What are the opening hours?

Monday 9am - 11am 10pm - 12pm Tuesday 9am - 11am 10pm - 12pm Wednesday 9am - 11am 10pm - 12pm Thursday 9am - 11am 10pm - 12pm Saturday 9am - 11am 10pm - 12pm Sunday 9am - 11am 10pm - 12pm

https://www.facebook.com/596962137154455/

Reham Elbarqawy, Cairo (2025)

02/10/2025

من كام يوم لاقيت واحدة لطيفة جدا بعتتلى رسالة على الواتس اب خاص هى معايا فى جروب بس استغربت لما لاقتها بعتالي خاص الحقيقه ان كلامها كان جميل جدا لدرجه بكيت من الفرحه حسيت ان ربنا أجرى الكلام دا على لسانها علشان يطمني
كلام مش قادرة اوصفه من حلاوته
حد حس بيك من مجرد كلام انت بتقوله فدخلت خاص تقولى احساسها عني لدرجه بقولها ازاى قالتلي مش إزاي ومعرفش انا ببعتلك ليه بس انا عرفت فهمت ان ربنا حب يطمني حب يقولي انا معاكي حب يقولي اني جنبك مهما كنتي تايهه مهما كنتي خايفه مهما كنتي ايه انا هنا وهبعتلك رسائل تفرحك وتطمن قلبك
فاكرين سيدنا إبراهيم قال ايه لربنا
"قال ربي أرني كيف تحيي الموتى قال أولم تؤمن قال بلى ولكن ليطمئن قلبي"
ربنا مورلوش الأحياء بيكون إزاي بس قاله ادبحهم وحط على كل جبل جزء وناديهم هيجولك طب هو شاف الأحياء لأ طيب هو اتطمن اه إزاي ربنا بعتله إشارة انت دبحتهم بإيدك والمولى عزوجل احياهم بقدرته وبعث الطمأنينة في قلبه
علشان كدا لما تيجي إشارات تطمنك اطمن وآمن بيها ربنا جنبك
لو كان سابك قبل كدا يبقى هيسيبك دلوقت
فكر شوية
حياتك كلها مش ماشيه بلطف ربنا
انت موجود علشان تتعلم درسك
علشان تاخد بالك
بس المهم
اطمن
لسه قلقان
وادي شوية أطفال ياسيدي اول ماشافوك ضحكولك وعايزين يجيوا عليك واول مرة يشوفوك
ها
اطمنت
نام بقى وقول الحمد لله
تصبحوا على خير وسعادة وطمأنينة من المولى عز وجل
ريهام

19/09/2025

طبعا في عظمة بتحصل على المسرح القومي وكل اللي بيروح لازم ينزل بوست طويل عن الملك لير وأداء د/يحي الفخراني وطارق دسوقي والوجوه الجميلة المتميزة
أحمد عثمان بدور (أدموند)
ولقاء علي بدور (كورديليا)
ودور البهلول بيقول حكم بجد مش مجرد مهرج دي الحقيقه المره مع الأسف
وغيرهم كتير
أداء استثنائي
وزحمة غير عادية دليل على أن لسه الذوق العام بخير
نيجي بقى على المهم
الملك لير بتتكلم عن جزأين مهمين جدا
جزء ودا الشائع وهو عقوق الأبناء للآباء
طيب حد خد باله ان فى جزء مهم هو ظلم الآباء للأبناء
الملك ظلم بنته واكتر واحدة بتحبه في بناته وطردها علشان يواجه جزاء ظلمه ليها في عقوق الاتنين التانين وترجع هي في الاخر تبقى جنبه وتموت في سبيل انقاذه
والأمر مقتصرش على الملك لير وبس لأ دا كمان وقع في نفس القصه الدوق وظلم ابنه وطرده وخلى اللي عمل المصيبة والوقيعه اللي بينهم هو المحظي عنده
علشان يتجازى بفعله ويروح نور عنيه واللي يساعده ابنه اللي طرده ويموت وهو في حضن ابنه بعد مايعرف الحقيقه
تخيل كدا معايا كام اب ظلم ابنه أو بنته بدون وجه حق
طيب على الصعيد الاخر كم اب عانى من عقوق أبنائه
هو ليه دا بيحصل
نتيجه الظلم
الكارما
قانون كوني
داين فكما تدين تدان
ربنا قال كدا
فكلمة لكل اب وكل ام
قبل ما تفكر تظلم حد من عيالك افتكر ان دا هيتردلك في عقوق في ظلم
ربنا مش هيسيب الظلم يعدي
المظلوم صاحب حق ودعوته منها للسما من غير حجاب
الملك لير
تناولت العدل الإلهي وهو بيتحقق
على الجانبين
ظلم الأب
وعقوق الابن
واللي بيحصل ان المظلوم هو اللي بيرجع ويساعد في الآخر
تحية لصناع هذا العمل الرائع
أمتعوتنا
اللي متفرجش عليها يلحق يتفرج هيستمتع بيها جدا

