https://www.facebook.com/363845230314581/

لقد وقعنا في الطب, Cairo (2026)

16/02/2026

‏الجوهرة من السعوديه، قصتها اقوي من قصص الخيال العلمي…
‏حكايتي معاها بدأت من اسبوعين تقريبا، لقيت دكتور صديق اهلها بيقولي انه جاي يعرض عليا حالة طفله من السعوديه، طيب فين البنت قالي في تركيا و اهلها منتظرين نكلمهم بس شوف الأشعة.. قولتله انا جاهز كلمهم، قالولي طمنا قولتلهم اطمئنوا الحوا في طلب الاطمئنان قولتهم ان شاء الله ربنا ييسر و اعملها العمليه علي خير بس اشوف البنت، قالولي كام نسبة نجاح عمليتها قولتهم ربنا ييسر اكتر من ٩٥٪، شكلهم مش مصدقين او حاسس كدا بيقولوا عليا مجنون من الهمهمه اللي سامعها…طيب العمليه كام ساعة قولتلهم ربنا ييسر ساعتين الي ثلاثه، كانوا قلقانين جامد و الكلام كله غريب عليهم و انا مش فاهم ليه..
‏يومين و لقيتهم عندي في العيادة بالجوهرة، شوفتها و قولت نفس الكلام و هنا بقي بدأ تفسير ليه هم مش مصدقين اللي بقوله… مامتها قالتها انها طرقت كل الابواب و كل المستشفيات و قالولها البنت دي مفيش منها امل نهائي و قالولها باللفظ ودعيها.. امها انهارت و قالت هلف الدنيا علي امل … راحت تركيا وقعدت هناك شهرين و قالولها فيه عمليه و لكن هتستغرق ١٠ ساعات في العمليات و تطلع علي الرعايه المركزه و الخطورة عاليه جامد علشان وزن البنت ٢٥ كيلو فقط و الاعوجاج اللي عندها ثانوي ل خلل جيني مع تأثير علي الاعصاب و العضلات و بعدما قالولها كدا كانت بتجهز نفسها تروح المانيا و بعدين حد قالهم ابعتوا البنت مصر لدكتور هاني عبدالجواد… لما كلمتهم في التلفون حجزوا الطياره فورا و نزلوا من تركيا علي مصر علشان يشوفوا مين اللي بيقول ٩٥٪ و ساعتين عمليه و متفائل زيادة عن اللزوم دا…
‏مامتها بعد ما قالتلي القصه دي و هي بتبكي طبعاً، انا خفت جامد الحقيقه.. و فحصت البنت تاني و شوفت الاشعه تاني و قولتلها انا عند كلامي… ايوه خطيره لكن مش الخطورة اللي هي يعني و هعملها العمليه و ان شاء الله تبقي بخير … طلبتلها بعض الفحوصات.. مامتها تقولي يعني ممكن ترفض تاني العمليه بعد الفحوصات، قولتلها انا خلاص قبلت العمليه انا بس بأخد بالاسباب…
‏الجوهرة بقي فعلا جوهره، البنت بتتكلم كأنها مزيعه و عندها ذكاء رهيب ما شاء الله…
‏عملية الجوهرة كانت النهارده و كنت قلقان و عمال افكر فيها طول الليل و اقول يا رب استر و خايف البنت يحصلها حاجه يقولوا ما كل الدنيا قالت مش هينفع دخلتها ليه…
‏المهم رحت المستشفى الساعه ٦ صباحا اشوف الجوهرة و اتخضيت … لقيت معاها يجي ٢٠ فرد من اسرتها جايين من السعوديه مخصوص ل عملية الجوهره… و الجوهرة متشيكه و قاعدة تحكيلهم عن الحلم اللي بيتحقق النهارده و انا شوفتهم و مكنتش قادر اقف علي رجلي .. كل الناس دي جايه تفرح … يا رب استر
‏مش هطول عليكم علشان القصه طويله جامد لكن الحمد لله الجوهرة زي الفل و العمليه استغرقت ساعتين و الجوهرة نزلت غرفتها بدون رعاية مركزة و اتصلحت احسن من احلامي و مش هقدر بقي اوصف احساسي مع اللفيف الموجود من اقاربها علشان انا نفسي لسه مش مستوعب اللي حصل بفضل ربنا و كرمه علينا.
‏القصه بقالها ٣ سنوات تمام، لكن صحيت الصبح لقيتها في الذكريات.

