What are the opening hours?

Monday 9am - 9pm Tuesday 9am - 9pm Wednesday 9am - 9pm Thursday 9am - 9pm Sunday 9am - 9pm

إسراء زين- Israa Zain, Cairo (2026)

10/03/2026

🌙 مقرأة العشر – ختمة تلاوة في العشر الأواخر

"إنها أيام وداع… لا أيام ضياع"

مع بداية العشر الأواخر من رمضان نبدأ بإذن الله ختمة تلاوة كاملة للقرآن خلال 10 أيام.

📖 نقرأ يوميًا 3 أجزاء
⏰ في 3 مواعيد مختلفة حتى يناسب الجميع:

▫️ الموعد الأول: 10:30 مساءً
▫️ الموعد الثاني: 4:30 فجرًا
▫️ الموعد الثالث: 3:30 عصرًا

💗 يمكنكِ حضور الموعد المناسب لكِ أو أكثر من موعد.

🌸 نبدأ الليلة بإذن الله
فمن تحب المشاركة معنا تكتب "نسائم العشر" في التعليقات وسنرسل لها رابط الجروب.

نسأل الله أن يجعلها ختمة مباركة وأن يتقبل منا ومنكم 🤲

جدول المقرأة في التعليق الأول

إسراء زين 🌸

19/02/2026

🔴 نفسك تختمي في رمضان بس بتكسلي لوحدك و مش بتلتزمي؟ 🤔

🔹 بتخافي تكون قرائتك فيها أخطاء و لحن جلي و محدش بيصلحهالك؟✅

🔸 الصحبة بتشجعك على الاستمرار و الإلتزام؟🎯

🔹 لما بتنتظمي في التلاوة بتركيز بتقدري تستحضري واحدة واحدة التدبر و المعاني؟😍

🟡 يبقى مقرأة قانتات هي الحل 👌

🔹 مقرأة قاتنات : هى مقرأة شهرية نختم فيها القرآن كل شهر عربي تلاوة
و نسعد باستكمالها في رمضان للعام الثاني على التوالي بفضل الله 😊

🔸 تقوم على إدارة المقرأة معلمة متقنة حتى يتسنى لها متابعة القراءة
و تصحيح أخطاء التلاوة خاصة الأخطاء الجلية👌

🔴 الحد الأقصى: عشرين طالبة في المقرأة الواحدة

⚪مدة المقرأة : من ساعة ونصف إلى ساعتين

🔸 تقوم كل طالبة بقراءة وردها أمام المعلمة
و تتابع بقية التلاوة مع زميلاتها فتتم تلاوة الجزء كاملا

🔴 تبدأ المقرأة في ليلة ثالث أيام رمضان ( الجمعة مساء)
و نختم بإذن الله في الليلة التاسعة و العشرين من ليالي رمضان المبارك .

⚪ تتم المقرأة من خلال برنامج زووم

⚪ تقوم الطالبة بفتح الكاميرا في وقت قرائتها لتصحيح التلاوة

🔴 يجب الانتباه لعدم وجود أي رجال بالقرب من الطالبة أو بجوارها حفاظا على خصوصية معلمتها و أخواتها من حيث صوتهن أو صورتهن.

🟡 المقارئ لها مواعيد متنوعة على مدار اليوم
و لكن العدد محدود فبادري بالالتحاق بالركب .

🔴 المقرأة لا تغني عن حلقات تصحيح التلاوة مع المعلمات بعد ذلك؛ لأن التركيز فيها لا يكون على مقدار القراءة
و لكن على تصحيح التلاوة و لكن الجمع بينهما يسير بإذن الله ❤️

🟡 *لمعرفة المواعيد المتاحة وقيمة الاشتراك برجاء التواصل على الخاص ( على رسائل الصفحة)*

دمتم في وعي و سعي و إزهار
إسراء زين 🌸

#قانتات

05/02/2026

🛑 وقفة مع النفس ❗

ياترى،

امتى أخر مرة حاسبتي فيها نفسك؟!..

كتير مننا بيبقي مهتم بتقييم شغله،📝

علشان عامل حساب التقرير السنوى اللي بيحدد هل الشخص ده هيحصل علي الترقية ولالا ؟🎯

هل هيزيد في المرتب ولا لا؟🤩

⚪ولله المثل الأعلى طبعاً 🤍

🛑ياترى احنا مهتمين برضه بتقييم أعمالنا،🤔

وجاهزين ليوم العرض علي الله ؟

🌸هل مستعدين و بنحاسب نفسنا ؟📝

🌸هل هيبقي فيه فرصة نتوب و نعوض تقصيرنا؟!....

