Steps - خطوات

27/02/2026

هل فيه حاجة اسمها ؟ بمعنى طفل مفهوش غلطة بيجيب الدرجات النهائية .. مش #بيغلط .. بيعمل كل حاجة صح
بمعنى انه لازم:
دايما يقفل الدرجات .. دايما بيسمع الكلام .. دايما #منظم .. دايما #نضيف .. دايما لبسه منسق .. دايما شعره متسرح .. مفهوش غلطة
تبص عليه تحس انه روبوت مش انسان.
لكن الحقيقة الدنيا مبتمشيش كده ..
يعنى مثلا نعكشة ولخبطة حاجاتهم دي بيتعملوا منها #الابداع و فهم العلاقات بين الأشياء و لو أتوجه صح واعتبرنا ان عشوائيتهم مش هرجلة .. ممكن يطلع عالم او فنان او مهندس ..
ومثلا .. لو مرة ماجابوش درجات نهائية دى مش نهاية الدنيا ومش فشل لكن بيتعلموا منها ان كل غلطة هي فرصة تعلم جديدة وازاى يواجهوا صدمات #الفشل ومن هنا شخصيتهم بتكبر ..
وهكذا كل فعل مش مثالى كانه طوبه بتتبنى في

في النهاية .. #المثالية بتقتل جواهم طفولتهم لان #الاطفال مش محتاجين يبقوا نسخة كاملة لان مفيش انسان كامل بدليل اننا كأب وأم مش كاملين ومش مثاليين .. لكن اطفالنا محتاجين يحسوا انهم متشافين ومقبولين حتى وقت الغلط لكن المثالية لو زادت عن حدها هيطلعوا اطفال خايفين يغلطوا– يجلدوا نفسهم في كل تصرفاتهم – دايما عندهم شعور بالنقص و بيسعوا انهم يرضوا الكل – او يحصل العكس انهم فجاة يتمردوا على كل حاجة وحياتهم تتدمر
دورنا كأب وأم نسمح بالعشوائية لكن نوجه للنظام.. نسمح بالفشل لكن نوجه للنجاح

وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

24/02/2026

انتوا عارفين ان متوسط عدد مرات لمس الموبايل يوميًا يتجاوز 200 مرة… طيب ايه اللى هيحصل لو قللناها .. تعالوا نجرب تجربة بسيطة .. نسيب #الموبايل احنا واولادنا لمده 30 دقيقة ونشوف هنقدر ولا لاء ؟
لو لاء فمبروك علينا احنا كده في مرحلة #الإدمان ايوة زى ما بقولكم كده

طيب تعالوا نلعب لعبة مع أولادنا هنظبط Stopwatch لمدة ساعة وهنتفق اننا مش هنبص على الموبايل عارفين ايه الى هيحصل؟

- اول 5 دقايق هنلاقى أيدينا عاوزة تمسك الموبايل لا ارإديا وهنحس اننا ناسين حاجة مهمة وبعد شوية هنحس بتوتر خفيف
- بعد 15 دقيقة هنحس ان دماغنا بدات تهدى ونركز في اللى قدامنا والوقت بقى ابطأ شوية واحنا بننجز اللى ورانا
- بعد 30 دقيقة هنلاقى نفسنا ننجزنا حاجات كانت متأجلة .. وفى الوقت ده هنتجاهل اى Notification
مفيش Notification = مفيش تشتت وهنا هنحس براحة غربية

- بعد 60 دقيقة هنلاقى اننا خلصنا شغل اكتر من المعتاد وذهننا بقى أوضح وال Mood بقى احسن وهنكتشف اننا مش محتاجين الموبايل كل شوية

عارفين اللعبة دى بتكشف اذا كان عندنا نوع من الإدمان اسمة ( ادمان التشتت) ولا لاء
يعنى ايه ادمان التشتت؟
يعنى لما نصحى على مليون صوت ومليون Notifications ومليون فكرة بتشدّنا يمين وشمال
الموبايل بيرن، التلفزيون شغال، الولاد بيعيّطوا، الشغل بيسابق الوقت… وبقينا لا عارفين نركّز ولا
حاسين إن دماغنا مرتاحة .. لكن اللي إحنا مش واخدين بالنا منه إن الشتِت بقى نوع من الإدمان… أيوه، إدمان زي أي عادة غلط بتسحبنا وبتسحب أولادنا من غير ما نحس دماغنا طول الوقت عاوزة تشوف حاجات ملهاش علاقة ببعض ايه الفرق بين ادمان التشتت عندنا الكبار وعند أولادنا ؟