د. هاني عبد الجواد

15/02/2026

من فترة كنت نباطشي بمر علي مريضه محجوزه في الرعاية بسبب غييوبة ناتجة عن انخفاض شديد في مستوي السكر في الدم وكان الأمر كالتالي:
ست عندها ٦٠سنه تقريبا عندها سكر من 20سنه بتاخد نوعين انسولين لانتوس واكترابيد صحيت الصبح اخدت الأنسولين وفطرت بعدها بشويه بدأت تحس بتقل في جسمها وضعف في الرؤية وعرق وللاسف مكانش في حد معاها في البيت في الوقت دا فدخلت في غيبوبة سكر قليل وفقدت الوعي تماماً إستمرت تقريبا ساعة لعند ما اهلها دخلو عليها لقوها مغمي عليها جابوها المستشفى السكر وقتها كان 40
ادوها جلوكوز لعند ما فاقت واتحجزت في الرعاية
طبعاً لما شوفتها قعدت اخدت تاريخ مرضي تاني طلع إن موضوع غيبوبة نقص السكر دي بتتكرر كتير وبقالها فتره طويله يجي خمس سنين واتحجزت اكتر من مره في الرعايه بسبب الغيبوبة دي واتحجزت في مستشفيات كبيره في افخم مستشفيات خاصه في القاهرة كل مره تتحجز يتقالها انخفاض مستوي السكر بسبب جرعات الانسولين وكل مره تظبط جرعات الأنسولين وتخرح البيت
المهم عشان مطولش عليكم
طبعا وقفنا الأنسولين وبدأنا نتابع مستوي السكر لكن لاحظت وجود نمط معين لانخفاض مستوي السكر في الدم كل يوم السكر ينخفض في فترة الصباح مابين الساعة ستة والساعه سبعة الصبح وبينزل
لاقل من خمسين ما يعرف بال
Morning hypoglycemia
ودا حصل اكتر من يوم ورا بعض جريت بسرعة بصيت علي نسبة الصوديوم لقيته قليل علي 129
وهنا في شيء نور في دماغي (وهتفهم قصدي بعدين 😅)
ونظرتي لسبب انخفاض السكر تغيرت تماماً يعني مش موضوع تظبيط جرعات انسولين وبس لا إطلاقا دا في حاجه مستخبيه هي السبب

ياعزيزي لمن يقولون أنه ليس هناك دليل عقلي علي وجود الله ولو أنهم نظروا في أنفسهم لعرفوا الله حق المعرفة لكن عَمَي قلوبِهم وأبصارِهم حجب عنهم الحق فما قَدَرُوا الله حقَّ قدرِه.

الخالقُ العظيمُ سبحانه وتعالى يقولُ في كتابة العزيز
﴾وَجَعَلْنَا اللَّيْلَ لِبَاسًا وَجَعَلْنَا النَّهَارَ مَعَاشًا ﴿
فليس المقصود من قوله تعالي هنا مجرد وصفٍ لنمط حياة الإنسان من النومِ ليلاً والاستيقاظِ نهارًا، بل يحمل المعنى دلالة أعمق تتعلق بالتنظيم الدقيق لوظائف الجسم البشري فالليل جُعل زمنَ السكون وإعادة البناء الحيوي، حيث تنخفض معدلات إستهلاك الطاقة وتسكن الجوارح ويتهيأ الجسد للترميم واستعادة الطاقة. أما النهار فقد جُعل وقت النشاط والحركة والسعي، ولذلك هيّأ الله سبحانه وتعالى الإنسان بمنظومة فسيولوجية متكاملة تبلغ ذروة كفاءتها في الصباح؛ فتزداد الهرمونات المحفزة للطاقة مثل الكورتيزول والكاتيكولامينات، ويرتفع مستوي السكر وبالتالي يرتفع مستوى اليقظة والاستعداد الذهني والبدني، ليتمكن الإنسان من أداء مهامه بأعلى درجات الكفاءة.
وهكذا يتجلى أن تعاقب الليل والنهار ليس مجرد ظاهرة كونية، بل هو نظام محكم يتناغم مع الإيقاع الحيوي الداخلي للإنسان فجعل الله النهار معاشاً وهيأ الجسد بالتغيرات الفسيولوجية اللازمة حتي يتمكن الجسم من القيام بنشاطه اليومي.

وبالتالي مفروض مستوي السكر في الصباح يكون في أعلي مستوياته ليعطي الجسد الطاقة اللازمة لمباشرة مهامه
ودا ما نسميه بال
Dawn phenomenon
زي ما قولنا ياعزيزي في الصباح الباكر بيحصل ما يعرف باسم
Peak Counter Regulation
حيث يكون معدل افراز الكورتيزون في أعلي مستوياته ويحدث تغيرات فسيولوجية أهمها زيادة مستوى السكر في الدم وهذا ما يعرف بال Dawn phenomenon
واللي تبان كويس في مرضي السكر ولازم تاخد بالك تفرق بينها وبين
Somogyi phenomenon🙃
➖➖➖➖➖➖➖➖➖➖➖➖➖➖➖
يبقي الست دي بيحصلها انخفاض في مستوي السكر في الوقت اللي مفروض يكون فيه عالي بسبب زيادة معدل افراز الكورتيزون اللي بيوصل لاعلي معدلاته صباحاً
يبقي انا هنا عندي مشكلة في الكورتيزون نسبته قليله عشان كده السكر بيقل وهنا علي الفور طلبت تحليل كورتيزون صباحي (رغم اعتراض البعض)لتأتي النتيجة بفشل في وظائف الغده الكظريه نتج عنه نقص في الكورتيزون واللي نتج عنه نوبات السكر القليل والغيبوبة المتكررة وبالتالي التشخيص اختلف وطريقة العلاج اختلفت تماماً وقدرنا نوصل اننا نحمي الست دي من نوبات غيبوبة السكر اللي ممكن تحصلها مستقبلاً واللي خطورتها قد تؤدي إلى الوفاة
وبالتالي المريضه اللي كل شويه تدخل رعاية بسبب سكر قليل كان الشبب اللي ظاهر قدامك جرعات الأنسولين لكن السبب الخفي اللي مش ظاهرلك ويخدعك ويخليك متاخدش بالك منه هو نقص الكورتيزون