16/09/2025

دي صوفيا مكنتش بتجيلي نهائي
وكنت لما أقرب منها تجري بعيد عني
النهاردة فوجئت بيها جتلى وقعدت في حضني لدرجة اني استغربت جدا فكنت بعمل حاجه ونزلتها طلعتلي تاني مبقتش عارفه هي فيها ايه
صوفيا غبر ليو خالص لابتخربش ولابتعض عكس ليو وحبتها اوي وخصوصا انها تعبانه الا ان ليو هو أول قط في حياتي اشيله خلاني احبه رغم انه مؤذي وخربشني وتقيل في نفسه كدا صوفيا ايدي جت ناحيه بقها وهو مفتوح معضتنيش بل بالعكس كانت بتتمسح في أيدي
فكرتي اتغيرت تماما عن الحيوانات
طباعهم زي البشر في ناس أذتك وانت كنت بتحبها زي ليو بس مع الأسف بحبه بردوا
صوفي حبيبتي واحلى حضن في الدنيا

06/09/2025

#الفوبيا
كتير مننا بيكون عنده فوبيا فى كذا حاجه خلونا نتكلم عني مش هقول حالات المرة دي
كان عندي فوبيا من الأماكن المرتفعة
وكان عندي فوبيا من الحيوانات
وعندي فوبيا من شوية حاجات تانيه كتير
ومش لازم اقولهم كلهم علشان محدش ياخدهم ضدي خليهم في سري🙈🙈🙈
المهم مطولش عليكوا قولولي طولي
المرتفعات عالجتها بالصدمة
انا بخاف من المرتفعات فطلعت جبل
وطلعت مأذنة باب زويلة وقعدت فى الأرض واتصورت صورة حلوة جدا تدل عمليا على اني لسه فى حتة بشلن خوف من المرتفعات
نيجي بقى على الحيوانات
اني امسك قط واحضنه وألعب معاه دا كان من رابع المستحيلات وان كلب يعدي من جنبي وعادي دا بردوا مكنش اوبشن عندي
التغيير حصل ان ليو ودا القط اللي في الصورة معايا
جه جنبي وقرب مني واحدة واحدة
حد حاسس ان فيك حاجه وعايز يلفت انتباهك ويخليك تقرب منه بالراحه اينعم دلوقت بقى يعضني ويخربشني المجرم بس دا حبيبي وعلى قلبي زي العسل كفاية اني لما باجي انام بيفضل جنبي لغاية ما ابقى خلاص هروح فى النوم يقوم خلاص عايز يخرج كأنه بيطمني انه موجود لغاية ما انام ويمشي
طيب ليه بقول الكلام دا لأن كتير سألني انت عملتيها إزاي دي لان اي حيوان يقرب مني كنت بخاف جدا حاولت اني أواجه الخوف دا مقدرتش ولما دخلت ماتركس لاقيت الكلبه بتاعتي اللي كنت بربيها وانا صغيرة لما ماتت فى حادثة اتكون عندي انى السبب لاني نسيت اقفل البوابة وطلعت ورايا تدور عليا فلومت نفسي جدا اينعم صلحت المعتقد دا فى الماتركس بس فضل جوايا رفض للحيوانات لكن ليو صلح دا واحدة واحدة فضل جنبي مستني اني ألمسه وألعب معاه لغاية ما خدنا على بعض الحكاية اخدت يوم او يومين تلاته تقريبا وبعدها احنا بقينا أصحاب وحبايب
#الخلاصة
الفوبيا خوف شديد محدش بيحس بيه غيرك لو عايز تغيره اقبله اقبل انك خايف وواحدة واحدة التغيير بيحصل ودا لان التغيير اي تغيير بيكون محتاج وقت فأدي لنفسك فرصة

كلمتين فى سركم ليو واحشني بصراحه
بالمناسبة ليو القط بتاع صاحبتي ومش عايزة تتنازل عنه وانا مفتقداه بقالي يومين مشفتوش
كلمتين في حب ليو
استنونا
البوستات اللي جاية مفاجأة

16/08/2025

⚡ اضطراب ثنائي القطب – المزاج اللي بيلعب حبة فوق وحبة تحت على رأي عدوية

دا مش مجرد "مزاج متقلب" دا اضطراب مزاجي بيجي في صورة نوبات.

