيرة حصان طروادة

يقتل اكيليس بسهم اطلقه باريس اخو هكتور الاخر وقد وجه الاله ابوللو السهم ليصيب كعب قدمه
فيموت اكيليس متاثرا بجراحه

و السؤال ليه مات اكيليس من الجرح ده و ليه أبوللو وجه السهم للعرقوب؟!

لان الاساطير تقول (وليست مذكورة عند هوميروس)
فان امه ثيتيس الهة البحر غمسته وهو رضيع في نهر الخلود المقدس ستيكس
لكنها كانت تمسكه من العرقوب الكعب
فكان هذا الموضع الوحيد الذي لم يمسه الماء
واصبح نقطة ضعفه ومكان موته

08/12/2025

يقول كارل يونغ المفكر وعالم النفس السويسري و مؤسس علم التحليل النفسي:

The first half of life is devoted to forming a healthy ego; the second half is going inward and letting go of it.
Life really does begin at forty. Up until then, you are just doing research

و ترجمة و شرح هذا الكلام كالآتي

حياتنا زي اليوم الواحد له صبح و بعد ظهر او عصر ثم ليل

و يقول المفكر السويسري ان الحياة الحقيقية تبدأ بعد سن الأربعين… و كل ما قبل ذلك هو مجرد مجرد تجارب و ابحاث للبحث عن ذاتك الحقيقية و معرفة نفسك الداخلية و التخللي

علي مدار سنوات عديدة حاولت اسلك طريقا صعباً و غير ممهد، انحت في الصخر ممر و مسار شبه مستحيل

و لكن بعد كل هذه السنوات و الجهد بالفعل ادركت ان الحياة اعمق بكتير من كونها حلم و هدف بتحققه و خلاص

النصف الأول من عمرنا بيكون لصناعة الأنا، الذات، تكوين الشخصية و صقلها عن طريق تجارب تنجح في بعضها و تفشل في كثير منها

نصف حياتك هتلاقيك بتقضيه في البحث عن الاستحقاق و بتدور علي حد يقولك انك ناجح او عاوز تلاقي اللي يغذي الإيجو ego اللي انت قعدت تبنيه في النصف الاول

دايما بندور علي ناس تدعمنا و تسقف لنا و تشجعنا و بندور علي الاستحقاق في عيونهم و اثبات لهم اننا كويسين و ناجحين و نستحق الفخر

و لكن بعد مابتحقق اهدافك و نجاحاتك من وجهة نظرك اللي قصيت نصف عمرك فيها بتلاقيك في النصف الثاني من العمر و هو الخياة الحقيقية للتعمق في داخل الذات و معرفة نفسك و التخلي!

بنبدأ في هذا النصف اننا بنحاول نتخلص تدريجيا من الاثقال اللي متحملة علي اكتافنا طول السنوات الماضية بسبب هذا الجهد المبذول للبحث عن النحاح المادي المزعوم و الوصول للاستحقاقية و تحقيق الذات او الإيجو

بنلاقينا تدريجيا بنميل للروحانية اكتر و بنترك عبء المقارنات، نشوة الأنا، خوف النقص النسبي…

و نرجع إلى سكينة الداخل، هدوء الرضا و الزهد حيث لا يحتاج المرء سوى أن يكون صادقًا مع نفسه و قدام نفسه

الحياة الحقيقية هي أن ترى نفسك في عيون قلبك، لا في عيون الناس و أن تفهم أن الطريق الطويل اللي مشيته كان مجرد الرصيد و الشحن اللي هيكمل معاك الشوية اللي فاضلين

و تدرك أن كل جرحٍ كان درس و كان تحرر من قيد مؤلم و ثقيل

وتتعلم ان كل لقاءٍ كان بابًا للنور و المعرفة حتي لو كنت شفته غير كده ساعتها

و في النهاية تكتشف ان الحياة ليست كلها عن الكمال
او المقارنات السخيفة بل الحياة في عمقها تتمحور حول ثلاث محاور رئيسية

١-السعادة والاسعاد
٢-تطوير ذاتك لتصبح افضل نسخة لك انت
٣-الإعمار

اسعاد نفسك و الاخرين في حدود المتاح والممكن
و انك محتاج تكون افضل من الماضي بتاعك