وهنا نرجع لأصل الحكايه الحاله دي عدت علي استشاريين وناس كبيره وفي أماكن معروفه جدا و الكورتيزون خدعهم برضو وانا لما أخدت بالي منها مكانش شطاره مني قد ما هو فصل من الله ثم فضل استاذنا الدكتور محمد الألفي لأن من فتره شوفت مع أستاذنا حاله عجيبه وغريبه ملخصها بنت صغيره عندها سكر نوع اول.
وصرع ومتظبطه علي أدوية الصرع ومفيش تشنجات لعند ما جالها فوبيا من حاجه اسمها الساعه سبعه الصبح ليه ؟!لان كل يوم في نفس المعاد بقي يحصلها تشنجات عنيفة وكان اللي بيتقال وقتها نشاط زايد للصرع والعلاج انهم يزودوا أدوية الصرع عشان تمنع التشنجات ولكن مفيش نتيجه لعند ما في مره وقت حدوث التشنجات راحت مستشفى بيقيسوا السكر لقوه منخفض جدا ادوها جلوكوز وكان نفس الكلام ظبطوا جرعات الأنسولين وخلاص وفضلت البنت علي مدار سنتين بنفس الحوار برضو وتدخل في نوبات سكر قليل كل مره في نفس المعاد الساعه سبعه الصبح لعند ما والدتها خلاص بقت عارفه المعاد اللي هيحصل فيها النوبات دي وتقعد جنبها لدجة أنها قالت الجمله الشهيره اللي معلقه في ذهني الي الان وهي "فوبيا الساعه سبعة صباحاً"
كنت قاعد مع أستاذنا وهو بيشوف الحاله دي ومن غير ما يفحصها ولا يعمل اي حاجه مجرد بيستمع لقصتها بس هنا قالي يا محمد يا حسونه لما يجيلك حد كده ويوصل بيه الحال انها تقول فوبيا الساعه سبعة وسكر يقل كل يوم دي لازم تنور في دماغك(أكيد فهمت كان قصدي ايه بنورت في دماغي 😅)لازم تقول وفين الكورتيزون وفعلاً عملنا للبنت دي تحليل كورتيزون وطلع عندها نقص شديد في الكورتيزون مجرد ما عالجناه خلاص لا بقي في سكر قليل ولا بقي في تشنجات وقللنا جرعات أدوية الصرع والبنت روحت بيتها بسلام ووالدتها بقت تعرف تنام عادي لعند الضهر ماهو خلاص مبقاش في فوبيا الساعه سبعة صباحاً 😅
دكتور محمد السيد حسونه

15/02/2026

كان الألم يسكنها منذ سنين
ألمٌ غامض في الفخذة اليمنى، عميق، ثقيل، يوقظها عند التقلب في الليل ويجعل الجلوس امتحانًا يوميًا للصبر.
قالوا لها:
"إنها الفقرات… ضغط جذري… ربما انزلاق بسيط."
وصُوِّرت الظهر، وأُعطيت المسكنات، ومضت الأيام… لكن الألم بقي.
بقي هناك، في مكانٍ محدد، في الفخذة، لا في الظهر.
دخلت عليّ تمشي بحذر، كأنها تخاف أن توقظ الألم.
حكت قصتها بصوتٍ اعتاد التعايش مع الشك.
قلت لها: "دلّيني بإصبعك… أين يسكن الألم بالضبط؟"
وضعت إصبعها على نقطة في الربع العلوي الوحشي من الفخذة اليمنى… نقطة لا تخطئها الأصابع الصادقة.
مددت المسبار.
على الشاشة، ظهرت الطبقات بوضوح:
الجلد…
النسيج الشحمي…
اللفافة…
العضلة…
ثم رأيته.
منطقة متحجرة داخل الطبقة الشحمية، بحدود واضحة، ذات صدى مرتفع، تلقي بظل صوتي خلفها… كأنها حجر صغير دُفن في لحمٍ طري.
قياسها يقارب 1.1 سم طولًا و 0.8 سم عرضًا.
ليست عضلية… ليست عصبية… ليست فقرة.
إنها هناك… في المكان نفسه الذي أشارت إليه بإصبعها.
تحجّر دهني.
Calcification intralipomateuse.
أثرُ التهاب قديم، أو رضٍّ نُسي، أو حقنةٍ غائرة في زمنٍ مضى.
قلت لها بهدوء:
"ألمك ليس من ظهرك."
نظرت إليّ بدهشة… ثم بصمتٍ طويل.
كأنها كانت تحتاج فقط أن يُصدَّق ألمها.
في الطب، أحيانًا لا يكون الصوت الأعلى هو الحقيقة.
الصور الكبيرة — الرنين، السكانير — قد تخدعنا بعظمتها.
لكن الحقيقة قد تختبئ في طبقة شحمية، في سنتيمترٍ واحد، في ظلٍّ أسود صغير على شاشة رمادية.
حقنّا حول الآفة بمزيجٍ بسيط من مخدر موضعي مع كورتيكويد.
لم يكن الأمر معجزة… لكنه كان دقيقًا.
بعد أيام، عادت تمشي بخطواتٍ أكثر ثقة.
قالت:
"الدكتور… الألم خفّ كثيرًا."
ابتسمت.
ليس لأنني كنت محقًا…
بل لأن الإصبع الذي دلّ على موضع الألم لم يكن مخطئًا منذ البداية.
هذه الحالة تذكيرٌ لنا — نحن الأطباء — أن الجسد لا يكذب.
وأن الإصغاء للمريض أحيانًا أهم من البحث عن إجابة جاهزة في مكانٍ شائع.
ليس كل ألم في الفخذة سببه الفقرات.
وأحيانًا… يكون الحجر صغيرًا، لكن صداه كبير.