الكبار.. تعالوا نراقب نفسنا كده بقينا اول ناس تقع في الفخ ده
• أول ما نزهق شوية… نفتح الموبايل.
• أول ما نبدا شغل… نفتكر نفتح الفيسبوك او اى نوع من السوشيال ميديا.
• أول ما نحاول نركز… ودننا تروح لصوت Notifications
وبكده المخ بقى متعوّد ياخد دفعة سريعة من التشتيت، وما بقاش قادر يستحمل الهدوء.
النتيجة؟
– توتر
– قلق
– إنتاجية أقل
– وإحساس إن الوقت بيجري ومش عارفين نلحق حاجة
طيب ايه اللى بيحصل للأطفال؟
الأطفال بقى عندهم كل حاجة سريعة بسرعة .. كرتون سريع الوان بتشدهم فبقى طبيعى ان دماغهم متعرفش تهدأ ولا تركز في حاجة بسيطة زى نلون قصة او نحل الواجب فنبلاقيهم
- يزهقوا بسرعة
- يسيبوا اللعبة بعد دقيقتين
- يتعصبوا من اقل حاجة
- ودايما مخهم عايز اكشن
وده للأسف مش بس بياثرعلى تركيزهم ده بياثرعلى نومهم وسلوكهم وطريقة كلامهم وتعاملاتهم مع الناس تلاقيهم تايهين .. مدة تركيزهم اقل من دقيقتبن لان المخ اتعود ياخد متعته في خلال دقيقتين وبس
ليه التشتيت بقى مُغرِي كده؟ لأن كل حاجة حوالينا متصممة تشدّ عيننا…
ألوان… أصوات… فيديوهات سريعة…كل ده بيخلّي المخ ياخد جرعة متعة سريعة، وعايز يكررها طول الوقت
وايه الحل ..
الكبار .. نحدد وقت للموبايل – ندى نفسنا فترات راحة من غير #شاشة – ندور على بدائل كنا بنعملها من غير شاشة للأطفال .. نقلل وقت الشاشة بالتدريج – نرجع نلعب بالالعاب الملوسة ( مكعبات – تلوين – قص ولزق) – نقرا معاهم قصص قصيرة – روتين يومى ثابت مع الأطفال
الخلاصة.. بقى واقع عايشين فيه .. بس مش لازم نفضل متعلقين به خلينا نحاول نقلل وقت الشاشة لينا ولاولادنا علشان حياتنا تكون اهدا.. واكيد هنشوف الفرق
وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

22/02/2026

هي الكلام اللى جواهم من غير ما يقولوا ولا كلمة لان الطفل بيسقط مشاعره في الورقة من غير اى توجيه .. لوعاوزين نعرف #أطفالنا شايفنا ازاى .. نقولهم ارسموا بابا وماما وانتوا معاهم وبين الخطوط هيبان الكلام اللى جواهم

دى رسمة لطفل من ضمن مجموعة اطفال اتطلب منهم ارسموا نفسكم مع بابا وبابا.. يلا نشوف الكلام اللى بين الخطوط ايه ؟ وايه اللى موجود في العالم الداخلى .. مشاعره .. طريقة ادراكه للأشخاص اللى حواله

- وضع الرسمة في نص الصفحة دى بيعكس ان الطفل مرتاح ومتوازن نفسياً عنده إحساس جيد بذاته

- الرسم في نص الصفحة بيدل على ان الطفل حاسس انه مسيطرعلى البيئة المحيطة به ومش حاسس #بخوف او تردد وعنده ثقة في نفسه .. الطفل ده منفتح اجتماعيا وبيحب يعبرعن نفسه بطريقة واضحة وعنده تواصل جديد

- لو لاحظنا رسم شخص في اتجاه الصفحة الأعلى وده بيعكس .. قلقان منه او منطوى منه .. بيتجنبه

- الطفل هنا رسم قلوب و وردة وده بيعكس مشاعر الحب والارتباط العاطفى

- كمان القلب اللى رسمة في صدر الشخصية المركزية بيدل على ان الشخص ده مهم جدا للطفل ( وبسؤال الطفل مين دى قال ماما)

