https://www.facebook.com/profile.php?id=61564357816660&mibextid=ZbWKwL

Rania Mabrouk, Clinical Psychologist, Cairo (2025)

25/08/2025

تصريحك بفكرك ورأيك ومشاعرك بطريقة مهذبة مفيهاش لا عنف ولا عدوان على الآخر في الموقف، معناها إنك بتأكد ذاتك و بتحمي حدودك الشخصية وده سلوك إيجابي.
وإذا كان الطرف التاني مش متقبل منك ده فهنا مش بتكون مشكلتك تعبيرك عن رأيك خالص!.
فبلاش تتنازل عن حق أصيل لك في علاقاتك الشخصية بدافع الشعور بالذنب..

24/08/2025

الشعور بالذنب أوقات بيكون في غير محله؛ بمعنى إنك تحس إنك المذنب بطريقة ما في بعض المواقف الحياتية ولكن فعليا إنت مش مذنب ولا مسئول عن الخطأ.
الشعور بالذنب لو في غير موضعه ممكن يخلي إحساس البني آدم مننا بقيمة نفسه وأهمية وجوده ومنفعته يقلوا؛ لأنه مجرد ما بقى في غير موضعه هيدفع الفرد لسلوك مش في صالحه زي مثلا..
كثرة الاعتذارت على أخطاء لم يرتكبها
تراجع في تأكيد ذاته، وإنه يدافع عن حقوقه
تدني إحساسه بقيمته وده هيخليه يقبل بأقل مما يستحقه، أو يؤدي بما هو أزيد من طاقته على التحمل فيحترق نفسيا وغيرها من السلوكيات
الشعور بالذنب اللي في غير موضعه ده بيكون متسبب أساسي في تفكيرك بشكل خاطيء؛ بتفكر في الأمور بطريقة تدفعك لشخصنتها، بتشوفها كلها على مقاسك انت بس
فيكون حكمك وإدارتك لأمور حياتك مشوه، بمنطق مش سليم!.
ببساطة بتشيل نفسك الليلة كلها حتى لو ماتخصكش أبدا..
شعور الذنب بالشكل ده بيكون وش القفص
تحته بتكون مشاعر تانية أتقل زي مشاعر الخزي ومتوقع بعدها العار.
الوعي ده هيخليك تقدر تتحكم في سلسلة المشاعر غير الملائمة؛ بمعنى تقدر تحلل وتفسر..
أنا ليه في الموقف ده حسيت بالذنب؟
هل أنا المسئول عن النتائج؟
هل أنا المتسبب في الحدث؟
هل الموقف يحتمل تفسيرات تانية غير رؤيتي؟
هيساعدك هنا إنك تحلل وكأنك بتتكلم عن شخص تاني غيرك بيمر بنفس ظروف موقفك
من خلال إجاباتك هتقدر تحكم بشكل سليم هل شعورك بالذنب هنا في موضعه بالتالي تتحمل مسؤولية تصحيح أفعالك؛ ولا في غير موضعه بالتالي تتعلم إزاي تصحح خبراتك الانفعالية وتعيد تنظيمها، وتفكر بشكل عقلاني..🌱🌸

23/08/2025

أوقات بيجي على بالك شوية أفكار مزعجة
الفكرة بتخبط راسك في ثانية وتروح بعدها لو مامسكتش فيها..
الفكرة المزعجة السريعة دي أوقات بيبقى شيء كويس إنك تسيبها تمر؛ زي ما جات بسرعة هتمشي بسرعة لو ما قعدتش تحلل فيها وتشبط..
المهم دايما عيش لحظتك 🌱🌸

