12/02/2026
انا بفتح التلاجه واحده وبقفلها واحده تانيه خالص 🤭
اصل انا بفتح التلاجه وانا بدور على سناكس خفيفة كده تشبعني 🥰، بقفلها بقي و انا واكلة رغيفين علي الفراخ اللي باقية من الغدا و شوية جبنة و حتة حلاوة 🙈, دا غير كيس الشيبسي اللي لقيته في المطبخ فاستوليت عليه عافية كده، وبعد ما اخرج من المطبخ افتكر الاغنية بتاعة باظت ... باظت خالص😂، لا مبدهاش بقي ما دام كده كده باظت يبقي شوية لب و سوداني عشان السهرة تحلي.
السهرة دي كده تعملها بالميت بتاع 2000 سعر و انت طالع اه والله زي ما بقولك كده 😂
يعني لفتين حوالين استاد القاهرة الدولي من برة , اه من برة مش من جوة 😅
➖➖➖➖➖➖➖➖
الكارثة دي بتحصل ليه و نحلها ازاي؟ انا اقولك🧐.
من اكبر اسباب المشكلة دي هو زحمة اليوم نفسه من مسئوليات في الشغل او البيت ممكن تخليكى متاكليش كويس , تيجي بالليل بقي تبدأى تحسى انك جعانة او محتاجة تكافئى نفسك 🥰 بحاجة حلوة اخر اليوم دا غير ان السهر من اكبر الاسباب اللي بتخلينا نجوع 😉.
انا مش هقولك اقفلى التليفزيون و نامى بدري و لا نظمى اكلك خلال اليوم مع انها حلول صح كلها بس مش كلنا هنقدر عليها.
لأ عيشى يومك براحتك خالص بس استعدى لجوعك قبل ما يهاجمك 👌
♦ ما دام انت كده كده عارفه انك بتجوعى بالليل جهزى لنفسك حاجة تاكليها من بدري , ليه بقي بدري؟ عشان تبقي بتقررى بعقلك ميبقاش جوعك اللي بيحركك فتجهزى حاجات تشبعك ومتبقاش سعراتها كتير زى انك تقطعى شوية فاكهه او طبق سلطه فلما تفتحى التلاجه تلاقيه ادامك.
♦احساس الجوع نفسه بييجي من اشارات في المخ , فالمخ بيوجهك بشكل اكبر ناحية الحاجات الحلوة المسكرة عشان هي مصدر عالي للسكر , سواء بقي شوكولاتة او بسكوت او حلويات او مخبوزات … متسمعيش كلامه ساعتها علشان هيوديكى ورا الشمس والله😂.
♦لما تجوعى …. اشربى ميه، طب اقولك علي مفاجأة ؟ انتى ممكن تبقي عطشانه مش جعانه اصلا 😂 , إشارات الجوع و العطش بتطلع من نفس المركز في المخ فأحيانا الجسم مش بيتعرف عليها صح , الحل انك تشربى شوية ماية حلوين و تستني شوية عشان تتاكدى ان دا جوع مش عطش
♦لو فضلتى جعانة بعدها كلى حاجة مفيدة تشبعك و متزوديش وزنك و افتكرى ان هدفك من الاكل اصلا هو سد احساس الجوع مش اكتر , فمش لازم نسده بسعرات تقعد لنا في جنابنا 😂، ممكن مثلا اومليت بالبسطرمة او بالخضار… من غير عيش طبعا هيشبعك لحد الصبح ,او جبنة عليها سلطة خضراء … برضه من غير عيش 🤫.
احسبيها صح ... هتعشيها صح 💪
#تخسيس