- الطفل رسم الشخصية المركزية حجمها كبير وفيها تفاصيل ولونها وده بيدل على أهمية الشخصية دى عند الطفل لانها بيتحسسه بالأمان والحب

- في شخص فوق في يسار الصفحة بالرصاص معناه ان الشخص ده اقل أهمية عاطفيا بالنسبة له

- رسم الوردة عكس البراءة اللى جوه الطفل وان عند رغبة يعبرعن الفرح اللى جواه

- الطفل عنده ادراك مكانى لانه وزع الشخصيات على الجانبين وقلب كبير في الوسط

- الطفل هنا تجاهل رسم الذراعين و الكفين وده دلالة على شعور الطفل بالاعتماد على الاخرين واحساسه بالعجز في بعض المواقف

- رسم العيون نقط وده بيدل على التواصل والانتباه واحساسه انه ( مش متشاف من اللى حواليه) وانه ( مش بيقدرييظهر مشاعره بشكل واضح )

- تجاهل رسم الكفيين بيدل على ان الاحتياجات لا تلبى له بشكل كامل

الخلاصة :
الطفل ده عبر عن مشاعر إيجابية .. حب .. ارتباط .. وعنده وعى بالمحيطين به لكن ركز على شحصية واحدة محورية في حياته وكمان استخدم الالوان علشان يقول قد ايه الشخصية دى مهم ليه وهمش الشخصية التانية اللى في حياته

الملاحظات دى مش بالضرورة وجود مشكلة، لكن ممكن تكون جزءًا من التطورالطبيعي للرسم عند الطفل لكن لو تكرر الرسم بالطريقة دى بشكل دائم مع وجود صعوبات تانى في الدراسة أو التواصل، مهم استشارة مختص في علم نفس الطفل أو صعوبات التعلم علشان يقدريقييم الطفل.

وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

20/02/2026

بين البيت والشغل

"اكترحاجة بتتعبني كأم بتشتغل إني طول الوقت حاسة إني مقسومة نصين.. بين ضغط الشغل اللي محتاج تركيز، وبين مسئوليات البيت و اولادى اللي محتاجين حضوري وطاقتي .. ساعات بحس إن اليوم بيخلص قبل ما ألحق أدي كل حاجة حقها وساعات بحس انى مقصرة مع اولادى "

ده كان احساس ام بتشتغل بترجع من شغلها في وقت متأخر وبتلاقى نفسها واقفة في التفكير في منطقة اسيب الشغل علشان مكنش ام مقصرة ولا اكمل علشان تحقيق ذاتى ومواجهة متطلبات الحياة ؟!
في الحقيقة محدش هيقدر يديكى حل سحرى ولا فيه حلول مكتوبة ينفع كل ام تمشى عليها لان الظروف بتختلف من بيت للتانى لكن خلينا نفكر شوية مع بعض ونحط حلول عملية علشان نوازن بين الشغل والبيت

- أولا لو تقدرى ابدئي يومك بدرى علشان تقدرى تنجزى اكبر عدد من الحاجات المطلوبة

- اعملى جدول يومى واضح .. من الطرق المريحة اللى انا مجربها شخصيا نكتب اهم المهام في بداية اليوم ونحدد وقت لكل حاجة حتى لو 15 دقيقة .. الجدول ده في شغلك وكمان في البيت

- ممكن تتفقى مع اى حد طفلك هيكون معاه تيتا .. خالتو .. عمتو .. الحضانة .. على قواعد واحدة انتى اللى محددها

- خليكى عارفة ان البناء الاساسى لشخصية #الطفل هي اول 4 سنين في عمره علشان كده نركز كويس بتبنى ازاى ومين اللى بيبنى معاكى

- خلى بالك من خطورة ازدواجية المعايير بين #ماما وتيتا بمعنى ماما بتقول ياكل اكل معين وبطريقة معينة لكن تيتا شايفة اللى هي متعودة عليه .. طريقة النوم ، الاكل ، اللبس ،......

