02/01/2026
هالة كاظم قالت حاجه حلوه اوي في حلقتها مع دينا غبور (والحلقه كلها حلوه ❤). هي قالت انها بتحب تجلس في البيت وتدخل المطبخ تعمل كيك و.... وانها وقّفت المحاضرات واكتفت بمساحه محدده من الشغل علشان يتبقى مساحه اخرى لباقي ادوارها ولممارسة هواياتها فقررت تختار لنفسها الفرص اللي تناسبها بس. كأنها بتفصّل فستان على قدها (على تعبيرها).
فتقدر تستمتع بوقت فراغها وتستمتع كمان بشغلها اللي بتحبه من غير ما يضغطها ويجي على مساحة باقي ادوارها في الحياه.
و ده بيشبه مقوله لدكتور مصطفى محمود بيقول فيها : أُفضل أن أعيش حياه صغيره أملكها على أن أعيش حياه كبيره تملكني.
اللي يوصل للنقطه دي هيبقى في سلام مع نفسه. و ده هيحصل لما نكون واضحين مع نفسنا وعارفين نميز بين اللي عايزينه واللي نقدر عليه. ونفهم أدوارنا في الحياه منختزلش حياتنا في دور واحد على حساب باقي الادوار. لما نفهم ده طاقتنا مش هتبقى مستنزفه في اتجاه واحد ولا هتكون مشتته بين كل الاتجاهات لكن هتبقى متوزعه صح حسب الاولويه. وقتها كمان مش كل الابواب المفتوحه هتجذبنا، ومش هنسعى لاقتناص كل الفرص ومش كل اللي فاتنا هيتسمى فرص ضايعه لاننا مش في سباق مع حد احنا بنستثمر في نفسنا ومع ربنا.
مهم نقبل بعدم الكماليه لان الكماليه في جانب معناه اننا جينا على باقي الجوانب وده هيؤدي لخلل في حياتنا وفي نفسيتنا.
فبلاش ندوس على نفسنا علشان بطارية نفسيتنا متخلصش بدري.
Asmaa HaSsan - Psy Mentor