و انك تعرف تلاقي بوصلتك بالذات بعد اي صدمة نفسية او عاطفية او اي صدمة انسانية لاننا بعد الصدمات ممكن نفقد التوازن النفسي و تفقد الثقة بالنفس و لو عندنا البوصلة مش هنتوه

و تعمل حاجة نبيلة او هدف نبيل لإعمار الكون و ده مش معناه انك تفوز بنوبل مثلا لا ده معناه انك تعمل و لو شئ بسيط زي انك تزرع فسيلة 🌴

02/12/2025

الصورة دي من ٢٠١١ يعني من ١٥ سنة ..و اخذتها و أنا فرحان لحضوري اول مؤتمر علاج ألأورام احضره في حياتي و فاكرها كأنها النهاردة

30/11/2025

مع اقتراب نهاية العام،

نكتشف دائمًا إن أهم الرحلات ممكن متكونش اللي قطعنا فيها مسافة كبيرة لكن اللي غيّرَتنا من جوّه❤️

كل خطوة تعب… كل لحظة شك… كل محاولة نجحت أو ما نجحتش كلها كانت بتبني فينا حاجة و بتشكل علامة

وساعات ما بنشوفش التغيير غير لما نوقف كده للحظة ونبص ورا و نشوف النقط اتوصلت بيعض و ساعتها بنفهم إننا اتغيّرنا أكتر مما كنا فاكرين

☝️آخر أيام السنة مش للحساب القاسي او جلد الذات… ولا للمقارنة…

آخر الأيام دي فرصة نرفع فيها راسنا ونقول لنفسنا:
أننا كملنا… رغم كل حاجة و و ندعي ان ربنا يقدرنا اننا نسعد ناس اكتر لان ده شئ بيؤدي لاسعادنا احنا كمان حاي بدون مانحس و ندعي ربنا باخلاص انه يعوضنا خير و ان جروحنا تلتأم❤️‍🩹
و ان ربنا يكتب لنا الخير حيثما كان... و نتذكر ان كل انسان له قدر ربنا مقدره له و ان لا هي شطارة و لا اجتهاد قدر ماهي توفيق من الله و نقول: "إن الفضل بيد الله يؤتيه من يشاء والله ذو الفضل العظيم"

أميال من الحب و التمنيات الطيبة💌💐

28/11/2025

العلاج بالبروتون يترنح بشدة!!!

لما الضربات تيجي ورا بعضها تباعا

من شهرين، في اكبر مؤتمر للأورام في العالم، الإنجليز قدموا نتايج دراستهم الشهيرة TORPEDO و اللي أذهلت المجتمع العلمي و صدمت الجميع بان العلاج بالبروتون مقدرش يحقق نتايج افضل من الفوتون في علاج أورام الرأس و الرقبة بالبلعوم الفمي

الصدمة لان الدراسة جاءت عكس الدراسة الأمريكية الشهيرة اللي طلعت من مركز أورام اسمه قد السما في امريكا و الدراسة الإنجليزية الأخيرة جاءت من النظام الصحي البريطاني الوطني المجاني و اللي لا يتاثر بنفس الشكل زي النظام الأمريكي بموضوع التامين و الفواتير و البيزنس و التسويق و كده

و كمان الدراسة دي تمت برعاية و تمويل منظمة او معهد ابحاث السرطان البريطاني و اللي لسه واخد جائزة الملكة إليزابيث المرموقة للأبحاث العلمية الاسبوع ده و لهم حق لانه دول بيعملوا علم و بحث علمي يوفر عليهم ملايين و مليارات الدولارات كل سنة كانوا ممكن يدفعوها بدون داعي و يصرفوها علي علاج مبيعملش اللي بيتم التسويق له و ده لو مشيوا ورا كلام الأمريكان عمياني و ارفع لهم القبعة الحقيقة —شابوه 🎩