طيب إزاي بتكون النوبات دي؟

النوبات دي بتكون عبارة عن:

١) هوس: نشاط زائد، أفكار سريعة، نوم قليل، ثقة عالية، قرارات متهورة.

٢) اكتئاب: حزن شديد، فقدان طاقة، أفكار سلبية، انسحاب من الحياة.

النوبات ممكن تستمر أيام أو أسابيع، ومش دايمًا لها سبب واضح.

خليني اقولك ان الجميلة آن هاثاواى فى مسلسل
modern love
عملت حلقة اكثر من رائعه عن البايبولر وكانت مديرتها فى العمل بعد ما تم فصلها لتغيبها الكتير كلمتها واتقابلوا وسمعتها علشان تحكلها المعاناة اللى هي فيها
وبتقولها انت اول واحدة احكلها
مش من قلة الناس اللى حواليها بس محدش حب يسمعها للآخر ومحدش استوعب ومحدش فهم.

أى مرض نفسي بيكون عرضة لهجوم الناس عليه واتهامه انه غلطان وأنه ابن ستين فى سبعين من غير ما حد يكلف نفسه ويسمعه ممكن ميكنش قصده.
تخيل آن هاثاواى كانت شخصيه ناجحه فى شغلها بس بتغيب كتير محدش فكر هى بتغيب كتير ليه محدش كلف تفسه يسأل عليها هى فيها ايه او مالها حتى الشخص اللى حبته مكنش قادر يستوعب التغيرات اللي بتمر بيها كان شايفها مجنونة مرة عايزاه ومرة لأ

الحقيقة ان مريض البايبولر عنده مشكلة فى فترات الاكتئاب الطويلة بيكون مش قادر يتفاعل معندوش طاقة بينسحب من كل حاجه حواليه اما فى فترات الهوس فبيكون أجمل واجمد شخص ممكن تشوفه وتعرفه
علشان كدا مريض البايبولر بيتعرف من الفترات دي لأنها بتطول معاه
الهوس بيكون فترات طويلة وكذلك الاكتئاب

والحقيقة:
ان مريض البايبولر محتاج متابعة دوائية ثابتة، وممكن تعيش حياة مستقرة جدًا لو تم ضبط العلاج.

انصحكم بشدة انكم تشوفوا الحلقة دي هتعجبكم
ريهام البرقاوى
مدرب معتمد
ثيرابي معتمد
سفيرة مصر فى الماتركس

09/08/2025

حد فاكر مسلسل خلي بالك من زيزي
فاكر زيزي
طب فاكر تيتو
الاتنين تم تشخيصهم ب ADHD
طب ايه هو ال ADHD
هو فرط الحركة وتشتت الانتباه
ومش دايمًا "شقاوة" أو "كسل"… أحيانًا دماغك زي راديو بيستقبل 10 قنوات في نفس الوقت فبتكون مش قادر تستوعب فبتوه

طب ليه أعراض معينة؟

الأعراض الشائعة بتاعته:

١) صعوبة في التركيز لفترات طويلة.

٢) نسيان المهام والمواعيد.

٣) تشتت ذهني، وأفكار كتير في وقت واحد.

٤) اندفاع في الكلام أو القرارات.

٥) إحساس دائم بالملل أو القلق.

والحقيقة:
إن ال ADHD

مش ضعف إرادة… ده اختلاف في طريقة عمل المخ.
وبالعلاج المناسب وتنظيم الحياة، ممكن تحول التشتت لإبداع. زي ما زيزي عملت مع تيتو بالضبط وقدرت انها تخليها كويسة