21/08/2025

دواسة الفرامل..
كثرة التعرض للأحداث الضاغطة _دون وعي بخطط التعايش والمواجهة_ بيدفع الجسم إنه ياخد نفس خبرة الأحداث الصدمية!.
بمعنى من كتر التعرض للضغوطات الحياتية بيتم تخزين هذه الخبرة على أنها خبرة صدمية.
و نتاج ده عدد من المشكلات اللي بتواجه الإنسان ومش بيكون عارف امتى ابتدت بالظبط وايه هي العوامل اللي سببتها بالتحديد
المشكلات دي بتكون متمثلة في
سلوكيات تجنب، عزلة وانسحاب، أفكار سلبية، انفعالات زائدة، أفكار انتحارية أو محاولات، توتر في شبكة العلاقات الاجتماعية، توتر وشد عصبي واستثارة زايدة اتجاه أي أمر يقرب لضغوطاته الحالية، كوابيس أو أحلام مزعجة، صور ذهنية عن الفترة الحالية الضاغطة إلى غيرها من التفاصيل اللي بتتقيم وتتفحص كويس عند الفرد صاحب هذه الخبرة.
علشان كده مهم تدوس فرامل قبل ما تتفرم في ضغوطات متكررة ومستمرة دون حل لها؛ وهنا من ضمن اللي بتتعلمه علشان تقدر تواجه:
هو مهارات حل المشكلات ومهارات تحمل الكرب النفسي.. 🫒🌸
علشان ماتتحولش من مجرد حدث ضاغط كل الناس بتمر بيه لخبرات صدمية..

20/08/2025

أهلا يا عزيزي.. هل تؤمن بهذا ؟ 🌸
"انفعالاتي ليست شيء خطير كي أفزع من مجرد شعوري بها؛ بل دلالة إنسانيتي!.
سأجعلها تمر وأتقبل وجودها داخلي كما يمر بصدري ذرات الشهيق والزفير؛ فالأمر مماثل حيث لا يمكنني العيش دونها"

هل تسطيع تطبيقه؟ 🫒

19/08/2025

تتجلي روعة ممارسات التعقل في تنشيط ذهنك لأن ينتبه دوما لواقعك وما أنت عليه الآن؛ كما تجعل وميض الذكريات المؤلمة يخبو بسلاسة دون أن تجتر على غرارها المزيد والمزيد!.
أن تكون حاضرا منتبها يعني ذلك أن تكون صادقا ذو أثر يفتقد..🌱🌸

31/07/2025

عن القلق الآن وقديما..

إن الطفل داخلنا الذي اعتاد القلق كوسيلة للنجاة مرارا وتكرارا؛ حيث كان القلق الزائد هو ما يجعله يعتقد أنه يمكنه السيطرة عند تفاقم الأمور؛ لم يكن الأمر منه محاولة طمأنينة، بل كان أشبه بالوقوف دوما على قدما واحد استعدادا للعدو في أي اتجاه وبعيدا عن الخطر المهدد له. تلك الوسيلة أصبحت نمطا حياتيا اتجاه مجريات كثيرة في الأيام العادية ولاشيء فيها يستحق القلق؛ ولكن الطفل داخلنا بحكم العادة يعايش إنذارات القلق دون أن ينتبه إلى تقييم الأمر؛ وهنا كي يتدخل الراشد لإدارة بوصلة انفعال القلق الطاحن عليه أولا أن يعي التاريخ قبل أن يقيم انفعال هذه الطفل!
متى بدأ،، وكيف كانت هذه الوسيلة تنجيه قديما،، ولماذا لم تعد بالمنفعة ذاتها الآن؟
حين ينظر الراشد إلى تاريخ انفعال الطفل داخله عندما يبدو غير ملائما؛ سيدرك أنه لابد أن تتمثل في نظرته لذاته الرحمة واللطف والحكمة؛ كي يتمكن من إعادة تنظيمها من جديد.

03/07/2025

بفكرك إن التربية مش لسن الطفولة
التربية مستمرة معانا طوال رحلة التعلم.
في علاجك النفسي بتلاقي نفسك بتهذب سلوكياتك، ويتربي نفسك على أمور أهلك ربوك عليها خطأ أو أغفلوا تربيتك فيها ومن ضمن أساسيات العيش.
علشان كده متزعلش لما تخلف طفل وتقول ايه ده انا بتربى معاه..
بتربى من أول جديد ازاي أهدي انفعالاتي، واتحكم في سلوكياتي الاندفاعية، وازاي بعتذر لما أخطأ في حق طفلي، وازاي بحترم كونه بني آدم، وازاي بسامح نفسي على أخطائي واتعلم منها..
كل ده من أصول التربية وهي رحلة مستمرة ومثمرة..🌸