و الحقيقة كانت خناقة في المؤتمر لان الإنجليز من الاخر شلوحو الآمريكان اللي عملوا الدراسة الأمريكية و مخلوهمش عارفين يبرّروا وشكلهم مكنش لطيف لان من الاخر كان فيه تلميحات علي موضوع التأمين و التسويق و القصص دي و خاصة ان تقنية البروتون غالية جدا و عاوزين فلوسها تتلم و مينقالش علينا اننا خسرنا

و بالإضافة لده ففي نفس المؤتمر طلعت نتايج مشابهة في سرطان الثدي RADCOMP بتقول برضه ان البروتون مش افضل من العلاج بالاشعاع الفوتوني

و كمان السنة اللي فاتت دارسةPARTIQoL قالت نفس الكلام في البروستاتا و ده معناه ان سوق البروتون مش افضل استثمار دلوقت لانه بيخسر ارض يوم بعد يوم

و علشان تكمل الكارثة و لان المصايب لا تأتي فرادي
النهاردة يتم نشر دراسة جديدة في دورية JAMA للرأس و الرقبة تقًول ان كمان البروتون أتسبب في عرض جانبي شهير و خطير بيحصل بعد علاج الحالات دي و هو تآكل عظام الفك النيكروزي بعد الإشعاع osteoradionecrosis

و اعتقد دي بداية نهاية العلاج بالبروتون (في أورام الكبار) اللي بقت واضحة قدام عيني و خاصة مع التقدم الخارق لتقنيات الفوتون و اعتقد ان ده اللي واحدة من اكبر شركات العالم متخصصة في تصنيع تقنيات العلاج بالاشعاع تنسحب من مجال البروتون منذ سنوات (لأنهم كانوا شايفين يمكن اللي هيحصل؟! او عاوزين يركزوا في حتة واحدة؟! مش عارف الحقيقة بس النقاط لما اتوصلت تقول كده)

23/11/2025

ماهي المدة الصحيحة للعلاج الهرموني لمريض سرطان البروستاتا اللي هيتعالج بالاشعاع؟!

الإجابة: مش معروف! يعني ايه يادكتور ؟ يعني زي ماحضرتك سمعت.. احنا مش عارفين تحديدا و كل خبراء العالم و كلنا بنعرف كل يوم معلومة جديدة من العلم.

استشارتي مع المريض هنا في كندا مدتها ساعة، و لما يدخل لي مريض و يسألني عن العلاج الاشعاعي و العلاج الهرموني بنتكلم كتير. و ساعات إجابتي علي بعض الاسئلة بتكون مش معروف بدقة ايه الإجابة بالظبط و المريض بيصدقني و بشرح له نتايج الدراسات و كتير جدا بقدم له ورقات علمية مطبوعة سواء أنا اللي نشرتها او منشورة في دوريات عالمية. و الشعب الكندي بيحب القراءة جدا و الاطلاع و بالذات الورق بيحب الكتب و الورق اكتر من الإلكترونيات و الإنترنت

زمان ، زمان اوي كان الاطباء لما بيعالجوا المريض بالاشعاع بيعملوا استئصال للخصيتين لمنع التيستوستيرون و ادخال المريض الي مايسمي بالحرمان من الاندروچين (او الاخصاء) علشان سرطان البروستاتا ليتغذى علي هرمونات الذكورة و بالتالي يسهل العلاج بالاشعاع بقتل خلايا السرطان داخل البروستاتا بالاشعاع و بعدين بتطور العلم و تحسن الظروف الاقتصادية بقوا بيوصفوله علاج هرموني متصل الي نهاية العمر و بدأ العلماء و الاطباء يدركوا من متابعة المرضي بعد عمليات استئصال الخصية او بعد وضع المريض علي العلاج الهرموني ان فيه أعراض جانبية هامة و متنوعة زي الهبات الساخنة و ضعف الانتصاب و القدرة الجنسية و لين العظام و الأزمات القلبية و غيرها

و بدأنا دراسات كتير و عرفنا ان الفترة المفروض تكون ٣٦ شهر و بعدين طلعت دراسة كيبيك الكندية الشهيرة و اللي وضعت الاسترشادات الحالية ان ١٨ شهر كافي و موازي ل ٣٦ شكر و ملوش لازمة نكمل ل ٣٦ شهر