- طيب يا ترى #الحضانة افضل ولا تيتا (لو متاحة) ؟ من رائي ان لو في حضانة نضيفة وبرنامج قوى اشجعك على الحضانة لان في الحضانة الطفل بيتعلم ينفصل عن ماما بطريقة آمنة وكمان وقته بيقضيه في حاجات كتيرة بتفيده طيب لو تيتا متاحة تابعى معها جدول طفلك

- الاولوليات قاعدة مهمة .. ركزى على 3 مهام أساسية في الشغل و 3 في البيت و بعد ما يخلصوا لوعملتى الباقى يبقى تمام زى الفل

- لما تكونى مع طفلك افصلى بين الشغل والبيت

وعلشان نقدر نعوض غياب ماما وقت الشغل ممكن

- نظبط ساعة في اليوم نعمل معاه حاجة بيحبها لعب ، قراءة ، نحضر الاكل مع بعض ، ننزل مع بعض .. المهم وقت مخصص ليه نكون معاه بلغة حبه

- ادمجيه معاكى في يومك طيب لو الطفل ده بيبى خليه معاكى وقريب منك في الحاجة اللى بتعمليها واتكلمى معاه زى مثلا دلوقتى بنعمل الاكل وهنعمل كذا .. و دلوقتى ماما بتعمل حاجة معينة ( شاركيه بالكلام لان مخه بيترجم المشاركة عن طريق صوتك وحركتك جانبه )

- وقت النوم .. من سن صغير نعمل معاهم روتين ثابت زى حكاية او اغنية هادية ، حضن ، ولو سن اكبر ممكن نتفق معاهم على حركة معينة بينا وبينهم نقفل بيها اليوم لان كده بنبنى رابط قوى بينا وبينهم

الفكرة إن الوقت مش لازم يكون طويل، لكن يكون مركز ومليان تواصل، عشان يحسوا اننا موجودين معاهم فعلًا وبشوية مجهود بسيط قدرنا نظبط وقتنا بين الشغل والبيت

وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

19/02/2026

17/02/2026

ليه #طفلي بيكره الكتابة؟! … سمعتوا عن حاجة اسمها #ديسكرافيا
كتيرمن الأطفال بيواجهوا صعوبة في الكتابة، لكن مش كل صعوبة معناها كسل أو قلة #تركيز ممكن يكون فيه سبب حقيقي اسمه الديسكرافيا… اضطراب تعلّمي بيأثر على قدرة الطفل على الكتابة وتنظيم الأفكار على الورق.
طيب ايه هي الديسكرافيا؟
هي صعوبة في مهارات الكتابة بتظهر في:
• مش قادر يكون الحروف بشكل صحيح
• مسك القلم بطريقة مش مريحة
• كتابة مش مرتبة أو مش مفهومة
• ينسي المسافات بين الكلمات
• بطء شديد في الكتابة رغم معرفة الإجابات
• صعوبة تحويل الأفكار لكتابة
ومهم اوى نعرف إن ذكاء الطفل طبيعي تمامًا… المشكلة في تنفيذ الكتابة مش في التفكير.
اعرف ازاى ان ابنى او بنتى عندهم ديسكرافيا
لو لاحظنا إن الطفل:
• بيعرف يحكي أفكاره شفوياً لكن مش بيعرف يكتبها
• بيحس بالإحباط أو بيهرب من أي نشاط يتطلب كتابة
• بيشتكي من تعب في اليد أو ان ايده بتوجعه وهو بيكتب
• خطه بيتدهور مع الوقت بدل ما يتحسّن
يبقى ضروري نبدأ مع أخصائي.
بتبدأ علامات الديسكرافيا تظهرغالبًا من بداية سن المدرسة، يعني تقريبًا بين:
من 5 إلى 7 سنيين لأن في المرحلة دي الطفل بيبدأ يتعلّم كتابة الحروف وتكوين الكلمات ومسك القلم وتنظيم الكتابة على السطروبيبدأ يظهر الفرق بين الطفل اللي متأخر شوية طبيعي وبين الطفل اللي عنده صعوبة واضحة في تنفيذ الكتابة نفسها.
مش بنشخّص ديسكرافيا قبل المدرسة، لكن ممكن نلاحظ علامات إن عضلات اليد ضعيفة أو إن الطفل بيتجنب أي نشاط فيه كتابة أو تلوين أو إن مسكته للقلم غريبة ومؤلمة ودي بتكون إشارات مبكرة بس مش تشخيص. ومن سنة أولى لحد سنة ثالثة (6-9 سنين) بتبان اكتر لان الطفل بيبقى مطلوب منه مهارات كتابة اكتر
إزاي نساعد الأطفال اللى عندهم ديسكرافيا
• يكتبوا او يرسموا بأقلام تخينة أو مريحة لليد
• يعملوا تمارين تقوية عضلات اليد (معجون/ألعاب تركيب/قص ولصق)
• نستخدم مهارات من المنتسورى زى لضم المكرونة او القبض باليد من طبق لطبق
• ممكن الطفل يكتب على كيبورد كمبيوتر
• نقسم الكتابة لمهام صغيرة
• نشجع الطفل ونمدح محاولته… مش خطه
• نختار أنشطة ممتعة فيها كتابة بسيطة ومش مُرهِقة
وأهم حاجة نعرفها ان الطفل مش - مش مركز-… الطفل محتاج طريقة مناسبة يتعلم بيها.

وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

15/02/2026

الطفل المكوكى او الطفل الفراك المستكشف الصغير عارفين مين ده .. ده #البيبى من سن سنتين اللى كان لسه بيرضع وبيزحف فجاة بقى يجرى في البيت ، يفتح الادراج يمسك كل حاجة .. مش هيقعد دقيقة واحده .. بيقلدنا في كل #حركة .. ضحكته مالية البيت .. الحركة دى طبيعية ومهمة علشان يتطور مش شقاوة
انتوا عارفين ان #الطفل كده عنده ذكاء حركى مش مجرد فرك والدليل انه بيقدر يستخدم جسمه وحركاته علشان يتعلم ويكتشف البيئة حواليه ومن خلال الحركة واللمس ورمى الحاجة من ايده ، وممكن نلاقيه يمسك في لعبه وميرضاش يديها لحد ، بيفهم البيئة حواليه وكل حركة بيعملها بتكون تجربة تعليمية جديدة بتطوّر إدراكه ومهاراته الذكاء الحركي مش بس حركة، ده أساس لتطور باقي أنواع الذكاء زي الاجتماعي واللغوي الطفل الفراك ده دليل علي الذكاء وشغفه في اكتشاف العالم بس لازم يتلاحظ ويتوجه عشان ميأذيش نفسه
بس خلى بالك انه بيكون محتاج صبر وطولة بال علشان نعرف نتعامل مع فضوله ونشاطه الكبير فهتلاقيه
• يبدا يمشى او يحاول يمشى ، يطلع فوق الكراسى
• عنده #حب استكشاف يلمس كل حاجة حواليه يفتح الادراج ويجرب الألعاب بطرق جديده
• تبدأ اللغة عنده تتطور ينطق كلمات بسيطة زى ماما و بابا بعد شوية يضيف كلمات جديدة
• يحاول ياكل بنفسه ( الاعتماد على الذات) يمسك كوبايه المايه عايز يقلد الكبار
• تلاقيه بيضحك لاى حد ويلعب مع اى حد (فضول اجتماعى)
• بيقدر يعبر عن مشاعره تلاقى #الغضب و #الفرح عنده واضح

طيب علشان تكونى اشطر #مامى .. امنى البيت كويس ( غطى الكهرباء .. شيلى من قدامة الحاجات الخطر) ممكن نوفر مساحة امان يلعبوا ويتحركوا فيها ، نلعب معاهم علشان يفرغوا طاقتهم ونعلمهم ( يمسكوا .. يتكلموا .. أسماء الحاجات) ممكن نسيبهم يجربوا ياكلوا بنفسهم حتى لو هيبهدلوا الدنيا بس اتعلموا حاجة جديدة نشجعهم على اللعب الحركى زى اللعب بالكرة والمكعبات نلعب معاهم على الأرض نتنطط معاهم ونجرى .. بس مع كل ده لازم صبر وتشجيع لان كل محاولة جديدة حتى لو فشلت هي خطوة لتطوير ذكاءهم الحركى ..
وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