دكتور / صيد ياسين

14/02/2026

دي اشعه طفل عمره ٨ شهور

الطفل كانت شكوته انه بيشتكي من سخونيه متكرره وضعف في زياده وزنه

بعمل تحليل بول تبين ان عنده نسبه صديد عاليه بالبول

اخد علاج للصديد كذا مره

لكن الشكوي ما زالت مستمره

ونسبه الصديد عاليه جدا في البول

الخطوه اللي بعد كده في التشخيص هي اجراء اشعه تلفزيونيه واشعه تصاعديه بالصبغه

MCUG

لازم وضروري لتشخيص سبب تكرار العدوي

الاشعه التصاعدية بالصبغه علي مجري البول والمثانه

كانت هي كلمه السر في التشخيص

اتضح ان الطفل عنده ارتجاع بول من المثانه علي الحالبين

وارتجاع من الدرجه الرابعه

وده تسبب في التهابات شديده ووجود ميكروب مقاوم للعلاجات والمضادات الحيويه

الحمد لله الطفل عمل العمليه الأسبوع اللي فات

الرساله اللي بحب اوجهها لكل الناس من البوست ده

السخونيه المتكرره ليها اسباب وعلي رأسها

حمي البحر الأبيض المتوسط

حمي البافابا او متلازمه مارشال

التهابات مجري البول

كل مرض ليه صورته وشكله ولازم نوصل للسبب علشان العلاج يبقي فعال

الاشعه بالصبغه مش حاجه خطيره والاطفال بتعملها عادي

مش بعبع الناس بتخاف منه ☹️

الحاله دي استحاله كانت تتشخص بدون عمل الاشعه دي

By Adham kids clinic

14/02/2026

شخص كان مُصاب بورم سرطاني داخل الفم، ولما تم استئصال الورم تَرَك مكانه فجوة كبيرة في فم المريض

بعدها تم قص قطعة جلد بحجم الفجوة من معصم المريض ونجحت العملية واختفي السرطان؛ لكن العجيب في الموضوع ان الشعر طلع في فم المريض ..

Dr Mahmoud kabil

14/02/2026

قاعده ف الشيفت بناظر الأشعه وبكاب تقاريرها جالي عيان مطلوبله أشهعه رنين للبروستاتا

دخل حاج كبير بالجبه والقفطان ، دخل ونيموه علي الجهاز ، أول صوره نزلت سواد السواد مش شايفه حاجه خالص ،، قولت أكيد لابس حاجه فيها معدن ردوا قالولي لابس الجاون الواقي من الإشعاع علي الجلد، قولتلهم يبقا مفصل صناعي او شرايح ومسامير ودخلتله سألته قالي عمري ماعملت عمليات
طب رجلك اليمين ياحاج انا واثقه وبقولك ان فيها معدن قالي هي وارمه بس والدكتور شاكك ان فيه اورام ف البروستاتا ضاغطه علي حاجه مش موصله دم لرجلي اليمين ..
قولتله طيب ياحاج ادخل الحمام لاني طبعا شوفت البلادر مليانه وف نفس الوقت عاوزه اشوف السرير تحته يمكن الاقي حاجه معدن ..

قلبت السرير رأسا ع عقب مفيش اي حاجه معدن
دخل تاني وانا دماغي هتتجنن قولتله ياحاج رجلك فيها معدن قالي عظيم بيمين مافيها معدن ويحلف وانا مخي هيتفرتك 😂 بدأت أمسك راسي من الحيره، قالي انا ف حرب 73 دخل رصا**صه ف صدري ودي طلعوها ؟
قولتله ايوه ايوه وبعدين كمل قالي انما رجلي مفيهاش حاجه، تااااني ! مصمم ايوه !😬

قولتله عظيم بيمين رجلك فيها شظيه يحلف ويقول والله مافيها حاجه، وانا الي طالع عليا دي شظيه خلاص قضي الامر. 😆
نزلناه ياخد صوره أشعه عاديه وكان متكدر اوي
هوب الصور طلعالي بمفاجأه رجله فيه رصا**صه يانااااس رصاصه. 😳

الحاج طلع تاني ها مش هتدخليني بقا قولتله ياحاج انت رجلك فيها رصا**صه. 😂قالي نعم!
ازاي محصلش
دخلت ابنه وريته ااصور قالي بعد اذنك ممكن نوريله الصور علشان عمره ماهيصدق ،، دخلته وقعدت اشرحله الصوره يقولي ازاي لا عمري محصلش. 😂😂