و بعدين انقسم أطباء علاج سرطان البروستاتا في العالم جزء بيكتب ٣٦ و حزء٢٤ و جزء ١٨ شهر مع العلاج بالاشعاع

و فضلنا سنوات كده و بعدين بدأنا مرحلة ال اهتمام بالقلب و الأوعية الدموية مع السرطان في علم جديد نسبيا اسمه Cardio-Oncology و بدأ الباحثين ينشروا مشاكل العلاج الهرموني علي القلب و أنا كنت من الناس اللي نشرنا اكثر من دراسة و وورقة علمية في دوريات شهيرة عن الموضوع ده

و من كم ساعه طلعت الورقة العلمية دي و انتشرت في JAMA ONCOLOGY و بتحاول تجيب عن السؤال الشهير ماهي المدة المظبوطة للعلاج الهرموني مع الأعلاج بالاشعاع لمريض سرطان البروستاتا اللي هيتعالج بالاشعاع؟ و كانت اول جملة في الورقة اللي بتحاول تجاوب السؤال انها حتي قبل كتابة هذا البحث (الآن) غير معروفة بدقة

و كانت نتايج الورقة مهمة و مثيرة للاهتمام و لكن ماشية مع اللي قلناه كتير قبل كده في أبحاثنا عن مشاكل الأمراض القلبية و أمراض الأوعية مع العلاج الهرموني و بتاكده و بدرجة علمية رصينة
📍ان الفترة المثلي هي من ٩-١٢ شهر في الإحالات المحدودة الانتشار و الخطورة و غير محددة في الحالات عالية الخطورة جدا very high risk

و ده لان بعد ال ١٢ شهر بتزيد خطورة أمراض القلب و الاصابة بالأزمات القلبية و خطورة الوفاة من اسباب غير السرطان او مانسميه باحثين و متخصصين Other cause mortality و اللي ممكن للأسف تكون بتتنافس مع العلاج و السرطان انها تقصر عمر المريض لو تطورت و ممكن تودي الي قصر معدلات الحياة

و بالتالي فيه نقطة sweet spot او منطقة نموذجية و هي ١٢ شهر علاج هرموني لو زودت عنها ف انت المريض بتاعك ممكن يتعرض لخطر و لو قللت عنها علاج السرطان بيكون مهدد و لذلك دي النقطة اللي بنسميها ال نقطة الحلوة او ظبطة الميزان ع الشعرة ..أنا حاولت ابسط نتايج البحث بالرسمة البسيطة دي بس انصح المتخصصين بقراءة الورقة البحثية نفسها

📍هتلاقي في فايدة لحد ١٢ شهر و بعدها بلاتوه او مفيش فايدة كبيرة و بعد ١٢ شهر بيتنافس اسباب الوفاة الاخري او المشاكل اللي ممكن تكون سبب في قصر عمر المريض ف نخللي بالنا كويس

17/11/2025

لو مشوفتش حاجة حلوة النهاردة، شوف الدقيقة دي❤️

📍دعم الأب مش بيأثر لحظة وخلاص… ده بيبني العمر كله

والإنسان يفضل طول حياته شايل اللحظات دي جواه محفورة في الذاكرة والوجدان.

و رغم ان اللي عشته مع أبي كان سنوات محدودة (وكنت اتمني انها تطول بس لحد ما يشوفني دخلت كلية الطب) بس لحد النهاردة، لسه بفتكر كل كلمة دعم قالها لي — رحمة الله عليه

اللهم اغفر لآبائنا وارحمهم كما ربّونا صغارًا، واجعل ما قدّموه لنا نورًا يجري بهم سرمداً في جنات النعيم 💌

22/10/2025

احتفل الرئيس الأمريكي السابق چو بايدن بانتهاء العلاج بالاشعاع لسرطان البروستاتا و رن الجرس احتفالاً بانتهاء العلاج بالاشعاع في مستشفي جامعة بنسلڤانيا

و رن الجرس هو تقليد معروف عند انتهاء علاج السرطان

19/10/2025

💥☝️النهاردة يوم كبير في مجال علاج سرطان البروستاتا، مش لأنه يوم إيجابي بالنتايج البراقة، لكن لأن نتايج الدراسات اللي اتقدمت النهاردة في مؤتمر الجمعية الأوروبية للأورام هتنقذ آلاف المرضى من “الهايب” والترندات اللي كان ممكن تأذيهم ماليًا وتستنزفهم ماديًا، ومن غير فايدة طبية حقيقية.