11/02/2026

الطفل الأول

عاوزاكم توصفوا كان ايه احساسكم بأول طفل ؟
#فرحة .. #قلق .. شغف .. خوف ....
وما بين كل المشاعر الملخبطة دى بيتولد إحساس مختلف
اول ما الام والأب بيعرفوا ان اول بيبى جاى بيكونوا مركزين في كل تفاصيله اهتمامهم به بكل حاجة تخصه
من اول السونار والدايبر واللبس ومكان نومه و... و...
الطفل الأول هو اكتر طفل بياخد كل اللخبطة وقلة الخبرة مسؤليات جديدة على الاب والام شكل الحياة بيختلف نوم ملخبط اكل ملخبط بتحس ان الحياة حصلها format من اول وجديد
الام والأب بيتعاملوا معاه كانه معمل تجارب حنيه زيادة ولا حزم شديد ونفضل نجرب فيه
بس قبل ما يجى الطفل الأول لازم يكون الام والأب مستعدين للخطوة دى ونذاكرها كويس جداً لان اول 5 سنيين هما اللى بيتكب فيهم شخصية الطفل ده هتكون ازاى .. صفحة بيضا جديدة بتاسس حياة انسان
ناخد بالنا من كام نقطة:
محتاجين كماما وبابا اننا نكون متفاهمين ما بينا عشان نخلق جو نفسي صحي ينشأ فيه الطفل
محتاجين نبعد عن التهويل في الحماية أو التهوين منها
محتاجين ما ننقلش للطفل حتي لو بدون قصد اى جروح نفسية موجودة عندنا

خلى بالكم .. للطفل سواء من بابا أو ماما أو تيته أو جدو ممكن تطلع شخص متدلع ومعتمد على غيره مش عارف يتعامل لوحده في اى شيء مش عارف ياخد قرار وبيبقي عنده تخوف من اى جديد ومش منفتح علي الحياة ..
وفي نفس الوقت #القسوة أو #الأهمال بتعمله جروح نفسية بتفضل ملازماه حتي لما يكبر وبتأثر في كل خطواته ..
اطفالنا مش مسئولين انهم يعوضوا أي نقص عندنا
الحل هنا .. التوازن .. نفرح بالطفل الأول بس بلاش مبالغة في حمايته ولا اهمال فيهم تحت مسمى العادى زيه زى اى طفل

ومع مرور الوقت والطفل ده بيكبر مش عاوزين ننسي اننا بنكتب ونرسم شكل حياته لما يكبر هتكون ازاى واللى أساسها زرعتنا الأولى.

الطفل الأول مش بس بداية حياة جديدة ليه، لكنه كمان بداية نضج وقوة للأب والأم

وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

08/02/2026

مسلسل |ميدترم|
تابعنا الأيام اللى فاتت مسلسل " #ميدترم" وعلى الرغم من ان المسلسل بتكلم عن مشكلات لاشخاص في المراهقة واحنا صفحتنا خاصة بالطفولة الا ان كل مشكلة من مشكلات المسلسل ليها جذور في الطفولة واتكلمنا عنها قبل كده بتوسع في بوستات منفصلة هسيبها فى التعليقات تعالوا نشوفها مع بعض
- لو في مشكلة معينة انت مهتم بيها اكتر من الباقى ممكن تروحلها مباشرة -

1- "ناعومى" ... مشكلتها #الأمان ، انفصال الاب والام داخليا ،عايشة مع ام دايما رافضها ورافضة تصرفتها ورغم حياتها الملخبطة دى كانت دايما تظهر للناس ان حياتها تمام الام دايما عاوزة ان بنتها تكون مثالية في كل حاجة والأب فاكر انه عامل اللى عليه معاها رغم ان كان فيه انفصال بينه وبين الام على الرغم انهم عايشين مع بعض
وعلاجها يبدا من الاهل واحساس الأمان الحقيقى اللى لازم أولادهم يحسوا دايما .. مهم اوى ان الاهل ميدخلوش أولادهم طرف في المشكلة الزوجية اللى بينهم وان الولد او البنت يكون في طرف حد فيهم واسقاط مشاعر الغضب من الطرف التانى على الابن او الابنه

2-"تيا" متشابهه في الوضع الاسرى مع ناعومى لكن بصورة مختلفة المشكلة عندها ان الأمان مش ثابت وان الحب مش مضمون و خطر تقول اللى جواك فبقيت تكتم مشاعرها .. وعندها إحساس بالقلق دايما بسبب انفصال الاب والام فوصلت لها رسالة ان سهل اوى اللى بيحبونا يسيبونا فبقى عندها ( #تعلق قلق) وده ظهر لما بتكون عاوزة تقرب من حد لكن خايفة تبان انها قوية لكن عندها وبسبب كده تيا بقى عندها كذب لاارادى من صغرها
وعلاجها يبدا من الاهل انهم يحسسوا أولادهم بالأمان والحب ويشجعوهم على انهم يطلعوا مشاعرهم وطبعا اهم المشكلة لازم تتعالج هي