24/06/2025

كنت بشتغل من مدة في مؤسسة تعليمة، إدارتها كانت بتقدر مجال علم النفس وأهمية وجوده وأهمية تنمية مهارات الأطفال، في صيف قررت الإدارة تعمل ورش مفيدة للأطفال في بناء شخصياتهم.
فأنا أخدت تنمية مهارة التعبير عن المشاعر.
الورشة اتقسمت جزء نظري مع أولياء الأمور في محاضرة تعليمية مركزة على أهداف معينة والجزء العملي كان خاص بإكساب الأطفال مهارات التعبير عن المشاعر، والتعرف عليها باختلاف أسمائها، وازاي نتصرف.
فكانت الأدوات المستخدمة في الورشة معتمدة اساسا على التمثيل والقصص والرسم والتلوين.
ساعدتني أخصائية التربية الخاصة وقتها في محتوى مرئي مناسب للأطفال في عمر( 5 _7) سنين وانا تكفلت بباقي الأدوات واستمرت الورشة على 4 أيام.
فيه طفل كان عنده 5 سنين في وقت التعبير بالرسم والألوان، لاقيته بيقولي انا مش عارف برسم ايه، انا مابعرفش ارسم.
الملاحظ وقتها ان كل الأطفال كانت بتحب وقت الرسم ده واختيار الألوان المفضلة عندهم الا هو كان بيكرر انه مش بيعرف زيهم.
رسمه كان شخابيط في الأول طمنتنه وشجعته قولته مش لازم نرسم لوحة، ممكن ترسم نفسك او بابا او ماما او أي حد من اخواتنا في البيت.
ارسملي وانتو قاعدين بتتغدوا، او بتسمعوا التليفزيون.
ولما كان يطلع أي رسمة كنت بشجعة جدا وبخلي باقي زمايله يسقفوله.
المهم لاحظت ان لما بشغل الجزء اللي فيه اغنية عن المشاعر وتمثيل انه بيتفاعل وبيندمج وبينبسط أكتر مع اللي سامعه وشايفه، فشجعت أدائه أكتر فهو اتحمس أكتر.
قبل اخر يوم كنا يعتبر في اليوم التالت للورشة، لاقيته جاي مبسوط جدا وهو ماسك ورقه في ايده وبيقولي انا بقيت بعرف أرسم. 🌼🤍
انا انبسطت جدا وقتها علشان كان ممكن يخرج من الورشة دي وهو لسه شايف أنه مش بيعرف يعبر عن مشاعره بالرسم.
أينعم الرسم مش الطريقة الوحيدة في التعبير عند الأطفال لكن بشوية تشجيع وزيادة دافعية عنده قدر يتعلم ازاي يعبر بالرسم، وقدر يندمج مع زمايله وقت الرسم على ترابيزه واحده ويشاركلهم الألوان، ويستنى لو حد معاه اللون اللي كان عايزه؛ بدل ما كان ف أول يوم قاعد ف ترابيزه لوحده بعلبة ألوان لوحده وشايف أنه مش بيعرف يعمل زيهم.
والنتيجة دي ماكنتش هتحصل لو أنا من الأول أهملت تشجيعه أو استعجلت اندماجه.
بقول كده علشان أوضح حاجة مهمة جدا..
الأطفال كائنات نهمة للتعلم والاكتساب والتقليد بس محتاجة الصبر وتكرار المحاولات بصدق وقلب رحيم 🤍