طيب المشكلة فى ايه بقى؟

تعالى خليني اسلطلك الضوء على حتة صادمة شوية
فاكر ام تيتو
كانت رافضه ان بنتها فيها مشكلة
وهى دي المشكلة
رفض الاسرة ان ابنهم أو بنتهم عندهم مشكلة اصلا
ال ADHD بيأثر على التحصيل الدراسى فابتدي اجيب مبررات ان الدراسة مش كل حاجه وان دي قدرات ويمكن علشان هو مش أذكى طفل فى مصر بس ممكن يكمل تعليمه وياخد درجات علميه متقدمه مش هيحصل يافندم
فوقي حضرتك
ابنك أو بنتك عنده صعوبة اصلا فى التعلم
علشان يتعلم لازم يتعلم بطريقه مختلفه
اعرف أم فضلت مع الطفل بتاعها لغاية الكلية ولحد ما خلص هي اللي بتذاكر علشان صعوبة التعلم انت متخيل
فمبدأيا كدا لازم تعترفي انه عنده مشكلة
لأن المشكلة الحقيقية بتكون فى ولي الأمر اللي بيرفض ان ابنه عنده مشكلة اساسا وعايزة تدخل علاجي
والADHD جزء كبير منه وراثي وبيبان فى مراحل الطفولة كصعوبة فى الكلام وحركة زيادة ونشاط اوفر بس كل دا بيتم التغاضي عنه ابني زي الفل بنتي مفيهاش حاجه
يكبر بقى وهو مسنود على ماما اللى بتقول انه زي الفل أو انه يلاقي اللي يلم وراه زي ما كان جوز زيزي بيعمل هو اللي ينضف البيت بعدها

طب والعمل

الحل

العلاج
اولا فى تغيير السلوكيات وفى تغيير المنهج المتبع عند الدراسة
ابنك هيبقى فل بجد لو اتعلم لعبه قدر يخرج فيها النشاط بتاعه
ويبقى فل الفل لو شرحتيله بطريقه مختلفه خليك كريتيف وفكر بره الصندوق
والعلاج السلوكي هيفرق كتير فى انه يستوعب ويغير من نفسه
هو مش ذنبه ان ورث حاجه وظهرت عنده وهو طفل وانت اغفلتها أو مخدتش بالك منها أو اهملتها أيا كان
عايز تصلح
الوقت لسه ادامك
انا بقول الكلام دا من واقع انا شوفت أسر بتدافع عن أبنائها وهما عندهم مشاكل
لازم يكون فى استيعاب للطفل وهو كدا كدا هيتغير بس افهم الاول هو عنده ايه ومحتاج ايه

حافظ عليها
افهم ابنك صح
وخد خطوة

تابعونا فى هذه السلسلة
وانتظروا إزاي تعرف مرضك
ولأي استفسار أو سؤال
ابعتولنا
دمتم بصحه وعافيه
ريهام البرقاوى
مدرب معتمد
ثيرابي
سفيرة مصر فى الماتركس

07/08/2025

دايما فكر نفسك بالحاجات الحلوة اللى انت عملتها
ولو مفيش فكر فى الحلو اللى ممكن تعمله

07/08/2025

كتير مننا بيتلخبط بين اضطراب الشخصية الحدية وثنائي القطب
جتلى حالات اتشخصت بايبولر(ثنائي القطب)وهى بوردرلاين(اضطراب الشخصية الحدية) والعكس حصل
طب اللخبطه دي بتيجي منين
هنعرف دلوقت
يالابينا

ّية

✴️ الجرح النفسي(جرح الطفولة):

الحدّي (BPD):
الجرح اسمه "أنا بخاف أتساب".
الخوف مش من الألم… الخوف من الهجر.
كل لمسة باردة… بتفكك جوه حاجة قديمة.
واحنا اتفقنا ان اضطراب الشخصية الحدية فى جزء منه وراثي وبسبب التنشئة الاجتماعية القاسية والسيئه بتظهر الأعراض فى مرحله المراهقه

ثنائي القطب (Bipolar):
الجرح مش شعوري… الجرح كيميائي.
الدماغ فجأة تطلع فوق أو تنزل تحت، من غير سبب ظاهر.
مش بيتعلق حد… لكن المزاج هو اللي بيخونه.
ولازم ياخد علاج علشان تغير كيميا المخ دا لازم ولابد وحتما واساسي وضروري
وغالبا بتظهر الأعراض بعد مواقف جامدة جدا بيكون صعب على العقل إنه يستوعبها موقف مصيري

✴️ طبيعة التقلّب(التقلبات المزاجية):

الحدّي:
زي موجة في عز العاصفة…
ساعة فوق وساعة تحت…
بتحركها نظرة، كلمة، مكالمة، تجاهل.
ياترى اتفهمت صح، ياترى كان قصدهم ايه
طب ليه قالوا كدا
وليه عملوا كدا

ثنائي القطب:
زي موسم بيدخل…
الهوس ييجي أيام أو أسابيع،
والاكتئاب يقعد شهور أحيانًا…
من غير سبب واضح… مش بنتيجة حدث.
آن هاثاواى عملت حلقة فى مسلسل modern love
جميلة عن مرض ثنائي القطب

✴️ شكل المشاعر:

الحدّي:
المشاعر دايمًا على سطح الجلد…
حساسة… متقلبة… بتصرخ.
"أنا زعلان… أنا متضايق… لأ خلاص… لأ أنا بموت".

