14/02/2026
=إيه دة هو مرضى القلب هيصوموا أصلا ؟!!.. لأ 🙄
= بس أنا صحتي كويسة وأقدر أصوم ؟.. صوم 🤔
=طيب لو تعبت أفطر ؟!.. أفطر
=بس لو كويس أصوم ؟!.. صوم
=أنا باخد مدرات بول علشان عضلة القلب ضعيفة؟ أفطر.. صوم.. أفطر.. صوم 🙃
الحمد الله على نعمة الإسلام وأحكام الصيام ،فلم يترك شئ فى هذه الدين إلا وقد ذكره رب العالمين "برحمة واسعة"
(فمن شهد منكم الشهر فليصمه، ومن كان "مريضًا" أو على سفر فعدة من أيام أخر، يريد الله بكم اليسر ولا يريد بكم العسر)
ركز أوى فى يريد الله بكم اليسر ولا يريد بكم العسر ...
مريض القلب كلمة عامة لايمكن الأخذ بها كحكم عام لجميع المرضى، مريض ضعف عضلة القلب، غير قصور الشرايين التاجية، غير جلطة القلب، غير الحمى الروماتزمية، غير ضغط الدم المرتفع، غير غير كل دة قلب ولكل مريض حكمه حسب مرضه وحالته الصحية...
مريض القلب اللى لاجدال على أن يفطر فى رمضان لخطورة الصيام عليه >>>
١. مرضى ضعف عضلة القلب اللى متشخص قريبا فى الشهور الأولى ومحتاج علاج مكثف بأنتظام وخصوصا مدرات البول.. يفطر
٢. مريض جلطة بالقلب أو الذبحة الصدرية الغير مستقرة اللى ماعداش عليه ٣ شهور سواء ركب دعامات أو لأ.. يفطر
٣. مريض مركب أكثر من دعامة بالشرايين التاجية حديثا ماعداش عليه ٣شهور .. يفطر
٤. مريض الإرتفاع الشديد بضغط الشريان الرئوي المصاحب بضعف الجزء الايمن من عضلة القلب.. يفطر
٥. مريض جلطة الساق الحادة أو الشريان الرئوي الحادة وماعداش عليه 3 شهور.. يفطر
٦. ضيق "شديد" بأى صمام بالقلب (زى الأورطي أو الميترالي ).. يفطر
٧. جراحة قلب مفتوح ماعداش عليها ٣شهور.. يفطر
٨. أى مريض قلب حالته مستقرة وشعر بتعب مع الصيام ( ألام بالصدر، ضيق تنفس، دوخة ،نهجان ،إغماء، تورم بالجسم).. يفطر
فيما عدا ذلك وبشرط إستقرار حالته الصحية والقدرة البدنية على الصيام فليصم، وياخد باله بقي من الكلمتين الطعمين دول >>>
_ الفطار: لو هياخد علاجه على الريق يشرب ماية أو لبن أو عصير وبعدين ياخد العلاج، والفطار يكون كميات قليلة مايكلش حتى الأمتلاء ،علشان تاخد نفسك ياحج، الأكل بيسرع ضربات القلب ويوطي الضغط قليلا فى الانسان الطبيعى، فانت هيبقى طيارات حضرتك مش ضربات قلب 😀.. كميات قليلة وكل تانى بعد الترويح .
_تجنب الجهد البدنى الزائد قبل المغرب لان دة ذروة جفاف الجسم ودائما واحنا نواب فى المستشفى كان لازم حالة جلطة قلب تيجى وقت الفطار ، هى جاتله قبل الفطار بس عقبال ماوصلنا 🫡
_ ياعرقسوس ،شفا وخمير 😀
بالنسبة لمرضى القلب والضغط لا شفا ولا خمير، هى إيه خمير دى بقى؟! 🤔..
المهم ماتشربهوش علشان بيرفع الضغط، بس أنت عارف المصرى معروف بقوته وجبروته ممكن يحط نص كوباية عرق سوس على نص كوباية كركدية وبكدة يعمل شلل فى الدورة الدموية ماتبقاش عارفة تلف يمين ولا شمال 😂
_الماية حوالى 2 لتر على مدار الوقت بين الفطار والسحور، ماتجيش قبل الأذان بخمس دقايق تشرب إزازة وتحول معدتك لقربة ماية تطبق على مراوحك بليل وانت نايم وتصحينا الفجر 🤢 ، يعنى لا فطار ولا سحور ياخى حرام عليك هو احنا مورناش غيرك 😂
الحقيقة انت فعلا عندك مراوح ربانية تساعدك على التنفس ويطبق عليها بالأكل والماء، هوريك صورتها فى أول تعليق علشان الموضوع مايوسعش مننا ...
_المخلل والطرشي والموالح ممنوعة لانها بتحبس الماية فى الجسم وبترفع الضغط وكذلك العرقسوس، لو بتحب الحادق أعصر ليمون أو حط خل.
_الأدوية اللى بتتاخد فى الفطار وخصوصا لو فيها مدرات بول >>> تبقى على فطار رمضان.
وأدوية العشا >>> على السحور
ومهم جدا تأخر السحور لقبل أذان الفجر ماتتسحرش بدرى علشان تقلل ساعات الصيام.
ومرضى السكر يرجعوا لدكتور السكر ولو سمح لهم بالصيام يبقى لازم يكون معاك جهاز قياس سكر بالبيت علشان لو قل أقل من 70 أو زاد أكتر من 300 تفطر بلا تردد.
ال٧٠٠ رسالة اللى على الواتس اب أخد علاجى إزاى فى رمضان ؟؟؟
أهو 👆 ... ابعتها لزمايلك علشان الدكاترة مش بتعرف ترد على ٣٠٠ رسالة فى اليوم 🤕😬
_ أخيرا ربنا جعل الصيام رحمة وزيادة فى الصحة وسمح "للمريض" بالإفطار ومن رحمته أن ترك لنا كأطباء تحديد من يفطر ومن لايفطر حسب حالته علشان لا أنا أأثم بإجتهادي فى منع الضرر عنك، ولا أنت كمريض تأثم بالإفطار..
ماتنسوش تسئلوا أهل الدين عن كفارة الإفطار...
يابخت كل واحد ربنا كتب له الصيام السنة دى ، وياهناه المريض اللى أستجاب لنداء ربه من السماء بأن يفطر حبا فيه وخوفا عليه، أحنا بنصوم لربنا وبنفطر "كمرضى" بأمر ربنا بردو ولا ينقص من أجرك شئ طالما كنت تنوى الصيام ومنعك المرض...
يريد الله بكم اليسر ولا يريد بكم العسر.
كم انت رحيم بعبادك يا الله ،والله إنا نحبك ونحب من أحبك ،فاجعل حبنا لمن أحبك شفاعة لنا ...
كل سنة وأنتم طيبين.