3-"هنا" ... كان عندها مشكلة التمييز بين الاخوات وتجاهل تام من الام لوجودها ودايما حاسة انها منسية وتفضيل اختها عليها وعلاجها ان الاهل لازم يوزعوا حبهم واهتماهم بين أولادهم

4-" أدهم" عنده #كبت في انفعلاته ويغضب فجاة .. بيعمل اللى باباه عاوزه مش اللى هو عاوزه اتربى في اسرة عادية باباه هو المتحكم لانه فقد الامل في ابنه الكبير وبقى يعوض في ابنه الصغير (ادهم) وده خلاه مش عارف يعبرعن مشاعره
وعلاج الشخصية دى ان الاهل يشجعوا أولادهم على المحاولة مش الكمال وانهم يقبلوا الغلط ويعلجوه بهدوء يسمعوا مشاعر أولادهم يحترموا رغبات أولادهم .. العقاب بالضرب من اخطر الطرق اللى بتشوه شخصية الأطفال وبتفضل معاهم ومش بتتسنى حتى لما يكبروا بتسبب جروح في نفسيتهم

5-" يزن" اتربى في بيت #سلطة ابوه هي المتحكمة في كل شىء ، نفسه (يغنى) لكن ابوه رافض فربى جواه تمرد وصراع على عيشته وكسرللقواعد.. عنده اندفاعية عالية بياخد قرارات سريعة من غير تفكير ، عاوز يهرب من الواقع اللى عايشه .. عاوز يعمل الحاجة اللى بيحبها
والعلاج هنا من الطفولة نسمعهم من صغرهم ونساعدهم يحددوا شغفهم ونحط قدامهم اختيارات كتيرة ونساعدهم ازاى ياخدوا قراراتهم بطريقة صح ومتناسبة مع ظروف ومعايير كل اسرة يعنى لو شغف الطفل من صغره (فنى) نساعدهم ياخدوا دراسة عملية تتناسب مع احتياج السوق وفى نفس الوقت ننمى هواياتهم الفنية بشكل جانبي

6- "ملك" نفس القصة الاب رافض شغفها واختياراتها من غير ما يوجهها حتى لو هيتعب في ده واللى زود صعوبة الموضوع ان الاب رمها لامه واخواته وفى كل الحالات وكل الأوقات كانت (ملك) بتختار الهروب لانها مش قادرة على المواجهه ولا لاقيه ودن تسمعها ولا تعرف لغة الحب بتاعتها
وعلاجها ان من الطفولة الاهل يشجعوا على التعبيرعن المشاعر ويسمعوا بجد ويحسسوا الطفل ان كلامه بجد ورايهم مهم يعلمهوهم يقولوا لأ من غير خوف او إحساس بالذنب تعبرعن زعلها بدل ما تكتمه

7- "عبد الله" الاب متسلط ومش مدى فرصة لابنه انه يختار شغفه فهنا الابن قر ان يحقق قرار باباه وفى النفس الوقت عمل لنفسه شخصية سرية تحت قناع ( حجازى هانتر) وده معناه انه عايش في ازدواجية وراء الماسك علشان يرضى ابوه ونفس الوقت يعمل اللى عاوزة ومتعلمش من صغره ازاى يقول لا والعلاج اننا نديهم فرصة يختاروا شغفهم ونطور هدفهم علشان يكون مناسب للمجتمع وفى النفس يعمل اللى بيحبه

8- "يونس" ده ساكت وهادى جدا وطلع في الاخر بيعمل هاك على التليفونات علشان ياخد فلوس .. اتحمل المسؤلية من صغره وامه من غير ما تدرى ضغطت عليه بسبب فقدان الاب فمن صغره مش عارف يعبرعن ذاته .. عاوز يجيب فلوس باى طريقة حتى لو غلط علشان مايخيبش امل امه فيه والعلاج ان حتى لو فيه ظروف خاصة عدت بالاسرة لازم الطفل يعيش سنه ويعيش طفولته قدرالإمكان
وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