ثنائي القطب:
المشاعر بتيجي ككتلة مزاجية.
مرة ثقة مفرطة ونشاط زائد.
ومرة يأس عميق وسواد بيغطي كل حاجة.

✴️ العلاقات:

الحدّي:
الحب هو المعبد…
والهجر هو القيامة.
كل علاقة اختبار للحياة أو الموت.

ثنائي القطب:
العلاقات تتأثر، آه… لكن مش المحور.
ممكن يحب بعمق أو يبعد فجأة…
لكن اللي بيقوده هو "المزاج"، مش "الخوف من الهجر".

✴️ الأنا:

الحدّي:
صورة الذات مش ثابتة…
يوم شايفة نفسها ملاك… ويوم تكره نفسها كأنها عار.
بتدور على هويتها في عيون اللي بيحبوها.
ثقتها بنفسها مهزوزة شوية وبتستمد الثقه دي من اللى حواليها وطبعا مع التنشئة القاسية فبتفقد الثقه بالنفس

ثنائي القطب:
صورة الذات ثابتة نسبيًا بين النوبات…
لكن وقت الهوس ممكن يحس إنه عبقري خارق،
ووقت الاكتئاب يحس إنه لا شيء.

✴️ السلوك:

الحدّي:
اندفاع فجائي… رسائل طويلة… تهديد بالانسحاب…
إيذاء النفس مش تهديد، ده استغاثة.
عارف انت بهاء سلطان لما قال:
"لما اقولك تبعد إياك تسمع مني
قرب اكتر امسك فيا بكلمة احضني
انا مستني اهو تكلمني"
اهو كان بيوصف الشخص الحدي بالضبط دا اللي بيقصده ودا اللى بيكون عايزه هو مش عايزك تبعد هو عايزك تقرب اكتر تطمنه انك جنبه وهتفضل جنبه

ثنائي القطب:
السلوك بيكون مضطرب في نوبات الهوس:
صرف زائد، قرارات مجنونة، مشاريع فجائية…
وركود تام في نوبات الاكتئاب.

طيب هل فى علاج بجد والواحد يتعافى ولا ايه؟

✴️ العلاج:

الحدّي:
العلاج العميق – خصوصًا DBT العلاج المعرفي السلوكي– بيغيّر الحياة.
كل ما تفهم مشاعرك… تقل التوهة.

ثنائي القطب:
العلاج دوائي في الأساس ولازم وضروري ومفيهوش كلام … مثبتات المزاج، والمتابعة المستمرة.
والعلاج النفسي مساعد، لكن مش أساسي لوحده.

#الخلاصة
الشخص الحدّي عايش في زلزال داخلي… كل تفصيلة بتهز كيانه.

الشخص ثنائي القطب، عايش في مصعد كهربائي…
يطلع لأعلى فجأة، وينزل لأسفل فجأة…
بس هو مش ماسك الزرار.

وخليني أقولك ان معرفتك نص الطريق
وفى جملة لطيفه جدا اتقالت فى فيلم حديقة الديناصورات الأخير:
"قد يتحدث الآخرين عنك بشكل سىء ولكننا لسنا مضطرين للقيام بهذه المهمه بدلا عنهم لأنها ستصبح واقع"
مهما كانت وجهة نظر الناس حواليك انت ولايهمك اعتبر نفسك كأنك عندك نزلة برد محتاج تفهم انت عندك ايه بالضبط
وتاخد العلاج وترتاح وتخف بس كدا
المرض النفسي زيه زي اي مرض بيتعالج
البوردرلاين محتاج حضن
محتاج احتواء
محتاج يطمن
يتسمع
يتشاف
انك تفضل جنبه
دا حد أتعرض لهجر اب او ام ليه وهو طفل صغير
البايبولر محتاج دواء أساسي وضروري
ومحتاج انك تبقى جنبه تفهم حالته دا حد اتعرف لموقف مصيري مقدرش يستوعبه صدمتين اشتغلوا فى المخ فى نفس الوقت
الناس دي محتاجه دعم
فياريت نخلي بالنا من بعض
دمتم بخير ومعافين
ريهام البرقاوى
سفيرة مصر فى الماتركس