ووقف مذهووووول ويقول من يوم 31/12/1973
ولسه جيه توجعني دلوقتي؟
دي صور الرصا**صه في الاشعه العايه , رصا**صه الفخر و العزة في ساق بطل من الأبطال ربنا يحفظه و يمتعه بالصحه و العافيه

13/02/2026

كنا دكاتره امتياز مُغتربين في القاهرة في رمضان و اخدنا شقة في حدايق الزيتون و صاحبي يونس هو اللي بيطبخلنا ..
رجعت يوم قبل المغرب بشوية لقيت يونس عنده دور برد و راقد في السرير بس كان عادي نبقى ننزل بعد المغرب نجيب اي حاجة ناكلها بس اتفاجئنا بواحد صاحبنا اتزنق في عزومة لإتنين من قرايبه عندنا ..
المغرب فاضلله ربع ساعة و المحلات كلها قافلة و فيه 8 افراد في الشقة منهم اتنين ضيوف هيفطروا إيه!!
هوبّا استخدمت ذكائي الفطري🤣

و قولت ليونس انا عندي حل تعالى معايا...قالي هنعمل إيه؟
قولتله ثق فِيا بس...
في آخر شارعنا كان فيه مائدة رحمن .. يونس طبعا سابني و دخلت انا للراجل اللي ماسك المائدة

- ممكن كلمة على جنب يا حاج؟
= قاللي خير يا ابني قولتله احنا دكاترة مُغتربين جنبك هنا و اتورطنا في عزومة و اللي بيطبخلنا تعبان ممكن اجيبلك الحلل فاضية و أملاها من عندك دليفري و ناخدها نرجع بيها للي عازمينهم كإننا احنا اللي طابخينهم؟؟

- ايوة يابني تحت امرك مفيهاش حاجه
= فهمتني بذمتك؟
عيب عليك يابني فهمتك هو انا عبيط!!
- الله يكرمك يا حاج بس من غير شوشرة بالله عليك...

روحنا جيبنا الحلل و رجعنا طبعا يونس سابني وقالي هستناك أنا هنا و إتدّارى و انا دخلت عالراجل من بعيد شافني جاي
لاقيته بعلو صوته "وسّع للضُكتور يابني وسع للضُكتور...
لا ياحااااااج لاااا استرني ما يفضحك ربنا 😬🤣

لاقيت كل الناس بتبص عليا.. رجليا اتثبتت مكاني و حطيت حلة على وشي من الناحيه دي و حلة من الناحيه دي بداري وشي😄
لاقيته نزل من على المنصة و بيتاخر الناس في الطابور و بيشدني تعالى يا ضوكتور الضكتر جاي ياخد اكل للدكاترة من عندنا و هات الحلة آهو احلى رز لأحلى ضُكتر...
كفااااية ابوس إيدك ياحج ...كفاية إيه كفاية رز يا ضكتور؟

- لا كفاية يا ضوكتور دي...
= يا ضوكتر عيب عليك ..دانت لسة هتروح عند صلاح يا صلاااااح كتر لحمة للضُكتور يا صلاح ... لحمة حمرة للضُكتور يا صلاح..احنا تحت أمرك يا ضكتر عيب عليك.

لاقيت الشعب حواليا اتجمع و انا ماسك حلة في إيد و حلة في إيد و كل واحد بيحط التاتش بتاعته و لاقيت واحد ملالي ازازة شوربة و حطها تحت باطي و واحد ملالي ازازة تمر هندي تحت باطي التاني..😂
= دا احنا نخدمك بعينينا يا ضكتر .

خرجت لاقيت يونس ميت من الضحك و ماشي أدامي يضحك في الشارع يقول لكل حد يقابله وسع للضُكتور يابني 😂😂

وده كان شكل الضكتور 👇
محمود_أبو_العزم

13/02/2026

بمناسبه الترند بتاع الأطباء .. الصوره دي كانت في رمضان ؛ لمريض ( ايدز ) وعنده كسر ومحتاج يتثبت ، العمليه الحمد لله اتعملت والمغرب أذن علينا واحنا شغالين وصايمين،
المريض الحمد لله اتعمله عمليه مجانًا علي نفقه الدوله،
عمليه معدل الخطوره فيها عالي جدا اتعملت من سكات والمريض روح من سكات..
ده نموذج شبه نماذج كتير بتتعمل يومياً في مستشفيات الصحة والجامعة بشكل مجاني ومهياش بطوله شخصيه مني بالعكس زمايلنا بيعملوا ويتعرضوا لأخطر من كده، تعرض لحالات فيروس C و B وايدز بشكل يومي وحالات القئ الدموي والأمراض المعدية ،
بمقابل بدل عدوي لا يتجاوز 20 جنيه لا يكفي حتي لعمل تحليل أو نشتري بيها مناديل ننضف الدم اللي بيجي علي وشنا و ايدنا وهدومنا ، سألت نفسك ليه الطبيب مضطر يتعرض لكده !