ولا هيبقي فات الأوان.............❕

كتير مننا بيتحجج أنه معندوش وقت ، 😔

🔸ولكن ❕

اللي اكتشفته علي مر حياتي،

إن الإنسان لما بيبقي عايز يعمل حاجة، بيعرف يلاقيلها وقت.💪🏻

🛑ماذا لو خصصتي وقت بسيط قبل نومك،

و حاسبتي فيه نفسك❕📝

🌸ياترى أخبار الفرائض ايه ؟

أخبار الذكر ايه ؟

🌸ياترى قصرتي ف ايه؟

و ازاى تعالجي التقصير ده ؟

🌸ياترى وقعتي في ذنب ايه ؟

وتتوبي منه وتستغفرى

ياترى ................ إلخ

🛑تخيلي شكل حياتك هيختلف ازاى لو استمريتي علي العادة دى يومياً؟🎯

🌸 يالا انتهزى الفرصة دلوقتي
في شهر شعبان ،

وراجعي وحاسبي نفسك عن كل اللي فات ،

وتوبي الي الله وابدئي صفحة جديدة .😊

🔹دون تفريط يخليكي متحاسبيش نفسك و لا تراجعيها تماما و تغفلي عن الأمر

🔸و لا إفراط تنشغلي فيه بالمحاسبة و الشعور بالذنب أو جلد الذات دون توبة أو استغفار أو سعي
نرجو من الله إنه يغفر لنا به و يجبر تقصيرنا فيما فات

راجعي--- توبي و استغفري--- ثم

اتبعي السيئة الحسنة 😍🥰🥳

و اسأل الله أن يتقبل منا جميعا

🛑و خلي الآية دى قدامك دايمآ ،

عشان كل ماالحياة تلهيكي ،

تفتكرى وترجعي 😊

🌸قَالَ تَعَالَى: {يَا أَيُّهَا الَّذِينَ آمَنُوا اتَّقُوا اللَّهَ وَلْتَنظُرْ نَفْسٌ مَّا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُون}

دمتم في وعي و سعي و إزهار
إسراء زين 🌸

04/02/2026

🛑 رمضان بدون تشتت 🎯

كل سنة وأنتِ طيبة.. رمضان على الأبواب، ومعاه بتبدأ خناقة القنوات والبرامج.

وطبعاً لأنك "زهرة" واعية، قررتي تبعدي عن المسلسلات.. برافو عليكي! 👏

🔴بس خدي بالك من "الفخ" الجديد.. 🤔

لما الشيطان يلاقيكي قفلتي باب المسلسلات، مش هيستسلم،👇

هيجيلك من باب " البرامج الدينية"!

👈 اللعبة فين؟

للأسف، كثرة البرامج الدينية والمفيدة بيعمل حالة "تشتت"

بتلاقي نفسك عايزة تشوفي ده وتسمعي ده.. والنتيجة؟👇

🔸الوقت بيتسرق، وتلاقي يومك خلص وأنتِ "بتتفرجي" بس،🥹

ومفيش وقت للعبادة (القرآن، الذكر، الصلاة).

🔹الشيخ الحوينى ضرب مثال في "الإسراف في المباح"👇

بالناس اللى بتسرف في الأكل في رمضان ، صحيح الأكل مباح ، لكن👇
الإسراف في الاكل بيخلينا نكسل عن الصلاة والعبادات في رمضان.

🛑 طيب والحل؟ نحرم نفسنا من البرامج المفيدة؟

أكيد لا، بس بذكاء:

🔹اختاري برنامج واحد أو اتنين بالكتير: ركزي فيهم واستفيدي بجد.

🔸بقية البرامج استنيها بعد رمضان:

اليوتيوب مش هيطير، ممكن كل

شهر تتابعى برنامج أو سلسلة مفيدة على اليوتيوب

🟡وافتكرى أن رمضان مبيتعوضش🩷

🔸وشاركينا في التعليقات 👇

ايه البرنامج أو البودكاست اللى
ناوية تتابعيه في رمضان بإذن الله؟

دمتم في وعي و سعي و إزهار
إسراء زين 🌸

03/02/2026

🔴التغيير رحلة ...مش ضغطة زرار 🔁

تخيلي إنك راكبة طيارة ماشية
بسرعة 1000 كم/ساعة.. ✈️

هل ينفع الطيار يدوس "فرامل" فجأة وينزل بيكي على الأرض في ثانية؟ ❌ طبعاً مستحيل!