07/08/2025

فيد باك بعد ٤ سنين من الجلسه المجانية
ان شاء الله نرجع الجلسات المجانية من تاني والكل يستفيد
ممنونة لكرم ربنا وفضله ونعمه التى لاتعد ولاتحصى
الحمدوالشكر ليك يارب على نعمة العلم اللى بيه بقدر افيد غيري
ربنا يوفق الجميع يارب

06/08/2025

#الإمتنان
كتير اوي بفكر هو إيه اللي ممكن نمتن عليه كل يوم
وكانت دايما بتستوقفني الآية
"وقليل من عبادي الشكور"
طب ماهو الواحد بيحمد ربنا وبيشكره
فى حتة ناقصه مش مفهومة
إلى أن لاقيت الآتى
فى ناس لأسباب مرضية أو حادثة أو وراثة أو هو أتخلق كدا بيكون عنده
ايد ناقصه
رجل ناقصه
مش بيشوف
مش بيسمع
ليا أخ عزيز من متحدي إعاقة البصر كان مبصر لغاية ١٣ سنة وبعد كدا لأسباب مرضية وراثية فقد البصر وبصراحه انا مدينة ليه بفضل تعليمه ليا عملي حاجات كتير جدا اصراره على أنه يبقى مصور وفعلا حقق دا ولقط صورة حلوة جدا بإشاده الكل
انت بقى عندك كتير من النعم اللي ربنا ادهالك
ازيدك من الشعر بيت عقلك ومخك اللي بيفكر دا فى ناس مغيبه عقلها راح صديقه كانت معايا فى ثانوي كنت متوقعه انها هتبقى نابغه من شده ذكاءها دخلت هندسه بالفعل بس مكملتش وشوفتها بعد ما اتخرجت واشتغلت وعملت بدل الدبلومه اتنين لاقتها عقلها مش زي ماكان الاول رغم زعلي عليها ورغبتي اني اساعدها بس انت متخيل حد ذكي جدا عقله يروح كل دا عندك مجانا هل انت بتحمد ربنا عليه هل فكرت يوم ان مجرد دخولك الحمام دي نعمه خليني احكيلك ان في يوم قعدت اكتر من ١٢ ساعه مدخلتش الحمام وبشرب ميه كنت مخلصه حوالي ٢ لتر وزيادة بس مفيش شعور ايه اللي حصل ألم رهيب وغير محتمل فى الجناب الجهاز كله كان متألم ألم غير عادي فأنت ابسط حاجه دخولك الحمام دي نعمه هل فكرت فيها كدا
طيب الاربع حيطان هل فكرت ان فى ناس الدنيا دارت عليهم وباتوا فى الشارع بدل المرة كذا مرة
هل فكرت ان فى ناس مبتعرفش تنام غير بمنوم وفى ناس مبتعرفش تنام اصلا
هل فكرت ان السرير اللي بتفرد ضهرك عليه ان فى ناس معندهاش السرير دا وفى ناس بتنام على الأرض هل فكرت ان الغطا اللي بيدفيك فى الشتا فى ناس معندهاش الغطا فى ناس من البرد بتعيط لربنا وتقوله يارب دفيني من عندك هل فكرت ان التكييف أو المروحه اللي عندك ان فى ناس من كتر الحرارة والشمس بيجلها ضربة شمس ومبتقدرش تتحرك من التعب هل فكرت اللبس اللي عندك ان فى ناس بتدارى فى تيشيرت كمامه مقطوعه علشان مفيش الا هو ومتقدرش تجيب جديد
لو اتكلمنا البوست هيطول اوي
احنا فى زحام من النعم واحنا مش واخدين بالنا
علشان كدا تعالوا كل يوم نمتن لحاجه مهما كانت بسيطة فنشكر ربنا عليها ويارب نبقى من القليل
ايه رأيكم
يالا بينا
يالابينا نشكر الله
ممتنة لوجودكم
ريهام البرقاوى

Reham Elbarqawy

02/10/2025

19/09/2025

16/09/2025

06/09/2025

16/08/2025

09/08/2025

07/08/2025

07/08/2025

07/08/2025

06/08/2025

Address

Opening Hours

Telephone

Website

Alerts

Shortcuts

Share

Category

Monday	9am - 11am
	10pm - 12pm
Tuesday	9am - 11am
	10pm - 12pm
Wednesday	9am - 11am
	10pm - 12pm
Thursday	9am - 11am
	10pm - 12pm
Saturday	9am - 11am
	10pm - 12pm
Sunday	9am - 11am
	10pm - 12pm