أخلاق الناس حرفياً اتغيرت وبقوا متحفزين تجاه الطبيب لو تأخرت علي حاله خمس دقايق عشان حاله تانيه ليها أولوية بتنال سيل من الشتيمه والتعدي، روح أسأل بره مصر معدل انتظار الحالات بيوصل لوقت اد ايه هنا المريض بيتعمله تحاليل كامله واشعات كامله مجاناً خلال كام ساعه وبيكون متأفف ،

مرة في إحدي النبطشيات سهران، واحد داخل ببنته مريضه وهو علي باب المستشفي بيقول فين الدكتور ابن ال**** اللي هنا حرفيا وهو علي باب المستشفي !

الطب مهنه زيها زي أي مهنة ربحيه ، بنشتغلها عشان نعيش منها ونصرف علي بيوتنا ونصرف علي تعليمنا ومذاكرتنا ألوفات عشان نبقي علي أرضيه صلبه وكفاءه تكفي اننا نعالجك بشكل صحيح،
اه يغلب عليها الجانب الإنساني لأنها بتتعامل مع الروح والصحة لكن الطبيب لما بيتعب بيصرف علي نفسه، تحاليلنا واشعتنا وعلاجنا من جيوبنا ،
لينا احتياجات ومتطلبات أسريه زي أي بيت محدش بيجي يدفعلنا صياناتنا أو لوازم بيوتنا والصنعه أم ١٠ بيتطلب من الدكتور فيها ٢٠ لو اتعرف انه دكتور ،
فلو مشتغلناش هنا وهنا مش هنعرف نعيش زينا زي الأجري باليوميه اليوم اللي هنقعده مش هندخل فيه فلوس ،

فمتستغربش من الطبيب اللي مرتبه ميكفهوش اسبوع انه يدور علي ربح من الطب ده عادي جدا هو بني ادم زيك وعليه مسئوليات ومتطلبات ،
وبمناسبة حوار ده الدكتور كشفه كتييير وغالي
عزيزي المريض في الطبيب اللي أجره غالي وفيه اللي كشفه متوسط وفي الجمعيات الخيريه بقت كتير وكلها أطباء وكفء، وفي العيادات الحكومي المجاني فيها نفس الأطباء،

شاء الله أن يكون قوت يومنا ودخلنا من مرض الناس ...
أتمني يجي اليوم اللي التعامل المادي بين الطبيب والمريض ينتهي تماماً والدولة تكفل لينا مرتب يعيشنا حتي لآخر الشهر ،
صدقوني الطبيب والله أحرص علي المريض من نفسه ولما بيحصل معانا مضاعفات للمريض والله ما بننام وبنفضل شايلين هم المريض لحد ما يخف،
ربنا يكتب لجميع الناس الشفاء ويديم عليكم الصحةوالعافيه
، ويديمنا علي هذا الثغر العظيم ويجعل عملنا في ميزان حسناتنا.
كل عام وأنتم بخير 💜
دكتور احمد فوده

13/02/2026

🚨 قرار ايكمو 🫀 في لحظة فجر ينقذ فتاه حامل وجنينها 🩺 و لأول مرة في مصر ، كانيولا مزدوجة Avalon ..

شابه عندها ٣٠ سنة و حامل ، جالها دور برد راحت لدكتور النساء بتاعها و اخدت علاج بس مفيش تحسن و بقت مش قادرة تتحرك و لا تتنفس ..
راحت له تاني حولها فورا علي القصر العيني بعد ما لقي مستوي الأكسجين في الدم واطي جدا علي ما وصلت مستشفي الطوارئ كانت تقريبا فاقدة الوعي دخلوها فورا غرفة الإفاقة و حطوها علي التنفس الصناعي بس مفيش فايدة الأكسجين ما بيوصلش ٥٠٪؜ ، جم دكاترة النساء لقوا الطفل لسه عايش و الاشعة طلعت متلازمة الفشل التنفسي الحاد ARDS الرئة مش داخلها الهوا خالص، الضغط بدأ ينهار و ادوية رفع الضغط… أدرينالين….نورادرينالين الكلام ده الفجر في طوارئ قصر العيني أطلبوا فورا وحدة الايكمو يمكن عندهم حل الام و الطفل هيروحوا مننا.
و بالفعل انتقلت وحدة الايكمو و عشان حامل و ضعيفة البنيان جدا قررت و لأول مرة في مصر ان الدكتور محمد عبد المنعم يحطها بالكانيولا المزدوجة عن طريق الرقبة Avalon عشان تقدر تتحرك بالايكمو و تم توصيلها فعلا في غرفة العمليات الهجينة و لأول مرة بإستخدام الإرشاد بالأشعة و الحمد لله بدأت دورة الدم في الرئة الصناعية ووصل الأكسجين ٩٥٪؜ و بدأ الدكاترة يسحبوا الادوية و كان فاضل نطمن انها واعية و ان الطفل عايش. جم دكاترة النساء و بقوا يتابعوا الطفل كل يوم و الام استعادت وعيها و بدأ العلاج المكثف بالأدوية و كان التحدي الكبير لازم نمشيها يابروف بالايكمو منتظرين موافقتك ، والحمد لله قدرنا نمشيها
و خرجت علي رجليها بعد ١٤ يوم في وحدة الايكمو عشان تقضي رمضان في وسط العيلة و ان شاء الله تفرح بطفلها و يتم لها علي خير ، و كل ده بالمجان في قصر العيني قلعه الطب في مصر والوطن العربي ❤️
دكتور أكرم عبدالباري

12/02/2026

"يا دكتور أحمد.. أنا بقالي شهرين (تائه) جوه جسمي، وحاسس إن عافيتي مابقتش مِلكي!"