ده بالظبط اللي بنعمله في نفسنا، بنبقى فاكرين إننا أول ما نشوف هلال رمضان،

هندوس على زرار 🔁وهنتغير فجأة 🙄

🟢نظرية "المروحة" للشيخ محمد خيري

🔸الشيخ كان بيقول :

تخيلي المروحة وهي شغالة على أعلى سرعة، لو فصلتي الكهرباء فجأة،
المروحة هتقف في لحظتها؟

ولا هتفضل تلف شوية لحد ما تقف؟

وهو ده بالظبط اللي بيحصل معانا 👌

🔹عشان نغير الحاجات اللى متعودين نعملها هتاخد وقت ⏰

وعشان كده الأفضل اننا نبدء من دلوقتي بالتدريج 📈

🟢يعنى مثلاً لو عايزة تبطلى

تتفرجى على مسلسلات

أو تغيري طريقة لبسك للأفضل

أو عايزة تتعودى على السنن والقيام

ابدئي بالتدريج من دلوقتي💪

ومتستنيش لما يبدء رمضان عشان

تاخدى خطوة التغيير🎯

🟢وشاركينا في التعليقات 👇

🔸ايه الحاجة اللى ناوية تاخدى فيها خطوة التغيير من دلوقتي ؛ عشان نشجع بعض 💪

دمتم في وعي و سعي و إزهار
إسراء زين 🌸

02/02/2026

🔴وداعاً لحيرة كل رمضان"🌙

إزاي تجمعى بين الختمة والتدبر؟

🔸كل سنة بنسأل نفسنا نفس السؤال🤔

"أركز إني أختم القرآن أكتر من مرة؟

ولا أركز على التدبر ؟

🔹 الحيرة دي بتخلينا نضيع وقت، ونحس بتشتت.
وف الآخر ممكن منلحقش نخلص ختمة واحدة للأسف🥹

🔹بس لحسن الحظ قابلتنى فكرة على قناة ف اليوتيوب ألهمتنى بالحل؛ لأنها👇

بتجمع بين القراءة والتدبر والحفظ كمان

💡 الفكرة هى : بدل ما نشتت نفسنا، هنمشي في مسارين:👇

🔹المسار الأول : قراءة وردك اليومي العادي عشان تختمى القرآن، حسب عايزة تختميه كام مرة

🔹المسار الثاني : تختاري سورة واحدة (زي سورة الكهف مثلاً) وتكون هي "مشروعك" طول الشهر (حفظ، تفسير، وتدبّر).

🔸 الفكرة دى ألهمتنى أننا مش بس ممكن نطبقها في رمضان....

🔸 احنا ممكن نطبقها في كل شهر وشوفى وقتها حصيلة السنة هتكون عاملة ازاى ؟

🟢طب ياترى ننفذ الفكرة إزاي من غير ضغط؟

🔸الموضوع مش محتاج ساعات،

محتاج "نظام":📝

🔹وقت الحفظ: خليه بدري (بعد الفجر مثلاً) والذهن لسه صافي.. نص ساعة كفاية.

🔹وقت التدبر: خليه بليل بعد التراويح، كوباية شاي وكشكولك الجميل، واكتبي و شوفى ازاى تطبقي اللى اتعلمتيه في يومك و في حياتك عموماً.

🟡ولو الأوقات دى مش مناسبة معاكى ممكن تختارى الوقت اللى يناسب ظروفك

🔴 قنوات هتساعدك في مشروعك💪

لو محتارة تبدئى تدبّر منين أرشحلك القنوات دي على اليوتيوب 👇

🔹قناة د. أحمد عبد المنعم

🔹قناة م. فاضل سليمان

🟡وشاركينا في التعليقات 👇

🔹ايه رأيك في الفكرة ؟

🔹ولو هتطبقيها ايه السورة اللى هتكون مشروعك في رمضان ؟

دمتم في وعي و سعي و إزهار
إسراء زين 🌸

01/02/2026

🛑 السر في جملة واحدة..