#

23/06/2025

الأخطاء جزء من رحلة التعلم.
وارد ومتوقع جدا أرتكب أخطاء وأنا بمارس أي نشاط، مهارة، مهمة إلخ..
والمتوقع مني اني أصلح هذا الخطأ وأعدل طريقتي بحيث استفيد منه وبالتالي أكون أكثر وعيا وانتباها المرة الجاية وأنا بمارس الفعل ده وهنا بيحصل التعلم.
لكن ممكن مجموعة من أخطاء التفكير تعوق حركة التعلم دي وانسيابها من حين لآخر.
لفظة أخطاء تفكير معناها انه بعتقد وبتصور في أفكار غير واقعية تماما عن أمر معين وغير واقعية معناها منافية للمنطق والواقع الحياتي بتاع خلقة البشر.
ازاي ممكن يكون عندي أخطاء تفكير تعوق حركة التعلم اللي بتكلم عنها ؟
إني اعتقد اني لو أخطأت مرة يبقى هفضل طول عمري أخطئ.
أو إني لو أخطأت معناها اني غير كفء وغير مؤهل.
أو إني لو أخطأت معناها اني عندي نقص شديد جدا
أو إني لو أخطأت ابقى عار ولازم اتخفى.
كل هذه المعتقدات المتمثلة في أخطاء التفكير هتعوق حركة تطويري وتعليمي بشكل مرتاح.
لأنها هتكون عوامل ضاغطة مع الوقت تدفعني إلى سلوكين
يا أنكر مسئوليتي اتجاه افعالي، يا إما أحمل أطنان من الهم والذنب طوال رحلة تعلمي.
وده أو ده أشكال من العوائق اللي تخلي تعلمي متقيد.
علشان كده محتاجة أقول..
الوعي بتصرافاتنا وقت الخطأ مهم جدا وبيعكس طرق تفكيرنا وتوقعاتنا من نفسنا.
فلو لاقيت نفسك بتلومها وبتستحقرها وبتغرق في أطنان من مشاعر الذنب وكراهية الذات وقت خطأك، أو بتتنصل تماما من مسئوليتك؛ يبقى هنا محتاج تقف مع نفسك وتعدل هذا الفكر وما يترتب عليه من سلوكيات.

22/06/2025

مع زيادة الساعات اللي بقينا نقضيها على السوشيال ميديا باختلاف ال apps بقى ينط للفكر عند بعضنا لما نمر بمشاعر ملل، إحباط، استياء، أو حزن؛ إن المشاعر دي مالهاش إلا تصريف واحد وهو إننا نسمي نفسنا مكتئبين.
مع إن الاكتئاب كمرض نفسي علشان يتم تشخصيه بيلزم له مجموعة محكات تشخيصيه عند الطبيب النفسي، ومجموعة استخبارات نفسية عند الأخصائي النفسي.
ولكن بردو طول مدة انعزال الشخص عن المجتمع الحقيقي اللي هو الناس والأهل والتفاعلات الحية المباشرة مع الأصدقاء يخيله يدخل في أعراض الاكتئاب أسهل من غيره اللي بيعمل العكس.
علشان كده ماتستهونش بلطافة الريلز، وقعدانك لوحدك قدام الشاشات، وكنسلة الخروجات واللقاءات، أو حتى تفاعلك مع الشارع والطبيعة.
كتير من الأبحاث أثبتت انه انعزالنا عن الواقع المحيط قدام شاشة سوشيال ميديا هيخلينا عرضة بشكل أكبر للإصابة بأمراض زي القلق والاكتئاب والأرق وضعف التركيز والانتباه و ضعف مهارات التواصل الفعالة.
قبل ما تقول انك مكتئب بص بعيونك على lifestyle حياتك واللي محتاج تعدله إبدأ فيه من دلوقت..🌼🪴

12/05/2025

عن الاكتئاب..
عندما يتملك الاكتئاب منك تحرك به!.

في الوقت الذي لا يستطيع فيه المرء أن ينهض من فراشه بمؤشر طاقه يقترب من الصفر؛ عليه أن يجبر قدميه أن تطأ الأرض، يتحسس خطواته عليها بصبر ويروي نبتة مفضلة عنده، ويقدم مساعدة بسيطة لآخر..
بهذا الفعل الجيد ينتبه أنه بإمكانه الحفاظ على شيئا جميلا حيا و لهذا السبب يستطيع أيضا أن يبقي على نفسه حيا لليوم..
حتى لو كانت الخطوات متعثرة، حتى لو كانت بطيئة، تلك الخطوات هي عنفوان الطاقة في ظل وجود الاكتئاب الجليس داخلك وتتحرك به.. لذلك كل الدعم 🙏🌼

Rania Mabrouk, Clinical Psychologist

25/08/2025

24/08/2025

23/08/2025

21/08/2025

20/08/2025

19/08/2025

31/07/2025

03/07/2025

24/06/2025

23/06/2025

22/06/2025

12/05/2025

Address

Website

Alerts

Shortcuts

Share

Category