بهذه الكلمات الصادمة، بدأ شاب في الثلاثين من عمره حكايته. لم يقل "أنا أتألم"، بل قال "أنا تائه". كان يجلس أمامي كظِل لرجل كان يومًا ما ممتلئًا بالحياة، جاء من "سوهاج" يحمل في يده شنطة بلاستيكية مكدسة بأوراق هي عنوان "الحيرة"؛ مئات التحاليل، عشرات الأشعات، وكلها تُجمع على نتيجة واحدة: (المريض سليم).

دخل العيادة ساندًا ظهره على أقاربه، ملامحه منطفئة تمامًا. أخوه وضع الشنطة أمامي وقال بلهفة:
"يا دكتور أحمد.. أخويا بيذبل قدامنا. بقاله شهرين، كل يوم الساعة ٥ المغرب، جسمه بيتحول لفرن، والحرارة توصل ٤٠. لفينا على كل التخصصات.. اللي يقول تيفود، واللي يقول ميكروب، بس المضادات الحيوية مابتعملش حاجة! إزاي يبقى سليم والترمومتر مابيكدبش؟"

رحلة "المحقق الطبي".. الاستجواب الذي قلب المعادلة :
فتحت الأوراق وعقلي يعمل كجهاز رادار، استبعدت الميكروبات لأن المريض لم يستجب للمضادات الحيوية، واستبعدت الأمراض المناعية التقليدية لأن تحاليل الـروماتويد والذئبة الحمراء وغيرهم من تحاليل الأمراض المناعية كانت سلبية تماماً.
أيضاً لا توجد علامات أو مؤشرات في الأشعات الكثيرة جداً اللي المريض عملها تدل على أي أورام ..
هنا نظرت للمريض في عينه وقلتله بتركيز شديد:
"سيبك من السخونية دلوقتي.. فيه أي تعب تاني بتشتكي منه غير السخونية؟"
هنا شهق وكأنني لمست جرحه المنسي، وقال بصوت مجهد:
"يا دكتور أحمد، ده أكتر وجع تاعبني.. زوري واكلني أكل! بحس كأن فيه شفرات حلاقة بتقطع في زوري مع كل نوبة حرارة، لدرجة إني ماببقاش عارف أبلع ريقي .. وعملت منظار وطلع سليم .. ورحت لدكتور أنف وأذن وقال مافيش حاجه ... والمفاصل يا دكتور، مفاصل إيدي وركبي بتولع نار لما حرارتي بترتفع، بحس إن عضمي بيسيح ومابقاش شايلني!"

لحظة "الخيط الوردّي الهارب" :
في اللحظة دي، بدأت أطبق في سرّي (معايير إسمها معايير ياماغوتشي)؛ ألم الزور الحاد مع وجع المفاصل العنيف دول "المفاتيح" اللي الجهاز المناعي بيسلمها لي. قمت بفحص المريض بدقة .. وتحت ضوء كشاف العيادة ، لمحت "التوقيع" الذي تركه المرض خلفه: بقع وردية باهتة جدًا (Salmon-pink rash) على صدره ودراعاته.
سألت المريض بلهفة: "دي بتظهر إمتى؟"
كان الرد هو "كلمة السر" التي أكدت ظنوني: "بتظهر بس مع الحرارة بليل.. وتختفي الصبح ولا كأنها كانت موجودة!"

كواليس تفكيري (لما البازل يكتمل) :
الصورة اكتملت.. أنا لست أمام مرض مناعي (Autoimmune)، بل أمام اضطراب "التهاب ذاتي" (Autoinflammatory) يُسمى Adult-Onset Still’s Disease.
مرض ستيل في البالغين .
هنا لا توجد أجسام مضادة "غلط" (لذا التحاليل سليمة)، بل هناك "انفجار" تلقائي في بروتينات الالتهاب. قلت لأهله بيقين: "مش هنعمل تحاليل مناعة تاني.. إحنا هنعمل تحليل واحد: الفرّيتين (Ferritin)."

عندما جاءت النتيجة، ساد صمت رهيب.. الرقم الطبيعي أقصاه ٣٠٠.. أما الرقم عنده فكان: ٧٠٠٠ !!!
هذا ليس مجرد ارتفاع، هذا إعلان "حالة طوارئ" قصوى. المرض الذي يختبئ خلف التحاليل "السليمة".. ظهر أخيراً للطبيب الذي يقرأ لغة الجسد بدقة.

رحلة العودة.. "إطفاء النيران" :
بدأنا فورًا البروتوكول العلاجي؛ جرعات مكثفة من الكورتيزون الوريدي (Pulse Steroids) للسيطرة على العاصفة الالتهابية، مع الميثوتريكسيت لحماية المفاصل وضمان عدم الانتكاس.