تفتكرى إيه هي؟! 🤔

⚪عارفين فقرة الفتاوى اللي بتيجي بعد العصر في إذاعة القرآن الكريم كل رمضان؟

اللي الناس بتفضل تسأل فيها الشيخ أسئلة كتير؟

الفقرة دي رغم جمالها، بس لفتت نظري لحاجة غريبة .. 👇

🔴معظم الأسئلة بتلف وتدور حوالين 👇

"ينفع أصوم لو حصل كذا؟؟🌙

"طب ينفع أصلي وأنا كذا؟؟؟

🔹والحقيقة إن كل الأسئلة دي إجابتها بتتلخص في جملة واحدة بس، وهى :👇

🔸 (تعلم الفقه)

تعلم فقه الطهارة والصلاة والصوم هيعرفنا أساسيات في دينا المفروض كل مسلم يكون عارفها،

هيساعدنا نعرف الصح من الغلط و نأدى عباداتنا بطريقة صحيحة.

💡 ليه تستنى لرمضان؟ ابدئي من دلوقتي!

🔹مش محتاجة تدوري كتير، ممكن تبدئي ب👇

"سلسلة شرح كتاب الفقه الميسر" للمهندس علاء حامد.

🟡وشاركينا في التعليقات لو 👇

فيه كتب أو سلاسل تانية ساعدتك تفهمى الفقه ببساطة عشان الكل يستفيد! 🩷

دمتم في وعي و سعي و إزهار
إسراء زين 🌸

31/01/2026

🔴تخيلي لو فيه شركة بتسحب من رصيدك مبلغ كل يوم وأنتِ مش واخدة بالك..

ياترى هتعملى ايه ؟🤔

🔴للأسف.... ده اللي السوشيال

ميديا بتعمله في رصيد عمرك،

وطاقتك

🔸الدراسات بتقول إن السوشيال

ميديا هي العدو الأول لتركيزك،

وبتخليكي دايماً مضغوطة.

⚪ومش بس كده هى كمان 👇

بتسرق ميزانيتك: بإعلانات وحاجات مش محتاجاها.

بتعطّل خطواتك: كل ما تنوي تلتزمي، تسحبك لفيديو يرجعك لورا.

🔴طب ياترى ازاى تستفيدى منها من غير ما تأذيكى؟👇

🔙💡 روشتة الإنقاذ

(إزاي تمسكي العصاية من النص؟)

1️⃣ واجهي الحقيقة:

شوفي "Screen Time" في إعدادات موبايلك.. الرقم هيفوقك! 🔍

2️⃣ فلترة بضمير:

أي صفحة بتحسسك بالنقص أو بتضيع وقتك.. "إلغاء متابعة" فوراً.

3️⃣ افهمي اللعبة:

اقرئي عن "إدمان الدوبامين"
واعرفي إزاي السوشيال ميديا بتسحلك معاها.

4️⃣ صعّبي السكّة:

امسحي التطبيق وافتحي من المتصفح (جوجل كروم) عشان تكسلي تفتحي كتير. 🔐

5️⃣ التدرج سر النجاح:

قللي استخدامك نص ساعة كل يومين تلاتة 🎯

6️⃣ املي وقتك صح:

استبدلي السوشيال ميديا بحفظ قرآن، كورس جديد، هواية، أو قعدة مع أهلك.

7️⃣ خلفية الموبايل:

خليها صورة تذكرك بهدفك أو بذكر الله عشان "تفتكرى" أول ما تفتحي.

✨ وافتكرى إن 👇:

🔹الدقيقة اللي بتروح مبترجعش..

واننا هنتحاسب على كل دقيقة في حياتنا

🔸و إن عشان تستغلي وقتك في رمضان،

لازم تتدربي من دلوقتي. 💪🌙

ومتنسيش تشاركينا في التعليقات..👇

🔹إيه أكتر تطبيق بياخد من وقتك؟

🔸وجربتي قبل كدة تقفليه يوم كامل؟

دمتم في وعي و سعي و إزهار
إسراء زين 🌸

29/01/2026

🔴1 ÷ 3 .. حسبة بسيطة لترتيب يومك⏰

كنا بنتكلم البوست اللي فات عن الهدف اللي حابين نكمل بيه بعد رمضان 🎯

بس اكتشفت إن أكتر حاجة بتعطلنا هي جملة: 👇

🔸 "مفيش وقت!" ⏰

اليوم بيطير مابين مدارس، شغل بيت، ولاد،
ولو بتشتغلي كمان يبقى اليوم ضاع في الزحمة 😧.