06/02/2026

انا عاوزك تكون الأول دايما ..
انت / انتى ليه مش طالع الأول زى غيرك ..!!
لو عاوزين نهد #أولادنا مش نبنيهم دايما نضغطهم انهم يكونوا أوائل في اى حاجة بيعملوها وننسى قدراتهم عاملة ازاى.. لو جينا لاحظنا من بعيد وشوفنا أولادنا وهما بيلعبوا هنلاقى في حد دايما عايز يكون الأول ( وده طبيعى جدا)
المشكلة مش في " #المنافسة"، المشكلة في إزاي بنتعامل معاها.
لما نعلّم الطفل إن المكسب مش معناه إن التاني "يخسر"، وإن #النجاح الحقيقي إن كل اللى معانا ينجح … ساعتها المنافسة تبقى دافع مش ضغط والكلام ده في امتحانات او اى لعبة بيلعبوها او مسابقة معينة دخلوها
ممكن نعلمهم "خليكم الأفضل، بس شجّعوا صاحبكم كمان"، ونعلم بناتنا إن فرحتهم بنجاح صاحبتهم مش بتنقص منهم حاجة.
وان المنافسة الصح انى انافس نفسي يعنى انى اتطور واحسن نفسي عن اللى كنت فيه وعينى تكون على الهدف مش الناس الهدف ده ممكن يكون ( نتيجة امتحان – رياضة معينة)
روح المنافسة الصح لما تكون جواهم هيتعلموا يطوروا نفسهم اكتر (منافسة نفسي مش غيرى) وممكن كل فترة نراجع معاهم تطورهم في كل حاجة ونشوف ايه اللى بنتقدم فيه
المنافسة بتحفّزهم يطوروا نفسهم من غير مقارنة دايما علشان يكونوا الأفضل لنفسهم
وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

04/02/2026

"خلينا نكون قربيبن من اولادنا وبناتنا ، نفتح معاهم حوار يومى ، نسمع أفكارهم ، احلامهم ومخاوفهم . الوقت اللى بنقضيه معاهم بيكون اغلى من أى حاجة فى الدنيا .. خليهم يعرفوا ان بابا وماما موجودين دايما لسماعهم ودعمهم .. انهارده هما بتوعنا بكرة هيكونوا بتوع نفسهم .. خلينا نبنى معاهم جسر حماية لعلاقتنا بيهم من صغرهم "
وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية

01/02/2026

#الكذب اللاإرادي يعني إن الطفل يقول حاجة مش صح من غير ما يكون قاصد يكدب أو من غير ما يحس إن اللي قاله كذب أصلًا يعني مثلًا:
• حد يحكي موقف وهو فاكره حصل بشكل معيّن، بس ذاكرته خانته.
• طفل يبالغ في قصة وهو متخيلها أو حاسسها كده، مش عشان يضحك عليك.
• طفل متوتر أو خايف فيطلع كلامه ملخبط وغير دقيق..
لكن الكذب العادي (المتعمد) بيحصل بقصد وتخطيط علشان الطفل يهرب من #العقاب او او يحقق مصلحة وهنا الطفل بيبقى عارف إن اللي بيقوله مش حقيقي زى طفل كسر اللعبة ويقول أخويا هو اللي كسرها علشان مايتعقبش هو

الكذب المتعمد بيظهر على الطفل في لغة جسد تدل على انه بيكدب زى التوتر ، يهرش في مناخيره ، يلمس ودنه او يلمس النضاره ، او يلمس شعره
أما الكذب اللاإرادي مش بيظهر في أي علامة من العلامات دى بيكون كلام عادى بيتكلم بطبيعته
العلاج:
مع الكذب اللاإرادي ماينفعش نعاقب الطفل ❌
• مهم اوى
- نسمعه بهدوء
- نوضح الفرق بين الحقيقة والخيال
- نسأله أسئلة بسيطة تساعده يفتكر
- نقلل التوتر والخوف

مع الكذب العادي
• نركز على السلوك مش الطفل
• مهم يكون في
- قواعد واضحة وثابتة
- نتيجة بسيطة ومناسبة من غير إهانة
- تأكيد على #الصدق ونشجعه
- مانخوفش الطفل زيادة علشان ما يكدبش
ممكن نقول
"أنا هكون مبسوط أكتر لو قلت الحقيقة حتى لو غلطت"
حاجة مهمة جدًا
مش كل كذب عند الأطفال ، أغلبه مرحلة طبيعية وبتعدّي بأسلوب تعامل صح.
وزى ما بنقول ان ورا كل طفل حكاية .. خطوة بخطوة نفهمها بحب 👣💡❤
كرستينا مخلص
#تربية #إرشاد_نفسي #صحةنفسية