اتقدمت النهاردة نتايج دراسة ENZARAD اللي كان عشرات الخبراء منتظرينها في ال Intact setting high risk، وكمان دراسة PRESTO في ال Salvage setting، ونتايج الدراستين كانت محبطة للعديد وصادمة للكثيرين، خصوصًا اللي كانوا بيجروا يهللوا بشكل أعمى للأدوية الغالية ويتبعوا الترند اللي بتحاول الشركات تسوقه. واللي حصل ده بيأكد لنا شوية حقايق مهمة جدًا:

🟩 ان استخدام ادوية ال ARPIs في غير محلها او في كل مراحل و كل مرضي سرطان البروستاتا هو اختيار فاشل و مخادع و ان سرطان البروستاتا مش مرض واحد
هو طيف واسع بيضم مراحل وأنواع مختلفة وفيه الغاز كتير معقدة. وده بيوضح أهمية الاتجاه الجديد اللي رايحين له — الطب المفصل لكل مريض (Personalized Medicine). المرضى مش نسخ متكررة و لا اسطمبات ينفع نعالجهم بجايدلاينز عمياء تنطبق على الكل. الطب الحقيقي فيه حكمة، علم، وتفصيل دقيق مبني على أساس علمي متين، من غير “هبد” ولا عشوائية.

🟦 العلاج بالإشعاع هو العمود الذهبي للعلاج
في سرطان البروستاتا، العلاج الإشعاعي هو الركيزة الأساسية، العلاج الفعّال والنموذجي اللي بيعالج سرطان البروستاتا فعلًا و نقطة

و ان كل محاولات استبداله بأدوية غالية موجهة من غير دليل كافي مصيرها الفشل، وأي طبيب يتجاهل ده بيتحول لمجرد “مندوب مبيعات” مش طبيب استشاري اورام محترف حقيقي

☝️طيب 🟨 ليه EMBARK قالت فيه فايدة و PRESTO قالت لا

اسباب عديدة بنتكلم فيها بس السبب الاساسي بسيط: في دراسة EMBARK، المرضى ماخدوش العلاج اللي المفروض ياخدوه وهو الإشعاع (Standard of Care) فبان تاثير العلاج الهرموني المحدد ده في غياب العلاج بالاشعاع و هنا مهم نعرف ان دي دراسة مهمة للمرضي اللي مش هياخدوا اشعاع او في اسباب تمنع انهم يتلقوا علاج اشعاعي

لكن في PRESTO و كمان ENZARAD (مع اختلاف ال Settings تماما) :
المرضي لما أخدوا العلاج المظبوط و هو العلاج بالاشعاع كاستاندارد Standard of care ، الأدوية الغالية دي ما أضافتش فايدة تُذكر. وده يثبت إن الإشعاع هو حجر الزاوية الحقيقي في علاج سرطان البروستاتا، والأدوية دي ليها مكان محدد بس في مراحل معينة من المرض

‼️‼️‼️⚠️ أمنية أخيرة

نفسي الناس في بلادنا تفهم إن الأدوية اللي بتتباع بعشرات أو مئات الآلاف من الدولارات مش دايمًا هي الحل المناسب و مش في كل المراحل و كل المرضي

☝️ونفسي الأطباء يكونوا أمناء مع المرضى ويقولوا الحقيقة: العلاج بالإشعاع علاج فعّال، حقيقي، وستاندارد STANDARD في كل دول العالم ومش لازم نجري ورا “وهم التسويق” على حساب صحة الناس

د. مروان طلبة - Dr. Marwan A Tolba

29/12/2025

18/12/2025

14/12/2025

08/12/2025

02/12/2025

30/11/2025

28/11/2025

23/11/2025

17/11/2025

22/10/2025

19/10/2025

Address

Website

Alerts

Shortcuts

Share

Category