🟢 طيب لو قولتلك على "سر" صغير يلملك الدنيا؟👌

🔹الفكرة دي سمعتها في درس للشيخ محمد خيري👇

وهي إننا نقسم اليوم لـ 3 فترات،
كل فترة 8 ساعات أو حسب الصلوات . مثلاً:

1️⃣فترة الصباح (من الفجر لـلظهر )

2️⃣فترة النهار (من الظهر
لـلعشاء )

3️⃣فترة المساء (من العشاء
للفجر ) : واللي بيكون من ضمنها وقت النوم والراحة.

بتوزعى مهامك على الفترات دي،
وطبعاً من ضمنهم وقت النوم والراحة على مدار اليوم .

🔴 ومش شرط تلتزمي بـ 3 فترات بالظبط،

ممكن تقسمي يومك لـ فترتين أو4
فترات، المهم اللي يناسب ظروفك.

👈 طيب إيه اللي هنستفيده من التقسيمة دي؟👇

1️⃣وداعاً لـ "اللف حوالين نفسك":

هتبقي عارفة كل فترة وراكي فيها
إيه، فتركيزك هيزيد ومش هتبقى تايهة.

2️⃣فرصة تانية كل يوم:

لو "بوظتي" أول اليوم أو كسلتي،
مش هتقولي "اليوم ضاع وهبدأ من بكرة".. لا،

انتِ لسه معاكي فترات تانية تقدري تنقذي فيها اللي فاضل 😊.

3️⃣ترتيب الدماغ:

بدل ما اليوم كتلة واحدة سايحة في بعضها،

هتحسي إن اليوم فعلاً طويل وفيه بركة.

4️⃣ذكاء التوزيع:

هتحطي المهام الصعبة في الفترة اللي تكوني فيها في قمة نشاطك،
مش تسيبيهم للآخر وأنتِ مهدودة 😦.

🔴مهمة النهارده:👇

🔸جربي لما تكتبى الـ To-Do List بتاعتك،
تقسميها بالفترات و شوفي الفرق👌

🔸وشاركينا في التعليقات 👇

هل عجبتك الفكرة؟

وناوية تقسمي يومك إزاي؟

دمتم في وعي و سعي و إزهار
إسراء زين 🌸

28/01/2026

🛑 رمضان مش مجرد شهر في السنة ! 🎯

عارفة شعور إنك كل سنة بتكتبي

نفس لستة الأهداف في رمضان،

ونفس الحماس بياخدك، وفي الآخر

بتلاقي نفسك بتعملي نفس

الحاجات وبتطلعي بنفس النتيجة؟ 🥺

لو ده بيحصلك، يبقى إنتي محتاجة

تغيري "النظارة" اللي بتشوفي

بيها رمضان🤓

🛑الشيخ محمد خيري كان بيقول :

"رمضان محطة مميزة وليس وجهة"

⚪يعنى ايه ؟ 🤔

يعنى تخيلي لو مسافرة إسكندرية وفجأة عديتى على بنزينة

وبدأتى بقى تفولى العربية وتشترى حاجات هتحتاجيها في طريق سفرك.

⚪هل البنزينة دى هى المكان اللى عايزة توصليله ولا محطة بتشحنك في الطريق ؟

🟢 وكذلك احنا وجهتنا هى تحقيق العبودية و الوصول للجنة

و رمضان محطة مميزة بتشحنا وننطلق منها

و نكمل الطريق مش نقف عند المحطة دى ❗

🔴لو فهمتى المعنى ده كويس

نظرتك لرمضان هتتغير 👀

لما تيجى تحطى أهداف مش هتبقى لرمضان وبس .....لا ........👇

🔸هتبقى عايزاها تكمل معاكى لبعد رمضان كمان وتتغيري بجد 💪

🔹هتبقى عارفة قيمة رمضان كويس، وأنها فرصة مميزة متتعوضش
ولازم نستغلها أفضل استغلال ☪️

🟢طيب برضه نعمل ايه ؟ 🤔

🔸ببساطة انتى محتاجة تحددى العادات والأهداف
اللى عايزاها تفضل مستمرة معاكى

🔹وتشوفى الغلطات اللى كانت بتعطلك في كل مرة عشان تحليها وتقدرى تتفاديها 💪

👈علي سبيل المثال 👇

1️⃣ لو نفسك في ورد قرآن يومي، بلاش صدمة أول يوم رمضان،

ابدئي بربع تستمرى عليه الأسبوع ده ،
وزودي الأسبوع الجاي..