📞 مكالمة "رد الروح" بعد ١٠ أيام :
بعد ١٠ أيام بالضبط، رن هاتفي .. كان هو! صوته كان مفعمًا بالحياة، رنة الفرح كانت واضحة. قال لي بامتنان:
"يا دكتور أحمد.. أنا مش عارف أشكرك إزاي. بقالي ١٠ أيام الحرارة مختفية تماماً. لأول مرة من شهرين أعرف أنام بعمق، ولأول مرة أحس إن عافيتي رجعت لي.. أنت رجعت لي الأمل بعد ما كان خلاص بيضيع مني!"
ودّعته وهو يكمل علاجه في بيته في "سوهاج" مجبور الخاطر، وفخور أن عيادتي في المحلة الكبرى كانت المحطة التي توقف عندها قطار الوجع بفضل الله.

في الطب.. أخطر شيء ليس أن تكون التحاليل سلبية، بل أن يصدقها الطبيب ويغلق الملف.
التشخيص هو "فن الربط" بين الخيوط الرفيعة.
والحمد لله .. والفضل أولاً وآخرًا لله.

د/ أحمد عبد الجواد

12/02/2026

البنوته العسل دي كانت بتمو،ت من نص ساعه وإحنا كمان كنا بنمو،ت معاها ..

العسوله دي كانت شرقانه في حبايه ذره عملت لها إنسداد في مجري الهواء ونفسها توقف محرد مادخلت الطوارئ كان تم التشخيص في أقل من دقيقة وبدا محاولات لطرد أي جسم غريب او ذره محشور لسه في زورها لكن للأسف باءت كلها بالفشل وممكن تكون نزلت أصلا و الإنسداد حصل كرد فعل من مجري الهواء و قفل ،الوقت كان قليل جدا لوجود البنت دي معانا في الحياه لأن هيبدأ يحصل إنكماش للرئه lung collapes ويقل الأكسجين اللي رايح للمخ ثم باقي أجهزه الجسم تباعا و تنتهي بالموت في دقايق...

لحد هنا وتعالو اعيشكم معانا لحظه بلحظه

شلناها و إحنا بنجري علي العمليات وزميلي بيرن علي تمريض العمليات
- معانا طفله سنتين جايه بإنسداد في مجري التنفس جهزوا منظار الممرات الهوائيه وجهاز التنفس الصناعي
= مفيش منظار مقاسها يا دكتور !!
- جهزوا اصغر حاجه موجوده نحاول بيها إحنا علي السلم يلا
= مع المحاوله المنظار كان مقاسه كبير علي حنجرتها الصغيره جدا و بدانا نركب أنبوبه حنجريه بس للأسف مع ازالة المنظار حصل تورم في الأحبال الصوتيه vocal cord oedema وكان قرب من درجه إنه يقفل مجري الهواء تماما !

الوضع بيزداد سوء و نسبه الاكسجين فى دمها بينزل لتحت ال 5% من أصل 100% ضربات القلب نزلت ل 40

لحظات من الرعب .. والصمت
هاتوا الأنبوبه ..جهزوا الأدرينالين .. جهاز التنفس الصناعي بسرعه يلا
بسم الله ..الأنبوبه ركبت ، كملنا بأقي الإسعافات ... إنتظاااار
لحظات من الرعب والتوتر ... الصمت .. نفس مكتوم كله بيدعي
يااااارب .. من لهذه الملاك غيرك ؟ هي بين يديك الآن من يربط علي قلب والديها ويربط علي قلوبنا إذا أصابها مكروه سواك
،،، إنتظاااار ،،،
البنت دلوقتي علي جهاز التنفس الصناعى ، الخطر الشارد في ذهن الجميع بندعى ربنا ان المخ مايكونش إتأثر من نقص الأكسجين

الوقت واقف..الدقايق بتعدي ساعات ..كله عينه علي الموينتور ..
نسبه تشبع الأكسجين بيرجع ، ضربات القلب بتزيد وضربات قلبنا بتزيد معاها ، صوت الاجهزه المزعجه دايما بيزيد املنا معاه علي غير العاده ، ربع ساعه ..تلت ساعه ..كل شئ منتظم ..نص ساعه إفصلو الجهاز ..
صوت ضعيف جاي من حركه السرير ،صوت عياط بيرسم البسمه علي وشنا تاني ..نفس عميق ..بيطرد القلق والخوف من جوانا
حمدالله عالسلامه يا حبيبه عمو ...عياط تاني وصوت بيقول مامااا
طب يلا نتصور صوره للذكري عشان نطلع لماما .

الطب مهنه ساميه علشان اللحظه دى .. اللحظه دي و بس

تمت بفضل الله بمبني طوارئ القلب والصدر بمستشفي جامعه الزقازيق - مصر

بواسطه د/ إسلام نصر د/ خالد مصطفي و طاقم تمريض عمليات و طوارئ القلب و الصدر

12/02/2026

النفسية عامله ايه دلوقت ؟

لقد وقعنا في الطب

16/02/2026

15/02/2026

15/02/2026

14/02/2026

14/02/2026

14/02/2026

13/02/2026

13/02/2026

13/02/2026

12/02/2026

12/02/2026

12/02/2026

Address

Website

Alerts

Shortcuts

Share

Category