2️⃣ اعرفي عدوك: 🚫

إيه اللي بيعطلك كل سنة؟
(قعدة التليفزيون؟ الموبايل؟ المطبخ اللي مبيخلصش؟)..

حددي العائق ده من دلوقتي وحطيله خطة بديلة.

🔴مهمة النهارده 👇

1️⃣هو إنك تقعدى مع نفسك وتحددى

ايه أكتر هدف نفسك تحققيه في رمضان وتستمرى عليه بعد رمضان ؟ 🎯

2️⃣ابدئي قسمى الهدف ده لأهداف صغيرة أوى .

3️⃣حددى الغلطات اللى كانت بتوقعك
وازاى هتقدرى تتفاديها 💪

🛑وشاركينا في التعليقات👇

بالهدف ده، وايه أول خطوة هتعمليها النهارده ؟

دمتم في وعي و سعي و إزهار
إسراء زين 🌸

27/01/2026

🔴فكرتى قبل كدة.. 👇

ماذا لو كان شعبان هو محطتنا الأخيرة؟ 😪

ماذا لو ملحقناش رمضان ؟💔

🔸ياترى وقتها هتتعاملى ازاى مع شهر شعبان ؟ زى كل سنة ؟

ياترى هتفضلي تأجلى توبتك لرمضان زى كل سنة ؟

🔸هتفضلى تأجلى كل اعمال الخير لرمضان ؟ 😦

هتفضلي تضيعى وقت وتنشغلى بالدنيا وتضيعى شهر شعبان ؟

🛑طب انتِ عارفة أن أعمال السنة كلها بترفع في شهر شعبان ؟

🔸الربيع بن خثيم الله كان بيقول :

"لو فارق ذكر الموت قلبي ساعة، لفسد "

🔹وقال أبو عبد ربه لمكحول:

يا أبا عبد الله، أتحب الجنة؟

قال : ومن لا يحب الجنة؟

قال: فأحب الموت؛ فإنك لن ترى

الجنة حتى تموت.

⚪البوست ده اعتبريه إشارة ليكى

انك تقفى مع نفسك وقفة صدق في

وسط دوامة الحياة اللى لهياكى⏸️

واسألى نفسك 👇

🔹لو كان ده آخر شهر ليكي في الدنيا، هتعملي إيه؟ وهتغيري إيه في يومك؟

شاركينا إجابتك في التعليقات عشان
نشجع بعض..

دمتم في وعي و سعي و إزهار
إسراء زين 🌸

26/01/2026

🔴 رحلة "الزهرات" بدأت.. 📢

فهل أنتِ مستعدة؟ 💪

🔹كل سنة في شهر شعبان، بنقرأ

نصائح كتير وكلام مكرر عن

الاستعداد.. ورغم أهميته،

إلا إننا قررنا نكسر القاعدة! 👌

🔸مش مجرد كلام أو نصائح

نظرية، دي رحلة هنشارككم فيها

خطوات عملية بسيطة جداً،

بس مفعولها في التغيير حقيقي

وملموس بإذن الله.🩷

⚪ ولكن ياترى؟؟👇

هل مستعدة تخوضي معانا الرحلة

وتغيري شكل استعدادك لرمضان؟؟

شاركينا في التعليقات👇

إيه أكتر حاجة بتحسي إنها

"بتعطلك" فعلاً عن الاستعداد

لرمضان؟

دمتم في وعي و سعي و إزهار
إسراء زين 🌸

إسراء زين- Israa Zain

10/03/2026

19/02/2026

05/02/2026

04/02/2026

03/02/2026

02/02/2026

01/02/2026

31/01/2026

29/01/2026

28/01/2026

27/01/2026

26/01/2026

Address

Opening Hours

Telephone

Website

Alerts

Contact The Practice

Shortcuts

Share

Monday	9am - 9pm
Tuesday	9am - 9pm
Wednesday	9am - 9pm
Thursday	9am - 9pm
Sunday	9am - 9pm